| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༥. ནིཝེསཀསུཏྟཾ
5. Nivesakasuttaṃ
༧༦. ཨཐ ཁོ ཨཱཡསྨཱ ཨཱནནྡོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ ཨཱནནྡཾ བྷགཝཱ ཨེཏདཝོཙ –
76. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca –
‘‘ཡེ, ཨཱནནྡ, ཨནུཀམྤེཡྻཱཐ ཡེ ཙ སོཏབྦཾ མཉྙེཡྻུཾ མིཏྟཱ ཝཱ ཨམཙྩཱ ཝཱ ཉཱཏཱི ཝཱ སཱལོཧིཏཱ ཝཱ ཏེ ཝོ, ཨཱནནྡ, ཏཱིསུ ཋཱནེསུ སམཱདཔེཏབྦཱ 1 ནིཝེསེཏབྦཱ པཏིཊྛཱཔེཏབྦཱ། ཀཏམེསུ ཏཱིསུ? བུདྡྷེ ཨཝེཙྩཔྤསཱདེ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ – ‘ཨིཏིཔི སོ བྷགཝཱ ཨརཧཾ སམྨཱསམྦུདྡྷོ ཝིཛྫཱཙརཎསམྤནྣོ སུགཏོ ལོཀཝིདཱུ ཨནུཏྟརོ པུརིསདམྨསཱརཐི; སཏྠཱ དེཝམནུསྶཱནཾ, བུདྡྷོ བྷགཝཱ’ཏི, དྷམྨེ ཨཝེཙྩཔྤསཱདེ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ – ‘སྭཱཀྑཱཏོ བྷགཝཏཱ དྷམྨོ སནྡིཊྛིཀོ ཨཀཱལིཀོ ཨེཧིཔསྶིཀོ ཨོཔནེཡྻིཀོ པཙྩཏྟཾ ཝེདིཏབྦོ ཝིཉྙཱུཧཱི’ཏི, སངྒྷེ ཨཝེཙྩཔྤསཱདེ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ – ‘སུཔྤཊིཔནྣོ བྷགཝཏོ སཱཝཀསངྒྷོ ཨུཛུཔྤཊིཔནྣོ བྷགཝཏོ སཱཝཀསངྒྷོ ཉཱཡཔྤཊིཔནྣོ བྷགཝཏོ སཱཝཀསངྒྷོ སཱམཱིཙིཔྤཊིཔནྣོ བྷགཝཏོ སཱཝཀསངྒྷོ, ཡདིདཾ ཙཏྟཱརི པུརིསཡུགཱནི ཨཊྛ པུརིསཔུགྒལཱ ཨེས བྷགཝཏོ སཱཝཀསངྒྷོ ཨཱཧུནེཡྻོ པཱཧུནེཡྻོ དཀྑིཎེཡྻོ ཨཉྫལིཀརཎཱིཡོ ཨནུཏྟརཾ པུཉྙཀྑེཏྟཾ ལོཀསྶཱ’’’ཏི།
‘‘Ye, ānanda, anukampeyyātha ye ca sotabbaṃ maññeyyuṃ mittā vā amaccā vā ñātī vā sālohitā vā te vo, ānanda, tīsu ṭhānesu samādapetabbā 2 nivesetabbā patiṭṭhāpetabbā. Katamesu tīsu? Buddhe aveccappasāde samādapetabbā nivesetabbā patiṭṭhāpetabbā – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi; satthā devamanussānaṃ, buddho bhagavā’ti, dhamme aveccappasāde samādapetabbā nivesetabbā patiṭṭhāpetabbā – ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī’ti, saṅghe aveccappasāde samādapetabbā nivesetabbā patiṭṭhāpetabbā – ‘suppaṭipanno bhagavato sāvakasaṅgho ujuppaṭipanno bhagavato sāvakasaṅgho ñāyappaṭipanno bhagavato sāvakasaṅgho sāmīcippaṭipanno bhagavato sāvakasaṅgho, yadidaṃ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassā’’’ti.
‘‘སིཡཱ, ཨཱནནྡ, ཙཏུནྣཾ མཧཱབྷཱུཏཱནཾ ཨཉྙཐཏྟཾ – པཐཝཱིདྷཱཏུཡཱ ཨཱཔོདྷཱཏུཡཱ ཏེཛོདྷཱཏུཡཱ ཝཱཡོདྷཱཏུཡཱ, ན ཏྭེཝ བུདྡྷེ ཨཝེཙྩཔྤསཱདེན སམནྣཱགཏསྶ ཨརིཡསཱཝཀསྶ སིཡཱ ཨཉྙཐཏྟཾ ཏཏྲིདཾ ཨཉྙཐཏྟཾ། སོ ཝཏཱནནྡ, བུདྡྷེ ཨཝེཙྩཔྤསཱདེན སམནྣཱགཏོ ཨརིཡསཱཝཀོ ནིརཡཾ ཝཱ ཏིརཙྪཱནཡོནིཾ ཝཱ པེཏྟིཝིསཡཾ ཝཱ ཨུཔཔཛྫིསྶཏཱིཏི ནེཏཾ ཋཱནཾ ཝིཛྫཏི།
‘‘Siyā, ānanda, catunnaṃ mahābhūtānaṃ aññathattaṃ – pathavīdhātuyā āpodhātuyā tejodhātuyā vāyodhātuyā, na tveva buddhe aveccappasādena samannāgatassa ariyasāvakassa siyā aññathattaṃ tatridaṃ aññathattaṃ. So vatānanda, buddhe aveccappasādena samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatīti netaṃ ṭhānaṃ vijjati.
‘‘སིཡཱ , ཨཱནནྡ, ཙཏུནྣཾ མཧཱབྷཱུཏཱནཾ ཨཉྙཐཏྟཾ – པཐཝཱིདྷཱཏུཡཱ ཨཱཔོདྷཱཏུཡཱ ཏེཛོདྷཱཏུཡཱ ཝཱཡོདྷཱཏུཡཱ, ན ཏྭེཝ དྷམྨེ…པེ॰… ན ཏྭེཝ སངྒྷེ ཨཝེཙྩཔྤསཱདེན སམནྣཱགཏསྶ ཨརིཡསཱཝཀསྶ སིཡཱ ཨཉྙཐཏྟཾ ཏཏྲིདཾ ཨཉྙཐཏྟཾ། སོ ཝཏཱནནྡ, སངྒྷེ ཨཝེཙྩཔྤསཱདེན སམནྣཱགཏོ ཨརིཡསཱཝཀོ ནིརཡཾ ཝཱ ཏིརཙྪཱནཡོནིཾ ཝཱ པེཏྟིཝིསཡཾ ཝཱ ཨུཔཔཛྫིསྶཏཱིཏི ནེཏཾ ཋཱནཾ ཝིཛྫཏི།
‘‘Siyā , ānanda, catunnaṃ mahābhūtānaṃ aññathattaṃ – pathavīdhātuyā āpodhātuyā tejodhātuyā vāyodhātuyā, na tveva dhamme…pe… na tveva saṅghe aveccappasādena samannāgatassa ariyasāvakassa siyā aññathattaṃ tatridaṃ aññathattaṃ. So vatānanda, saṅghe aveccappasādena samannāgato ariyasāvako nirayaṃ vā tiracchānayoniṃ vā pettivisayaṃ vā upapajjissatīti netaṃ ṭhānaṃ vijjati.
‘‘ཡེ, ཨཱནནྡ, ཨནུཀམྤེཡྻཱཐ ཡེ ཙ སོཏབྦཾ མཉྙེཡྻུཾ མིཏྟཱ ཝཱ ཨམཙྩཱ ཝཱ ཉཱཏཱི ཝཱ སཱལོཧིཏཱ ཝཱ ཏེ ཝོ, ཨཱནནྡ, ཨིམེསུ ཏཱིསུ ཋཱནེསུ སམཱདཔེཏབྦཱ ནིཝེསེཏབྦཱ པཏིཊྛཱཔེཏབྦཱ’’ཏི། པཉྩམཾ།
‘‘Ye, ānanda, anukampeyyātha ye ca sotabbaṃ maññeyyuṃ mittā vā amaccā vā ñātī vā sālohitā vā te vo, ānanda, imesu tīsu ṭhānesu samādapetabbā nivesetabbā patiṭṭhāpetabbā’’ti. Pañcamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༥. ནིཝེསཀསུཏྟཝཎྞནཱ • 5. Nivesakasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༥. ནིཝེསཀསུཏྟཝཎྞནཱ • 5. Nivesakasuttavaṇṇanā
