| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
5. நிவாபஸுத்தவண்ணனா
5. Nivāpasuttavaṇṇanā
261. நிவப்பதீதி நிவாபோ, நிவாபங் வத்தேதி, நிவாபபோ⁴ஜனங் வா ஏதஸ்ஸாதி நேவாபிகோ, நிவாபேன மிகே³ பலோபெ⁴த்வா க³ண்ஹனகமாக³விகோ. திணபீ³ஜானீதி நிவாபதிணபீ³ஜானி. வப்பந்தி ஸஸ்ஸங் விய வபிதப்³ப³ட்டே²ன வப்பங். ‘‘மயங் விய அஞ்ஞே கே ஈதி³ஸங் லபி⁴ஸ்ஸந்தீ’’தி மானமத³ங் ஆபஜ்ஜிஸ்ஸந்தி. விஸ்ஸட்ட²ஸதிபா⁴வந்தி அனுஸ்ஸங்கிதபரிஸங்கிதபா⁴வங். திரச்சா²னா ஹி விஜாதியப³லவதிரச்சா²னவஸனட்டா²னேஸு ஸாஸங்கா உப்³பி³க்³க³ஹத³யா அப்பமத்தா ஹொந்தி விஸேஸதோ மாக³விகாதி³மனுஸ்ஸூபசாரே, ரஸதண்ஹாய பன ப³த்³தா⁴ பமாத³ங் ஆபஜ்ஜஸ்ஸந்தி. நிவபதி எத்தா²தி நிவாபோ, நிவாபபூ⁴மி நிவாபட்டா²னங். தேனாஹ ‘‘நிவாபட்டா²னே’’தி. ‘‘யதா²காமகரணீயா’’தி வுத்தமத்த²ங் விவரிதுங் ‘‘ஏகங் கிரா’’திஆதி³ வுத்தங். தத்த² நீவாரவனங் வியாதி நீவாரஸ்ஸ ஸமூஹோ விய. நீவாரோ நாம அரஞ்ஞே ஸயங்ஜாதவீஹிஜாதி. மேக⁴மாலா வியாதி மேக⁴க⁴டா விய. ஏகக்³க⁴னந்தி ஏகஜ்ஜ²ங் விய அவிரட்ட²ங். பக்கமந்தீதி ஆஸங்கபரிஸங்கா ஹுத்வா பக்கமந்தி. கண்ணே சாலயமானாதி அனாஸங்கந்தானங் பஹட்டா²காரத³ஸ்ஸனங். மண்ட³லகு³ம்ப³ந்தி மண்ட³லகாகாரேன டி²தங் கு³ம்ப³ங்.
261. Nivappatīti nivāpo, nivāpaṃ vatteti, nivāpabhojanaṃ vā etassāti nevāpiko, nivāpena mige palobhetvā gaṇhanakamāgaviko. Tiṇabījānīti nivāpatiṇabījāni. Vappanti sassaṃ viya vapitabbaṭṭhena vappaṃ. ‘‘Mayaṃ viya aññe ke īdisaṃ labhissantī’’ti mānamadaṃ āpajjissanti. Vissaṭṭhasatibhāvanti anussaṅkitaparisaṅkitabhāvaṃ. Tiracchānā hi vijātiyabalavatiracchānavasanaṭṭhānesu sāsaṅkā ubbiggahadayā appamattā honti visesato māgavikādimanussūpacāre, rasataṇhāya pana baddhā pamādaṃ āpajjassanti. Nivapati etthāti nivāpo, nivāpabhūmi nivāpaṭṭhānaṃ. Tenāha ‘‘nivāpaṭṭhāne’’ti. ‘‘Yathākāmakaraṇīyā’’ti vuttamatthaṃ vivarituṃ ‘‘ekaṃ kirā’’tiādi vuttaṃ. Tattha nīvāravanaṃ viyāti nīvārassa samūho viya. Nīvāro nāma araññe sayaṃjātavīhijāti. Meghamālā viyāti meghaghaṭā viya. Ekagghananti ekajjhaṃ viya aviraṭṭhaṃ. Pakkamantīti āsaṅkaparisaṅkā hutvā pakkamanti. Kaṇṇe cālayamānāti anāsaṅkantānaṃ pahaṭṭhākāradassanaṃ. Maṇḍalagumbanti maṇḍalakākārena ṭhitaṃ gumbaṃ.
262. கப்பெத்வாதி உபமாபா⁴வேன பரிகப்பெத்வா. மிகே³ அத்தனோ வஸே வத்தாபனங் வஸீபா⁴வோ. ஸோ ஏவ இஜ்ஜ²னட்டே²ன இத்³தி⁴, பபா⁴வனட்டே²ன ஆனுபா⁴வோ.
262.Kappetvāti upamābhāvena parikappetvā. Mige attano vase vattāpanaṃ vasībhāvo. So eva ijjhanaṭṭhena iddhi, pabhāvanaṭṭhena ānubhāvo.
263. ப⁴யேன போ⁴க³தோதி ப⁴யேன ஸஹ ஸப⁴யங் நிவாபபரிபோ⁴க³தோ. ப³லவீரியந்தி காயப³லஞ்ச உட்டா²னவீரியஞ்ச. அட்ட²கதா²யங் பன ப³லமேவ வீரியங். ப³லந்தி ச ஸரீரப³லங், தஞ்ச அத்த²தோ மனஸிகாரமக்³கே³ஹி அபராபரங் ஸஞ்சரணகவாதோதி வுத்தங் ‘‘அபராபரங் ஸஞ்சரணவாயோதா⁴தூ’’தி.
263.Bhayena bhogatoti bhayena saha sabhayaṃ nivāpaparibhogato. Balavīriyanti kāyabalañca uṭṭhānavīriyañca. Aṭṭhakathāyaṃ pana balameva vīriyaṃ. Balanti ca sarīrabalaṃ, tañca atthato manasikāramaggehi aparāparaṃ sañcaraṇakavātoti vuttaṃ ‘‘aparāparaṃ sañcaraṇavāyodhātū’’ti.
264. ஸிக்கி²தகேராடிகாதி பரிசிதஸாடெ²ய்யா, வஞ்சகாதி அத்தோ². இத்³தி⁴மந்தோ விய ஆனுபா⁴வவந்தோ விய. பசுரஜனேஹி பரபூ⁴தா ஜாதாதி பரஜனா, மஹாபூ⁴தா. தேனாஹ ‘‘யக்கா²’’தி. ஸமந்தா ஸப்பதே³ஸந்தி ஸமந்ததோ பதே³ஸவந்தங் விபுலோகாஸஸன்னிவாஸட்டா²னங். தஸ்ஸ பன ஸப்பதே³ஸதா மஹாஓகாஸதாயாதி வுத்தங் ‘‘மஹந்தங் ஓகாஸ’’ந்தி.
264.Sikkhitakerāṭikāti paricitasāṭheyyā, vañcakāti attho. Iddhimanto viya ānubhāvavanto viya. Pacurajanehi parabhūtā jātāti parajanā, mahābhūtā. Tenāha ‘‘yakkhā’’ti. Samantā sappadesanti samantato padesavantaṃ vipulokāsasannivāsaṭṭhānaṃ. Tassa pana sappadesatā mahāokāsatāyāti vuttaṃ ‘‘mahantaṃ okāsa’’nti.
265. க⁴ட்டெஸ்ஸந்தீதி ‘‘ஸப⁴யஸமுட்டா²ன’’ந்தி ஸஞ்ஞாதா³னவஸேன சித்தங் சேதெஸ்ஸந்தி, தாஸெஸ்ஸந்தீதி அத்தோ². பரிச்சஜிஸ்ஸந்தீதி நிப்³பி³ஸிஸ்ஸந்தி. மஹல்லகோதி ஜாதியா மஹல்லகோ ஜிண்ணோ. து³ப்³ப³லோதி ப்³யாதி⁴வஸேன, பகதியா வா ப³லவிரஹிதோ.
265.Ghaṭṭessantīti ‘‘sabhayasamuṭṭhāna’’nti saññādānavasena cittaṃ cetessanti, tāsessantīti attho. Pariccajissantīti nibbisissanti. Mahallakoti jātiyā mahallako jiṇṇo. Dubbaloti byādhivasena, pakatiyā vā balavirahito.
267. நிவாபஸதி³ஸதாய நிவாபோதி வா. லோகபரியாபன்னங் ஹுத்வா கிலேஸேஹி ஆமஸிதப்³ப³தாய லோகாமிஸானீதி வா. வட்டே ஆமிஸபூ⁴தத்தா வட்டாமிஸபூ⁴தானங். வஸங் வத்தேதீதி காமகு³ணேஹி காமகு³ணே கி³த்³தே⁴ ஸத்தே தஸ்ஸேவ கே³த⁴ஸ்ஸ வஸேன அத்தனோ வஸே வத்தேதீதி. தேனாஹ –
267. Nivāpasadisatāya nivāpoti vā. Lokapariyāpannaṃ hutvā kilesehi āmasitabbatāya lokāmisānīti vā. Vaṭṭe āmisabhūtattā vaṭṭāmisabhūtānaṃ. Vasaṃ vattetīti kāmaguṇehi kāmaguṇe giddhe satte tasseva gedhassa vasena attano vase vattetīti. Tenāha –
‘‘அந்தலிக்க²சரோ பாஸோ, ய்வாயங் சரதி மானஸோ;
‘‘Antalikkhacaro pāso, yvāyaṃ carati mānaso;
தேன தங் பா³த⁴யிஸ்ஸாமி, ந மே ஸமண மொக்க²ஸீ’’தி. (ஸங்॰ நி॰ 1.151; மஹாவ॰ 33);
Tena taṃ bādhayissāmi, na me samaṇa mokkhasī’’ti. (saṃ. ni. 1.151; mahāva. 33);
அயந்தி பட²மமிக³ஜாதூபமா. வானபத்த²ஸ்ஸ ஸதோவ பபஞ்சபரத³த்திகாதி³ஸபுத்ததா³ரனிக்க²மனங் ஸந்தா⁴யாஹ ‘‘ஸபுத்தப⁴ரியபப்³ப³ஜ்ஜாயா’’தி.
Ayanti paṭhamamigajātūpamā. Vānapatthassa satova papañcaparadattikādisaputtadāranikkhamanaṃ sandhāyāha ‘‘saputtabhariyapabbajjāyā’’ti.
268. காமதோ சித்தஸ்ஸ விமுத்தி இத⁴ சேதோவிமுத்தீதி அதி⁴ப்பேதாதி ஆஹ ‘‘சேதோவிமுத்தி நாம…பே॰… உப்பன்னஅஜ்ஜா²ஸயோ’’தி. காமே விஸ்ஸஜ்ஜெத்வா புன தத்த² நிமுக்³க³தாய து³தியஸமணப்³ராஹ்மணா து³தியமிக³ஜாதூபமா வுத்தா.
268. Kāmato cittassa vimutti idha cetovimuttīti adhippetāti āha ‘‘cetovimutti nāma…pe… uppannaajjhāsayo’’ti. Kāme vissajjetvā puna tattha nimuggatāya dutiyasamaṇabrāhmaṇā dutiyamigajātūpamā vuttā.
269. ததியஸமணப்³ராஹ்மணா யதா²பரிச்சத்தே காமே பரிச்சஜித்வா ஏவங் டி²தா, ந து³தியா விய தத்த² நிமுக்³கா³தி அதி⁴ப்பாயேன ‘‘கிங் பன தே அகங்ஸூ’’தி புச்ச²தி. இதரே காமங் உஜுகங் காமகு³ணேஸு ந நிமுக்³கா³, பரியாயேன பன நிமுக்³கா³ தி³ட்டி²ஜாலேன ச அஜ்ஜொ²த்த²டாதி த³ஸ்ஸெந்தோ ‘‘கா³மனிக³மஜனபத³ராஜதா⁴னியோ’’திஆதி³மாஹ. தி³ட்டி²ஜாலம்பி தண்ஹாஜாலானுக³தமேவாதி ஆஹ ‘‘மாரஸ்ஸ பாபிமதோ தி³ட்டி²ஜாலேன பரிக்கி²பித்வா’’தி.
269. Tatiyasamaṇabrāhmaṇā yathāpariccatte kāme pariccajitvā evaṃ ṭhitā, na dutiyā viya tattha nimuggāti adhippāyena ‘‘kiṃ pana te akaṃsū’’ti pucchati. Itare kāmaṃ ujukaṃ kāmaguṇesu na nimuggā, pariyāyena pana nimuggā diṭṭhijālena ca ajjhotthaṭāti dassento ‘‘gāmanigamajanapadarājadhāniyo’’tiādimāha. Diṭṭhijālampi taṇhājālānugatamevāti āha ‘‘mārassa pāpimato diṭṭhijālena parikkhipitvā’’ti.
271. க²ந்த⁴கிலேஸாபி⁴ஸங்கா²ரமாரா வா இத⁴ மாரக்³க³ஹணேன க³ஹிதாதி த³ட்ட²ப்³ப³ங். அக்கீ²னி பி⁴ந்தி³ த³ட்டு²ங் அஸமத்த²பா⁴வாபாத³னேன. தேனாஹ ‘‘விபஸ்ஸனாபாத³கஜ்ஜா²ன’’ந்திஆதி³. கிஞ்சாபி மாரோ யங் கிஞ்சி ஜா²னங் ஸமாபன்னஸ்ஸபி பி⁴க்கு²னோ சித்தங் இமங் நாம ஆரம்மணங் நிஸ்ஸாய வத்ததீதி ந ஜானாதி, இதா⁴தி⁴ப்பேதஸ்ஸ பன பி⁴க்கு²னோ வஸேன ‘‘விபஸ்ஸனாபாத³கஜ்ஜா²ன’’ந்தி வுத்தங். தேனேவ பரியாயேனாதி ‘‘ந மாரஸ்ஸ அக்கீ²னி பி⁴ந்தீ³’’தி ஏவமாதி³னா யதா²வுத்தபரியாயேன. அத³ஸ்ஸனங் க³தோதி எத்தா²பி ஏஸேவ நயோ. சக்கு²ஸ்ஸ பத³ங் பதிட்டா²தி ச இத⁴ ஆரம்மணங் அதி⁴ப்பேதங் தங் பரிக்³க³ய்ஹ பவத்தனதோதி ஆஹ ‘‘அப்பதிட்ட²ங் நிராரம்மண’’ந்தி. ஸோதி மாரோ. தி³ஸ்வாதி த³ஸ்ஸனஹேது. யஸ்மா மக்³கே³ன சதுஸச்சத³ஸ்ஸனஹேது ஆஸவா ந பரிக்கீ²ணா. ப²லக்க²ணே ஹி தே கீ²ணாதி வுச்சந்தீதி.
271. Khandhakilesābhisaṅkhāramārā vā idha māraggahaṇena gahitāti daṭṭhabbaṃ. Akkhīni bhindi daṭṭhuṃ asamatthabhāvāpādanena. Tenāha ‘‘vipassanāpādakajjhāna’’ntiādi. Kiñcāpi māro yaṃ kiñci jhānaṃ samāpannassapi bhikkhuno cittaṃ imaṃ nāma ārammaṇaṃ nissāya vattatīti na jānāti, idhādhippetassa pana bhikkhuno vasena ‘‘vipassanāpādakajjhāna’’nti vuttaṃ. Teneva pariyāyenāti ‘‘na mārassa akkhīni bhindī’’ti evamādinā yathāvuttapariyāyena. Adassanaṃ gatoti etthāpi eseva nayo. Cakkhussa padaṃ patiṭṭhāti ca idha ārammaṇaṃ adhippetaṃ taṃ pariggayha pavattanatoti āha ‘‘appatiṭṭhaṃ nirārammaṇa’’nti. Soti māro. Disvāti dassanahetu. Yasmā maggena catusaccadassanahetu āsavā na parikkhīṇā. Phalakkhaṇe hi te khīṇāti vuccantīti.
லோகேதி ஸத்தலோகே ஸங்கா²ரலோகே ச. ஸத்தவிஸத்தபா⁴வேனாதி லக்³க³பா⁴வேன சேவ ஸவிஸேஸங் ஆஸத்தபா⁴வேன ச. அத² வாதிஆதி³னா நித்³தே³ஸனயவஸேன (மஹானி॰ 3, சூளனி॰ மெத்தகூ³மாணவபுச்சா²னித்³தே³ஸ 22, 23; சூளனி॰ க²க்³க³விஸாணஸுத்தனித்³தே³ஸ 124) விஸத்திகாபத³ங் நித்³தி³ஸதி. விஸதாதி வித்த²டா ரூபாதீ³ஸு தேபூ⁴மகத⁴ம்மேஸு ப்³யாபனவஸேன விஸடாதி புரிமவசனமேவ தகாரஸ்ஸ டகாரங் கத்வா வுத்தங். விஸாலாதி விபுலா. விஸக்கதீதி பரிஸக்கதி ஸஹதி. ரத்தோ ஹி ராக³வத்து²னா பாதே³ன தாலியமானோபி ஸஹதி. ஓஸக்கனங், விப்ப²ந்த³னங் வா விஸக்கனந்திபி வத³ந்தி. விஸங்ஹரதீதி யதா² ததா² காமேஸு ஆனிஸங்ஸங் த³ஸ்ஸெந்தீ விவிதே⁴ஹி ஆகாரேஹி நெக்க²ம்மாபி⁴முக²ப்பவத்திதோ சித்தங் ஸங்ஹரதி ஸங்கி²பதி, விஸங் வா து³க்க²ங், தங் ஹரதி உபனேதீதி அத்தோ². விஸங்வாதி³காதி அனிச்சாதி³ங் நிச்சாதி³தோ க³ண்ஹாபெந்தீ விஸங்வாதி³கா ஹோதி. து³க்க²னிப்³ப³த்தகஸ்ஸ கம்மஸ்ஸ ஹேதுபா⁴வதோ விஸமூலா, விஸங் வா து³க்க²து³க்கா²தி³பூ⁴தா வேத³னா மூலங் ஏதிஸ்ஸாதி விஸமூலா. து³க்க²ஸமுத³யத்தா விஸங் ப²லங் ஏதிஸ்ஸாதி விஸப²லா. தண்ஹாய ரூபாதி³கஸ்ஸ து³க்க²ஸ்ஸேவ பரிபோ⁴கோ³ ஹோதி, ந அமதஸ்ஸாதி ஸா ‘‘விஸபரிபோ⁴கா³’’தி வுத்தா. ஸப்³ப³த்த² நிருத்திவஸேன ஸத்³த³ஸித்³தி⁴ வேதி³தப்³பா³. யோ பனெத்த² பதா⁴னோ அத்தோ², தங் த³ஸ்ஸேதுங் புன ‘‘விஸாலா வா பனா’’திஆதி³ வுத்தங். நித்திண்ணோ உத்திண்ணோதி உபஸக்³க³வஸேன பத³ங் வட்³டி⁴தங். நிரவஸேஸதோ வா திண்ணோ நித்திண்ணோ. தேன தேன மக்³கே³ன உத்³த⁴முத்³த⁴ங் திண்ணோ உத்திண்ணோ. யங் பனெத்த² அத்த²தோ அவிப⁴த்தங், தங் ஸுவிஞ்ஞெய்யமேவ.
Loketi sattaloke saṅkhāraloke ca. Sattavisattabhāvenāti laggabhāvena ceva savisesaṃ āsattabhāvena ca. Atha vātiādinā niddesanayavasena (mahāni. 3, cūḷani. mettagūmāṇavapucchāniddesa 22, 23; cūḷani. khaggavisāṇasuttaniddesa 124) visattikāpadaṃ niddisati. Visatāti vitthaṭā rūpādīsu tebhūmakadhammesu byāpanavasena visaṭāti purimavacanameva takārassa ṭakāraṃ katvā vuttaṃ. Visālāti vipulā. Visakkatīti parisakkati sahati. Ratto hi rāgavatthunā pādena tāliyamānopi sahati. Osakkanaṃ, vipphandanaṃ vā visakkanantipi vadanti. Visaṃharatīti yathā tathā kāmesu ānisaṃsaṃ dassentī vividhehi ākārehi nekkhammābhimukhappavattito cittaṃ saṃharati saṅkhipati, visaṃ vā dukkhaṃ, taṃ harati upanetīti attho. Visaṃvādikāti aniccādiṃ niccādito gaṇhāpentī visaṃvādikā hoti. Dukkhanibbattakassa kammassa hetubhāvato visamūlā, visaṃ vā dukkhadukkhādibhūtā vedanā mūlaṃ etissāti visamūlā. Dukkhasamudayattā visaṃ phalaṃ etissāti visaphalā. Taṇhāya rūpādikassa dukkhasseva paribhogo hoti, na amatassāti sā ‘‘visaparibhogā’’ti vuttā. Sabbattha niruttivasena saddasiddhi veditabbā. Yo panettha padhāno attho, taṃ dassetuṃ puna ‘‘visālā vā panā’’tiādi vuttaṃ. Nittiṇṇo uttiṇṇoti upasaggavasena padaṃ vaḍḍhitaṃ. Niravasesato vā tiṇṇo nittiṇṇo. Tena tena maggena uddhamuddhaṃ tiṇṇo uttiṇṇo. Yaṃ panettha atthato avibhattaṃ, taṃ suviññeyyameva.
நிவாபஸுத்தவண்ணனாய லீனத்த²ப்பகாஸனா ஸமத்தா.
Nivāpasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. நிவாபஸுத்தங் • 5. Nivāpasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 5. நிவாபஸுத்தவண்ணனா • 5. Nivāpasuttavaṇṇanā
