| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. නිස්‌සයසුත්‌තං
2. Nissayasuttaṃ
2. අථ ඛො අඤ්‌ඤතරො භික්‌ඛු යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං…පෙ.… එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘‘නිස්‌සයසම්‌පන්‌නො නිස්‌සයසම්‌පන්‌නො’ති, භන්‌තෙ, වුච්‌චති. කිත්‌තාවතා නු ඛො, භන්‌තෙ, භික්‌ඛු නිස්‌සයසම්‌පන්‌නො හොතී’’ති? ‘‘සද්‌ධං චෙ, භික්‌ඛු, භික්‌ඛු නිස්‌සාය අකුසලං පජහති කුසලං භාවෙති, පහීනමෙවස්‌ස තං අකුසලං හොති. හිරිං චෙ, භික්‌ඛු, භික්‌ඛු නිස්‌සාය…පෙ.… ඔත්‌තප්‌පං චෙ, භික්‌ඛු, භික්‌ඛු නිස්‌සාය…පෙ.… වීරියං චෙ, භික්‌ඛු, භික්‌ඛු නිස්‌සාය…පෙ.… පඤ්‌ඤං චෙ, භික්‌ඛු, භික්‌ඛු නිස්‌සාය අකුසලං පජහති කුසලං භාවෙති, පහීනමෙවස්‌ස තං අකුසලං හොති . තං හිස්‌ස භික්‌ඛුනො අකුසලං පහීනං හොති සුප්‌පහීනං, යංස අරියාය පඤ්‌ඤාය දිස්‌වා පහීනං’’.
2. Atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ…pe… ekamantaṃ nisinno kho so bhikkhu bhagavantaṃ etadavoca – ‘‘‘nissayasampanno nissayasampanno’ti, bhante, vuccati. Kittāvatā nu kho, bhante, bhikkhu nissayasampanno hotī’’ti? ‘‘Saddhaṃ ce, bhikkhu, bhikkhu nissāya akusalaṃ pajahati kusalaṃ bhāveti, pahīnamevassa taṃ akusalaṃ hoti. Hiriṃ ce, bhikkhu, bhikkhu nissāya…pe… ottappaṃ ce, bhikkhu, bhikkhu nissāya…pe… vīriyaṃ ce, bhikkhu, bhikkhu nissāya…pe… paññaṃ ce, bhikkhu, bhikkhu nissāya akusalaṃ pajahati kusalaṃ bhāveti, pahīnamevassa taṃ akusalaṃ hoti . Taṃ hissa bhikkhuno akusalaṃ pahīnaṃ hoti suppahīnaṃ, yaṃsa ariyāya paññāya disvā pahīnaṃ’’.
‘‘තෙන ච පන, භික්‌ඛු, භික්‌ඛුනා ඉමෙසු පඤ්‌චසු ධම්‌මෙසු පතිට්‌ඨාය චත්‌තාරො උපනිස්‌සාය විහාතබ්‌බා. කතමෙ චත්‌තාරො? ඉධ, භික්‌ඛු, භික්‌ඛු සඞ්‌ඛායෙකං පටිසෙවති, සඞ්‌ඛායෙකං අධිවාසෙති, සඞ්‌ඛායෙකං පරිවජ්‌ජෙති, සඞ්‌ඛායෙකං විනොදෙති. එවං ඛො, භික්‌ඛු, භික්‌ඛු නිස්‌සයසම්‌පන්‌නො හොතී’’ති. දුතියං.
‘‘Tena ca pana, bhikkhu, bhikkhunā imesu pañcasu dhammesu patiṭṭhāya cattāro upanissāya vihātabbā. Katame cattāro? Idha, bhikkhu, bhikkhu saṅkhāyekaṃ paṭisevati, saṅkhāyekaṃ adhivāseti, saṅkhāyekaṃ parivajjeti, saṅkhāyekaṃ vinodeti. Evaṃ kho, bhikkhu, bhikkhu nissayasampanno hotī’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. නිස්‌සයසුත්‌තවණ්‌ණනා • 2. Nissayasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-2. සම්‌බොධිසුත්‌තාදිවණ්‌ණනා • 1-2. Sambodhisuttādivaṇṇanā
