| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
១០. នីវរណសុត្តំ
10. Nīvaraṇasuttaṃ
២២១. ‘‘បញ្ចិមេ, ភិក្ខវេ, នីវរណា អន្ធករណា អចក្ខុករណា អញ្ញាណករណា បញ្ញានិរោធិកា វិឃាតបក្ខិយា អនិព្ពានសំវត្តនិកា។ កតមេ បញ្ច? កាមច្ឆន្ទនីវរណំ, ភិក្ខវេ, អន្ធករណំ អចក្ខុករណំ អញ្ញាណករណំ បញ្ញានិរោធិកំ វិឃាតបក្ខិយំ អនិព្ពានសំវត្តនិកំ ។ ព្យាបាទនីវរណំ, ភិក្ខវេ…បេ.… ថិនមិទ្ធនីវរណំ, ភិក្ខវេ… ឧទ្ធច្ចកុក្កុច្ចនីវរណំ, ភិក្ខវេ… វិចិកិច្ឆានីវរណំ, ភិក្ខវេ, អន្ធករណំ អចក្ខុករណំ អញ្ញាណករណំ បញ្ញានិរោធិកំ វិឃាតបក្ខិយំ អនិព្ពានសំវត្តនិកំ។ ឥមេ ខោ, ភិក្ខវេ, បញ្ច នីវរណា អន្ធករណា អចក្ខុករណា អញ្ញាណករណា បញ្ញានិរោធិកា វិឃាតបក្ខិយា អនិព្ពានសំវត្តនិកា។
221. ‘‘Pañcime, bhikkhave, nīvaraṇā andhakaraṇā acakkhukaraṇā aññāṇakaraṇā paññānirodhikā vighātapakkhiyā anibbānasaṃvattanikā. Katame pañca? Kāmacchandanīvaraṇaṃ, bhikkhave, andhakaraṇaṃ acakkhukaraṇaṃ aññāṇakaraṇaṃ paññānirodhikaṃ vighātapakkhiyaṃ anibbānasaṃvattanikaṃ . Byāpādanīvaraṇaṃ, bhikkhave…pe… thinamiddhanīvaraṇaṃ, bhikkhave… uddhaccakukkuccanīvaraṇaṃ, bhikkhave… vicikicchānīvaraṇaṃ, bhikkhave, andhakaraṇaṃ acakkhukaraṇaṃ aññāṇakaraṇaṃ paññānirodhikaṃ vighātapakkhiyaṃ anibbānasaṃvattanikaṃ. Ime kho, bhikkhave, pañca nīvaraṇā andhakaraṇā acakkhukaraṇā aññāṇakaraṇā paññānirodhikā vighātapakkhiyā anibbānasaṃvattanikā.
‘‘សត្តិមេ, ភិក្ខវេ, ពោជ្ឈង្គា ចក្ខុករណា ញាណករណា បញ្ញាពុទ្ធិយា អវិឃាតបក្ខិយា និព្ពានសំវត្តនិកា។ កតមេ សត្ត? សតិសម្ពោជ្ឈង្គោ, ភិក្ខវេ, ចក្ខុករណោ ញាណករណោ បញ្ញាពុទ្ធិយោ អវិឃាតបក្ខិយោ និព្ពានសំវត្តនិកោ…បេ.… ឧបេក្ខាសម្ពោជ្ឈង្គោ, ភិក្ខវេ, ចក្ខុករណោ ញាណករណោ បញ្ញាពុទ្ធិយោ អវិឃាតបក្ខិយោ និព្ពានសំវត្តនិកោ។ ឥមេ ខោ, ភិក្ខវេ , សត្ត ពោជ្ឈង្គា ចក្ខុករណា ញាណករណា បញ្ញាពុទ្ធិយា អវិឃាតបក្ខិយា និព្ពានសំវត្តនិកា’’តិ។ ទសមំ។
‘‘Sattime, bhikkhave, bojjhaṅgā cakkhukaraṇā ñāṇakaraṇā paññābuddhiyā avighātapakkhiyā nibbānasaṃvattanikā. Katame satta? Satisambojjhaṅgo, bhikkhave, cakkhukaraṇo ñāṇakaraṇo paññābuddhiyo avighātapakkhiyo nibbānasaṃvattaniko…pe… upekkhāsambojjhaṅgo, bhikkhave, cakkhukaraṇo ñāṇakaraṇo paññābuddhiyo avighātapakkhiyo nibbānasaṃvattaniko. Ime kho, bhikkhave , satta bojjhaṅgā cakkhukaraṇā ñāṇakaraṇā paññābuddhiyā avighātapakkhiyā nibbānasaṃvattanikā’’ti. Dasamaṃ.
នីវរណវគ្គោ ចតុត្ថោ។
Nīvaraṇavaggo catuttho.
តស្សុទ្ទានំ –
Tassuddānaṃ –
ទ្វេ កុសលា កិលេសា ច, ទ្វេ យោនិសោ ច ពុទ្ធិ ច;
Dve kusalā kilesā ca, dve yoniso ca buddhi ca;
អាវរណា នីវរណា រុក្ខំ, នីវរណញ្ច តេ ទសាតិ។
Āvaraṇā nīvaraṇā rukkhaṃ, nīvaraṇañca te dasāti.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១០. នីវរណសុត្តវណ្ណនា • 10. Nīvaraṇasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១០. នីវរណសុត្តវណ្ណនា • 10. Nīvaraṇasuttavaṇṇanā
