| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
နိသ္သယပဋိပ္ပသ္သဒ္ဓိကထာဝဏ္ဏနာ
Nissayapaṭippassaddhikathāvaṇṇanā
၈၃. နိသ္သယပဋိပ္ပသ္သဒ္ဓိကထာယံ ဒိသံ ဂတောတိ ပုန အာဂန္တုကာမော အနာဂန္တုကာမော ဝာ ဟုတ္ဝာ ဝာသတ္ထာယ ကဉ္စိ ဒိသံ ဂတော။ ဘိက္ခုနော သဘာဂတန္တိ ပေသလဘာဝံ။ ဩလောကေတ္ဝာတိ ဥပပရိက္ခိတ္ဝာ။ ဝိဗ္ဘန္တေ။ပေ.။ တတ္ထ ဂန္တဗ္ဗန္တိ ဧတ္ထ သစေ ကေနစိ ကရဏီယေန တဒဟေဝ ဂန္တုံ အသက္ကောန္တော ကတိပာဟေန ဂမိသ္သာမီတိ ဂမနေ သဥသ္သာဟော ဟောတိ, ရက္ခတီတိ ဝဒန္တိ။ မာ ဣဓ ပဋိက္ကမီတိ မာ ဣဓ ပဝိသိ။ တတ္ရေဝ ဝသိတဗ္ဗန္တိ တတ္ထေဝ နိသ္သယံ ဂဟေတ္ဝာ ဝသိတဗ္ဗံ။ တံယေဝ ဝိဟာရံ။ပေ.။ ဝသိတုံ ဝဋ္ဋတီတိ ဧတ္ထ ဥပဇ္ဈာယေန ပရိစ္စတ္တတ္တာ ဥပဇ္ဈာယသမောဓာနပရိဟာရော နတ္ထိ, တသ္မာ ဥပဇ္ဈာယေန သမောဓာနဂတသ္သပိ အာစရိယသ္သ သန္တိကေ ဂဟိတနိသ္သယော န ပဋိပ္ပသ္သမ္ဘတိ။
83. Nissayapaṭippassaddhikathāyaṃ disaṃ gatoti puna āgantukāmo anāgantukāmo vā hutvā vāsatthāya kañci disaṃ gato. Bhikkhuno sabhāgatanti pesalabhāvaṃ. Oloketvāti upaparikkhitvā. Vibbhante…pe… tattha gantabbanti ettha sace kenaci karaṇīyena tadaheva gantuṃ asakkonto katipāhena gamissāmīti gamane saussāho hoti, rakkhatīti vadanti. Mā idha paṭikkamīti mā idha pavisi. Tatreva vasitabbanti tattheva nissayaṃ gahetvā vasitabbaṃ. Taṃyeva vihāraṃ…pe… vasituṃ vaṭṭatīti ettha upajjhāyena pariccattattā upajjhāyasamodhānaparihāro natthi, tasmā upajjhāyena samodhānagatassapi ācariyassa santike gahitanissayo na paṭippassambhati.
အာစရိယမ္ဟာ နိသ္သယပဋိပ္ပသ္သဒ္ဓီသု အာစရိယော ပက္ကန္တော ဝာ ဟောတီတိ ဧတ္ထ ‘‘ပက္ကန္တောတိ ဒိသံ ဂတော’’တိအာဒိနာ ဥပဇ္ဈာယသ္သ ပက္ကမနေ ယော ဝိနိစ္ဆယော ဝုတ္တော, သော တတ္ထ ဝုတ္တနယေနေဝ ဣဓာပိ သက္ကာ ဝိညာတုန္တိ တံ အဝတ္ဝာ ‘‘ကောစိ အာစရိယော အာပုစ္ဆိတ္ဝာ ပက္ကမတီ’’တိအာဒိနာ အညောယေဝ နယော အာရဒ္ဓော, အယဉ္စ နယော ဥပဇ္ဈာယပက္ကမနေပိ ဝေဒိတဗ္ဗောယေဝ။ ဤဒိသေသု ဟိ ဌာနေသု ဧကတ္ထ ဝုတ္တလက္ခဏံ အညတ္ထာပိ ဒဋ္ဌဗ္ဗံ။ သစေ ဒ္ဝေ လေဍ္ဍုပာတေ အတိက္ကမိတ္ဝာ နိဝတ္တတိ, ပဋိပ္ပသ္သဒ္ဓော ဟောတီတိ ဧတ္ထ ဧတ္တာဝတာ ဒိသာပက္ကန္တော နာမ ဟောတီတိ အန္တေဝာသိကေ အနိက္ခိတ္တဓုရေပိ နိသ္သယော ပဋိပ္ပသ္သမ္ဘတိ။ အာစရိယုပဇ္ဈာယာ ဒ္ဝေ လေဍ္ဍုပာတေ အတိက္ကမ္မ အညသ္မိံ ဝိဟာရေ ဝသန္တီတိ ဗဟိဥပစာရသီမာယံ အန္တေဝာသိကသဒ္ဓိဝိဟာရိကာနံ ဝသနဋ္ဌာနတော ဒ္ဝေ လေဍ္ဍုပာတေ အတိက္ကမ္မ အညသ္မိံ သေနာသနေ ဝသန္တိ, အန္တောဥပစာရသီမာယံ ပန ဒ္ဝေ လေဍ္ဍုပာတေ အတိက္ကမိတ္ဝာပိ ဝသတော နိသ္သယော န ပဋိပ္ပသ္သမ္ဘတိ။ ‘‘သစေပိ အာစရိယော မုဉ္စိတုကာမောဝ ဟုတ္ဝာ နိသ္သယပဏာမနာယ ပဏာမေတီ’’တိအာဒိ သဗ္ဗံ ဥပဇ္ဈာယသ္သ အာဏတ္တိယမ္ပိ ဝေဒိတဗ္ဗံ။ သေသမေတ္ထ ဥတ္တာနမေဝ။
Ācariyamhānissayapaṭippassaddhīsu ācariyo pakkanto vā hotīti ettha ‘‘pakkantoti disaṃ gato’’tiādinā upajjhāyassa pakkamane yo vinicchayo vutto, so tattha vuttanayeneva idhāpi sakkā viññātunti taṃ avatvā ‘‘koci ācariyo āpucchitvā pakkamatī’’tiādinā aññoyeva nayo āraddho, ayañca nayo upajjhāyapakkamanepi veditabboyeva. Īdisesu hi ṭhānesu ekattha vuttalakkhaṇaṃ aññatthāpi daṭṭhabbaṃ. Sace dve leḍḍupāte atikkamitvā nivattati, paṭippassaddho hotīti ettha ettāvatā disāpakkanto nāma hotīti antevāsike anikkhittadhurepi nissayo paṭippassambhati. Ācariyupajjhāyā dve leḍḍupāte atikkamma aññasmiṃ vihāre vasantīti bahiupacārasīmāyaṃ antevāsikasaddhivihārikānaṃ vasanaṭṭhānato dve leḍḍupāte atikkamma aññasmiṃ senāsane vasanti, antoupacārasīmāyaṃ pana dve leḍḍupāte atikkamitvāpi vasato nissayo na paṭippassambhati. ‘‘Sacepi ācariyo muñcitukāmova hutvā nissayapaṇāmanāya paṇāmetī’’tiādi sabbaṃ upajjhāyassa āṇattiyampi veditabbaṃ. Sesamettha uttānameva.
နိသ္သယပဋိပ္ပသ္သဒ္ဓိကထာဝဏ္ဏနာ နိဋ္ဌိတာ။
Nissayapaṭippassaddhikathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၂၂. နိသ္သယပဋိပ္ပသ္သဒ္ဓိကထာ • 22. Nissayapaṭippassaddhikathā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / နိသ္သယပဋိပ္ပသ္သဒ္ဓိကထာ • Nissayapaṭippassaddhikathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / နိသ္သယပဋိပ္ပသ္သဒ္ဓိကထာဝဏ္ဏနာ • Nissayapaṭippassaddhikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / နိသ္သယပဋိပ္ပသ္သဒ္ဓိကထာဝဏ္ဏနာ • Nissayapaṭippassaddhikathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂၂. နိသ္သယပဋိပ္ပသ္သဒ္ဓိကထာ • 22. Nissayapaṭippassaddhikathā
