| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
நிஸ்ஸயபடிப்பஸ்ஸத்³தி⁴கதா²வண்ணனா
Nissayapaṭippassaddhikathāvaṇṇanā
83. தி³ஸங் க³தோதி தத்த² து⁴ரனிக்கி²த்தவாஸோ ஹுத்வா திரோகா³மங் க³தோ. யத்த² நிஸ்ஸயோ லப்³ப⁴தி, தத்த² க³ந்தப்³ப³ந்தி எத்தா²பி உபஜ்ஜா²யே வுத்தனயேனேவ ‘‘கதிபாஹேன க³மிஸ்ஸாமீ’’தி க³மனே சேஸ உஸ்ஸாஹோ ரக்க²தி. மா இத⁴ படிக்கமீதி மா இத⁴ க³ச்ச². ஸபா⁴கா³ நாம உபஜ்ஜா²யஸ்ஸ ஸிஸ்ஸா. தத்த² நிஸ்ஸயங் க³ஹெத்வா. யதி³ ஏவங் கோ விஸேஸோதி சே? தேன இத³ங் வுச்சதி ‘‘அப்பேவ நாம க²மெய்யா’’தி. வஸிதுங் வட்டதீதி உபஜ்ஜா²யேன பரிச்சத்தத்தா உபஜ்ஜா²யஸமோதா⁴னங் நிரத்த²கந்தி அத்தோ². ஸசே உபஜ்ஜா²யோ சிரேன அனுக்³க³ஹேதுகாமோ ஹோதி, ததோ பட்டா²ய உபஜ்ஜா²யோவ நிஸ்ஸயோ. உபஜ்ஜா²யோ சே அலஜ்ஜீ ஹோதி, ஸத்³தி⁴விஹாரிகேன அனேகக்க²த்துங் வாரெத்வா அவிரமந்தங் உபஜ்ஜா²யங் பஹாய வினாபி நிஸ்ஸயபணாமனேன அஞ்ஞஸ்ஸ ஸந்திகே நிஸ்ஸயங் க³ஹெத்வா வஸிதப்³ப³ங். உபஜ்ஜா²யஸ்ஸ சே லிங்க³ங் பரிவத்ததி, ஏகதி³வஸம்பி ந ரக்க²தி. பக்க²பண்ட³கோ சே ஹோதி, நிஸ்ஸயஜாதிகோ சே ‘‘உபஜ்ஜா²யஸ்ஸ ஸுக்கபக்க²ங் ஆக³மேஹீ’’தி வத³தி, ஸயமேவ வா ஆக³மேதி, வட்டதி. உபஜ்ஜா²யோ சே உக்கே²பனியகம்மகதோ ஹோதி, நானாஸங்வாஸகபூ⁴மியங் டி²தத்தா நிஸ்ஸயோ படிப்பஸ்ஸம்ப⁴தி. ஸம்மாவத்தந்தங் பன பஸ்ஸித்வா கம்மபடிப்பஸ்ஸத்³தி⁴ங் ஆக³மேதுங் லப⁴தி. மானத்தாசாரீ சே ஹோதி, அப்³பா⁴னங் ஆக³மேதப்³ப³ங். தீ³க⁴ங் சே பரிவாஸங் சரதி, அஞ்ஞஸ்ஸ ஸந்திகே நிஸ்ஸயோ க³ஹேதப்³போ³, உபஜ்ஜா²யஸமோதா⁴னங் அப்பமாணங். பரிவாஸமானத்தசாரினா ஹி ந நிஸ்ஸயோ தா³தப்³போ³. யங் பன பாரிவாஸிகக்க²ந்த⁴கட்ட²கதா²யங் வுத்தங் ‘‘ஸத்³தி⁴விஹாரிகானம்பி ஸாதி³யந்தஸ்ஸ து³க்கடமேவா’’திஆதி³ (சூளவ॰ அட்ட²॰ 75), தங் யதா²வுத்தமத்த²ங் ஸாதே⁴தி ஏவ. யங் பன வுத்தங் ‘‘ஸசே ஸத்³தா⁴பப்³ப³ஜிதா குலபுத்தா ‘தும்ஹே, ப⁴ந்தே, வினயகம்மமத்தங் கரோதா²’’தி வத்வா வத்தங் கரொந்தியேவ, கா³மப்பவேஸனங் ஆபுச்ச²ந்தியேவ, தங் வாரிதகாலதோ பட்டா²ய அனாபத்தீ’’தி. தங் வத்தஸாதி³யனபச்சயா து³க்கடாபா⁴வமத்ததீ³பனத்த²ங், ஸத்³தி⁴விஹாரிகானங் ஸாபெக்க²தங் வா ஸந்தா⁴ய வுத்தந்தி வேதி³தப்³ப³ங். தஸ்மா தே சே உபஜ்ஜா²யேன வாரிதானுரூபமேவ படிபஜ்ஜந்தி, நிஸ்ஸயோ தேஸங் படிப்பஸ்ஸத்³தோ⁴தி ஸித்³த⁴ங் ஹோதி.
83.Disaṃ gatoti tattha dhuranikkhittavāso hutvā tirogāmaṃ gato. Yattha nissayo labbhati, tattha gantabbanti etthāpi upajjhāye vuttanayeneva ‘‘katipāhena gamissāmī’’ti gamane cesa ussāho rakkhati. Mā idha paṭikkamīti mā idha gaccha. Sabhāgā nāma upajjhāyassa sissā. Tattha nissayaṃ gahetvā. Yadi evaṃ ko visesoti ce? Tena idaṃ vuccati ‘‘appeva nāma khameyyā’’ti. Vasituṃ vaṭṭatīti upajjhāyena pariccattattā upajjhāyasamodhānaṃ niratthakanti attho. Sace upajjhāyo cirena anuggahetukāmo hoti, tato paṭṭhāya upajjhāyova nissayo. Upajjhāyo ce alajjī hoti, saddhivihārikena anekakkhattuṃ vāretvā aviramantaṃ upajjhāyaṃ pahāya vināpi nissayapaṇāmanena aññassa santike nissayaṃ gahetvā vasitabbaṃ. Upajjhāyassa ce liṅgaṃ parivattati, ekadivasampi na rakkhati. Pakkhapaṇḍako ce hoti, nissayajātiko ce ‘‘upajjhāyassa sukkapakkhaṃ āgamehī’’ti vadati, sayameva vā āgameti, vaṭṭati. Upajjhāyo ce ukkhepaniyakammakato hoti, nānāsaṃvāsakabhūmiyaṃ ṭhitattā nissayo paṭippassambhati. Sammāvattantaṃ pana passitvā kammapaṭippassaddhiṃ āgametuṃ labhati. Mānattācārī ce hoti, abbhānaṃ āgametabbaṃ. Dīghaṃ ce parivāsaṃ carati, aññassa santike nissayo gahetabbo, upajjhāyasamodhānaṃ appamāṇaṃ. Parivāsamānattacārinā hi na nissayo dātabbo. Yaṃ pana pārivāsikakkhandhakaṭṭhakathāyaṃ vuttaṃ ‘‘saddhivihārikānampi sādiyantassa dukkaṭamevā’’tiādi (cūḷava. aṭṭha. 75), taṃ yathāvuttamatthaṃ sādheti eva. Yaṃ pana vuttaṃ ‘‘sace saddhāpabbajitā kulaputtā ‘tumhe, bhante, vinayakammamattaṃ karothā’’ti vatvā vattaṃ karontiyeva, gāmappavesanaṃ āpucchantiyeva, taṃ vāritakālato paṭṭhāya anāpattī’’ti. Taṃ vattasādiyanapaccayā dukkaṭābhāvamattadīpanatthaṃ, saddhivihārikānaṃ sāpekkhataṃ vā sandhāya vuttanti veditabbaṃ. Tasmā te ce upajjhāyena vāritānurūpameva paṭipajjanti, nissayo tesaṃ paṭippassaddhoti siddhaṃ hoti.
த்³வே லெட்³டு³பாதே அதிக்கமித்வா நிவத்ததீதி ‘‘எத்தாவதா தி³ஸாபக்கந்தோ நாம ஹோதி, தஸ்மா அந்தேவாஸிகே அனிக்கி²த்தது⁴ரேபி நிஸ்ஸயோ படிப்பஸ்ஸம்ப⁴தி. ஆசரியுபஜ்ஜா²யா த்³வே லெட்³டு³பாதே அனதிக்கம்ம லெட்³டு³பாதத்³வயப்³ப⁴ந்தரே திரோவிஹாரேபி பரிக்கி²த்தே, அபரிக்கி²த்தே வா வஸிதுங் வட்டதீ’’தி லிகி²தங். அபரிக்கி²த்தேயேவாதி நோ தக்கோதி ஆசரியோ, எத்த² பன அபரிக்கி²த்தஸ்ஸ பரிக்கே²பாரஹட்டா²னதோ விமுத்தே அஞ்ஞஸ்மிங் விஹாரே வஸந்தீதி அதி⁴ப்பாயோ. விஹாரோதி செத்த² ‘‘தாதி³ஸஸ்ஸ விஹாரஸ்ஸ அந்தே டி²தா ஏகா குடிகா அதி⁴ப்பேதாதி உபதிஸ்ஸத்தே²ரோ’’தி வுத்தங். தத்த² ‘‘ஸசே உபோ⁴பி ஆசரியந்தேவாஸிகா கேனசி…பே॰… நிஸ்ஸயோ ந படிப்பஸ்ஸம்ப⁴தீ’’தி இமினா ஸாமஞ்ஞதோ வுத்தேன அட்ட²கதா²வசனேன த⁴ம்மஸிரித்தே²ரவாதோ³ ஸமேதி. அபரிக்கி²த்தே வாதி த்³வின்னங் லெட்³டு³பாதானங் அந்தோ பரிக்கி²த்தோ வா ஹோதி அபரிக்கி²த்தோ வா. ‘‘ப³ஹிஸீம’’ந்தி ச வுத்தத்தா அந்தோவிஹாரஸீமாயங் த்³வே லெட்³டு³பாதே அதிக்கமித்வாபி வஸிதுங் வட்டதீதி ஸித்³த⁴த்தா பன உபதிஸ்ஸத்தே²ரவாதோ³ ந ஸமேதி. ஏகாவாஸே ஹி பரிக்கி²த்தே வா அபரிக்கி²த்தே வா அந்தமஸோ அந்தோதியோஜனேபி வஸதோ நிஸ்ஸயோ ந படிப்பஸ்ஸம்ப⁴தி. ஸோ ச உபசாரஸீமாய பரிச்சி²ன்னோ, ஸா ச உபசாரஸீமா பரிக்கி²த்தஸ்ஸ விஹாரஸ்ஸ பரிக்கே²பேன அபரிக்கி²த்தஸ்ஸ பரிக்கே²பாரஹட்டா²னேன பரிச்சி²ன்னோ ஏகாவாஸோ.
Dve leḍḍupāte atikkamitvā nivattatīti ‘‘ettāvatā disāpakkanto nāma hoti, tasmā antevāsike anikkhittadhurepi nissayo paṭippassambhati. Ācariyupajjhāyā dve leḍḍupāte anatikkamma leḍḍupātadvayabbhantare tirovihārepi parikkhitte, aparikkhitte vā vasituṃ vaṭṭatī’’ti likhitaṃ. Aparikkhitteyevāti no takkoti ācariyo, ettha pana aparikkhittassa parikkhepārahaṭṭhānato vimutte aññasmiṃ vihāre vasantīti adhippāyo. Vihāroti cettha ‘‘tādisassa vihārassa ante ṭhitā ekā kuṭikā adhippetāti upatissatthero’’ti vuttaṃ. Tattha ‘‘sace ubhopi ācariyantevāsikā kenaci…pe… nissayo na paṭippassambhatī’’ti iminā sāmaññato vuttena aṭṭhakathāvacanena dhammasirittheravādo sameti. Aparikkhitte vāti dvinnaṃ leḍḍupātānaṃ anto parikkhitto vā hoti aparikkhitto vā. ‘‘Bahisīma’’nti ca vuttattā antovihārasīmāyaṃ dve leḍḍupāte atikkamitvāpi vasituṃ vaṭṭatīti siddhattā pana upatissattheravādo na sameti. Ekāvāse hi parikkhitte vā aparikkhitte vā antamaso antotiyojanepi vasato nissayo na paṭippassambhati. So ca upacārasīmāya paricchinno, sā ca upacārasīmā parikkhittassa vihārassa parikkhepena aparikkhittassa parikkhepārahaṭṭhānena paricchinno ekāvāso.
உபோஸத²க்க²ந்த⁴கே ஏகாவாஸவிமதியங் ஸீமாய அனுஞ்ஞாதத்தாதி சே? ந, சீவரக்க²ந்த⁴கட்ட²கதா²ய விசாரிதத்தா. யதா²ஹ ‘‘ஸீமட்ட²கஸங்கோ⁴ பா⁴ஜெத்வா க³ண்ஹாதூ’’தி (மஹாவ॰ அட்ட²॰ 379). கதரஸீமாய பா⁴ஜேதப்³ப³ங்? மஹாஸிவத்தே²ரோ கிராஹ ‘‘அவிப்பவாஸஸீமாயா’’தி. ததோ நங் ஆஹங்ஸு ‘‘அவிப்பவாஸஸீமா நாம தியோஜனாபி ஹோதி, ஏவங் ஸந்தே தியோஜனே டி²தா லாப⁴ங் க³ண்ஹிஸ்ஸந்தி, தியோஜனே ட²த்வா ஆக³ந்துகவத்தங் பூரெத்வா ஆராமங் பவிஸிதப்³ப³ங் ப⁴விஸ்ஸதி, க³மிகோ தியோஜனங் க³ந்த்வா ஸேனாஸனங் ஆபுச்சி²ஸ்ஸதி, நிஸ்ஸயபடிப்பன்னஸ்ஸ தியோஜனாதிக்கமே நிஸ்ஸயோ படிப்பஸ்ஸம்பி⁴ஸ்ஸதி, பாரிவாஸிகேன தியோஜனங் அதிக்கமித்வா அருணங் உட்டா²பேதப்³ப³ங் ப⁴விஸ்ஸதி, பி⁴க்கு²னியா தியோஜனே ட²த்வா ஆராமப்பவேஸனா ஆபுச்சி²தப்³பா³ ப⁴விஸ்ஸதி, ஸப்³ப³மேதங் உபசாரஸீமாபரிச்சே²த³வஸேன காதுங் வட்டதீதி. தஸ்மா அந்தோஉபசாரஸீமாய லெட்³டு³பாதத்³வயங் அதிக்கமித்வாபி வஸதோ நிஸ்ஸயோ தியோஜனாதிக்கமே நிஸ்ஸயோ ந படிப்பஸ்ஸம்ப⁴தீதி ஸித்³த⁴ங். காமஞ்செத்த² உபசாரஸீமாய தியோஜனப்பமாணாய, அதிரேகாய வா யதா²வுத்ததோ³ஸப்பஸங்கோ³ ஸியாதி. ஸா ஹி ஆவாஸேஸு வட்³ட⁴ந்தேஸு வட்³ட⁴தி, பரிஹாயந்தேஸு பரிஹாயதீதி வுத்தத்தா, தஸ்மா தாதி³ஸஸ்ஸ விஹாரஸ்ஸ அந்தே டி²தா ஏகா குடி விஹாரோதி இதா⁴தி⁴ப்பேதா. ஸாபி தஸ்ஸேவ விஹாரஸ்ஸ குடிகாவ ஹோதீதி கத்வா ஸோ ஆவாஸோ ஹோதி. நானாவாஸோ ஏவ சே அதி⁴ப்பேதோ, ‘‘அந்தே டி²தா குடிகா’’தி ந வத்தப்³ப³ங். த்³வின்னங் லெட்³டு³பாதானங் அப்³ப⁴ந்தரே பன அபரிக்கி²த்தே நானாவாஸே நிஸ்ஸயோ ந படிப்பஸ்ஸம்ப⁴தீதி ய்வாயங் ‘‘நோ தக்கோ’’தி வுத்தோ, ஸோ தாதி³ஸே நானாவாஸே ஸேனாஸனக்³கா³ஹஸ்ஸ அப்படிப்பஸ்ஸத்³தி⁴னயேன வுத்தோ. ஸேனாஸனக்³கா³ஹோ ஹி ‘‘க³ஹணேன க³ஹணங் ஆலயோ படிப்பஸ்ஸம்ப⁴தீ’’தி லக்க²ணத்தா இதரத்த² படிப்பஸ்ஸம்ப⁴தி. தத்ராயங் பாளி ‘‘தேன கோ² பன ஸமயேன ஆயஸ்மா உபனந்தோ³ ஸக்யபுத்தோ ஏகோ த்³வீஸு ஆவாஸேஸு வஸ்ஸங் வஸி…பே॰… தே³த², பி⁴க்க²வே, மோக⁴புரிஸஸ்ஸ ஏகாதி⁴ப்பாய’’ந்தி (மஹாவ॰ 364). அட்ட²கதா²யஞ்சஸ்ஸ ஏவங் வுத்தங் ‘‘இத³ஞ்ச நானாலாபே⁴ஹி நானூபசாரேஹி ஏகஸீமவிஹாரேஹி கதி²தங், நானாஸீமவிஹாரே பன ஸேனாஸனக்³கா³ஹோ படிப்பஸ்ஸம்ப⁴தீ’’தி (மஹாவ॰ அட்ட²॰ 364). அபரிக்கி²த்தா நானாவாஸா ஏகூபசாரஸங்க்²யங் க³ச்ச²ந்தி. பரிக்கி²த்தஞ்ச ஏகூபசாரங் அபரிக்கி²த்தஸங்க்²யங் க³ச்ச²தி. எத்தாவதா லெட்³டு³பாதத்³வயப்³ப⁴ந்தரே அபரிக்கி²த்தே அஞ்ஞஸ்மிங் விஹாரே வஸதோ நிஸ்ஸயோ பன ந படிப்பஸ்ஸம்ப⁴தி, பரிக்கி²த்தே படிப்பஸ்ஸம்ப⁴தி ஏவாதி அயமத்தோ² ஸாதி⁴தோதி. எத்தா²ஹ – த்³வே லெட்³டு³பாதே அதிக்கமித்வாவ ஸதோபி நிஸ்ஸயோ ந படிப்பஸ்ஸம்ப⁴தி. வுத்தஞ்ஹி நிஸ்ஸக்³கி³யட்ட²கதா²யங் ‘‘ஸசே க³ச்ச²ந்தானங்யேவ அஸம்பத்தேஸு த³ஹரேஸு அருணங் உக்³க³ச்ச²தி, சீவரங் நிஸ்ஸக்³கி³யங் ஹோதி, நிஸ்ஸயோ பன ந படிப்பஸ்ஸம்ப⁴தீ’’தி (பாரா॰ அட்ட²॰ 2.495)? வுச்சதே – தங் உபஜ்ஜா²யேன ஸமாக³மே ஸஉஸ்ஸாஹதாய வுத்தங். இத⁴ து⁴வவாஸங் ஸந்தா⁴ய, தஸ்மா அஞ்ஞமஞ்ஞங் ந விலோமெந்தி . கேசி பன ‘‘த்³வே லெட்³டு³பாதங் அதிக்கம்மாதி இத³ங் தே³வஸிகங் ஆரோசெத்வா வஸனவஸேன வுத்த’’ந்தி வத³ந்தி, தங் தேஸங் மதிமத்தமேவாதி மம தக்கோ. தே³வஸிகங் ஆரோசெத்வா வத்த²ப்³ப³ந்தி ஹி நேவ பாளியங் ந அட்ட²கதா²யங் தி³ஸ்ஸதி, தஞ்ச பன அபகதஞ்ஞூஹி ஆசிண்ணந்தி வேதி³தப்³ப³ங்.
Uposathakkhandhake ekāvāsavimatiyaṃ sīmāya anuññātattāti ce? Na, cīvarakkhandhakaṭṭhakathāya vicāritattā. Yathāha ‘‘sīmaṭṭhakasaṅgho bhājetvā gaṇhātū’’ti (mahāva. aṭṭha. 379). Katarasīmāya bhājetabbaṃ? Mahāsivatthero kirāha ‘‘avippavāsasīmāyā’’ti. Tato naṃ āhaṃsu ‘‘avippavāsasīmā nāma tiyojanāpi hoti, evaṃ sante tiyojane ṭhitā lābhaṃ gaṇhissanti, tiyojane ṭhatvā āgantukavattaṃ pūretvā ārāmaṃ pavisitabbaṃ bhavissati, gamiko tiyojanaṃ gantvā senāsanaṃ āpucchissati, nissayapaṭippannassa tiyojanātikkame nissayo paṭippassambhissati, pārivāsikena tiyojanaṃ atikkamitvā aruṇaṃ uṭṭhāpetabbaṃ bhavissati, bhikkhuniyā tiyojane ṭhatvā ārāmappavesanā āpucchitabbā bhavissati, sabbametaṃ upacārasīmāparicchedavasena kātuṃ vaṭṭatīti. Tasmā antoupacārasīmāya leḍḍupātadvayaṃ atikkamitvāpi vasato nissayo tiyojanātikkame nissayo na paṭippassambhatīti siddhaṃ. Kāmañcettha upacārasīmāya tiyojanappamāṇāya, atirekāya vā yathāvuttadosappasaṅgo siyāti. Sā hi āvāsesu vaḍḍhantesu vaḍḍhati, parihāyantesu parihāyatīti vuttattā, tasmā tādisassa vihārassa ante ṭhitā ekā kuṭi vihāroti idhādhippetā. Sāpi tasseva vihārassa kuṭikāva hotīti katvā so āvāso hoti. Nānāvāso eva ce adhippeto, ‘‘ante ṭhitā kuṭikā’’ti na vattabbaṃ. Dvinnaṃ leḍḍupātānaṃ abbhantare pana aparikkhitte nānāvāse nissayo na paṭippassambhatīti yvāyaṃ ‘‘no takko’’ti vutto, so tādise nānāvāse senāsanaggāhassa appaṭippassaddhinayena vutto. Senāsanaggāho hi ‘‘gahaṇena gahaṇaṃ ālayo paṭippassambhatī’’ti lakkhaṇattā itarattha paṭippassambhati. Tatrāyaṃ pāḷi ‘‘tena kho pana samayena āyasmā upanando sakyaputto eko dvīsu āvāsesu vassaṃ vasi…pe… detha, bhikkhave, moghapurisassa ekādhippāya’’nti (mahāva. 364). Aṭṭhakathāyañcassa evaṃ vuttaṃ ‘‘idañca nānālābhehi nānūpacārehi ekasīmavihārehi kathitaṃ, nānāsīmavihāre pana senāsanaggāho paṭippassambhatī’’ti (mahāva. aṭṭha. 364). Aparikkhittā nānāvāsā ekūpacārasaṅkhyaṃ gacchanti. Parikkhittañca ekūpacāraṃ aparikkhittasaṅkhyaṃ gacchati. Ettāvatā leḍḍupātadvayabbhantare aparikkhitte aññasmiṃ vihāre vasato nissayo pana na paṭippassambhati, parikkhitte paṭippassambhati evāti ayamattho sādhitoti. Etthāha – dve leḍḍupāte atikkamitvāva satopi nissayo na paṭippassambhati. Vuttañhi nissaggiyaṭṭhakathāyaṃ ‘‘sace gacchantānaṃyeva asampattesu daharesu aruṇaṃ uggacchati, cīvaraṃ nissaggiyaṃ hoti, nissayo pana na paṭippassambhatī’’ti (pārā. aṭṭha. 2.495)? Vuccate – taṃ upajjhāyena samāgame saussāhatāya vuttaṃ. Idha dhuvavāsaṃ sandhāya, tasmā aññamaññaṃ na vilomenti . Keci pana ‘‘dve leḍḍupātaṃ atikkammāti idaṃ devasikaṃ ārocetvā vasanavasena vutta’’nti vadanti, taṃ tesaṃ matimattamevāti mama takko. Devasikaṃ ārocetvā vatthabbanti hi neva pāḷiyaṃ na aṭṭhakathāyaṃ dissati, tañca pana apakataññūhi āciṇṇanti veditabbaṃ.
நிஸ்ஸயபடிப்பஸ்ஸத்³தி⁴கதா²வண்ணனா நிட்டி²தா.
Nissayapaṭippassaddhikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 22. நிஸ்ஸயபடிப்பஸ்ஸத்³தி⁴கதா² • 22. Nissayapaṭippassaddhikathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / நிஸ்ஸயபடிப்பஸ்ஸத்³தி⁴கதா² • Nissayapaṭippassaddhikathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / நிஸ்ஸயபடிப்பஸ்ஸத்³தி⁴கதா²வண்ணனா • Nissayapaṭippassaddhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / நிஸ்ஸயபடிப்பஸ்ஸத்³தி⁴கதா²வண்ணனா • Nissayapaṭippassaddhikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 22. நிஸ்ஸயபடிப்பஸ்ஸத்³தி⁴கதா² • 22. Nissayapaṭippassaddhikathā
