| Library / Tipiṭaka / திபிடக • Tipiṭaka / தே²ரகா³தா²-அட்ட²கதா² • Theragāthā-aṭṭhakathā |
4. நீதத்தே²ரகா³தா²வண்ணனா
4. Nītattheragāthāvaṇṇanā
ஸப்³ப³ரத்திங் ஸுபித்வானாதி ஆயஸ்மதோ நீதத்தே²ரஸ்ஸ கா³தா². கா உப்பத்தி? அயங் கிர பது³முத்தரஸ்ஸ ப⁴க³வதோ காலே ஸுனந்தோ³ நாம ப்³ராஹ்மணோ ஹுத்வா அனேகஸதே ப்³ராஹ்மணே மந்தே வாசெந்தோ வாஜபெய்யங் நாம யஞ்ஞங் யஜி, ப⁴க³வா தங் ப்³ராஹ்மணங் அனுகம்பந்தோ யஞ்ஞட்டா²னங் க³ந்த்வா ஆகாஸே சங்கமி. ப்³ராஹ்மணோ ஸத்தா²ரங் தி³ஸ்வா பஸன்னமானஸோ ஸிஸ்ஸேஹி புப்பா²னி ஆஹராபெத்வா ஆகாஸே கி²பித்வா பூஜங் அகாஸி. பு³த்³தா⁴னுபா⁴வேன தங் டா²னங் ஸகலஞ்ச நக³ரங் புப்ப²படவிதானிகங் விய சா²தி³தங் அஹோஸி. மஹாஜனோ ஸத்த²ரி உளாரங் பீதிஸோமனஸ்ஸங் படிஸங்வேதே³ஸி. ஸுனந்த³ப்³ராஹ்மணோ தேன குஸலமூலேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ ஸாவத்தி²யங் அஞ்ஞதரஸ்ஸ ப்³ராஹ்மணஸ்ஸ புத்தோ ஹுத்வா நிப்³ப³த்தி, நீதோதிஸ்ஸ நாமங் அஹோஸி. ஸோ விஞ்ஞுதங் பத்தோ ‘‘இமே ஸமணா ஸக்யபுத்தியா ஸுக²ஸீலா ஸுக²ஸமாசாரா ஸுபோ⁴ஜனானி பு⁴ஞ்ஜித்வா நிவாதேஸு ஸேனாஸனேஸு விஹரந்தி, இமேஸு பப்³ப³ஜித்வா ஸுகே²ன விஹரிதுங் ஸக்கா’’தி ஸுகா²பி⁴லாஸாய பப்³ப³ஜித்வாவ ஸத்து² ஸந்திகே கம்மட்டா²னங் க³ஹெத்வா கதிபாஹமேவ மனஸிகரித்வா தங் ச²ட்³டெ³த்வா யாவத³த்த²ங் உத³ராவதே³ஹகங் பு⁴ஞ்ஜித்வா தி³வஸபா⁴க³ங் ஸங்க³ணிகாராமோ திரச்சா²னகதா²ய வீதினாமேதி, ரத்திபா⁴கே³பி தி²னமித்³தா⁴பி⁴பூ⁴தோ ஸப்³ப³ரத்திங் ஸுபதி. ஸத்தா² தஸ்ஸ ஹேதுபரிபாகங் ஓலோகெத்வா ஓவாத³ங் தெ³ந்தோ –
Sabbarattiṃsupitvānāti āyasmato nītattherassa gāthā. Kā uppatti? Ayaṃ kira padumuttarassa bhagavato kāle sunando nāma brāhmaṇo hutvā anekasate brāhmaṇe mante vācento vājapeyyaṃ nāma yaññaṃ yaji, bhagavā taṃ brāhmaṇaṃ anukampanto yaññaṭṭhānaṃ gantvā ākāse caṅkami. Brāhmaṇo satthāraṃ disvā pasannamānaso sissehi pupphāni āharāpetvā ākāse khipitvā pūjaṃ akāsi. Buddhānubhāvena taṃ ṭhānaṃ sakalañca nagaraṃ pupphapaṭavitānikaṃ viya chāditaṃ ahosi. Mahājano satthari uḷāraṃ pītisomanassaṃ paṭisaṃvedesi. Sunandabrāhmaṇo tena kusalamūlena devamanussesu saṃsaranto imasmiṃ buddhuppāde sāvatthiyaṃ aññatarassa brāhmaṇassa putto hutvā nibbatti, nītotissa nāmaṃ ahosi. So viññutaṃ patto ‘‘ime samaṇā sakyaputtiyā sukhasīlā sukhasamācārā subhojanāni bhuñjitvā nivātesu senāsanesu viharanti, imesu pabbajitvā sukhena viharituṃ sakkā’’ti sukhābhilāsāya pabbajitvāva satthu santike kammaṭṭhānaṃ gahetvā katipāhameva manasikaritvā taṃ chaḍḍetvā yāvadatthaṃ udarāvadehakaṃ bhuñjitvā divasabhāgaṃ saṅgaṇikārāmo tiracchānakathāya vītināmeti, rattibhāgepi thinamiddhābhibhūto sabbarattiṃ supati. Satthā tassa hetuparipākaṃ oloketvā ovādaṃ dento –
84.
84.
‘‘ஸப்³ப³ரத்திங் ஸுபித்வான, தி³வா ஸங்க³ணிகே ரதோ;
‘‘Sabbarattiṃ supitvāna, divā saṅgaṇike rato;
குதா³ஸ்ஸு நாம து³ம்மேதோ⁴, து³க்க²ஸ்ஸந்தங் கரிஸ்ஸதீ’’தி. – கா³த²ங் அபா⁴ஸி;
Kudāssu nāma dummedho, dukkhassantaṃ karissatī’’ti. – gāthaṃ abhāsi;
தத்த² ஸப்³ப³ரத்திந்தி ஸகலங் ரத்திங். ஸுபித்வானாதி நித்³தா³யித்வா, ‘‘ரத்தியா பட²மங் யாமங் சங்கமேன நிஸஜ்ஜாய ஆவரணீயேஹி த⁴ம்மேஹி சித்தங் பரிஸோதே⁴தீ’’திஆதி³னா வுத்தங் ஜாக³ரியங் அனநுயுஞ்ஜித்வா கேவலங் ரத்தியா தீஸுபி யாமேஸு நித்³த³ங் ஓக்கமித்வாதி அத்தோ². தி³வாதி தி³வஸங், ஸகலங் தி³வஸபா⁴க³ந்தி அத்தோ². ஸங்க³ணிகேதி திரச்சா²னகதி²கேஹி காயத³ள்ஹிப³ஹுலபுக்³க³லேஹி ஸன்னிஸஜ்ஜா ஸங்க³ணிகோ, தஸ்மிங் ரதோ அபி⁴ரதோ தத்த² அவிக³தச்ச²ந்தோ³ ‘‘ஸங்க³ணிகே ரதோ’’தி வுத்தோ ‘‘ஸங்க³ணிகாரதோ’’திபி பாளி. குதா³ஸ்ஸு நாமாதி குதா³ நாம. அஸ்ஸூதி நிபாதமத்தங், கஸ்மிங் நாம காலேதி அத்தோ². து³ம்மேதோ⁴தி நிப்பஞ்ஞோ. து³க்க²ஸ்ஸாதி வட்டது³க்க²ஸ்ஸ. அந்தந்தி பரியோஸானங். அச்சந்தமேவ அனுப்பாத³ங் கதா³ நாம கரிஸ்ஸதி, ஏதி³ஸஸ்ஸ து³க்க²ஸ்ஸந்தகரணங் நத்தீ²தி அத்தோ². ‘‘து³ம்மேத⁴ து³க்க²ஸ்ஸந்தங் கரிஸ்ஸஸீ’’திபி பாளி.
Tattha sabbarattinti sakalaṃ rattiṃ. Supitvānāti niddāyitvā, ‘‘rattiyā paṭhamaṃ yāmaṃ caṅkamena nisajjāya āvaraṇīyehi dhammehi cittaṃ parisodhetī’’tiādinā vuttaṃ jāgariyaṃ ananuyuñjitvā kevalaṃ rattiyā tīsupi yāmesu niddaṃ okkamitvāti attho. Divāti divasaṃ, sakalaṃ divasabhāganti attho. Saṅgaṇiketi tiracchānakathikehi kāyadaḷhibahulapuggalehi sannisajjā saṅgaṇiko, tasmiṃ rato abhirato tattha avigatacchando ‘‘saṅgaṇike rato’’ti vutto ‘‘saṅgaṇikārato’’tipi pāḷi. Kudāssu nāmāti kudā nāma. Assūti nipātamattaṃ, kasmiṃ nāma kāleti attho. Dummedhoti nippañño. Dukkhassāti vaṭṭadukkhassa. Antanti pariyosānaṃ. Accantameva anuppādaṃ kadā nāma karissati, edisassa dukkhassantakaraṇaṃ natthīti attho. ‘‘Dummedha dukkhassantaṃ karissasī’’tipi pāḷi.
ஏவங் பன ஸத்தா²ரா கா³தா²ய கதி²தாய தே²ரோ ஸங்வேக³ஜாதோ விபஸ்ஸனங் பட்ட²பெத்வா நசிரஸ்ஸேவ அரஹத்தங் பாபுணி. தேன வுத்தங் அபதா³னே (அப॰ தே²ர 1.14.26-33) –
Evaṃ pana satthārā gāthāya kathitāya thero saṃvegajāto vipassanaṃ paṭṭhapetvā nacirasseva arahattaṃ pāpuṇi. Tena vuttaṃ apadāne (apa. thera 1.14.26-33) –
‘‘ஸுனந்தோ³ நாம நாமேன, ப்³ராஹ்மணோ மந்தபாரகூ³;
‘‘Sunando nāma nāmena, brāhmaṇo mantapāragū;
அஜ்ஜா²யகோ யாசயோகோ³, வாஜபெய்யங் அயாஜயி.
Ajjhāyako yācayogo, vājapeyyaṃ ayājayi.
‘‘பது³முத்தரோ லோகவிதூ³, அக்³கோ³ காருணிகோ இஸி;
‘‘Padumuttaro lokavidū, aggo kāruṇiko isi;
ஜனதங் அனுகம்பந்தோ, அம்ப³ரே சங்கமீ ததா³.
Janataṃ anukampanto, ambare caṅkamī tadā.
‘‘சங்கமித்வான ஸம்பு³த்³தோ⁴, ஸப்³ப³ஞ்ஞூ லோகனாயகோ;
‘‘Caṅkamitvāna sambuddho, sabbaññū lokanāyako;
மெத்தாய அப²ரி ஸத்தே, அப்பமாணே நிரூபதி⁴.
Mettāya aphari satte, appamāṇe nirūpadhi.
‘‘வண்டே செ²த்வான புப்பா²னி, ப்³ராஹ்மணோ மந்தபாரகூ³;
‘‘Vaṇṭe chetvāna pupphāni, brāhmaṇo mantapāragū;
ஸப்³பே³ ஸிஸ்ஸே ஸமானெத்வா, ஆகாஸே உக்கி²பாபயி.
Sabbe sisse samānetvā, ākāse ukkhipāpayi.
‘‘யாவதா நக³ரங் ஆஸி, புப்பா²னங் ச²த³னங் ததா³;
‘‘Yāvatā nagaraṃ āsi, pupphānaṃ chadanaṃ tadā;
பு³த்³த⁴ஸ்ஸ ஆனுபா⁴வேன, ஸத்தாஹங் ந விக³ச்ச²த².
Buddhassa ānubhāvena, sattāhaṃ na vigacchatha.
‘‘தேனேவ ஸுக்கமூலேன, அனுபொ⁴த்வான ஸம்பதா³;
‘‘Teneva sukkamūlena, anubhotvāna sampadā;
ஸப்³பா³ஸவே பரிஞ்ஞாய, திண்ணோ லோகே விஸத்திகங்.
Sabbāsave pariññāya, tiṇṇo loke visattikaṃ.
‘‘ஏகாரஸே கப்பஸதே, பஞ்சதிங்ஸாஸு க²த்தியா;
‘‘Ekārase kappasate, pañcatiṃsāsu khattiyā;
அம்ப³ரங்ஸஸனாமா தே, சக்கவத்தீ மஹப்³ப³லா.
Ambaraṃsasanāmā te, cakkavattī mahabbalā.
‘‘கிலேஸா ஜா²பிதா மய்ஹங்…பே॰… கதங் பு³த்³த⁴ஸ்ஸ ஸாஸன’’ந்தி.
‘‘Kilesā jhāpitā mayhaṃ…pe… kataṃ buddhassa sāsana’’nti.
அரஹத்தங் பன பத்வா தே²ரோ அஞ்ஞங் ப்³யாகரொந்தோ தமேவ கா³த²ங் பச்சுதா³ஹாஸி.
Arahattaṃ pana patvā thero aññaṃ byākaronto tameva gāthaṃ paccudāhāsi.
நீதத்தே²ரகா³தா²வண்ணனா நிட்டி²தா.
Nītattheragāthāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / தே²ரகா³தா²பாளி • Theragāthāpāḷi / 4. நீதத்தே²ரகா³தா² • 4. Nītattheragāthā
