| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. নিস্সযসুত্তং
2. Nissayasuttaṃ
২. অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং…পে॰… একমন্তং নিসিন্নো খো সো ভিক্খু ভগৰন্তং এতদৰোচ – ‘‘‘নিস্সযসম্পন্নো নিস্সযসম্পন্নো’তি, ভন্তে, ৰুচ্চতি। কিত্তাৰতা নু খো, ভন্তে, ভিক্খু নিস্সযসম্পন্নো হোতী’’তি? ‘‘সদ্ধং চে, ভিক্খু, ভিক্খু নিস্সায অকুসলং পজহতি কুসলং ভাৰেতি, পহীনমেৰস্স তং অকুসলং হোতি। হিরিং চে, ভিক্খু, ভিক্খু নিস্সায…পে॰… ওত্তপ্পং চে, ভিক্খু, ভিক্খু নিস্সায…পে॰… ৰীরিযং চে, ভিক্খু, ভিক্খু নিস্সায…পে॰… পঞ্ঞং চে, ভিক্খু, ভিক্খু নিস্সায অকুসলং পজহতি কুসলং ভাৰেতি, পহীনমেৰস্স তং অকুসলং হোতি । তং হিস্স ভিক্খুনো অকুসলং পহীনং হোতি সুপ্পহীনং, যংস অরিযায পঞ্ঞায দিস্ৰা পহীনং’’।
2. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ…pe… ekamantaṃ nisinno kho so bhikkhu bhagavantaṃ etadavoca – ‘‘‘nissayasampanno nissayasampanno’ti, bhante, vuccati. Kittāvatā nu kho, bhante, bhikkhu nissayasampanno hotī’’ti? ‘‘Saddhaṃ ce, bhikkhu, bhikkhu nissāya akusalaṃ pajahati kusalaṃ bhāveti, pahīnamevassa taṃ akusalaṃ hoti. Hiriṃ ce, bhikkhu, bhikkhu nissāya…pe… ottappaṃ ce, bhikkhu, bhikkhu nissāya…pe… vīriyaṃ ce, bhikkhu, bhikkhu nissāya…pe… paññaṃ ce, bhikkhu, bhikkhu nissāya akusalaṃ pajahati kusalaṃ bhāveti, pahīnamevassa taṃ akusalaṃ hoti . Taṃ hissa bhikkhuno akusalaṃ pahīnaṃ hoti suppahīnaṃ, yaṃsa ariyāya paññāya disvā pahīnaṃ’’.
‘‘তেন চ পন, ভিক্খু, ভিক্খুনা ইমেসু পঞ্চসু ধম্মেসু পতিট্ঠায চত্তারো উপনিস্সায ৰিহাতব্বা। কতমে চত্তারো? ইধ, ভিক্খু, ভিক্খু সঙ্খাযেকং পটিসেৰতি, সঙ্খাযেকং অধিৰাসেতি, সঙ্খাযেকং পরিৰজ্জেতি, সঙ্খাযেকং ৰিনোদেতি। এৰং খো, ভিক্খু, ভিক্খু নিস্সযসম্পন্নো হোতী’’তি। দুতিযং।
‘‘Tena ca pana, bhikkhu, bhikkhunā imesu pañcasu dhammesu patiṭṭhāya cattāro upanissāya vihātabbā. Katame cattāro? Idha, bhikkhu, bhikkhu saṅkhāyekaṃ paṭisevati, saṅkhāyekaṃ adhivāseti, saṅkhāyekaṃ parivajjeti, saṅkhāyekaṃ vinodeti. Evaṃ kho, bhikkhu, bhikkhu nissayasampanno hotī’’ti. Dutiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. নিস্সযসুত্তৰণ্ণনা • 2. Nissayasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-২. সম্বোধিসুত্তাদিৰণ্ণনা • 1-2. Sambodhisuttādivaṇṇanā
