| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೨. ನಿಸ್ಸೇಣಿದಾಯಕತ್ಥೇರಅಪದಾನವಣ್ಣನಾ
2. Nisseṇidāyakattheraapadānavaṇṇanā
ಕೋಣ್ಡಞ್ಞಸ್ಸ ಭಗವತೋತಿಆದಿಕಂ ಆಯಸ್ಮತೋ ನಿಸ್ಸೇಣಿದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಜಿನವರೇಸು ಕತಾಧಿಕಾರೋ ಅನೇಕಾಸು ಜಾತೀಸು ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಕೋಣ್ಡಞ್ಞಸ್ಸ ಭಗವತೋ ಕಾಲೇ ವಡ್ಢಕಿಕುಲೇ ನಿಬ್ಬತ್ತೋ ಸದ್ಧೋ ಪಸನ್ನೋ ಭಗವತೋ ಧಮ್ಮದೇಸನಂ ಸುತ್ವಾ ಪಸನ್ನಮಾನಸೋ ಭಗವತೋ ವಸನಪಾಸಾದಸ್ಸಾರೋಹನತ್ಥಾಯ ಸಾರಕಟ್ಠಮಯಂ ನಿಸ್ಸೇಣಿಂ ಕತ್ವಾ ಉಸ್ಸಾಪೇತ್ವಾ ಠಪೇಸಿ। ಭಗವಾ ತಸ್ಸ ಪಸಾದಸಂವಡ್ಢನತ್ಥಾಯ ಪಸ್ಸನ್ತಸ್ಸೇವ ಉಪರಿಪಾಸಾದಂ ಆರುಹಿ। ಸೋ ಅತೀವ ಪಸನ್ನೋ ತೇನೇವ ಪೀತಿಸೋಮನಸ್ಸೇನ ಕಾಲಂ ಕತ್ವಾ ದೇವಲೋಕೇ ನಿಬ್ಬತ್ತೋ ತತ್ಥ ದಿಬ್ಬಸಮ್ಪತ್ತಿಂ ಅನುಭವಿತ್ವಾ ಮನುಸ್ಸೇಸು ಜಾಯಮಾನೋ ನಿಸ್ಸೇಣಿದಾನನಿಸ್ಸನ್ದೇನ ಉಚ್ಚಕುಲೇ ನಿಬ್ಬತ್ತೋ ಮನುಸ್ಸಸುಖಂ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲೇ ನಿಬ್ಬತ್ತೋ ಸತ್ಥು ಧಮ್ಮದೇಸನಂ ಸುತ್ವಾ ಸದ್ಧಾಜಾತೋ ಪಬ್ಬಜಿತೋ ನಚಿರಸ್ಸೇವ ಅರಹಾ ಅಹೋಸಿ।
Koṇḍaññassabhagavatotiādikaṃ āyasmato nisseṇidāyakattherassa apadānaṃ. Ayampi purimajinavaresu katādhikāro anekāsu jātīsu vivaṭṭūpanissayāni puññāni upacinanto koṇḍaññassa bhagavato kāle vaḍḍhakikule nibbatto saddho pasanno bhagavato dhammadesanaṃ sutvā pasannamānaso bhagavato vasanapāsādassārohanatthāya sārakaṭṭhamayaṃ nisseṇiṃ katvā ussāpetvā ṭhapesi. Bhagavā tassa pasādasaṃvaḍḍhanatthāya passantasseva uparipāsādaṃ āruhi. So atīva pasanno teneva pītisomanassena kālaṃ katvā devaloke nibbatto tattha dibbasampattiṃ anubhavitvā manussesu jāyamāno nisseṇidānanissandena uccakule nibbatto manussasukhaṃ anubhavitvā imasmiṃ buddhuppāde ekasmiṃ kule nibbatto satthu dhammadesanaṃ sutvā saddhājāto pabbajito nacirasseva arahā ahosi.
೯. ಸೋ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಕೋಣ್ಡಞ್ಞಸ್ಸ ಭಗವತೋತಿಆದಿಮಾಹ। ತತ್ಥ ಕೋಣ್ಡಞ್ಞಸ್ಸಾತಿ ಕುಚ್ಛಿತೋ ಹುತ್ವಾ ಡೇತಿ ಪವತ್ತತೀತಿ ಕೋಣ್ಡೋ, ಲಾಮಕಸತ್ತೋ, ಕೋಣ್ಡತೋ ಅಞ್ಞೋತಿ ಕೋಣ್ಡಞ್ಞೋ, ಅಲಾಮಕೋ ಉತ್ತಮಪುರಿಸೋತಿ ಅತ್ಥೋ। ಅಥ ವಾ ಬ್ರಾಹ್ಮಣಗೋತ್ತೇಸು ಕೋಣ್ಡಞ್ಞಗೋತ್ತೇ ಉಪ್ಪನ್ನತ್ತಾ ‘‘ಕೋಣ್ಡಞ್ಞೋ’’ತಿ ಗೋತ್ತವಸೇನ ತಸ್ಸ ನಾಮಂ, ತಸ್ಸ ಕೋಣ್ಡಞ್ಞಸ್ಸ। ಸೇಸಂ ಪಾಕಟಮೇವಾತಿ।
9. So attano pubbakammaṃ saritvā somanassajāto pubbacaritāpadānaṃ pakāsento koṇḍaññassa bhagavatotiādimāha. Tattha koṇḍaññassāti kucchito hutvā ḍeti pavattatīti koṇḍo, lāmakasatto, koṇḍato aññoti koṇḍañño, alāmako uttamapurisoti attho. Atha vā brāhmaṇagottesu koṇḍaññagotte uppannattā ‘‘koṇḍañño’’ti gottavasena tassa nāmaṃ, tassa koṇḍaññassa. Sesaṃ pākaṭamevāti.
ನಿಸ್ಸೇಣಿದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Nisseṇidāyakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೨. ನಿಸ್ಸೇಣಿದಾಯಕತ್ಥೇರಅಪದಾನಂ • 2. Nisseṇidāyakattheraapadānaṃ
