| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৪. নীতত্থেরগাথাৰণ্ণনা
4. Nītattheragāthāvaṇṇanā
সব্বরত্তিং সুপিত্ৰানাতি আযস্মতো নীতত্থেরস্স গাথা। কা উপ্পত্তি? অযং কির পদুমুত্তরস্স ভগৰতো কালে সুনন্দো নাম ব্রাহ্মণো হুত্ৰা অনেকসতে ব্রাহ্মণে মন্তে ৰাচেন্তো ৰাজপেয্যং নাম যঞ্ঞং যজি, ভগৰা তং ব্রাহ্মণং অনুকম্পন্তো যঞ্ঞট্ঠানং গন্ত্ৰা আকাসে চঙ্কমি। ব্রাহ্মণো সত্থারং দিস্ৰা পসন্নমানসো সিস্সেহি পুপ্ফানি আহরাপেত্ৰা আকাসে খিপিত্ৰা পূজং অকাসি। বুদ্ধানুভাৰেন তং ঠানং সকলঞ্চ নগরং পুপ্ফপটৰিতানিকং ৰিয ছাদিতং অহোসি। মহাজনো সত্থরি উল়ারং পীতিসোমনস্সং পটিসংৰেদেসি। সুনন্দব্রাহ্মণো তেন কুসলমূলেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং অঞ্ঞতরস্স ব্রাহ্মণস্স পুত্তো হুত্ৰা নিব্বত্তি, নীতোতিস্স নামং অহোসি। সো ৰিঞ্ঞুতং পত্তো ‘‘ইমে সমণা সক্যপুত্তিযা সুখসীলা সুখসমাচারা সুভোজনানি ভুঞ্জিত্ৰা নিৰাতেসু সেনাসনেসু ৰিহরন্তি, ইমেসু পব্বজিত্ৰা সুখেন ৰিহরিতুং সক্কা’’তি সুখাভিলাসায পব্বজিত্ৰাৰ সত্থু সন্তিকে কম্মট্ঠানং গহেত্ৰা কতিপাহমেৰ মনসিকরিত্ৰা তং ছড্ডেত্ৰা যাৰদত্থং উদরাৰদেহকং ভুঞ্জিত্ৰা দিৰসভাগং সঙ্গণিকারামো তিরচ্ছানকথায ৰীতিনামেতি, রত্তিভাগেপি থিনমিদ্ধাভিভূতো সব্বরত্তিং সুপতি। সত্থা তস্স হেতুপরিপাকং ওলোকেত্ৰা ওৰাদং দেন্তো –
Sabbarattiṃsupitvānāti āyasmato nītattherassa gāthā. Kā uppatti? Ayaṃ kira padumuttarassa bhagavato kāle sunando nāma brāhmaṇo hutvā anekasate brāhmaṇe mante vācento vājapeyyaṃ nāma yaññaṃ yaji, bhagavā taṃ brāhmaṇaṃ anukampanto yaññaṭṭhānaṃ gantvā ākāse caṅkami. Brāhmaṇo satthāraṃ disvā pasannamānaso sissehi pupphāni āharāpetvā ākāse khipitvā pūjaṃ akāsi. Buddhānubhāvena taṃ ṭhānaṃ sakalañca nagaraṃ pupphapaṭavitānikaṃ viya chāditaṃ ahosi. Mahājano satthari uḷāraṃ pītisomanassaṃ paṭisaṃvedesi. Sunandabrāhmaṇo tena kusalamūlena devamanussesu saṃsaranto imasmiṃ buddhuppāde sāvatthiyaṃ aññatarassa brāhmaṇassa putto hutvā nibbatti, nītotissa nāmaṃ ahosi. So viññutaṃ patto ‘‘ime samaṇā sakyaputtiyā sukhasīlā sukhasamācārā subhojanāni bhuñjitvā nivātesu senāsanesu viharanti, imesu pabbajitvā sukhena viharituṃ sakkā’’ti sukhābhilāsāya pabbajitvāva satthu santike kammaṭṭhānaṃ gahetvā katipāhameva manasikaritvā taṃ chaḍḍetvā yāvadatthaṃ udarāvadehakaṃ bhuñjitvā divasabhāgaṃ saṅgaṇikārāmo tiracchānakathāya vītināmeti, rattibhāgepi thinamiddhābhibhūto sabbarattiṃ supati. Satthā tassa hetuparipākaṃ oloketvā ovādaṃ dento –
৮৪.
84.
‘‘সব্বরত্তিং সুপিত্ৰান, দিৰা সঙ্গণিকে রতো।
‘‘Sabbarattiṃ supitvāna, divā saṅgaṇike rato;
কুদাস্সু নাম দুম্মেধো, দুক্খস্সন্তং করিস্সতী’’তি॥ – গাথং অভাসি।
Kudāssu nāma dummedho, dukkhassantaṃ karissatī’’ti. – gāthaṃ abhāsi;
তত্থ সব্বরত্তিন্তি সকলং রত্তিং। সুপিত্ৰানাতি নিদ্দাযিত্ৰা, ‘‘রত্তিযা পঠমং যামং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতী’’তিআদিনা ৰুত্তং জাগরিযং অননুযুঞ্জিত্ৰা কেৰলং রত্তিযা তীসুপি যামেসু নিদ্দং ওক্কমিত্ৰাতি অত্থো। দিৰাতি দিৰসং, সকলং দিৰসভাগন্তি অত্থো। সঙ্গণিকেতি তিরচ্ছানকথিকেহি কাযদল়্হিবহুলপুগ্গলেহি সন্নিসজ্জা সঙ্গণিকো, তস্মিং রতো অভিরতো তত্থ অৰিগতচ্ছন্দো ‘‘সঙ্গণিকে রতো’’তি ৰুত্তো ‘‘সঙ্গণিকারতো’’তিপি পাল়ি। কুদাস্সু নামাতি কুদা নাম। অস্সূতি নিপাতমত্তং, কস্মিং নাম কালেতি অত্থো। দুম্মেধোতি নিপ্পঞ্ঞো। দুক্খস্সাতি ৰট্টদুক্খস্স। অন্তন্তি পরিযোসানং। অচ্চন্তমেৰ অনুপ্পাদং কদা নাম করিস্সতি, এদিসস্স দুক্খস্সন্তকরণং নত্থীতি অত্থো। ‘‘দুম্মেধ দুক্খস্সন্তং করিস্সসী’’তিপি পাল়ি।
Tattha sabbarattinti sakalaṃ rattiṃ. Supitvānāti niddāyitvā, ‘‘rattiyā paṭhamaṃ yāmaṃ caṅkamena nisajjāya āvaraṇīyehi dhammehi cittaṃ parisodhetī’’tiādinā vuttaṃ jāgariyaṃ ananuyuñjitvā kevalaṃ rattiyā tīsupi yāmesu niddaṃ okkamitvāti attho. Divāti divasaṃ, sakalaṃ divasabhāganti attho. Saṅgaṇiketi tiracchānakathikehi kāyadaḷhibahulapuggalehi sannisajjā saṅgaṇiko, tasmiṃ rato abhirato tattha avigatacchando ‘‘saṅgaṇike rato’’ti vutto ‘‘saṅgaṇikārato’’tipi pāḷi. Kudāssu nāmāti kudā nāma. Assūti nipātamattaṃ, kasmiṃ nāma kāleti attho. Dummedhoti nippañño. Dukkhassāti vaṭṭadukkhassa. Antanti pariyosānaṃ. Accantameva anuppādaṃ kadā nāma karissati, edisassa dukkhassantakaraṇaṃ natthīti attho. ‘‘Dummedha dukkhassantaṃ karissasī’’tipi pāḷi.
এৰং পন সত্থারা গাথায কথিতায থেরো সংৰেগজাতো ৰিপস্সনং পট্ঠপেত্ৰা নচিরস্সেৰ অরহত্তং পাপুণি। তেন ৰুত্তং অপদানে (অপ॰ থের ১.১৪.২৬-৩৩) –
Evaṃ pana satthārā gāthāya kathitāya thero saṃvegajāto vipassanaṃ paṭṭhapetvā nacirasseva arahattaṃ pāpuṇi. Tena vuttaṃ apadāne (apa. thera 1.14.26-33) –
‘‘সুনন্দো নাম নামেন, ব্রাহ্মণো মন্তপারগূ।
‘‘Sunando nāma nāmena, brāhmaṇo mantapāragū;
অজ্ঝাযকো যাচযোগো, ৰাজপেয্যং অযাজযি॥
Ajjhāyako yācayogo, vājapeyyaṃ ayājayi.
‘‘পদুমুত্তরো লোকৰিদূ, অগ্গো কারুণিকো ইসি।
‘‘Padumuttaro lokavidū, aggo kāruṇiko isi;
জনতং অনুকম্পন্তো, অম্বরে চঙ্কমী তদা॥
Janataṃ anukampanto, ambare caṅkamī tadā.
‘‘চঙ্কমিত্ৰান সম্বুদ্ধো, সব্বঞ্ঞূ লোকনাযকো।
‘‘Caṅkamitvāna sambuddho, sabbaññū lokanāyako;
মেত্তায অফরি সত্তে, অপ্পমাণে নিরূপধি॥
Mettāya aphari satte, appamāṇe nirūpadhi.
‘‘ৰণ্টে ছেত্ৰান পুপ্ফানি, ব্রাহ্মণো মন্তপারগূ।
‘‘Vaṇṭe chetvāna pupphāni, brāhmaṇo mantapāragū;
সব্বে সিস্সে সমানেত্ৰা, আকাসে উক্খিপাপযি॥
Sabbe sisse samānetvā, ākāse ukkhipāpayi.
‘‘যাৰতা নগরং আসি, পুপ্ফানং ছদনং তদা।
‘‘Yāvatā nagaraṃ āsi, pupphānaṃ chadanaṃ tadā;
বুদ্ধস্স আনুভাৰেন, সত্তাহং ন ৰিগচ্ছথ॥
Buddhassa ānubhāvena, sattāhaṃ na vigacchatha.
‘‘তেনেৰ সুক্কমূলেন, অনুভোত্ৰান সম্পদা।
‘‘Teneva sukkamūlena, anubhotvāna sampadā;
সব্বাসৰে পরিঞ্ঞায, তিণ্ণো লোকে ৰিসত্তিকং॥
Sabbāsave pariññāya, tiṇṇo loke visattikaṃ.
‘‘একারসে কপ্পসতে, পঞ্চতিংসাসু খত্তিযা।
‘‘Ekārase kappasate, pañcatiṃsāsu khattiyā;
অম্বরংসসনামা তে, চক্কৰত্তী মহব্বলা॥
Ambaraṃsasanāmā te, cakkavattī mahabbalā.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা থেরো অঞ্ঞং ব্যাকরোন্তো তমেৰ গাথং পচ্চুদাহাসি।
Arahattaṃ pana patvā thero aññaṃ byākaronto tameva gāthaṃ paccudāhāsi.
নীতত্থেরগাথাৰণ্ণনা নিট্ঠিতা।
Nītattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৪. নীতত্থেরগাথা • 4. Nītattheragāthā
