| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
নিস্সযপটিপ্পস্সদ্ধিকথাৰণ্ণনা
Nissayapaṭippassaddhikathāvaṇṇanā
৮৩. দিসং গতোতি তত্থ ধুরনিক্খিত্তৰাসো হুত্ৰা তিরোগামং গতো। যত্থ নিস্সযো লব্ভতি, তত্থ গন্তব্বন্তি এত্থাপি উপজ্ঝাযে ৰুত্তনযেনেৰ ‘‘কতিপাহেন গমিস্সামী’’তি গমনে চেস উস্সাহো রক্খতি। মা ইধ পটিক্কমীতি মা ইধ গচ্ছ। সভাগা নাম উপজ্ঝাযস্স সিস্সা। তত্থ নিস্সযং গহেত্ৰা। যদি এৰং কো ৰিসেসোতি চে? তেন ইদং ৰুচ্চতি ‘‘অপ্পেৰ নাম খমেয্যা’’তি। ৰসিতুং ৰট্টতীতি উপজ্ঝাযেন পরিচ্চত্তত্তা উপজ্ঝাযসমোধানং নিরত্থকন্তি অত্থো। সচে উপজ্ঝাযো চিরেন অনুগ্গহেতুকামো হোতি, ততো পট্ঠায উপজ্ঝাযোৰ নিস্সযো। উপজ্ঝাযো চে অলজ্জী হোতি, সদ্ধিৰিহারিকেন অনেকক্খত্তুং ৰারেত্ৰা অৰিরমন্তং উপজ্ঝাযং পহায ৰিনাপি নিস্সযপণামনেন অঞ্ঞস্স সন্তিকে নিস্সযং গহেত্ৰা ৰসিতব্বং। উপজ্ঝাযস্স চে লিঙ্গং পরিৰত্ততি, একদিৰসম্পি ন রক্খতি। পক্খপণ্ডকো চে হোতি, নিস্সযজাতিকো চে ‘‘উপজ্ঝাযস্স সুক্কপক্খং আগমেহী’’তি ৰদতি, সযমেৰ ৰা আগমেতি, ৰট্টতি। উপজ্ঝাযো চে উক্খেপনিযকম্মকতো হোতি, নানাসংৰাসকভূমিযং ঠিতত্তা নিস্সযো পটিপ্পস্সম্ভতি। সম্মাৰত্তন্তং পন পস্সিত্ৰা কম্মপটিপ্পস্সদ্ধিং আগমেতুং লভতি। মানত্তাচারী চে হোতি, অব্ভানং আগমেতব্বং। দীঘং চে পরিৰাসং চরতি, অঞ্ঞস্স সন্তিকে নিস্সযো গহেতব্বো, উপজ্ঝাযসমোধানং অপ্পমাণং। পরিৰাসমানত্তচারিনা হি ন নিস্সযো দাতব্বো। যং পন পারিৰাসিকক্খন্ধকট্ঠকথাযং ৰুত্তং ‘‘সদ্ধিৰিহারিকানম্পি সাদিযন্তস্স দুক্কটমেৰা’’তিআদি (চূল়ৰ॰ অট্ঠ॰ ৭৫), তং যথাৰুত্তমত্থং সাধেতি এৰ। যং পন ৰুত্তং ‘‘সচে সদ্ধাপব্বজিতা কুলপুত্তা ‘তুম্হে, ভন্তে, ৰিনযকম্মমত্তং করোথা’’তি ৰত্ৰা ৰত্তং করোন্তিযেৰ, গামপ্পৰেসনং আপুচ্ছন্তিযেৰ, তং ৰারিতকালতো পট্ঠায অনাপত্তী’’তি। তং ৰত্তসাদিযনপচ্চযা দুক্কটাভাৰমত্তদীপনত্থং, সদ্ধিৰিহারিকানং সাপেক্খতং ৰা সন্ধায ৰুত্তন্তি ৰেদিতব্বং। তস্মা তে চে উপজ্ঝাযেন ৰারিতানুরূপমেৰ পটিপজ্জন্তি, নিস্সযো তেসং পটিপ্পস্সদ্ধোতি সিদ্ধং হোতি।
83.Disaṃ gatoti tattha dhuranikkhittavāso hutvā tirogāmaṃ gato. Yattha nissayo labbhati, tattha gantabbanti etthāpi upajjhāye vuttanayeneva ‘‘katipāhena gamissāmī’’ti gamane cesa ussāho rakkhati. Mā idha paṭikkamīti mā idha gaccha. Sabhāgā nāma upajjhāyassa sissā. Tattha nissayaṃ gahetvā. Yadi evaṃ ko visesoti ce? Tena idaṃ vuccati ‘‘appeva nāma khameyyā’’ti. Vasituṃ vaṭṭatīti upajjhāyena pariccattattā upajjhāyasamodhānaṃ niratthakanti attho. Sace upajjhāyo cirena anuggahetukāmo hoti, tato paṭṭhāya upajjhāyova nissayo. Upajjhāyo ce alajjī hoti, saddhivihārikena anekakkhattuṃ vāretvā aviramantaṃ upajjhāyaṃ pahāya vināpi nissayapaṇāmanena aññassa santike nissayaṃ gahetvā vasitabbaṃ. Upajjhāyassa ce liṅgaṃ parivattati, ekadivasampi na rakkhati. Pakkhapaṇḍako ce hoti, nissayajātiko ce ‘‘upajjhāyassa sukkapakkhaṃ āgamehī’’ti vadati, sayameva vā āgameti, vaṭṭati. Upajjhāyo ce ukkhepaniyakammakato hoti, nānāsaṃvāsakabhūmiyaṃ ṭhitattā nissayo paṭippassambhati. Sammāvattantaṃ pana passitvā kammapaṭippassaddhiṃ āgametuṃ labhati. Mānattācārī ce hoti, abbhānaṃ āgametabbaṃ. Dīghaṃ ce parivāsaṃ carati, aññassa santike nissayo gahetabbo, upajjhāyasamodhānaṃ appamāṇaṃ. Parivāsamānattacārinā hi na nissayo dātabbo. Yaṃ pana pārivāsikakkhandhakaṭṭhakathāyaṃ vuttaṃ ‘‘saddhivihārikānampi sādiyantassa dukkaṭamevā’’tiādi (cūḷava. aṭṭha. 75), taṃ yathāvuttamatthaṃ sādheti eva. Yaṃ pana vuttaṃ ‘‘sace saddhāpabbajitā kulaputtā ‘tumhe, bhante, vinayakammamattaṃ karothā’’ti vatvā vattaṃ karontiyeva, gāmappavesanaṃ āpucchantiyeva, taṃ vāritakālato paṭṭhāya anāpattī’’ti. Taṃ vattasādiyanapaccayā dukkaṭābhāvamattadīpanatthaṃ, saddhivihārikānaṃ sāpekkhataṃ vā sandhāya vuttanti veditabbaṃ. Tasmā te ce upajjhāyena vāritānurūpameva paṭipajjanti, nissayo tesaṃ paṭippassaddhoti siddhaṃ hoti.
দ্ৰে লেড্ডুপাতে অতিক্কমিত্ৰা নিৰত্ততীতি ‘‘এত্তাৰতা দিসাপক্কন্তো নাম হোতি, তস্মা অন্তেৰাসিকে অনিক্খিত্তধুরেপি নিস্সযো পটিপ্পস্সম্ভতি। আচরিযুপজ্ঝাযা দ্ৰে লেড্ডুপাতে অনতিক্কম্ম লেড্ডুপাতদ্ৰযব্ভন্তরে তিরোৰিহারেপি পরিক্খিত্তে, অপরিক্খিত্তে ৰা ৰসিতুং ৰট্টতী’’তি লিখিতং। অপরিক্খিত্তেযেৰাতি নো তক্কোতি আচরিযো, এত্থ পন অপরিক্খিত্তস্স পরিক্খেপারহট্ঠানতো ৰিমুত্তে অঞ্ঞস্মিং ৰিহারে ৰসন্তীতি অধিপ্পাযো। ৰিহারোতি চেত্থ ‘‘তাদিসস্স ৰিহারস্স অন্তে ঠিতা একা কুটিকা অধিপ্পেতাতি উপতিস্সত্থেরো’’তি ৰুত্তং। তত্থ ‘‘সচে উভোপি আচরিযন্তেৰাসিকা কেনচি…পে॰… নিস্সযো ন পটিপ্পস্সম্ভতী’’তি ইমিনা সামঞ্ঞতো ৰুত্তেন অট্ঠকথাৰচনেন ধম্মসিরিত্থেরৰাদো সমেতি। অপরিক্খিত্তে ৰাতি দ্ৰিন্নং লেড্ডুপাতানং অন্তো পরিক্খিত্তো ৰা হোতি অপরিক্খিত্তো ৰা। ‘‘বহিসীম’’ন্তি চ ৰুত্তত্তা অন্তোৰিহারসীমাযং দ্ৰে লেড্ডুপাতে অতিক্কমিত্ৰাপি ৰসিতুং ৰট্টতীতি সিদ্ধত্তা পন উপতিস্সত্থেরৰাদো ন সমেতি। একাৰাসে হি পরিক্খিত্তে ৰা অপরিক্খিত্তে ৰা অন্তমসো অন্তোতিযোজনেপি ৰসতো নিস্সযো ন পটিপ্পস্সম্ভতি। সো চ উপচারসীমায পরিচ্ছিন্নো, সা চ উপচারসীমা পরিক্খিত্তস্স ৰিহারস্স পরিক্খেপেন অপরিক্খিত্তস্স পরিক্খেপারহট্ঠানেন পরিচ্ছিন্নো একাৰাসো।
Dve leḍḍupāte atikkamitvā nivattatīti ‘‘ettāvatā disāpakkanto nāma hoti, tasmā antevāsike anikkhittadhurepi nissayo paṭippassambhati. Ācariyupajjhāyā dve leḍḍupāte anatikkamma leḍḍupātadvayabbhantare tirovihārepi parikkhitte, aparikkhitte vā vasituṃ vaṭṭatī’’ti likhitaṃ. Aparikkhitteyevāti no takkoti ācariyo, ettha pana aparikkhittassa parikkhepārahaṭṭhānato vimutte aññasmiṃ vihāre vasantīti adhippāyo. Vihāroti cettha ‘‘tādisassa vihārassa ante ṭhitā ekā kuṭikā adhippetāti upatissatthero’’ti vuttaṃ. Tattha ‘‘sace ubhopi ācariyantevāsikā kenaci…pe… nissayo na paṭippassambhatī’’ti iminā sāmaññato vuttena aṭṭhakathāvacanena dhammasirittheravādo sameti. Aparikkhitte vāti dvinnaṃ leḍḍupātānaṃ anto parikkhitto vā hoti aparikkhitto vā. ‘‘Bahisīma’’nti ca vuttattā antovihārasīmāyaṃ dve leḍḍupāte atikkamitvāpi vasituṃ vaṭṭatīti siddhattā pana upatissattheravādo na sameti. Ekāvāse hi parikkhitte vā aparikkhitte vā antamaso antotiyojanepi vasato nissayo na paṭippassambhati. So ca upacārasīmāya paricchinno, sā ca upacārasīmā parikkhittassa vihārassa parikkhepena aparikkhittassa parikkhepārahaṭṭhānena paricchinno ekāvāso.
উপোসথক্খন্ধকে একাৰাসৰিমতিযং সীমায অনুঞ্ঞাতত্তাতি চে? ন, চীৰরক্খন্ধকট্ঠকথায ৰিচারিতত্তা। যথাহ ‘‘সীমট্ঠকসঙ্ঘো ভাজেত্ৰা গণ্হাতূ’’তি (মহাৰ॰ অট্ঠ॰ ৩৭৯)। কতরসীমায ভাজেতব্বং? মহাসিৰত্থেরো কিরাহ ‘‘অৰিপ্পৰাসসীমাযা’’তি। ততো নং আহংসু ‘‘অৰিপ্পৰাসসীমা নাম তিযোজনাপি হোতি, এৰং সন্তে তিযোজনে ঠিতা লাভং গণ্হিস্সন্তি, তিযোজনে ঠত্ৰা আগন্তুকৰত্তং পূরেত্ৰা আরামং পৰিসিতব্বং ভৰিস্সতি, গমিকো তিযোজনং গন্ত্ৰা সেনাসনং আপুচ্ছিস্সতি, নিস্সযপটিপ্পন্নস্স তিযোজনাতিক্কমে নিস্সযো পটিপ্পস্সম্ভিস্সতি, পারিৰাসিকেন তিযোজনং অতিক্কমিত্ৰা অরুণং উট্ঠাপেতব্বং ভৰিস্সতি, ভিক্খুনিযা তিযোজনে ঠত্ৰা আরামপ্পৰেসনা আপুচ্ছিতব্বা ভৰিস্সতি, সব্বমেতং উপচারসীমাপরিচ্ছেদৰসেন কাতুং ৰট্টতীতি। তস্মা অন্তোউপচারসীমায লেড্ডুপাতদ্ৰযং অতিক্কমিত্ৰাপি ৰসতো নিস্সযো তিযোজনাতিক্কমে নিস্সযো ন পটিপ্পস্সম্ভতীতি সিদ্ধং। কামঞ্চেত্থ উপচারসীমায তিযোজনপ্পমাণায, অতিরেকায ৰা যথাৰুত্তদোসপ্পসঙ্গো সিযাতি। সা হি আৰাসেসু ৰড্ঢন্তেসু ৰড্ঢতি, পরিহাযন্তেসু পরিহাযতীতি ৰুত্তত্তা, তস্মা তাদিসস্স ৰিহারস্স অন্তে ঠিতা একা কুটি ৰিহারোতি ইধাধিপ্পেতা। সাপি তস্সেৰ ৰিহারস্স কুটিকাৰ হোতীতি কত্ৰা সো আৰাসো হোতি। নানাৰাসো এৰ চে অধিপ্পেতো, ‘‘অন্তে ঠিতা কুটিকা’’তি ন ৰত্তব্বং। দ্ৰিন্নং লেড্ডুপাতানং অব্ভন্তরে পন অপরিক্খিত্তে নানাৰাসে নিস্সযো ন পটিপ্পস্সম্ভতীতি য্ৰাযং ‘‘নো তক্কো’’তি ৰুত্তো, সো তাদিসে নানাৰাসে সেনাসনগ্গাহস্স অপ্পটিপ্পস্সদ্ধিনযেন ৰুত্তো। সেনাসনগ্গাহো হি ‘‘গহণেন গহণং আলযো পটিপ্পস্সম্ভতী’’তি লক্খণত্তা ইতরত্থ পটিপ্পস্সম্ভতি। তত্রাযং পাল়ি ‘‘তেন খো পন সমযেন আযস্মা উপনন্দো সক্যপুত্তো একো দ্ৰীসু আৰাসেসু ৰস্সং ৰসি…পে॰… দেথ, ভিক্খৰে, মোঘপুরিসস্স একাধিপ্পায’’ন্তি (মহাৰ॰ ৩৬৪)। অট্ঠকথাযঞ্চস্স এৰং ৰুত্তং ‘‘ইদঞ্চ নানালাভেহি নানূপচারেহি একসীমৰিহারেহি কথিতং, নানাসীমৰিহারে পন সেনাসনগ্গাহো পটিপ্পস্সম্ভতী’’তি (মহাৰ॰ অট্ঠ॰ ৩৬৪)। অপরিক্খিত্তা নানাৰাসা একূপচারসঙ্খ্যং গচ্ছন্তি। পরিক্খিত্তঞ্চ একূপচারং অপরিক্খিত্তসঙ্খ্যং গচ্ছতি। এত্তাৰতা লেড্ডুপাতদ্ৰযব্ভন্তরে অপরিক্খিত্তে অঞ্ঞস্মিং ৰিহারে ৰসতো নিস্সযো পন ন পটিপ্পস্সম্ভতি, পরিক্খিত্তে পটিপ্পস্সম্ভতি এৰাতি অযমত্থো সাধিতোতি। এত্থাহ – দ্ৰে লেড্ডুপাতে অতিক্কমিত্ৰাৰ সতোপি নিস্সযো ন পটিপ্পস্সম্ভতি। ৰুত্তঞ্হি নিস্সগ্গিযট্ঠকথাযং ‘‘সচে গচ্ছন্তানংযেৰ অসম্পত্তেসু দহরেসু অরুণং উগ্গচ্ছতি, চীৰরং নিস্সগ্গিযং হোতি, নিস্সযো পন ন পটিপ্পস্সম্ভতী’’তি (পারা॰ অট্ঠ॰ ২.৪৯৫)? ৰুচ্চতে – তং উপজ্ঝাযেন সমাগমে সউস্সাহতায ৰুত্তং। ইধ ধুৰৰাসং সন্ধায, তস্মা অঞ্ঞমঞ্ঞং ন ৰিলোমেন্তি । কেচি পন ‘‘দ্ৰে লেড্ডুপাতং অতিক্কম্মাতি ইদং দেৰসিকং আরোচেত্ৰা ৰসনৰসেন ৰুত্ত’’ন্তি ৰদন্তি, তং তেসং মতিমত্তমেৰাতি মম তক্কো। দেৰসিকং আরোচেত্ৰা ৰত্থব্বন্তি হি নেৰ পাল়িযং ন অট্ঠকথাযং দিস্সতি, তঞ্চ পন অপকতঞ্ঞূহি আচিণ্ণন্তি ৰেদিতব্বং।
Uposathakkhandhake ekāvāsavimatiyaṃ sīmāya anuññātattāti ce? Na, cīvarakkhandhakaṭṭhakathāya vicāritattā. Yathāha ‘‘sīmaṭṭhakasaṅgho bhājetvā gaṇhātū’’ti (mahāva. aṭṭha. 379). Katarasīmāya bhājetabbaṃ? Mahāsivatthero kirāha ‘‘avippavāsasīmāyā’’ti. Tato naṃ āhaṃsu ‘‘avippavāsasīmā nāma tiyojanāpi hoti, evaṃ sante tiyojane ṭhitā lābhaṃ gaṇhissanti, tiyojane ṭhatvā āgantukavattaṃ pūretvā ārāmaṃ pavisitabbaṃ bhavissati, gamiko tiyojanaṃ gantvā senāsanaṃ āpucchissati, nissayapaṭippannassa tiyojanātikkame nissayo paṭippassambhissati, pārivāsikena tiyojanaṃ atikkamitvā aruṇaṃ uṭṭhāpetabbaṃ bhavissati, bhikkhuniyā tiyojane ṭhatvā ārāmappavesanā āpucchitabbā bhavissati, sabbametaṃ upacārasīmāparicchedavasena kātuṃ vaṭṭatīti. Tasmā antoupacārasīmāya leḍḍupātadvayaṃ atikkamitvāpi vasato nissayo tiyojanātikkame nissayo na paṭippassambhatīti siddhaṃ. Kāmañcettha upacārasīmāya tiyojanappamāṇāya, atirekāya vā yathāvuttadosappasaṅgo siyāti. Sā hi āvāsesu vaḍḍhantesu vaḍḍhati, parihāyantesu parihāyatīti vuttattā, tasmā tādisassa vihārassa ante ṭhitā ekā kuṭi vihāroti idhādhippetā. Sāpi tasseva vihārassa kuṭikāva hotīti katvā so āvāso hoti. Nānāvāso eva ce adhippeto, ‘‘ante ṭhitā kuṭikā’’ti na vattabbaṃ. Dvinnaṃ leḍḍupātānaṃ abbhantare pana aparikkhitte nānāvāse nissayo na paṭippassambhatīti yvāyaṃ ‘‘no takko’’ti vutto, so tādise nānāvāse senāsanaggāhassa appaṭippassaddhinayena vutto. Senāsanaggāho hi ‘‘gahaṇena gahaṇaṃ ālayo paṭippassambhatī’’ti lakkhaṇattā itarattha paṭippassambhati. Tatrāyaṃ pāḷi ‘‘tena kho pana samayena āyasmā upanando sakyaputto eko dvīsu āvāsesu vassaṃ vasi…pe… detha, bhikkhave, moghapurisassa ekādhippāya’’nti (mahāva. 364). Aṭṭhakathāyañcassa evaṃ vuttaṃ ‘‘idañca nānālābhehi nānūpacārehi ekasīmavihārehi kathitaṃ, nānāsīmavihāre pana senāsanaggāho paṭippassambhatī’’ti (mahāva. aṭṭha. 364). Aparikkhittā nānāvāsā ekūpacārasaṅkhyaṃ gacchanti. Parikkhittañca ekūpacāraṃ aparikkhittasaṅkhyaṃ gacchati. Ettāvatā leḍḍupātadvayabbhantare aparikkhitte aññasmiṃ vihāre vasato nissayo pana na paṭippassambhati, parikkhitte paṭippassambhati evāti ayamattho sādhitoti. Etthāha – dve leḍḍupāte atikkamitvāva satopi nissayo na paṭippassambhati. Vuttañhi nissaggiyaṭṭhakathāyaṃ ‘‘sace gacchantānaṃyeva asampattesu daharesu aruṇaṃ uggacchati, cīvaraṃ nissaggiyaṃ hoti, nissayo pana na paṭippassambhatī’’ti (pārā. aṭṭha. 2.495)? Vuccate – taṃ upajjhāyena samāgame saussāhatāya vuttaṃ. Idha dhuvavāsaṃ sandhāya, tasmā aññamaññaṃ na vilomenti . Keci pana ‘‘dve leḍḍupātaṃ atikkammāti idaṃ devasikaṃ ārocetvā vasanavasena vutta’’nti vadanti, taṃ tesaṃ matimattamevāti mama takko. Devasikaṃ ārocetvā vatthabbanti hi neva pāḷiyaṃ na aṭṭhakathāyaṃ dissati, tañca pana apakataññūhi āciṇṇanti veditabbaṃ.
নিস্সযপটিপ্পস্সদ্ধিকথাৰণ্ণনা নিট্ঠিতা।
Nissayapaṭippassaddhikathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২২. নিস্সযপটিপ্পস্সদ্ধিকথা • 22. Nissayapaṭippassaddhikathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / নিস্সযপটিপ্পস্সদ্ধিকথা • Nissayapaṭippassaddhikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / নিস্সযপটিপ্পস্সদ্ধিকথাৰণ্ণনা • Nissayapaṭippassaddhikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / নিস্সযপটিপ্পস্সদ্ধিকথাৰণ্ণনা • Nissayapaṭippassaddhikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২২. নিস্সযপটিপ্পস্সদ্ধিকথা • 22. Nissayapaṭippassaddhikathā
