| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
23. நிஸ்ஸயவினிச்ச²யகதா²
23. Nissayavinicchayakathā
151. ஏவங் உபஸம்பதா³வினிச்ச²யங் கதெ²த்வா இதா³னி நிஸ்ஸயவினிச்ச²யங் கதே²துங் ‘‘நிஸ்ஸயோதி எத்த² பனா’’திஆதி³மாஹ. தத்த² நிஸ்ஸயனங் நிஸ்ஸயோ, ஸேவனங் ப⁴ஜனந்த்யத்தோ². நிபுப்³ப³ஸி ஸேவாயந்தி தா⁴து பா⁴வஸாத⁴னோ, ந ‘‘நிஸ்ஸாய நங் வஸதீதி நிஸ்ஸயோ’’தி இத⁴ விய அவுத்தகம்மஸாத⁴னோ. தத்த² ஹி ஸேவிதப்³போ³ புக்³க³லோ லப்³ப⁴தி, இத⁴ பன ஸேவனகிரியாதி. இதா³னி தங் நிஸ்ஸயங் புச்சா²புப்³ப³ங்க³மாய விஸ்ஸஜ்ஜனாய வித்தா²ரதோ ட²பேதுங் ‘‘கேன தா³தப்³போ³’’திஆதி³மாஹ. தத்த² கேன தா³தப்³போ³, கேன ந தா³தப்³போ³தி நிஸ்ஸயதா³யகங் கத்தாரங் புச்ச²தி, கஸ்ஸ தா³தப்³போ³, கஸ்ஸ ந தா³தப்³போ³தி நிஸ்ஸயபடிக்³கா³ஹகங் ஸம்பதா³னங், கத²ங் க³ஹிதோ ஹோதி, கத²ங் படிப்பஸ்ஸம்ப⁴தீதி காரணங், நிஸ்ஸாய கேன வஸிதப்³ப³ங், கேன ந வஸிதப்³ப³ந்தி நிஸ்ஸயபடிபன்னகங். ததோ புச்சா²னுக்கமேன விஸ்ஸஜ்ஜேதுங் ‘‘தத்த²’’த்யாதி³மாஹ. ந கேவலங் எத்தே²வ, அத² கோ² நிஸ்ஸயமுச்சனங்கே³பி ‘‘ப்³யத்தேனா’’தி ஆக³தோ.
151. Evaṃ upasampadāvinicchayaṃ kathetvā idāni nissayavinicchayaṃ kathetuṃ ‘‘nissayoti ettha panā’’tiādimāha. Tattha nissayanaṃ nissayo, sevanaṃ bhajanantyattho. Nipubbasi sevāyanti dhātu bhāvasādhano, na ‘‘nissāya naṃ vasatīti nissayo’’ti idha viya avuttakammasādhano. Tattha hi sevitabbo puggalo labbhati, idha pana sevanakiriyāti. Idāni taṃ nissayaṃ pucchāpubbaṅgamāya vissajjanāya vitthārato ṭhapetuṃ ‘‘kena dātabbo’’tiādimāha. Tattha kena dātabbo, kena na dātabboti nissayadāyakaṃ kattāraṃ pucchati, kassa dātabbo, kassa na dātabboti nissayapaṭiggāhakaṃ sampadānaṃ, kathaṃ gahito hoti, kathaṃ paṭippassambhatīti kāraṇaṃ, nissāya kena vasitabbaṃ, kena na vasitabbanti nissayapaṭipannakaṃ. Tato pucchānukkamena vissajjetuṃ ‘‘tattha’’tyādimāha. Na kevalaṃ ettheva, atha kho nissayamuccanaṅgepi ‘‘byattenā’’ti āgato.
தத்த² எத்த² ச கோ விஸேஸோதி ஆஹ ‘‘எத்த² ச ‘ப்³யத்தோ’தி இமினா பரிஸுபட்டா²பகோ ப³ஹுஸ்ஸுதோ வேதி³தப்³போ³’’தி. இதா³னி பரிஸுபட்டா²பகலக்க²ணங் த³ஸ்ஸேதுங் ‘‘பரிஸுபட்டா²பகேன ஹீ’’திஆதி³மாஹ. தத்த² அபி⁴வினயேதி ஸகலே வினயபிடகே. வினேதுந்தி ஸிக்கா²பேதுங். த்³வே விப⁴ங்கா³ பகு³ணா வாசுக்³க³தா காதப்³பா³தி இத³ங் பரிபுச்சா²வஸேன உக்³க³ண்ஹனங் ஸந்தா⁴ய வுத்தந்தி வத³ந்தி. ஏகஸ்ஸ பமுட்ட²ங், இதரேஸங் பகு³ணங் ப⁴வெய்யாதி ஆஹ ‘‘தீஹி ஜனேஹி ஸத்³தி⁴ங் பரிவத்தனக்க²மா காதப்³பா³’’தி. அபி⁴த⁴ம்மேதி நாமரூபபரிச்சே²தே³. ஹெட்டி²மா வா தயோ வக்³கா³தி மஹாவக்³க³தோ ஹெட்டா² ஸகா³தா²வக்³கோ³ நிதா³னவக்³கோ³ க²ந்த⁴வக்³கோ³தி இமே தயோ வக்³கா³. ‘‘த⁴ம்மபத³ம்பி ஸஹ வத்து²னா உக்³க³ஹேதுங் வட்டதீ’’தி மஹாபச்சரியங் வுத்தத்தா ஜாதகபா⁴ணகேன ஸாட்ட²கத²ங் ஜாதகங் உக்³க³ஹெத்வாபி த⁴ம்மபத³ங் ஸஹ வத்து²னா உக்³க³ஹேதப்³ப³மேவ.
Tattha ettha ca ko visesoti āha ‘‘ettha ca ‘byatto’ti iminā parisupaṭṭhāpako bahussuto veditabbo’’ti. Idāni parisupaṭṭhāpakalakkhaṇaṃ dassetuṃ ‘‘parisupaṭṭhāpakena hī’’tiādimāha. Tattha abhivinayeti sakale vinayapiṭake. Vinetunti sikkhāpetuṃ. Dve vibhaṅgā paguṇā vācuggatā kātabbāti idaṃ paripucchāvasena uggaṇhanaṃ sandhāya vuttanti vadanti. Ekassa pamuṭṭhaṃ, itaresaṃ paguṇaṃ bhaveyyāti āha ‘‘tīhi janehi saddhiṃ parivattanakkhamā kātabbā’’ti. Abhidhammeti nāmarūpaparicchede. Heṭṭhimā vā tayo vaggāti mahāvaggato heṭṭhā sagāthāvaggo nidānavaggo khandhavaggoti ime tayo vaggā. ‘‘Dhammapadampi saha vatthunā uggahetuṃ vaṭṭatī’’ti mahāpaccariyaṃ vuttattā jātakabhāṇakena sāṭṭhakathaṃ jātakaṃ uggahetvāpi dhammapadaṃ saha vatthunā uggahetabbameva.
பஞ்சஹி பி⁴க்க²வே அங்கே³ஹி ஸமன்னாக³தேனாதிஆதீ³ஸு ந ஸாமணேரோ உபட்டா²பேதப்³போ³தி உபஜ்ஜா²யேன ஹுத்வா ஸாமணேரோ ந உபட்டா²பேதப்³போ³. அஸெக்கே²ன ஸீலக்க²ந்தே⁴னாதி அஸெக்க²ஸ்ஸ ஸீலக்க²ந்தோ⁴பி அஸெக்கோ² ஸீலக்க²ந்தோ⁴ நாம. அஸெக்க²ஸ்ஸ அயந்தி ஹி அஸெக்கோ², ஸீலக்க²ந்தோ⁴. ஏவங் ஸப்³ப³த்த². ஏவஞ்ச கத்வா விமுத்திஞாணத³ஸ்ஸனஸங்கா²தஸ்ஸ பச்சவெக்க²ணஞாணஸ்ஸபி வஸேன அபெக்கி²த்வா உப்பன்னா அயங் கதா². அஸெக்க²ஸீலந்தி ச ந அக்³க³ப²லஸீலமேவ அதி⁴ப்பேதங், அத² கோ² யங் கிஞ்சி அஸெக்க²ஸந்தானே பவத்தஸீலங் லோகியலோகுத்தரமிஸ்ஸகஸ்ஸ ஸீலஸ்ஸ இதா⁴தி⁴ப்பேதத்தா. ஸமாதி⁴க்க²ந்தா⁴தீ³ஸுபி விமுத்திக்க²ந்த⁴பரியோஸானேஸு அயமேவ நயோ, தஸ்மா யதா² ஸீலஸமாதி⁴பஞ்ஞாக்க²ந்தா⁴ லோகியமிஸ்ஸகா கதி²தா, ஏவங் விமுத்திக்க²ந்தோ⁴பீதி தத³ங்க³விமுத்திஆத³யோபி வேதி³தப்³பா³, ந படிப்பஸ்ஸத்³தி⁴விமுத்தி ஏவ. விமுத்திஞாணத³ஸ்ஸனங் பன லோகியமேவ. தேனேவ ஸங்யுத்தனிகாயட்ட²கதா²யங் (ஸங்॰நி॰ அட்ட²॰ 1.1.135) வுத்தங் ‘‘புரிமேஹி சதூஹி பதே³ஹி லோகியலோகுத்தரஸீலஸமாதி⁴பஞ்ஞாவிமுத்தியோ கதி²தா, விமுத்திஞாணத³ஸ்ஸனங் பச்சவெக்க²ணஞாணங் ஹோதி, தங் லோகியமேவா’’தி.
Pañcahi bhikkhave aṅgehi samannāgatenātiādīsu na sāmaṇero upaṭṭhāpetabboti upajjhāyena hutvā sāmaṇero na upaṭṭhāpetabbo. Asekkhena sīlakkhandhenāti asekkhassa sīlakkhandhopi asekkho sīlakkhandho nāma. Asekkhassa ayanti hi asekkho, sīlakkhandho. Evaṃ sabbattha. Evañca katvā vimuttiñāṇadassanasaṅkhātassa paccavekkhaṇañāṇassapi vasena apekkhitvā uppannā ayaṃ kathā. Asekkhasīlanti ca na aggaphalasīlameva adhippetaṃ, atha kho yaṃ kiñci asekkhasantāne pavattasīlaṃ lokiyalokuttaramissakassa sīlassa idhādhippetattā. Samādhikkhandhādīsupi vimuttikkhandhapariyosānesu ayameva nayo, tasmā yathā sīlasamādhipaññākkhandhā lokiyamissakā kathitā, evaṃ vimuttikkhandhopīti tadaṅgavimuttiādayopi veditabbā, na paṭippassaddhivimutti eva. Vimuttiñāṇadassanaṃ pana lokiyameva. Teneva saṃyuttanikāyaṭṭhakathāyaṃ (saṃ.ni. aṭṭha. 1.1.135) vuttaṃ ‘‘purimehi catūhi padehi lokiyalokuttarasīlasamādhipaññāvimuttiyo kathitā, vimuttiñāṇadassanaṃ paccavekkhaṇañāṇaṃ hoti, taṃ lokiyamevā’’ti.
அஸ்ஸத்³தோ⁴திஆதீ³ஸு தீஸு வத்தூ²ஸு ஸத்³தா⁴ ஏதஸ்ஸ நத்தீ²தி அஸ்ஸத்³தோ⁴. நத்தி² ஏதஸ்ஸ ஹிரீதி அஹிரிகோ, அகுஸலஸமாபத்தியா அஜிகு³ச்ச²மானஸ்ஸேதங் அதி⁴வசனங். ந ஒத்தப்பதீதி அனொத்தப்பீ, அகுஸலஸமாபத்தியா ந பா⁴யதீதி வுத்தங் ஹோதி. குச்சி²தங் ஸீத³தீதி குஸீதோ, ஹீனவீரியஸ்ஸேதங் அதி⁴வசனங். ஆரத்³த⁴ங் வீரியங் ஏதஸ்ஸாதி ஆரத்³த⁴வீரியோ, ஸம்மப்பதா⁴னயுத்தஸ்ஸேதங் அதி⁴வசனங். முட்டா² ஸதி ஏதஸ்ஸாதி முட்ட²ஸ்ஸதீ, நட்ட²ஸ்ஸதீதி வுத்தங் ஹோதி. உபட்டி²தா ஸதி ஏதஸ்ஸாதி உபட்டி²தஸ்ஸதீ, நிச்சங் ஆரம்மணாபி⁴முக²பவத்தஸதிஸ்ஸேதங் அதி⁴வசனங்.
Assaddhotiādīsu tīsu vatthūsu saddhā etassa natthīti assaddho. Natthi etassa hirīti ahiriko, akusalasamāpattiyā ajigucchamānassetaṃ adhivacanaṃ. Na ottappatīti anottappī, akusalasamāpattiyā na bhāyatīti vuttaṃ hoti. Kucchitaṃ sīdatīti kusīto, hīnavīriyassetaṃ adhivacanaṃ. Āraddhaṃ vīriyaṃ etassāti āraddhavīriyo, sammappadhānayuttassetaṃ adhivacanaṃ. Muṭṭhā sati etassāti muṭṭhassatī, naṭṭhassatīti vuttaṃ hoti. Upaṭṭhitā sati etassāti upaṭṭhitassatī, niccaṃ ārammaṇābhimukhapavattasatissetaṃ adhivacanaṃ.
அதி⁴ஸீலே ஸீலவிபன்னோ ச அஜ்ஜா²சாரே ஆசாரவிபன்னோ ச ஆபஜ்ஜித்வா அவுட்டி²தோ அதி⁴ப்பேதோ. ஸஸ்ஸதுச்சே²த³ஸங்கா²தங் அந்தங் க³ண்ஹாதி, கா³ஹயதீதி வா அந்தக்³கா³ஹிகா, மிச்சா²தி³ட்டி². புரிமானி த்³வே பதா³னீதி ‘‘ந படிப³லோ ஹோதி அந்தேவாஸிங் வா ஸத்³தி⁴விஹாரிங் வா கி³லானங் உபட்டா²துங் வா உபட்டா²பேதுங் வா, அனபி⁴ரதங் வூபகாஸேதுங் வா வூபகாஸாபேதுங் வா’’தி இமானி த்³வே பதா³னி.
Adhisīle sīlavipanno ca ajjhācāre ācāravipanno ca āpajjitvā avuṭṭhito adhippeto. Sassatucchedasaṅkhātaṃ antaṃ gaṇhāti, gāhayatīti vā antaggāhikā, micchādiṭṭhi. Purimāni dve padānīti ‘‘na paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā, anabhirataṃ vūpakāsetuṃ vā vūpakāsāpetuṃ vā’’ti imāni dve padāni.
அபி⁴ விஸிட்டோ² உத்தமோ ஸமாசாரோ அபி⁴ஸமாசாரோ, அபி⁴ஸமாசாரோவ ஆபி⁴ஸமாசாரிகோதி ச ஸிக்கி²தப்³ப³தோ ஸிக்கா²தி ச ஆபி⁴ஸமாசாரிகஸிக்கா². அபி⁴ஸமாசாரங் வா ஆரப்³ப⁴ பஞ்ஞத்தா ஸிக்கா² ஆபி⁴ஸமாசாரிகஸிக்கா², க²ந்த⁴கவத்தபரியாபன்னஸிக்கா²யேதங் அதி⁴வசனங். மக்³க³ப்³ரஹ்மசரியஸ்ஸ ஆதி³பூ⁴தாதி ஆதி³ப்³ரஹ்மசரியகா, உப⁴தோவிப⁴ங்க³பரியாபன்னஸிக்கா²யேதங் அதி⁴வசனங். தேனேவ ‘‘உப⁴தோவிப⁴ங்க³பரியாபன்னங் வா ஆதி³ப்³ரஹ்மசரியகங், க²ந்த⁴கவத்தபரியாபன்னங் ஆபி⁴ஸமாசாரிக’’ந்தி விஸுத்³தி⁴மக்³கே³ (விஸுத்³தி⁴॰ 1.11) வுத்தங், தஸ்மா ஸெக்க²பண்ணத்தியந்தி எத்த² ஸிக்கி²தப்³ப³தோ ஸெக்கா², ப⁴க³வதா பஞ்ஞத்தத்தா பண்ணத்தி, ஸப்³பா³பி உப⁴தோவிப⁴ங்க³பரியாபன்னா ஸிக்கா²பத³பண்ணத்தி ‘‘ஸெக்க²பண்ணத்தீ’’தி வுத்தாதி க³ஹேதப்³ப³ங். தேனேவ க³ண்டி²பதே³பி வுத்தங் ‘‘ஸெக்க²பண்ணத்தியந்தி பாராஜிகமாதி³ங் கத்வா ஸிக்கி²தப்³ப³ஸிக்கா²பத³பஞ்ஞத்திய’’ந்தி. ஸேஸமெத்த² உத்தானத்த²மேவாதி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.84).
Abhi visiṭṭho uttamo samācāro abhisamācāro, abhisamācārova ābhisamācārikoti ca sikkhitabbato sikkhāti ca ābhisamācārikasikkhā. Abhisamācāraṃ vā ārabbha paññattā sikkhā ābhisamācārikasikkhā, khandhakavattapariyāpannasikkhāyetaṃ adhivacanaṃ. Maggabrahmacariyassa ādibhūtāti ādibrahmacariyakā, ubhatovibhaṅgapariyāpannasikkhāyetaṃ adhivacanaṃ. Teneva ‘‘ubhatovibhaṅgapariyāpannaṃ vā ādibrahmacariyakaṃ, khandhakavattapariyāpannaṃ ābhisamācārika’’nti visuddhimagge (visuddhi. 1.11) vuttaṃ, tasmā sekkhapaṇṇattiyanti ettha sikkhitabbato sekkhā, bhagavatā paññattattā paṇṇatti, sabbāpi ubhatovibhaṅgapariyāpannā sikkhāpadapaṇṇatti ‘‘sekkhapaṇṇattī’’ti vuttāti gahetabbaṃ. Teneva gaṇṭhipadepi vuttaṃ ‘‘sekkhapaṇṇattiyanti pārājikamādiṃ katvā sikkhitabbasikkhāpadapaññattiya’’nti. Sesamettha uttānatthamevāti sāratthadīpaniyaṃ (sārattha. ṭī. mahāvagga 3.84).
உபஜ்ஜா²யாசரியகதா²யங் ந ஸாமணேரோ உபட்டா²பேதப்³போ³தி உபஜ்ஜா²யேன ஹுத்வா ந பப்³பா³ஜேதப்³போ³. அஸெக்க²ஸ்ஸ அயந்தி அஸெக்கோ², லோகியலோகுத்தரோ ஸீலக்க²ந்தோ⁴. அந்தக்³கா³ஹிகாயாதி ஸஸ்ஸதுச்சே²த³கொட்டா²ஸக்³கா³ஹிகாய. பச்சி²மானி த்³வேதி அப்பஸ்ஸுதோ ஹோதி, து³ப்பஞ்ஞோ ஹோதீதி இமானி த்³வே அங்கா³னி. பச்சி²மானி தீணீதி ந படிப³லோ உப்பன்னங் குக்குச்சங் த⁴ம்மதோ வினோதே³துங், ஆபத்திங் ந ஜானாதி, ஆபத்திவுட்டா²னங் ந ஜானாதீதி இமானி தீணி. குக்குச்சஸ்ஸ ஹி பாளிஅட்ட²கதா²னயஸங்கா²தத⁴ம்மதோ வினோதே³துங் அப்படிப³லதா நாம அப்³யத்தத்தா ஏவ ஹோதீதி ஸாபி ஆபத்திஅங்க³மேவ வுத்தா.
Upajjhāyācariyakathāyaṃ na sāmaṇero upaṭṭhāpetabboti upajjhāyena hutvā na pabbājetabbo. Asekkhassa ayanti asekkho, lokiyalokuttaro sīlakkhandho. Antaggāhikāyāti sassatucchedakoṭṭhāsaggāhikāya. Pacchimāni dveti appassuto hoti, duppañño hotīti imāni dve aṅgāni. Pacchimāni tīṇīti na paṭibalo uppannaṃ kukkuccaṃ dhammato vinodetuṃ, āpattiṃ na jānāti, āpattivuṭṭhānaṃ na jānātīti imāni tīṇi. Kukkuccassa hi pāḷiaṭṭhakathānayasaṅkhātadhammato vinodetuṃ appaṭibalatā nāma abyattattā eva hotīti sāpi āpattiaṅgameva vuttā.
அபி⁴ விஸிட்டோ² உத்தமோ ஸமாசாரோ அபி⁴ஸமாசாரோ, வத்தப்படிபத்திஸீலங், தங் ஆரப்³ப⁴ பஞ்ஞத்தா க²ந்த⁴கஸிக்கா²பத³ஸங்கா²தா ஸிக்கா² ஆபி⁴ஸமாசாரிகா. ஸிக்கா²பத³ம்பி ஹி தத³த்த²பரிபூரணத்தி²கேஹி உக்³க³ஹணாதி³வஸேன ஸிக்கி²தப்³ப³தோ ஸிக்கா²தி வுச்சதி. மக்³க³ப்³ரஹ்மசரியஸ்ஸ ஆதி³பூ⁴தா காரணபூ⁴தா ஆதி³ப்³ரஹ்மசரியகா, உப⁴தோவிப⁴ங்க³பரியாபன்னஸிக்கா²பத³ங். தேனேவெத்த² விஸுத்³தி⁴மக்³கே³பி (விஸுத்³தி⁴॰ 1.11) ‘‘உப⁴தோவிப⁴ங்க³பரியாபன்னங் ஸிக்கா²பத³ங் ஆதி³ப்³ரஹ்மசரியகங், க²ந்த⁴கவத்தபரியாபன்னங் ஆபி⁴ஸமாசாரிக’’ந்தி வுத்தங், தஸ்மா ஸெக்க²பண்ணத்தியந்தி எத்த² ஸிக்கி²தப்³ப³தோ ஸெக்கா², ப⁴க³வதாவ பஞ்ஞத்தத்தா பஞ்ஞத்தி. ஸப்³பா³பி உப⁴தோவிப⁴ங்க³பரியாபன்னா ஸிக்கா²பத³பண்ணத்தி ‘‘ஸெக்க²பண்ணத்தீ’’தி வுத்தாதி க³ஹேதப்³ப³ங். நாமரூபபரிச்சே²தே³தி எத்த² குஸலத்திகாதீ³ஹி வுத்தங் ஜாதிபூ⁴மிபுக்³க³லஸம்பயோக³வத்தா²ரம்மணகம்மத்³வாரலக்க²ணரஸாதி³பே⁴தே³ஹி வேத³னாக்க²ந்தா⁴தி³சதுப்³பி³த⁴ங் ஸனிப்³பா³னங் நாமங், பூ⁴தோபாதா³யபே⁴த³ங் ரூபஞ்ச பரிச்சி²ந்தி³த்வா ஜானநபஞ்ஞா, தப்பகாஸகோ ச க³ந்தோ² நாமரூபபரிச்சே²தோ³ நாம. இமினா அபி⁴த⁴ம்மத்த²குஸலேன ப⁴விதப்³ப³ந்தி த³ஸ்ஸேதி. ஸிக்கா²பேதுந்தி உக்³க³ண்ஹாபேதுந்தி விமதிவினோத³னியங் (வி॰ வி॰ டீ॰ மஹாவக்³க³ 2.84) வுத்தங்.
Abhi visiṭṭho uttamo samācāro abhisamācāro, vattappaṭipattisīlaṃ, taṃ ārabbha paññattā khandhakasikkhāpadasaṅkhātā sikkhā ābhisamācārikā. Sikkhāpadampi hi tadatthaparipūraṇatthikehi uggahaṇādivasena sikkhitabbato sikkhāti vuccati. Maggabrahmacariyassa ādibhūtā kāraṇabhūtā ādibrahmacariyakā, ubhatovibhaṅgapariyāpannasikkhāpadaṃ. Tenevettha visuddhimaggepi (visuddhi. 1.11) ‘‘ubhatovibhaṅgapariyāpannaṃ sikkhāpadaṃ ādibrahmacariyakaṃ, khandhakavattapariyāpannaṃ ābhisamācārika’’nti vuttaṃ, tasmā sekkhapaṇṇattiyanti ettha sikkhitabbato sekkhā, bhagavatāva paññattattā paññatti. Sabbāpi ubhatovibhaṅgapariyāpannā sikkhāpadapaṇṇatti ‘‘sekkhapaṇṇattī’’ti vuttāti gahetabbaṃ. Nāmarūpaparicchedeti ettha kusalattikādīhi vuttaṃ jātibhūmipuggalasampayogavatthārammaṇakammadvāralakkhaṇarasādibhedehi vedanākkhandhādicatubbidhaṃ sanibbānaṃ nāmaṃ, bhūtopādāyabhedaṃ rūpañca paricchinditvā jānanapaññā, tappakāsako ca gantho nāmarūpaparicchedo nāma. Iminā abhidhammatthakusalena bhavitabbanti dasseti. Sikkhāpetunti uggaṇhāpetunti vimativinodaniyaṃ (vi. vi. ṭī. mahāvagga 2.84) vuttaṃ.
153. ஆயஸ்மதோ நிஸ்ஸாய வச்சா²மீதி எத்த² ஆயஸ்மதோதி உபயோக³த்தே² ஸாமிவசனங், ஆயஸ்மந்தங் நிஸ்ஸாய வஸிஸ்ஸாமீதி அத்தோ². யங் பன வுத்தங் ஸமந்தபாஸாதி³காயங் (மஹாவ॰ அட்ட²॰ 76) ‘‘ப்³யத்தோ…பே॰… வுத்தலக்க²ணோயேவா’’தி, தங் பரிஸூபட்டா²கப³ஹுஸ்ஸுதங் ஸந்தா⁴ய வத³தி. பப்³ப³ஜ்ஜாஉபஸம்பத³த⁴ம்மந்தேவாஸிகேஹி பன…பே॰… தாவ வத்தங் காதப்³ப³ந்தி பப்³ப³ஜ்ஜாசரியஉபஸம்பதா³சரியத⁴ம்மாசரியானங் ஏதேஹி யதா²வுத்தவத்தங் காதப்³ப³ங். தத்த² யேன ஸிக்கா²பதா³னி தி³ன்னானி, அயங் பப்³ப³ஜ்ஜாசரியோ. யேன உபஸம்பத³கம்மவாசா வுத்தா, அயங் உபஸம்பதா³சரியோ. யோ உத்³தே³ஸங் வா பரிபுச்ச²ங் வா தே³தி, அயங் த⁴ம்மாசரியோதி வேதி³தப்³ப³ங். ஸேஸமெத்த² உத்தானத்த²மேவ.
153.Āyasmato nissāya vacchāmīti ettha āyasmatoti upayogatthe sāmivacanaṃ, āyasmantaṃ nissāya vasissāmīti attho. Yaṃ pana vuttaṃ samantapāsādikāyaṃ (mahāva. aṭṭha. 76) ‘‘byatto…pe… vuttalakkhaṇoyevā’’ti, taṃ parisūpaṭṭhākabahussutaṃ sandhāya vadati. Pabbajjāupasampadadhammantevāsikehi pana…pe… tāva vattaṃ kātabbanti pabbajjācariyaupasampadācariyadhammācariyānaṃ etehi yathāvuttavattaṃ kātabbaṃ. Tattha yena sikkhāpadāni dinnāni, ayaṃ pabbajjācariyo. Yena upasampadakammavācā vuttā, ayaṃ upasampadācariyo. Yo uddesaṃ vā paripucchaṃ vā deti, ayaṃ dhammācariyoti veditabbaṃ. Sesamettha uttānatthameva.
154. நிஸ்ஸயபடிப்பஸ்ஸத்³தி⁴கதா²யங் தி³ஸங் க³தோதி புன ஆக³ந்துகாமோ, அனாக³ந்துகாமோ வா ஹுத்வா வாஸத்தா²ய கஞ்சி தி³ஸங் க³தோ. பி⁴க்கு²ஸ்ஸ ஸபா⁴க³தந்தி பேஸலபா⁴வங். ஓலோகெத்வாதி உபபரிக்கி²த்வா. விப்³ப⁴ந்தே…பே॰… தத்த² க³ந்தப்³ப³ந்தி எத்த² ‘‘ஸசே கேனசி கரணீயேன தத³ஹேவ க³ந்துங் அஸக்கொந்தோ ‘கதிபாஹேன க³மிஸ்ஸாமீ’தி க³மனே ஸஉஸ்ஸாஹோ ஹோதி, ரக்க²தீ’’தி வத³ந்தி. மா இத⁴ படிக்கமீதி மா இத⁴ பவிஸி. தத்ரேவ வஸிதப்³ப³ந்தி தத்தே²வ நிஸ்ஸயங் க³ஹெத்வா வஸிதப்³ப³ங். தங்யேவ விஹாரங்…பே॰… வஸிதுங் வட்டதீதி எத்த² உபஜ்ஜா²யேன பரிச்சத்தத்தா உபஜ்ஜா²யஸமோதா⁴னபரிஹாரோ நத்தி², தஸ்மா உபஜ்ஜா²யஸமோதா⁴னக³தஸ்ஸபி ஆசரியஸ்ஸ ஸந்திகே க³ஹிதனிஸ்ஸயோ ந படிப்பஸ்ஸம்ப⁴தி.
154. Nissayapaṭippassaddhikathāyaṃ disaṃ gatoti puna āgantukāmo, anāgantukāmo vā hutvā vāsatthāya kañci disaṃ gato. Bhikkhussa sabhāgatanti pesalabhāvaṃ. Oloketvāti upaparikkhitvā. Vibbhante…pe… tattha gantabbanti ettha ‘‘sace kenaci karaṇīyena tadaheva gantuṃ asakkonto ‘katipāhena gamissāmī’ti gamane saussāho hoti, rakkhatī’’ti vadanti. Mā idha paṭikkamīti mā idha pavisi. Tatreva vasitabbanti tattheva nissayaṃ gahetvā vasitabbaṃ. Taṃyeva vihāraṃ…pe… vasituṃ vaṭṭatīti ettha upajjhāyena pariccattattā upajjhāyasamodhānaparihāro natthi, tasmā upajjhāyasamodhānagatassapi ācariyassa santike gahitanissayo na paṭippassambhati.
ஆசரியம்ஹா நிஸ்ஸயபடிப்பஸ்ஸத்³தீ⁴ஸு ஆசரியோ பக்கந்தோ வா ஹோதீதி எத்த² ‘‘பக்கந்தோதி தி³ஸங் க³தோ’’திஆதி³னா உபஜ்ஜா²யஸ்ஸ பக்கமனே யோ வினிச்ச²யோ வுத்தோ, ஸோ தத்த² வுத்தனயேனேவ இதா⁴பி ஸக்கா விஞ்ஞாதுந்தி தங் அவத்வா ‘‘கோசி ஆசரியோ ஆபுச்சி²த்வா பக்கமதீ’’திஆதி³னா அஞ்ஞோயேவ நயோ ஆரத்³தோ⁴. அயஞ்ச நயோ உபஜ்ஜா²யபக்கமனேபி வேதி³தப்³போ³யேவ. ஈதி³ஸேஸு ஹி டா²னேஸு ஏகத்த²வுத்தலக்க²ணங் அஞ்ஞத்தா²பி த³ட்ட²ப்³ப³ங். ஸசே த்³வே லெட்³டு³பாதே அதிக்கமித்வா நிவத்ததி, படிப்பஸ்ஸத்³தோ⁴ ஹோதீதி எத்த² எத்தாவதா தி³ஸாபக்கந்தோ நாம ஹோதீதி அந்தேவாஸிகே அனிக்கி²த்தது⁴ரேபி நிஸ்ஸயோ படிப்பஸ்ஸம்ப⁴தி. ஆசரியுபஜ்ஜா²யா த்³வே லெட்³டு³பாதே அதிக்கம்ம அஞ்ஞஸ்மிங் விஹாரே வஸந்தீதி ப³ஹிஉபசாரஸீமாயங் அந்தேவாஸிகஸத்³தி⁴விஹாரிகானங் வஸனட்டா²னதோ த்³வே லெட்³டு³பாதே அதிக்கம்ம அஞ்ஞஸ்மிங் ஸேனாஸனே வஸந்தி, அந்தோஉபசாரஸீமாயங் பன த்³வே லெட்³டு³பாதே அதிக்கமித்வாபி வஸதோ நிஸ்ஸயோ ந படிப்பஸ்ஸம்ப⁴தி. ‘‘ஸசேபி ஆசரியோ முஞ்சிதுகாமோவ ஹுத்வா நிஸ்ஸயபணாமனாய பணாமேதீ’’திஆதி³ ஸப்³ப³ங் உபஜ்ஜா²யஸ்ஸ ஆணத்தியம்பி வேதி³தப்³ப³ந்தி ஸாரத்த²தீ³பனியங் (ஸாரத்த²॰ டீ॰ மஹாவக்³க³ 3.83) வுத்தங்.
Ācariyamhā nissayapaṭippassaddhīsu ācariyo pakkanto vā hotīti ettha ‘‘pakkantoti disaṃ gato’’tiādinā upajjhāyassa pakkamane yo vinicchayo vutto, so tattha vuttanayeneva idhāpi sakkā viññātunti taṃ avatvā ‘‘koci ācariyo āpucchitvā pakkamatī’’tiādinā aññoyeva nayo āraddho. Ayañca nayo upajjhāyapakkamanepi veditabboyeva. Īdisesu hi ṭhānesu ekatthavuttalakkhaṇaṃ aññatthāpi daṭṭhabbaṃ. Sace dve leḍḍupāte atikkamitvā nivattati, paṭippassaddho hotīti ettha ettāvatā disāpakkanto nāma hotīti antevāsike anikkhittadhurepi nissayo paṭippassambhati. Ācariyupajjhāyā dve leḍḍupāte atikkamma aññasmiṃ vihāre vasantīti bahiupacārasīmāyaṃ antevāsikasaddhivihārikānaṃ vasanaṭṭhānato dve leḍḍupāte atikkamma aññasmiṃ senāsane vasanti, antoupacārasīmāyaṃ pana dve leḍḍupāte atikkamitvāpi vasato nissayo na paṭippassambhati. ‘‘Sacepi ācariyo muñcitukāmova hutvā nissayapaṇāmanāya paṇāmetī’’tiādi sabbaṃ upajjhāyassa āṇattiyampi veditabbanti sāratthadīpaniyaṃ (sārattha. ṭī. mahāvagga 3.83) vuttaṃ.
153. ஸாஹூதி ஸாது⁴ ஸுந்த³ரங். லஹூதி அக³ரு, ஸுப⁴ரதாதி அத்தோ². ஓபாயிகந்தி உபாயபடிஸங்யுத்தங், ஏவங் படிபஜ்ஜனங் நித்த²ரணுபாயோதி அத்தோ². பதிரூபந்தி ஸாமீசிகம்மமித³ந்தி அத்தோ² . பாஸாதி³கேனாதி பஸாதா³வஹேன, காயவசீபயோகே³ன ஸம்பாதே³ஹீதி அத்தோ². காயேனாதி ஏதத³த்த²விஞ்ஞாபகங் ஹத்த²முத்³தா³தி³ங் த³ஸ்ஸெந்தோ காயேன விஞ்ஞாபேதி. ‘‘ஸாதூ⁴’’தி ஸம்படிச்ச²னங் ஸந்தா⁴யாதி உபஜ்ஜா²யேன ‘‘ஸாஹூ’’திஆதீ³ஸு வுத்தேஸு ஸத்³தி⁴விஹாரிகஸ்ஸ ‘‘ஸாதூ⁴’’தி ஸம்படிச்ச²னவசனங் ஸந்தா⁴ய ‘‘காயேன விஞ்ஞாபேதீ’’திஆதி³ வுத்தந்தி அதி⁴ப்பாயோ. ஆயாசனதா³னமத்தேனாதி ஸத்³தி⁴விஹாரிகஸ்ஸ பட²மங் ஆயாசனமத்தேன, ததோ உபஜ்ஜா²யஸ்ஸ ச ‘‘ஸாஹூ’’திஆதி³னா வசனமத்தேனாதி அத்தோ². ஆசரியஸ்ஸ ஸந்திகே நிஸ்ஸயக்³க³ஹணே ஆயஸ்மதோ நிஸ்ஸாய வச்சா²மீதி ஆயஸ்மந்தங் நிஸ்ஸாய வஸிஸ்ஸாமீதி அத்தோ².
153.Sāhūti sādhu sundaraṃ. Lahūti agaru, subharatāti attho. Opāyikanti upāyapaṭisaṃyuttaṃ, evaṃ paṭipajjanaṃ nittharaṇupāyoti attho. Patirūpanti sāmīcikammamidanti attho . Pāsādikenāti pasādāvahena, kāyavacīpayogena sampādehīti attho. Kāyenāti etadatthaviññāpakaṃ hatthamuddādiṃ dassento kāyena viññāpeti. ‘‘Sādhū’’ti sampaṭicchanaṃ sandhāyāti upajjhāyena ‘‘sāhū’’tiādīsu vuttesu saddhivihārikassa ‘‘sādhū’’ti sampaṭicchanavacanaṃ sandhāya ‘‘kāyena viññāpetī’’tiādi vuttanti adhippāyo. Āyācanadānamattenāti saddhivihārikassa paṭhamaṃ āyācanamattena, tato upajjhāyassa ca ‘‘sāhū’’tiādinā vacanamattenāti attho. Ācariyassa santike nissayaggahaṇe āyasmato nissāya vacchāmīti āyasmantaṃ nissāya vasissāmīti attho.
154. நிஸ்ஸயபடிப்பஸ்ஸத்³தி⁴கதா²யங் யோ வா ஏகஸம்போ⁴க³பரிபோ⁴கோ³, தஸ்ஸ ஸந்திகே நிஸ்ஸயோ க³ஹேதப்³போ³தி இமினா லஜ்ஜீஸு ஏவ நிஸ்ஸயக்³க³ஹணங் நியோஜேதி அலஜ்ஜீஸு படிக்கி²த்தத்தா. எத்த² ச பரிபோ⁴க³ஸத்³தே³ன ஏககம்மாதி³கோ ஸங்வாஸோ க³ஹிதோ பச்சயபரிபோ⁴க³ஸ்ஸ ஸம்போ⁴க³ஸத்³தே³ன க³ஹிதத்தா. ஏதேன ச ஸம்போ⁴க³ஸங்வாஸானங் அலஜ்ஜீஹி ஸத்³தி⁴ங் ந கத்தப்³ப³தங் த³ஸ்ஸேதி. பரிஹாரோ நத்தீ²தி ஆபத்திபரிஹாரோ நத்தி². தாதி³ஸோதி யத்த² நிஸ்ஸயோ க³ஹிதபுப்³போ³, யோ ச ஏகஸம்போ⁴க³பரிபோ⁴கோ³, தாதி³ஸோ. ததா² வுத்தந்தி ‘‘லஹுங் ஆக³மிஸ்ஸதீ’’தி வுத்தஞ்சேதி அத்தோ². சத்தாரி பஞ்ச தி³வஸானீதி இத³ங் உபலக்க²ணமத்தங். யதி³ ஏகாஹத்³வீஹேன ஸபா⁴க³தா பஞ்ஞாயதி, ஞாததி³வஸே க³ஹேதப்³போ³வ. அதா²பி சதுபஞ்சாஹேனபி ந பஞ்ஞாயதி, யத்தகேஹி தி³வஸேஹி பஞ்ஞாயதி, தத்தகானி அதிக்காமேதப்³பா³னி. ஸபா⁴க³தங் ஓலோகேமீதி பன லேஸோ ந காதப்³போ³. த³ஹரா ஸுணந்தீதி எத்த² அஸுத்வாபி ‘‘ஆக³மிஸ்ஸதி, கேனசி அந்தராயேன சிராயந்தீ’’தி ஸஞ்ஞாய ஸதிபி லப்³ப⁴தேவ பரிஹாரோ . தேனாஹ ‘‘இதே⁴வாஹங் வஸிஸ்ஸாமீதி பஹிணதி, பரிஹாரோ நத்தீ²’’தி. ஏகதி³வஸம்பி பரிஹாரோ நத்தீ²தி க³மனே நிருஸ்ஸாஹங் ஸந்தா⁴ய வுத்தங், ஸஉஸ்ஸாஹஸ்ஸ பன ஸேனாஸனபடிஸாமனாதி³வஸேன கதிபாஹே க³தேபி ந தோ³ஸோ.
154. Nissayapaṭippassaddhikathāyaṃ yo vā ekasambhogaparibhogo, tassa santike nissayo gahetabboti iminā lajjīsu eva nissayaggahaṇaṃ niyojeti alajjīsu paṭikkhittattā. Ettha ca paribhogasaddena ekakammādiko saṃvāso gahito paccayaparibhogassa sambhogasaddena gahitattā. Etena ca sambhogasaṃvāsānaṃ alajjīhi saddhiṃ na kattabbataṃ dasseti. Parihāro natthīti āpattiparihāro natthi. Tādisoti yattha nissayo gahitapubbo, yo ca ekasambhogaparibhogo, tādiso. Tathā vuttanti ‘‘lahuṃ āgamissatī’’ti vuttañceti attho. Cattāri pañca divasānīti idaṃ upalakkhaṇamattaṃ. Yadi ekāhadvīhena sabhāgatā paññāyati, ñātadivase gahetabbova. Athāpi catupañcāhenapi na paññāyati, yattakehi divasehi paññāyati, tattakāni atikkāmetabbāni. Sabhāgataṃ olokemīti pana leso na kātabbo. Daharā suṇantīti ettha asutvāpi ‘‘āgamissati, kenaci antarāyena cirāyantī’’ti saññāya satipi labbhateva parihāro . Tenāha ‘‘idhevāhaṃ vasissāmīti pahiṇati, parihāro natthī’’ti. Ekadivasampi parihāro natthīti gamane nirussāhaṃ sandhāya vuttaṃ, saussāhassa pana senāsanapaṭisāmanādivasena katipāhe gatepi na doso.
தத்ரேவ வஸிதப்³ப³ந்தி தத்ர ஸபா⁴க³ட்டா²னே ஏவ நிஸ்ஸயங் க³ஹெத்வா வஸிதப்³ப³ங். தங்யேவ விஹாரங்…பே॰… வஸிதுங் வட்டதீதி இமினா உபஜ்ஜா²யே ஸங்க³ண்ஹந்தேயேவ தங்ஸமோதா⁴னே நிஸ்ஸயபடிப்பஸ்ஸத்³தி⁴ வுத்தா, தஸ்மிங் பன கோதே⁴ன வா க³ணனிரபெக்க²தாய வா அஸங்க³ண்ஹந்தே அஞ்ஞேஸு க³ஹிதோ நிஸ்ஸயோ ந படிப்பஸ்ஸம்ப⁴தீதி த³ஸ்ஸேதி.
Tatreva vasitabbanti tatra sabhāgaṭṭhāne eva nissayaṃ gahetvā vasitabbaṃ. Taṃyeva vihāraṃ…pe… vasituṃ vaṭṭatīti iminā upajjhāye saṅgaṇhanteyeva taṃsamodhāne nissayapaṭippassaddhi vuttā, tasmiṃ pana kodhena vā gaṇanirapekkhatāya vā asaṅgaṇhante aññesu gahito nissayo na paṭippassambhatīti dasseti.
ஆசரியம்ஹா நிஸ்ஸயபடிப்பஸ்ஸத்³தி⁴யங் வுத்தோ ‘‘கோசி ஆசரியோ’’திஆதி³கோ நயோ உபஜ்ஜா²யபக்கமனாதீ³ஸுபி நெத்வா தத்த² ச வுத்தோ இதா⁴பி நெத்வா யதா²ரஹங் யோஜேதப்³போ³. த்³வே லெட்³டு³பாதே அதிக்கம்ம அஞ்ஞஸ்மிங் விஹாரே வஸந்தீதி உபசாரஸீமதோ ப³ஹி அஞ்ஞஸ்மிங் விஹாரே அந்தேவாஸிகாதீ³னங் வஸனட்டா²னதோ த்³வே லெட்³டு³பாதே அதிக்கமித்வா வஸந்தி. தேன ப³ஹிஉபசாரேபி அந்தேவாஸிகாதீ³னங் வஸனட்டா²னதோ த்³வின்னங் லெட்³டு³பாதானங் அந்தரே ஆஸன்னே பதே³ஸே வஸதி, நிஸ்ஸயோ ந படிப்பஸ்ஸம்ப⁴தீதி த³ஸ்ஸேதி. அந்தோஉபசாரஸீமாயங் பன த்³வே லெட்³டு³பாதே அதிக்கமித்வா வஸதோ நிஸ்ஸயோ ந படிப்பஸ்ஸம்ப⁴தேவாதி விமதிவினோத³னியங் (வி॰ வி॰ டீ॰ மஹாவக்³க³ 2.83) வுத்தங்.
Ācariyamhā nissayapaṭippassaddhiyaṃ vutto ‘‘koci ācariyo’’tiādiko nayo upajjhāyapakkamanādīsupi netvā tattha ca vutto idhāpi netvā yathārahaṃ yojetabbo. Dve leḍḍupāte atikkamma aññasmiṃ vihāre vasantīti upacārasīmato bahi aññasmiṃ vihāre antevāsikādīnaṃ vasanaṭṭhānato dve leḍḍupāte atikkamitvā vasanti. Tena bahiupacārepi antevāsikādīnaṃ vasanaṭṭhānato dvinnaṃ leḍḍupātānaṃ antare āsanne padese vasati, nissayo na paṭippassambhatīti dasseti. Antoupacārasīmāyaṃ pana dve leḍḍupāte atikkamitvā vasato nissayo na paṭippassambhatevāti vimativinodaniyaṃ (vi. vi. ṭī. mahāvagga 2.83) vuttaṃ.
இதி வினயஸங்க³ஹஸங்வண்ணனாபூ⁴தே வினயாலங்காரே
Iti vinayasaṅgahasaṃvaṇṇanābhūte vinayālaṅkāre
நிஸ்ஸயவினிச்ச²யகதா²லங்காரோ நாம
Nissayavinicchayakathālaṅkāro nāma
தேவீஸதிமோ பரிச்சே²தோ³.
Tevīsatimo paricchedo.
