| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
5. ниваабасуд̇д̇аван̣н̣анаа
5. Nivāpasuttavaṇṇanā
261. звам̣ мз суд̇анд̇и ниваабасуд̇д̇ам̣. д̇ад̇т̇а нзваабигод̇и яо миг̇аанам̣ г̇ахан̣ад̇т̇ааяа аран̃н̃з д̇ин̣аб̣ийж̇аани вабад̇и ‘‘ид̣̇ам̣ д̇ин̣ам̣ каад̣̇ид̇ум̣ ааг̇ад̇з миг̇з сукам̣ г̇ан̣хиссаамий’’д̇и. ниваабанд̇и ваббам̣. нивуд̇д̇анд̇и вабид̇ам̣. миг̇аж̇аад̇аад̇и миг̇агхадаа. анубакаж̇ж̇аад̇и анубависид̇ваа. мужчид̇аад̇и д̇ан̣хаамужчанааяа мужчид̇аа, д̇ан̣хааяа хад̣̇аяам̣ бависид̇ваа мужчанаагаарам̣ баабид̇аад̇и ад̇т̇о. мад̣̇ам̣ аабаж̇ж̇иссанд̇ийд̇и маанамад̣̇ам̣ аабаж̇ж̇иссанд̇и. бамаад̣̇анд̇и виссадтасад̇ибхаавам̣. яат̇аагаамагаран̣ийяаа бхависсанд̇ийд̇и яат̇аа ижчиссаама, д̇ат̇аа гаад̇аб̣б̣аа бхависсанд̇и. имасмим̣ ниваабзд̇и имасмим̣ ниваабадтаанз. згам̣ гира ниваабад̇ин̣ам̣ наама ад̇т̇и нид̣̇аагхабхад̣̇д̣̇агам̣, д̇ам̣ яат̇аа яат̇аа нид̣̇аагхо ход̇и, д̇ат̇аа д̇ат̇аа нийваараванам̣ вияа мзгхамаалаа вияа жа згаг̇гханам̣ ход̇и, д̇ам̣ луд̣̇д̣̇агаа згасмим̣ уд̣̇агапаасугадтаанз гасид̇ваа вабид̇ваа вад̇им̣ гад̇ваа д̣̇ваарам̣ яож̇зд̇ваа рагканд̇и. ат̇а яад̣̇аа махаанид̣̇аагхз саб̣б̣ад̇ин̣аани сугкаани хонд̇и, ж̇ивхаад̇зманамад̇д̇амби уд̣̇агам̣ д̣̇уллабхам̣ ход̇и, д̇ад̣̇аа миг̇аж̇аад̇аа сугкад̇ин̣аани жзва бураан̣абан̣н̣аани жа каад̣̇анд̇аа гамбамаанаа вияа вижаранд̇аа ниваабад̇ин̣асса г̇анд̇хам̣ гхааяид̇ваа вад̇хаб̣анд̇ханаад̣̇ийни аг̇ан̣аяид̇ваа вад̇им̣ аж̇жход̇т̇аранд̇аа бависанд̇и. д̇зсан̃хи ниваабад̇ин̣ам̣ ад̇ивияа бияам̣ ход̇и манаабам̣. нзваабиго д̇з д̣̇исваа д̣̇вз д̇ийн̣и д̣̇ивасаани бамад̇д̇о вияа ход̇и, д̣̇ваарам̣ виварид̇ваа д̇идтад̇и. анд̇ониваабадтаанз д̇ахим̣ д̇ахим̣ уд̣̇агаааваадагааби хонд̇и, миг̇аа вивадад̣̇ваарзна бависид̇ваа каад̣̇ид̇амад̇д̇агам̣ бивид̇амад̇д̇агамзва гад̇ваа баггаманд̇и, бунад̣̇ивасз гин̃жи на гаронд̇ийд̇и ган̣н̣з жаалаяамаанаа каад̣̇ид̇ваа бивид̇ваа ад̇арамаанаа г̇ажчанд̇и, бунад̣̇ивасз гожи гин̃жи гад̇д̇аа над̇т̇ийд̇и яаавад̣̇ад̇т̇ам̣ каад̣̇ид̇ваа бивид̇ваа ман̣д̣алаг̇умб̣ам̣ бависид̇ваа нибаж̇ж̇анд̇и. луд̣̇д̣̇агаа д̇зсам̣ бамад̇д̇абхаавам̣ ж̇аанид̇ваа д̣̇ваарам̣ бид̇хааяа самбариваарзд̇ваа годид̇о бадтааяа годдзд̇ваа г̇ажчанд̇и, звам̣ д̇з д̇асмим̣ ниваабз нзваабигасса яат̇аагаамагаран̣ийяаа бхаванд̇и.
261.Evaṃme sutanti nivāpasuttaṃ. Tattha nevāpikoti yo migānaṃ gahaṇatthāya araññe tiṇabījāni vapati ‘‘idaṃ tiṇaṃ khādituṃ āgate mige sukhaṃ gaṇhissāmī’’ti. Nivāpanti vappaṃ. Nivuttanti vapitaṃ. Migajātāti migaghaṭā. Anupakhajjāti anupavisitvā. Mucchitāti taṇhāmucchanāya mucchitā, taṇhāya hadayaṃ pavisitvā mucchanākāraṃ pāpitāti attho. Madaṃ āpajjissantīti mānamadaṃ āpajjissanti. Pamādanti vissaṭṭhasatibhāvaṃ. Yathākāmakaraṇīyā bhavissantīti yathā icchissāma, tathā kātabbā bhavissanti. Imasmiṃ nivāpeti imasmiṃ nivāpaṭṭhāne. Ekaṃ kira nivāpatiṇaṃ nāma atthi nidāghabhaddakaṃ, taṃ yathā yathā nidāgho hoti, tathā tathā nīvāravanaṃ viya meghamālā viya ca ekagghanaṃ hoti, taṃ luddakā ekasmiṃ udakaphāsukaṭṭhāne kasitvā vapitvā vatiṃ katvā dvāraṃ yojetvā rakkhanti. Atha yadā mahānidāghe sabbatiṇāni sukkhāni honti, jivhātemanamattampi udakaṃ dullabhaṃ hoti, tadā migajātā sukkhatiṇāni ceva purāṇapaṇṇāni ca khādantā kampamānā viya vicarantā nivāpatiṇassa gandhaṃ ghāyitvā vadhabandhanādīni agaṇayitvā vatiṃ ajjhottharantā pavisanti. Tesañhi nivāpatiṇaṃ ativiya piyaṃ hoti manāpaṃ. Nevāpiko te disvā dve tīṇi divasāni pamatto viya hoti, dvāraṃ vivaritvā tiṭṭhati. Antonivāpaṭṭhāne tahiṃ tahiṃ udakaāvāṭakāpi honti, migā vivaṭadvārena pavisitvā khāditamattakaṃ pivitamattakameva katvā pakkamanti, punadivase kiñci na karontīti kaṇṇe cālayamānā khāditvā pivitvā ataramānā gacchanti, punadivase koci kiñci kattā natthīti yāvadatthaṃ khāditvā pivitvā maṇḍalagumbaṃ pavisitvā nipajjanti. Luddakā tesaṃ pamattabhāvaṃ jānitvā dvāraṃ pidhāya samparivāretvā koṭito paṭṭhāya koṭṭetvā gacchanti, evaṃ te tasmiṃ nivāpe nevāpikassa yathākāmakaraṇīyā bhavanti.
262. д̇ад̇ра, бхигкавзд̇и, бхигкавз, д̇зсу миг̇аж̇аад̇зсу. батамаа миг̇аж̇аад̇аад̇и, миг̇аж̇аад̇аа батамад̣̇уд̇ияаа наама над̇т̇и. бхаг̇аваа бана ааг̇ад̇абадибаадивасзна габбзд̇ваа батамаа, д̣̇уд̇ияаа, д̇ад̇ияаа , жад̇уд̇т̇аад̇и наамам̣ ааробзд̇ваа д̣̇ассзси. ид̣̇д̇хаанубхааваад̇и яат̇аагаамам̣ гад̇д̇аб̣б̣абхаавад̇о; васийбхаавоязва хи зд̇т̇а ид̣̇д̇хийд̇и жа аанубхаавод̇и жа ад̇хиббзд̇о.
262.Tatra, bhikkhaveti, bhikkhave, tesu migajātesu. Paṭhamā migajātāti, migajātā paṭhamadutiyā nāma natthi. Bhagavā pana āgatapaṭipāṭivasena kappetvā paṭhamā, dutiyā, tatiyā , catutthāti nāmaṃ āropetvā dassesi. Iddhānubhāvāti yathākāmaṃ kattabbabhāvato; vasībhāvoyeva hi ettha iddhīti ca ānubhāvoti ca adhippeto.
263. бхаяабхог̇аад̇и бхаязна бхог̇ад̇о. б̣алавийрияанд̇и абараабарам̣ сан̃жаран̣авааяод̇хаад̇у, саа барихааяийд̇и ад̇т̇о.
263.Bhayabhogāti bhayena bhogato. Balavīriyanti aparāparaṃ sañcaraṇavāyodhātu, sā parihāyīti attho.
264. убаниссааяа аасаяам̣ габбзяяаамаад̇и анд̇о нибаж̇ж̇ид̇ваа каад̣̇анд̇аанамби бхаяамзва, б̣аахирад̇о ааг̇анд̇ваа каад̣̇анд̇аанамби бхаяамзва, маяам̣ бана амум̣ ниваабадтаанам̣ ниссааяа згаманд̇з аасаяам̣ габбзяяаамаад̇и жинд̇аяим̣су. убаниссааяа аасаяам̣ габбаяим̣сууд̇и луд̣̇д̣̇агаа наама на саб̣б̣агаалам̣ аббамад̇д̇аа хонд̇и. маяам̣ д̇ад̇т̇а д̇ад̇т̇а ман̣д̣алаг̇умб̣зсу жзва вад̇ибаад̣̇зсу жа нибаж̇ж̇ид̇ваа зд̇зсу мукад̇хованад̇т̇ам̣ ваа аахаарагижжагаран̣ад̇т̇ам̣ ваа багганд̇зсу ниваабавад̇т̇ум̣ бависид̇ваа каад̣̇ид̇амад̇д̇ам̣ гад̇ваа амхаагам̣ васанадтаанам̣ бависиссаамаад̇и ниваабавад̇т̇ум̣ убаниссааяа г̇аханзсу г̇умб̣авад̇ибаад̣̇аад̣̇ийсу аасаяам̣ габбаяим̣су. бхун̃ж̇им̣сууд̇и вуд̇д̇анаязна луд̣̇д̣̇агаанам̣ бамаад̣̇агаалам̣ н̃ад̇ваа сийгхам̣ сийгхам̣ бависид̇ваа бхун̃ж̇им̣су. гзд̇аб̣инод̇и сигкид̇агзраадигаа. ид̣̇д̇химанд̇аад̇и ид̣̇д̇химанд̇о вияа. бараж̇анаад̇и яагкаа. имз на миг̇аж̇аад̇аад̇и. ааг̇ад̇им̣ ваа г̇ад̇им̣ ваад̇и иминаа наама таанзна ааг̇ажчанд̇и, амуд̇ра г̇ажчанд̇ийд̇и ид̣̇ам̣ нзсам̣ на ж̇аанаама. д̣̇ан̣д̣аваагараахийд̇и д̣̇ан̣д̣аваагараж̇аалзхи. саманд̇аа саббад̣̇зсам̣ анубариваарзсунд̇и ад̇имааяаавино зд̇з, на д̣̇уурам̣ г̇амиссанд̇и, санд̇игзязва нибаннаа бхависсанд̇ийд̇и ниваабагкзд̇д̇асса саманд̇аа саббад̣̇зсам̣ маханд̇ам̣ огаасам̣ анубариваарзсум̣. ад̣̇д̣̇асам̣сууд̇и звам̣ бариваарзд̇ваа ваагараж̇аалам̣ саманд̇ад̇о жаалзд̇ваа ологзнд̇аа ад̣̇д̣̇асам̣су. яад̇т̇а д̇зд̇и яасмим̣ таанз д̇з г̇аахам̣ аг̇амам̣су, д̇ам̣ таанам̣ ад̣̇д̣̇асам̣сууд̇и ад̇т̇о.
264.Upanissāya āsayaṃ kappeyyāmāti anto nipajjitvā khādantānampi bhayameva, bāhirato āgantvā khādantānampi bhayameva, mayaṃ pana amuṃ nivāpaṭṭhānaṃ nissāya ekamante āsayaṃ kappeyyāmāti cintayiṃsu. Upanissāyaāsayaṃ kappayiṃsūti luddakā nāma na sabbakālaṃ appamattā honti. Mayaṃ tattha tattha maṇḍalagumbesu ceva vatipādesu ca nipajjitvā etesu mukhadhovanatthaṃ vā āhārakiccakaraṇatthaṃ vā pakkantesu nivāpavatthuṃ pavisitvā khāditamattaṃ katvā amhākaṃ vasanaṭṭhānaṃ pavisissāmāti nivāpavatthuṃ upanissāya gahanesu gumbavatipādādīsu āsayaṃ kappayiṃsu. Bhuñjiṃsūti vuttanayena luddakānaṃ pamādakālaṃ ñatvā sīghaṃ sīghaṃ pavisitvā bhuñjiṃsu. Ketabinoti sikkhitakerāṭikā. Iddhimantāti iddhimanto viya. Parajanāti yakkhā. Ime na migajātāti. Āgatiṃ vā gatiṃ vāti iminā nāma ṭhānena āgacchanti, amutra gacchantīti idaṃ nesaṃ na jānāma. Daṇḍavākarāhīti daṇḍavākarajālehi. Samantā sappadesaṃ anuparivāresunti atimāyāvino ete, na dūraṃ gamissanti, santikeyeva nipannā bhavissantīti nivāpakkhettassa samantā sappadesaṃ mahantaṃ okāsaṃ anuparivāresuṃ. Addasaṃsūti evaṃ parivāretvā vākarajālaṃ samantato cāletvā olokentā addasaṃsu. Yattha teti yasmiṃ ṭhāne te gāhaṃ agamaṃsu, taṃ ṭhānaṃ addasaṃsūti attho.
265. яам̣нууна маяам̣ яад̇т̇а аг̇ад̇ийд̇и д̇з гира звам̣ жинд̇аяим̣су – ‘‘анд̇о нибаж̇ж̇ид̇ваа анд̇о каад̣̇анд̇аанамби бхаяамзва, б̣аахирад̇о ааг̇анд̇ваа каад̣̇анд̇аанамби санд̇игз васид̇ваа каад̣̇анд̇аанамби бхаяамзва, д̇зби хи ваагараж̇аалзна баригкибид̇ваа г̇ахид̇ааязваа’’д̇и, д̇зна д̇зсам̣ зд̇ад̣̇ахоси – ‘‘яам̣нууна маяам̣ яад̇т̇а нзваабигасса жа нзваабигабарисааяа жа аг̇ад̇и ависаяо, д̇ад̇т̇а д̇ад̇т̇а сзяяам̣ габбзяяаамаа’’д̇и. ан̃н̃з гхаддзссанд̇ийд̇и д̇ад̇о д̇ад̇о д̣̇уурад̇араваасино ан̃н̃з гхаддзссанд̇и. д̇з гхаддид̇аа ан̃н̃зд̇и д̇зби гхаддид̇аа ан̃н̃з д̇ад̇о д̣̇уурад̇араваасино гхаддзссанд̇и. звам̣ имам̣ ниваабам̣ нивуд̇д̇ам̣ саб̣б̣асо миг̇аж̇аад̇аа баримужжиссанд̇ийд̇и звам̣ имам̣ амхзхи нивуд̇д̇ам̣ ниваабам̣ саб̣б̣з миг̇агхадаа миг̇асан̇гхаа виссаж̇ж̇зссанд̇и барижжаж̇иссанд̇и. аж̇жхубзгкзяяаамаад̇и д̇зсам̣ г̇ахан̣з аб̣яаавадаа бхавзяяаамаад̇и; яат̇аа д̇ат̇аа ааг̇ажчанд̇зсу хи д̇арун̣абод̇аго ваа махаллаго ваа д̣̇уб̣б̣ало ваа яуут̇абарихийно ваа саггаа хонд̇и лад̣̇д̇хум̣, анааг̇ажчанд̇зсу гин̃жи над̇т̇и. аж̇жхубзгким̣су ко, бхигкавзд̇и звам̣ жинд̇зд̇ваа аб̣яаавадаава ахзсум̣.
265.Yaṃnūna mayaṃ yattha agatīti te kira evaṃ cintayiṃsu – ‘‘anto nipajjitvā anto khādantānampi bhayameva, bāhirato āgantvā khādantānampi santike vasitvā khādantānampi bhayameva, tepi hi vākarajālena parikkhipitvā gahitāyevā’’ti, tena tesaṃ etadahosi – ‘‘yaṃnūna mayaṃ yattha nevāpikassa ca nevāpikaparisāya ca agati avisayo, tattha tattha seyyaṃ kappeyyāmā’’ti. Aññe ghaṭṭessantīti tato tato dūrataravāsino aññe ghaṭṭessanti. Te ghaṭṭitā aññeti tepi ghaṭṭitā aññe tato dūrataravāsino ghaṭṭessanti. Evaṃ imaṃnivāpaṃ nivuttaṃ sabbaso migajātā parimuccissantīti evaṃ imaṃ amhehi nivuttaṃ nivāpaṃ sabbe migaghaṭā migasaṅghā vissajjessanti pariccajissanti. Ajjhupekkheyyāmāti tesaṃ gahaṇe abyāvaṭā bhaveyyāmāti; yathā tathā āgacchantesu hi taruṇapotako vā mahallako vā dubbalo vā yūthaparihīno vā sakkā honti laddhuṃ, anāgacchantesu kiñci natthi. Ajjhupekkhiṃsu kho, bhikkhaveti evaṃ cintetvā abyāvaṭāva ahesuṃ.
267. амум̣ ниваабам̣ нивуд̇д̇ам̣ маарасса амууни жа логаамисаанийд̇и зд̇т̇а ниваабод̇и ваа логаамисаанийд̇и ваа ваддаамисабхууд̇аанам̣ бан̃жаннам̣ гаамаг̇ун̣аанамзд̇ам̣ ад̇хиважанам̣. мааро на жа б̣ийж̇аани вияа гаамаг̇ун̣з вабзнд̇о аахин̣д̣ад̇и, гаамаг̇ун̣аг̇ид̣̇д̇хаанам̣ бана убари васам̣ вад̇д̇зд̇и, д̇асмаа гаамаг̇ун̣аа маарасса ниваабаа наама хонд̇и. д̇зна вуд̇д̇ам̣ – ‘‘амум̣ ниваабам̣ нивуд̇д̇ам̣ маарассаа’’д̇и. на баримужжим̣су маарасса ид̣̇д̇хаанубхааваад̇и маарасса васам̣ г̇ад̇аа ахзсум̣, яат̇аагаамагаран̣ийяаа. аяам̣ сабуд̇д̇абхарияабаб̣б̣аж̇ж̇ааяа ааг̇ад̇аубамаа.
267.Amuṃnivāpaṃ nivuttaṃ mārassa amūni ca lokāmisānīti ettha nivāpoti vā lokāmisānīti vā vaṭṭāmisabhūtānaṃ pañcannaṃ kāmaguṇānametaṃ adhivacanaṃ. Māro na ca bījāni viya kāmaguṇe vapento āhiṇḍati, kāmaguṇagiddhānaṃ pana upari vasaṃ vatteti, tasmā kāmaguṇā mārassa nivāpā nāma honti. Tena vuttaṃ – ‘‘amuṃ nivāpaṃ nivuttaṃ mārassā’’ti. Na parimucciṃsu mārassa iddhānubhāvāti mārassa vasaṃ gatā ahesuṃ, yathākāmakaraṇīyā. Ayaṃ saputtabhariyapabbajjāya āgataupamā.
268. жзд̇овимуд̇д̇и барихааяийд̇и зд̇т̇а жзд̇овимуд̇д̇и наама аран̃н̃з васиссаамаад̇и уббаннааж̇жхаасаяо; со барихааяийд̇и ад̇т̇о. д̇ат̇уубамз ахам̣ имз д̣̇уд̇иязд̇и аяам̣ б̣раахман̣ад̇хаммигабаб̣б̣аж̇ж̇ааяа убамаа. б̣раахман̣аа хи адтажад̇д̇аалийсавассаани гомаараб̣рахмажарияам̣ жарид̇ваа ваддубажчзд̣̇абхаязна бавзн̣им̣ гхадаяиссаамаад̇и д̇ханам̣ бариязсид̇ваа бхарияам̣ г̇ахзд̇ваа аг̇аарамаж̇жхз васанд̇аа згасмим̣ буд̇д̇з ж̇аад̇з ‘‘амхаагам̣ буд̇д̇о ж̇аад̇о ваддам̣ на ужчиннам̣ бавзн̣и гхадид̇аа’’д̇и буна нигкамид̇ваа баб̣б̣аж̇анд̇и ваа д̇амзва ваа са’галад̇д̇аваасам̣ васанд̇и.
268.Cetovimutti parihāyīti ettha cetovimutti nāma araññe vasissāmāti uppannaajjhāsayo; so parihāyīti attho. Tathūpame ahaṃ ime dutiyeti ayaṃ brāhmaṇadhammikapabbajjāya upamā. Brāhmaṇā hi aṭṭhacattālīsavassāni komārabrahmacariyaṃ caritvā vaṭṭupacchedabhayena paveṇiṃ ghaṭayissāmāti dhanaṃ pariyesitvā bhariyaṃ gahetvā agāramajjhe vasantā ekasmiṃ putte jāte ‘‘amhākaṃ putto jāto vaṭṭaṃ na ucchinnaṃ paveṇi ghaṭitā’’ti puna nikkhamitvā pabbajanti vā tameva vā sa’kalattavāsaṃ vasanti.
269. зван̃хи д̇з, бхигкавз, д̇ад̇ияааби саман̣аб̣раахман̣аа на баримужжим̣сууд̇и буримаа вияа д̇зби маарасса ид̣̇д̇хаанубхааваа на мужжим̣су; яат̇аагаамагаран̣ийяаава ахзсум̣. гим̣ бана д̇з агам̣сууд̇и? г̇ааманиг̇амарааж̇ад̇хаанияо осарид̇ваа д̇зсу д̇зсу аараамауяяаанадтаанзсу ассамам̣ маабзд̇ваа нивасанд̇аа гулад̣̇аарагз хад̇т̇иассарат̇асиббаад̣̇ийни наанаббагаараани сиббаани сигкаабзсум̣. ид̇и д̇з ваагараж̇аалзна д̇ад̇ияаа миг̇аж̇аад̇аа вияа маарасса баабимад̇о д̣̇идтиж̇аалзна баригкибид̇ваа яат̇аагаамагаран̣ийяаа ахзсум̣.
269.Evañhi te, bhikkhave, tatiyāpi samaṇabrāhmaṇā na parimucciṃsūti purimā viya tepi mārassa iddhānubhāvā na mucciṃsu; yathākāmakaraṇīyāva ahesuṃ. Kiṃ pana te akaṃsūti? Gāmanigamarājadhāniyo osaritvā tesu tesu ārāmauyyānaṭṭhānesu assamaṃ māpetvā nivasantā kuladārake hatthiassarathasippādīni nānappakārāni sippāni sikkhāpesuṃ. Iti te vākarajālena tatiyā migajātā viya mārassa pāpimato diṭṭhijālena parikkhipitvā yathākāmakaraṇīyā ahesuṃ.
270. д̇ат̇уубамз ахам̣ имз жад̇уд̇т̇зд̇и аяам̣ имасса саасанасса убамаа аахадаа.
270.Tathūpameahaṃ ime catuttheti ayaṃ imassa sāsanassa upamā āhaṭā.
271. анд̇хамагааси мааранд̇и на маарасса агкийни бхинд̣̇и. вибассанаабаад̣̇агаж̇жхаанам̣ самаабаннасса бана бхигкуно имам̣ наама аарамман̣ам̣ ниссааяа жид̇д̇ам̣ вад̇д̇ад̇ийд̇и мааро бассид̇ум̣ на саггод̇и. д̇зна вуд̇д̇ам̣ – ‘‘анд̇хамагааси маара’’нд̇и. абад̣̇ам̣ вад̇хид̇ваа мааражагкунд̇и д̇знзва барияааязна яат̇аа маарасса жагку абад̣̇ам̣ ход̇и ниббад̣̇ам̣, аббад̇идтам̣, нираарамман̣ам̣, звам̣ вад̇хид̇ваад̇и ад̇т̇о. ад̣̇ассанам̣ г̇ад̇о баабимад̇од̇и д̇знзва барияааязна маарасса баабимад̇о ад̣̇ассанам̣ г̇ад̇о. на хи со ад̇д̇ано мам̣сажагкунаа д̇асса вибассанаабаад̣̇агаж̇жхаанам̣ самаабаннасса бхигкуно н̃аан̣асарийрам̣ д̣̇адтум̣ саггод̇и. бан̃н̃ааяа жасса д̣̇исваа аасаваа баригкийн̣аа хонд̇ийд̇и маг̇г̇абан̃н̃ааяа жад̇д̇аари арияасажжаани д̣̇исваа жад̇д̇ааро аасаваа баригкийн̣аа хонд̇и. д̇ин̣н̣о логз висад̇д̇иганд̇и логз сад̇д̇ависад̇д̇абхаавзна висад̇д̇игаад̇и звам̣ сан̇кам̣ г̇ад̇ам̣. ат̇а ваа ‘‘висад̇д̇игаад̇и гзнадтзна висад̇д̇игаа? висад̇аад̇и висад̇д̇игаа висадаад̇и висад̇д̇игаа, вибулаад̇и висад̇д̇игаа, висаалаад̇и висад̇д̇игаа, висамаад̇и висад̇д̇игаа, висаггад̇ийд̇и висад̇д̇игаа, висам̣ харад̇ийд̇и висад̇д̇игаа, висам̣ваад̣̇игаад̇и висад̇д̇игаа, висамуулаад̇и висад̇д̇игаа, висапалаад̇и висад̇д̇игаа, висабарибхог̇аад̇и висад̇д̇игаа, висаалаа ваа бана саа д̇ан̣хаа руубз сад̣̇д̣̇з г̇анд̇хз расз подтаб̣б̣з’’д̇и (махаани. 3; жуул̣ани. мзд̇д̇аг̇уумаан̣авабужчаанид̣̇д̣̇зса 22, каг̇г̇ависаан̣асуд̇д̇анид̣̇д̣̇зса 124) висад̇д̇игаа. звам̣ висад̇д̇игаад̇и сан̇кам̣ г̇ад̇ам̣ д̇ан̣хам̣ д̇ин̣н̣о нид̇д̇ин̣н̣о уд̇д̇ин̣н̣о. д̇зна вужжад̇и – ‘‘д̇ин̣н̣о логз висад̇д̇ига’’нд̇и.
271.Andhamakāsi māranti na mārassa akkhīni bhindi. Vipassanāpādakajjhānaṃ samāpannassa pana bhikkhuno imaṃ nāma ārammaṇaṃ nissāya cittaṃ vattatīti māro passituṃ na sakkoti. Tena vuttaṃ – ‘‘andhamakāsi māra’’nti. Apadaṃ vadhitvā māracakkhunti teneva pariyāyena yathā mārassa cakkhu apadaṃ hoti nippadaṃ, appatiṭṭhaṃ, nirārammaṇaṃ, evaṃ vadhitvāti attho. Adassanaṃ gato pāpimatoti teneva pariyāyena mārassa pāpimato adassanaṃ gato. Na hi so attano maṃsacakkhunā tassa vipassanāpādakajjhānaṃ samāpannassa bhikkhuno ñāṇasarīraṃ daṭṭhuṃ sakkoti. Paññāya cassa disvā āsavā parikkhīṇā hontīti maggapaññāya cattāri ariyasaccāni disvā cattāro āsavā parikkhīṇā honti. Tiṇṇo loke visattikanti loke sattavisattabhāvena visattikāti evaṃ saṅkhaṃ gataṃ. Atha vā ‘‘visattikāti kenaṭṭhena visattikā? Visatāti visattikā visaṭāti visattikā, vipulāti visattikā, visālāti visattikā, visamāti visattikā, visakkatīti visattikā, visaṃ haratīti visattikā, visaṃvādikāti visattikā, visamūlāti visattikā, visaphalāti visattikā, visaparibhogāti visattikā, visālā vā pana sā taṇhā rūpe sadde gandhe rase phoṭṭhabbe’’ti (mahāni. 3; cūḷani. mettagūmāṇavapucchāniddesa 22, khaggavisāṇasuttaniddesa 124) visattikā. Evaṃ visattikāti saṅkhaṃ gataṃ taṇhaṃ tiṇṇo nittiṇṇo uttiṇṇo. Tena vuccati – ‘‘tiṇṇo loke visattika’’nti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
ниваабасуд̇д̇аван̣н̣анаа нидтид̇аа.
Nivāpasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 5. ниваабасуд̇д̇ам̣ • 5. Nivāpasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 5. ниваабасуд̇д̇аван̣н̣анаа • 5. Nivāpasuttavaṇṇanā
