| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
නිස්‌සයපටිප්‌පස්‌සද්‌ධිකථාවණ්‌ණනා
Nissayapaṭippassaddhikathāvaṇṇanā
83. නිස්‌සයපටිප්‌පස්‌සද්‌ධිකථායං ‘‘යො වා එකසම්‌භොගපරිභොගො, තස්‌ස සන්‌තිකෙ නිස්‌සයො ගහෙතබ්‌බො’’ති ඉමිනා ලජ්‌ජීසු එව නිස්‌සයග්‌ගහණං නියොජෙති අලජ්‌ජීසු පටික්‌ඛිත්‌තත්‌තා. එත්‌ථ ච පරිභොගසද්‌දෙන එකකම්‌මාදිකො සංවාසො ගහිතො පච්‌චයපරිභොගස්‌ස සම්‌භොග-සද්‌දෙන ගහිතත්‌තා, එතෙන ච සම්‌භොගසංවාසානං අලජ්‌ජීහි සද්‌ධිං න කත්‌තබ්‌බතං දස්‌සෙති. පරිහාරො නත්‌ථීති ආපත්‌තිපරිහාරො නත්‌ථි. තාදිසොති යත්‌ථ නිස්‌සයො ගහිතපුබ්‌බො, යො ච එකසම්‌භොගපරිභොගො, තාදිසො. තථා වුත්‌තන්‌ති ‘‘ලහුං ආගමිස්‌සාමී’’ති වුත්‌තඤ්‌චෙති අත්‌ථො. ‘‘චත්‌තාරි පඤ්‌ච දිවසානී’’ති ඉදං උපලක්‌ඛණමත්‌තං. යදි එකාහද්‌වීහෙන සභාගතා පඤ්‌ඤායති, ඤාතදිවසෙන ගහෙතබ්‌බොව. අථාපි චතුපඤ්‌චාහෙනාපි න පඤ්‌ඤායති, යත්‌තකෙහි දිවසෙහි පඤ්‌ඤායති, තත්‌තකානි අතික්‌කමෙතබ්‌බානි. සභාගතං ඔලොකෙමීති පන ලෙසො න කාතබ්‌බො.
83. Nissayapaṭippassaddhikathāyaṃ ‘‘yo vā ekasambhogaparibhogo, tassa santike nissayo gahetabbo’’ti iminā lajjīsu eva nissayaggahaṇaṃ niyojeti alajjīsu paṭikkhittattā. Ettha ca paribhogasaddena ekakammādiko saṃvāso gahito paccayaparibhogassa sambhoga-saddena gahitattā, etena ca sambhogasaṃvāsānaṃ alajjīhi saddhiṃ na kattabbataṃ dasseti. Parihāro natthīti āpattiparihāro natthi. Tādisoti yattha nissayo gahitapubbo, yo ca ekasambhogaparibhogo, tādiso. Tathā vuttanti ‘‘lahuṃ āgamissāmī’’ti vuttañceti attho. ‘‘Cattāri pañca divasānī’’ti idaṃ upalakkhaṇamattaṃ. Yadi ekāhadvīhena sabhāgatā paññāyati, ñātadivasena gahetabbova. Athāpi catupañcāhenāpi na paññāyati, yattakehi divasehi paññāyati, tattakāni atikkametabbāni. Sabhāgataṃ olokemīti pana leso na kātabbo.
දහරා සුණන්‌තීති එත්‌ථ අසුත්‌වාපි ආගමිස්‌සති, කෙනචි අන්‌තරායෙන චිරායතීති සඤ්‌ඤාය සති ලබ්‌භතෙව පරිහාරො. තෙනාහ ‘‘ඉධෙවාහං වසිස්‌සාමීති පහිණති, පරිහාරො නත්‌ථී’’ති.
Daharā suṇantīti ettha asutvāpi āgamissati, kenaci antarāyena cirāyatīti saññāya sati labbhateva parihāro. Tenāha ‘‘idhevāhaṃ vasissāmīti pahiṇati, parihāro natthī’’ti.
එකදිවසම්‌පි පරිහාරො නත්‌ථීති ගමනෙ නිරුස්‌සාහං සන්‌ධාය වුත්‌තං. සඋස්‌සාහස්‌ස පන සෙනාසනපටිසාමනාදිවසෙන කතිපාහෙ ගතෙපි න දොසො.
Ekadivasampi parihāro natthīti gamane nirussāhaṃ sandhāya vuttaṃ. Saussāhassa pana senāsanapaṭisāmanādivasena katipāhe gatepi na doso.
තත්‍රෙව වසිතබ්‌බන්‌ති තත්‍ර සභාගට්‌ඨානෙ එව නිස්‌සයං ගහෙත්‌වා වසිතබ්‌බං. ‘‘තංයෙව විහාරං…පෙ.… වසිතුං වට්‌ටතී’’ති ඉමිනා උපජ්‌ඣායෙ සඞ්‌ගණ්‌හන්‌තෙයෙව තංසමොධානෙ නිස්‌සයපටිප්‌පස්‌සද්‌ධි වුත්‌තා, තස්‌මිං පන කොධෙන වා ගණනිරපෙක්‌ඛතාය වා අසඞ්‌ගණ්‌හන්‌තෙ අඤ්‌ඤෙසු ගහිතො නිස්‌සයො න පටිප්‌පස්‌සම්‌භතීති දස්‌සෙති.
Tatreva vasitabbanti tatra sabhāgaṭṭhāne eva nissayaṃ gahetvā vasitabbaṃ. ‘‘Taṃyeva vihāraṃ…pe… vasituṃ vaṭṭatī’’ti iminā upajjhāye saṅgaṇhanteyeva taṃsamodhāne nissayapaṭippassaddhi vuttā, tasmiṃ pana kodhena vā gaṇanirapekkhatāya vā asaṅgaṇhante aññesu gahito nissayo na paṭippassambhatīti dasseti.
ආචරියම්‌හා නිස්‌සයපටිප්‌පස්‌සද්‌ධියං වුත්‌තො ‘‘කොචි ආචරියො’’තිආදිකො නයො උපජ්‌ඣායපක්‌කමනාදීසුපි නෙත්‌වා තත්‌ථ ච වුත්‌තො ඉධාපි නෙත්‌වා යථාරහං යොජෙතබ්‌බො.
Ācariyamhā nissayapaṭippassaddhiyaṃ vutto ‘‘koci ācariyo’’tiādiko nayo upajjhāyapakkamanādīsupi netvā tattha ca vutto idhāpi netvā yathārahaṃ yojetabbo.
ද්‌වෙ ලෙඩ්‌ඩුපාතෙ අතික්‌කම්‌ම අඤ්‌ඤස්‌මිං විහාරෙ වසන්‌තීති උපචාරසීමතො බහි අඤ්‌ඤස්‌මිං විහාරෙ අන්‌තෙවාසිකානං වසනට්‌ඨානතො ද්‌වෙ ලෙඩ්‌ඩුපාතෙ අතික්‌කම්‌ම වසන්‌ති. තෙන බහිඋපචාරෙපි අන්‌තෙවාසිකාදීනං වසනට්‌ඨානතො ද්‌වින්‌නං ලෙඩ්‌ඩුපාතානං අන්‌තරෙ ආසන්‌නපදෙසෙ වසති, නිස්‌සයො න පටිප්‌පස්‌සම්‌භතීති දස්‌සෙති. අන්‌තොඋපචාරසීමායං පන ද්‌වෙ ලෙඩ්‌ඩුපාතෙ අතික්‌කමිත්‌වා වසතො නිස්‌සයො න පටිප්‌පස්‌සම්‌භතෙව.
Dve leḍḍupāte atikkamma aññasmiṃ vihāre vasantīti upacārasīmato bahi aññasmiṃ vihāre antevāsikānaṃ vasanaṭṭhānato dve leḍḍupāte atikkamma vasanti. Tena bahiupacārepi antevāsikādīnaṃ vasanaṭṭhānato dvinnaṃ leḍḍupātānaṃ antare āsannapadese vasati, nissayo na paṭippassambhatīti dasseti. Antoupacārasīmāyaṃ pana dve leḍḍupāte atikkamitvā vasato nissayo na paṭippassambhateva.
නිස්‌සයපටිප්‌පස්‌සද්‌ධිකථාවණ්‌ණනා නිට්‌ඨිතා.
Nissayapaṭippassaddhikathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi / 22. නිස්‌සයපටිප්‌පස්‌සද්‌ධිකථා • 22. Nissayapaṭippassaddhikathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / නිස්‌සයපටිප්‌පස්‌සද්‌ධිකථා • Nissayapaṭippassaddhikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / නිස්‌සයපටිප්‌පස්‌සද්‌ධිකථාවණ්‌ණනා • Nissayapaṭippassaddhikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / නිස්‌සයපටිප්‌පස්‌සද්‌ධිකථාවණ්‌ණනා • Nissayapaṭippassaddhikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 22. නිස්‌සයපටිප්‌පස්‌සද්‌ධිකථා • 22. Nissayapaṭippassaddhikathā
