| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. නිවෙසකසුත්‌තං
5. Nivesakasuttaṃ
76. අථ ඛො ආයස්‌මා ආනන්‌දො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො ආයස්‌මන්‌තං ආනන්‌දං භගවා එතදවොච –
76. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca –
‘‘යෙ, ආනන්‌ද, අනුකම්‌පෙය්‍යාථ යෙ ච සොතබ්‌බං මඤ්‌ඤෙය්‍යුං මිත්‌තා වා අමච්‌චා වා ඤාතී වා සාලොහිතා වා තෙ වො, ආනන්‌ද, තීසු ඨානෙසු සමාදපෙතබ්‌බා 1 නිවෙසෙතබ්‌බා පතිට්‌ඨාපෙතබ්‌බා. කතමෙසු තීසු? බුද්‌ධෙ අවෙච්‌චප්‌පසාදෙ සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා – ‘ඉතිපි සො භගවා අරහං සම්‌මාසම්‌බුද්‌ධො විජ්‌ජාචරණසම්‌පන්‌නො සුගතො ලොකවිදූ අනුත්‌තරො පුරිසදම්‌මසාරථි; සත්‌ථා දෙවමනුස්‌සානං, බුද්‌ධො භගවා’ති, ධම්‌මෙ අවෙච්‌චප්‌පසාදෙ සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා – ‘ස්‌වාක්‌ඛාතො භගවතා ධම්‌මො සන්‌දිට්‌ඨිකො අකාලිකො එහිපස්‌සිකො ඔපනෙය්‍යිකො පච්‌චත්‌තං වෙදිතබ්‌බො විඤ්‌ඤූහී’ති, සඞ්‌ඝෙ අවෙච්‌චප්‌පසාදෙ සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා – ‘සුප්‌පටිපන්‌නො භගවතො සාවකසඞ්‌ඝො උජුප්‌පටිපන්‌නො භගවතො සාවකසඞ්‌ඝො ඤායප්‌පටිපන්‌නො භගවතො සාවකසඞ්‌ඝො සාමීචිප්‌පටිපන්‌නො භගවතො සාවකසඞ්‌ඝො, යදිදං චත්‌තාරි පුරිසයුගානි අට්‌ඨ පුරිසපුග්‌ගලා එස භගවතො සාවකසඞ්‌ඝො ආහුනෙය්‍යො පාහුනෙය්‍යො දක්‌ඛිණෙය්‍යො අඤ්‌ජලිකරණීයො අනුත්‌තරං පුඤ්‌ඤක්‌ඛෙත්‌තං ලොකස්‌සා’’’ති.
‘‘Ye, ānanda, anukampeyyātha ye ca sotabbaṃ maññeyyuṃ mittā vā amaccā vā ñātī vā sālohitā vā te vo, ānanda, tīsu ṭhānesu samādapetabbā 2 nivesetabbā patiṭṭhāpetabbā. Katamesu tīsu? Buddhe aveccappasāde samādapetabbā nivesetabbā patiṭṭhāpetabbā – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi; satthā devamanussānaṃ, buddho bhagavā’ti, dhamme aveccappasāde samādapetabbā nivesetabbā patiṭṭhāpetabbā – ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī’ti, saṅghe aveccappasāde samādapetabbā nivesetabbā patiṭṭhāpetabbā – ‘suppaṭipanno bhagavato sāvakasaṅgho ujuppaṭipanno bhagavato sāvakasaṅgho ñāyappaṭipanno bhagavato sāvakasaṅgho sāmīcippaṭipanno bhagavato sāvakasaṅgho, yadidaṃ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā’’’ti.
‘‘සියා, ආනන්‌ද, චතුන්‌නං මහාභූතානං අඤ්‌ඤථත්‌තං – පථවීධාතුයා ආපොධාතුයා තෙජොධාතුයා වායොධාතුයා, න ත්‌වෙව බුද්‌ධෙ අවෙච්‌චප්‌පසාදෙන සමන්‌නාගතස්‌ස අරියසාවකස්‌ස සියා අඤ්‌ඤථත්‌තං තත්‍රිදං අඤ්‌ඤථත්‌තං. සො වතානන්‌ද, බුද්‌ධෙ අවෙච්‌චප්‌පසාදෙන සමන්‌නාගතො අරියසාවකො නිරයං වා තිරච්‌ඡානයොනිං වා පෙත්‌තිවිසයං වා උපපජ්‌ජිස්‌සතීති නෙතං ඨානං විජ්‌ජති.
‘‘Siyā, ānanda, catunnaṃ mahābhūtānaṃ aññathattaṃ – pathavīdhātuyā āpodhātuyā tejodhātuyā vāyodhātuyā, na tveva buddhe aveccappasādena samannāgatassa ariyasāvakassa siyā aññathattaṃ tatridaṃ aññathattaṃ. So vatānanda, buddhe aveccappasādena samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatīti netaṃ ṭhānaṃ vijjati.
‘‘සියා , ආනන්‌ද, චතුන්‌නං මහාභූතානං අඤ්‌ඤථත්‌තං – පථවීධාතුයා ආපොධාතුයා තෙජොධාතුයා වායොධාතුයා, න ත්‌වෙව ධම්‌මෙ…පෙ.… න ත්‌වෙව සඞ්‌ඝෙ අවෙච්‌චප්‌පසාදෙන සමන්‌නාගතස්‌ස අරියසාවකස්‌ස සියා අඤ්‌ඤථත්‌තං තත්‍රිදං අඤ්‌ඤථත්‌තං. සො වතානන්‌ද, සඞ්‌ඝෙ අවෙච්‌චප්‌පසාදෙන සමන්‌නාගතො අරියසාවකො නිරයං වා තිරච්‌ඡානයොනිං වා පෙත්‌තිවිසයං වා උපපජ්‌ජිස්‌සතීති නෙතං ඨානං විජ්‌ජති.
‘‘Siyā , ānanda, catunnaṃ mahābhūtānaṃ aññathattaṃ – pathavīdhātuyā āpodhātuyā tejodhātuyā vāyodhātuyā, na tveva dhamme…pe… na tveva saṅghe aveccappasādena samannāgatassa ariyasāvakassa siyā aññathattaṃ tatridaṃ aññathattaṃ. So vatānanda, saṅghe aveccappasādena samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatīti netaṃ ṭhānaṃ vijjati.
‘‘යෙ, ආනන්‌ද, අනුකම්‌පෙය්‍යාථ යෙ ච සොතබ්‌බං මඤ්‌ඤෙය්‍යුං මිත්‌තා වා අමච්‌චා වා ඤාතී වා සාලොහිතා වා තෙ වො, ආනන්‌ද, ඉමෙසු තීසු ඨානෙසු සමාදපෙතබ්‌බා නිවෙසෙතබ්‌බා පතිට්‌ඨාපෙතබ්‌බා’’ති. පඤ්‌චමං.
‘‘Ye, ānanda, anukampeyyātha ye ca sotabbaṃ maññeyyuṃ mittā vā amaccā vā ñātī vā sālohitā vā te vo, ānanda, imesu tīsu ṭhānesu samādapetabbā nivesetabbā patiṭṭhāpetabbā’’ti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. නිවෙසකසුත්‌තවණ්‌ණනා • 5. Nivesakasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5. නිවෙසකසුත්‌තවණ්‌ණනා • 5. Nivesakasuttavaṇṇanā
