| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၂. နိသ္သေဏိဒာယကတ္ထေရအပဒာနဝဏ္ဏနာ
2. Nisseṇidāyakattheraapadānavaṇṇanā
ကောဏ္ဍညသ္သ ဘဂဝတောတိအာဒိကံ အာယသ္မတော နိသ္သေဏိဒာယကတ္ထေရသ္သ အပဒာနံ။ အယမ္ပိ ပုရိမဇိနဝရေသု ကတာဓိကာရော အနေကာသု ဇာတီသု ဝိဝဋ္ဋူပနိသ္သယာနိ ပုညာနိ ဥပစိနန္တော ကောဏ္ဍညသ္သ ဘဂဝတော ကာလေ ဝဍ္ဎကိကုလေ နိဗ္ဗတ္တော သဒ္ဓော ပသန္နော ဘဂဝတော ဓမ္မဒေသနံ သုတ္ဝာ ပသန္နမာနသော ဘဂဝတော ဝသနပာသာဒသ္သာရောဟနတ္ထာယ သာရကဋ္ဌမယံ နိသ္သေဏိံ ကတ္ဝာ ဥသ္သာပေတ္ဝာ ဌပေသိ။ ဘဂဝာ တသ္သ ပသာဒသံဝဍ္ဎနတ္ထာယ ပသ္သန္တသ္သေဝ ဥပရိပာသာဒံ အာရုဟိ။ သော အတီဝ ပသန္နော တေနေဝ ပီတိသောမနသ္သေန ကာလံ ကတ္ဝာ ဒေဝလောကေ နိဗ္ဗတ္တော တတ္ထ ဒိဗ္ဗသမ္ပတ္တိံ အနုဘဝိတ္ဝာ မနုသ္သေသု ဇာယမာနော နိသ္သေဏိဒာနနိသ္သန္ဒေန ဥစ္စကုလေ နိဗ္ဗတ္တော မနုသ္သသုခံ အနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဧကသ္မိံ ကုလေ နိဗ္ဗတ္တော သတ္ထု ဓမ္မဒေသနံ သုတ္ဝာ သဒ္ဓာဇာတော ပဗ္ဗဇိတော နစိရသ္သေဝ အရဟာ အဟောသိ။
Koṇḍaññassabhagavatotiādikaṃ āyasmato nisseṇidāyakattherassa apadānaṃ. Ayampi purimajinavaresu katādhikāro anekāsu jātīsu vivaṭṭūpanissayāni puññāni upacinanto koṇḍaññassa bhagavato kāle vaḍḍhakikule nibbatto saddho pasanno bhagavato dhammadesanaṃ sutvā pasannamānaso bhagavato vasanapāsādassārohanatthāya sārakaṭṭhamayaṃ nisseṇiṃ katvā ussāpetvā ṭhapesi. Bhagavā tassa pasādasaṃvaḍḍhanatthāya passantasseva uparipāsādaṃ āruhi. So atīva pasanno teneva pītisomanassena kālaṃ katvā devaloke nibbatto tattha dibbasampattiṃ anubhavitvā manussesu jāyamāno nisseṇidānanissandena uccakule nibbatto manussasukhaṃ anubhavitvā imasmiṃ buddhuppāde ekasmiṃ kule nibbatto satthu dhammadesanaṃ sutvā saddhājāto pabbajito nacirasseva arahā ahosi.
၉. သော အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ကောဏ္ဍညသ္သ ဘဂဝတောတိအာဒိမာဟ။ တတ္ထ ကောဏ္ဍညသ္သာတိ ကုစ္ဆိတော ဟုတ္ဝာ ဍေတိ ပဝတ္တတီတိ ကောဏ္ဍော, လာမကသတ္တော, ကောဏ္ဍတော အညောတိ ကောဏ္ဍညော, အလာမကော ဥတ္တမပုရိသောတိ အတ္ထော။ အထ ဝာ ဗ္ရာဟ္မဏဂောတ္တေသု ကောဏ္ဍညဂောတ္တေ ဥပ္ပန္နတ္တာ ‘‘ကောဏ္ဍညော’’တိ ဂောတ္တဝသေန တသ္သ နာမံ, တသ္သ ကောဏ္ဍညသ္သ။ သေသံ ပာကဋမေဝာတိ။
9. So attano pubbakammaṃ saritvā somanassajāto pubbacaritāpadānaṃ pakāsento koṇḍaññassa bhagavatotiādimāha. Tattha koṇḍaññassāti kucchito hutvā ḍeti pavattatīti koṇḍo, lāmakasatto, koṇḍato aññoti koṇḍañño, alāmako uttamapurisoti attho. Atha vā brāhmaṇagottesu koṇḍaññagotte uppannattā ‘‘koṇḍañño’’ti gottavasena tassa nāmaṃ, tassa koṇḍaññassa. Sesaṃ pākaṭamevāti.
နိသ္သေဏိဒာယကတ္ထေရအပဒာနဝဏ္ဏနာ သမတ္တာ။
Nisseṇidāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၂. နိသ္သေဏိဒာယကတ္ထေရအပဒာနံ • 2. Nisseṇidāyakattheraapadānaṃ
