| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. නීවරණසුත්‌තං
10. Nīvaraṇasuttaṃ
221. ‘‘පඤ්‌චිමෙ, භික්‌ඛවෙ, නීවරණා අන්‌ධකරණා අචක්‌ඛුකරණා අඤ්‌ඤාණකරණා පඤ්‌ඤානිරොධිකා විඝාතපක්‌ඛියා අනිබ්‌බානසංවත්‌තනිකා. කතමෙ පඤ්‌ච? කාමච්‌ඡන්‌දනීවරණං, භික්‌ඛවෙ, අන්‌ධකරණං අචක්‌ඛුකරණං අඤ්‌ඤාණකරණං පඤ්‌ඤානිරොධිකං විඝාතපක්‌ඛියං අනිබ්‌බානසංවත්‌තනිකං . බ්‍යාපාදනීවරණං, භික්‌ඛවෙ…පෙ.… ථිනමිද්‌ධනීවරණං, භික්‌ඛවෙ… උද්‌ධච්‌චකුක්‌කුච්‌චනීවරණං, භික්‌ඛවෙ… විචිකිච්‌ඡානීවරණං, භික්‌ඛවෙ, අන්‌ධකරණං අචක්‌ඛුකරණං අඤ්‌ඤාණකරණං පඤ්‌ඤානිරොධිකං විඝාතපක්‌ඛියං අනිබ්‌බානසංවත්‌තනිකං. ඉමෙ ඛො, භික්‌ඛවෙ, පඤ්‌ච නීවරණා අන්‌ධකරණා අචක්‌ඛුකරණා අඤ්‌ඤාණකරණා පඤ්‌ඤානිරොධිකා විඝාතපක්‌ඛියා අනිබ්‌බානසංවත්‌තනිකා.
221. ‘‘Pañcime, bhikkhave, nīvaraṇā andhakaraṇā acakkhukaraṇā aññāṇakaraṇā paññānirodhikā vighātapakkhiyā anibbānasaṃvattanikā. Katame pañca? Kāmacchandanīvaraṇaṃ, bhikkhave, andhakaraṇaṃ acakkhukaraṇaṃ aññāṇakaraṇaṃ paññānirodhikaṃ vighātapakkhiyaṃ anibbānasaṃvattanikaṃ . Byāpādanīvaraṇaṃ, bhikkhave…pe… thinamiddhanīvaraṇaṃ, bhikkhave… uddhaccakukkuccanīvaraṇaṃ, bhikkhave… vicikicchānīvaraṇaṃ, bhikkhave, andhakaraṇaṃ acakkhukaraṇaṃ aññāṇakaraṇaṃ paññānirodhikaṃ vighātapakkhiyaṃ anibbānasaṃvattanikaṃ. Ime kho, bhikkhave, pañca nīvaraṇā andhakaraṇā acakkhukaraṇā aññāṇakaraṇā paññānirodhikā vighātapakkhiyā anibbānasaṃvattanikā.
‘‘සත්‌තිමෙ, භික්‌ඛවෙ, බොජ්‌ඣඞ්‌ගා චක්‌ඛුකරණා ඤාණකරණා පඤ්‌ඤාබුද්‌ධියා අවිඝාතපක්‌ඛියා නිබ්‌බානසංවත්‌තනිකා. කතමෙ සත්‌ත? සතිසම්‌බොජ්‌ඣඞ්‌ගො, භික්‌ඛවෙ, චක්‌ඛුකරණො ඤාණකරණො පඤ්‌ඤාබුද්‌ධියො අවිඝාතපක්‌ඛියො නිබ්‌බානසංවත්‌තනිකො…පෙ.… උපෙක්‌ඛාසම්‌බොජ්‌ඣඞ්‌ගො, භික්‌ඛවෙ, චක්‌ඛුකරණො ඤාණකරණො පඤ්‌ඤාබුද්‌ධියො අවිඝාතපක්‌ඛියො නිබ්‌බානසංවත්‌තනිකො. ඉමෙ ඛො, භික්‌ඛවෙ , සත්‌ත බොජ්‌ඣඞ්‌ගා චක්‌ඛුකරණා ඤාණකරණා පඤ්‌ඤාබුද්‌ධියා අවිඝාතපක්‌ඛියා නිබ්‌බානසංවත්‌තනිකා’’ති. දසමං.
‘‘Sattime, bhikkhave, bojjhaṅgā cakkhukaraṇā ñāṇakaraṇā paññābuddhiyā avighātapakkhiyā nibbānasaṃvattanikā. Katame satta? Satisambojjhaṅgo, bhikkhave, cakkhukaraṇo ñāṇakaraṇo paññābuddhiyo avighātapakkhiyo nibbānasaṃvattaniko…pe… upekkhāsambojjhaṅgo, bhikkhave, cakkhukaraṇo ñāṇakaraṇo paññābuddhiyo avighātapakkhiyo nibbānasaṃvattaniko. Ime kho, bhikkhave , satta bojjhaṅgā cakkhukaraṇā ñāṇakaraṇā paññābuddhiyā avighātapakkhiyā nibbānasaṃvattanikā’’ti. Dasamaṃ.
නීවරණවග්‌ගො චතුත්‌ථො.
Nīvaraṇavaggo catuttho.
තස්‌සුද්‌දානං –
Tassuddānaṃ –
ද්‌වෙ කුසලා කිලෙසා ච, ද්‌වෙ යොනිසො ච බුද්‌ධි ච;
Dve kusalā kilesā ca, dve yoniso ca buddhi ca;
ආවරණා නීවරණා රුක්‌ඛං, නීවරණඤ්‌ච තෙ දසාති.
Āvaraṇā nīvaraṇā rukkhaṃ, nīvaraṇañca te dasāti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. නීවරණසුත්‌තවණ්‌ණනා • 10. Nīvaraṇasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. නීවරණසුත්‌තවණ්‌ණනා • 10. Nīvaraṇasuttavaṇṇanā
