| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. நிவேஸகஸுத்தவண்ணனா
5. Nivesakasuttavaṇṇanā
76. பஞ்சமே அமச்சாதி ஸுஹஜ்ஜா. ஞாதீதி ஸஸ்ஸுஸஸுரபக்கி²கா. ஸாலோஹிதாதி ஸமானலோஹிதா பா⁴திப⁴கி³னிஆத³யோ. அவேச்சப்பஸாதே³தி கு³ணே அவேச்ச ஜானித்வா உப்பன்னே அசலப்பஸாதே³. அஞ்ஞத²த்தந்தி பா⁴வஞ்ஞத²த்தங் . பத²வீதா⁴துயாதிஆதீ³ஸு வீஸதியா கொட்டா²ஸேஸு த²த்³தா⁴காரபூ⁴தாய பத²வீதா⁴துயா, த்³வாத³ஸஸு கொட்டா²ஸேஸு யூஸக³தாய ஆப³ந்த⁴னபூ⁴தாய ஆபோதா⁴துயா, சதூஸு கொட்டா²ஸேஸு பரிபாசனபூ⁴தாய தேஜோதா⁴துயா, ச²ஸு கொட்டா²ஸேஸு வித்த²ம்ப⁴னபூ⁴தாய வாயோதா⁴துயா ஸியா அஞ்ஞத²த்தங். ந த்வேவாதி இமேஸங் ஹி சதுன்னங் மஹாபூ⁴தானங் அஞ்ஞமஞ்ஞபா⁴வூபக³மனேன ஸியா அஞ்ஞத²த்தங், அரியஸாவகஸ்ஸ பன ந த்வேவ ஸியாதி த³ஸ்ஸேதி. எத்த² ச அஞ்ஞத²த்தந்தி பஸாத³ஞ்ஞத²த்தஞ்ச க³திஅஞ்ஞத²த்தஞ்ச. தஞ்ஹி தஸ்ஸ ந ஹோதி, பா⁴வஞ்ஞத²த்தங் பன ஹோதி. அரியஸாவகோ ஹி மனுஸ்ஸோ ஹுத்வா தே³வோபி ஹோதி ப்³ரஹ்மாபி. பஸாதோ³ பனஸ்ஸ ப⁴வந்தரேபி ந விக³ச்ச²தி, ந ச அபாயக³திஸங்கா²தங் க³திஅஞ்ஞத²த்தங் பாபுணாதி. ஸத்தா²பி ததே³வ த³ஸ்ஸெந்தோ தத்ரித³ங் அஞ்ஞத²த்தந்திஆதி³மாஹ. ஸேஸமெத்த² உத்தானத்த²மேவாதி.
76. Pañcame amaccāti suhajjā. Ñātīti sassusasurapakkhikā. Sālohitāti samānalohitā bhātibhaginiādayo. Aveccappasādeti guṇe avecca jānitvā uppanne acalappasāde. Aññathattanti bhāvaññathattaṃ . Pathavīdhātuyātiādīsu vīsatiyā koṭṭhāsesu thaddhākārabhūtāya pathavīdhātuyā, dvādasasu koṭṭhāsesu yūsagatāya ābandhanabhūtāya āpodhātuyā, catūsu koṭṭhāsesu paripācanabhūtāya tejodhātuyā, chasu koṭṭhāsesu vitthambhanabhūtāya vāyodhātuyā siyā aññathattaṃ. Na tvevāti imesaṃ hi catunnaṃ mahābhūtānaṃ aññamaññabhāvūpagamanena siyā aññathattaṃ, ariyasāvakassa pana na tveva siyāti dasseti. Ettha ca aññathattanti pasādaññathattañca gatiaññathattañca. Tañhi tassa na hoti, bhāvaññathattaṃ pana hoti. Ariyasāvako hi manusso hutvā devopi hoti brahmāpi. Pasādo panassa bhavantarepi na vigacchati, na ca apāyagatisaṅkhātaṃ gatiaññathattaṃ pāpuṇāti. Satthāpi tadeva dassento tatridaṃ aññathattantiādimāha. Sesamettha uttānatthamevāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. நிவேஸகஸுத்தங் • 5. Nivesakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. நிவேஸகஸுத்தவண்ணனா • 5. Nivesakasuttavaṇṇanā
