| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
5. නිවෙසකසුත්‌තවණ්‌ණනා
5. Nivesakasuttavaṇṇanā
76. පඤ්‌චමෙ අමච්‌චාති සුහජ්‌ජා. ඤාතීති සස්‌සුසසුරපක්‌ඛිකා. සාලොහිතාති සමානලොහිතා භාතිභගිනිආදයො. අවෙච්‌චප්‌පසාදෙති ගුණෙ අවෙච්‌ච ජානිත්‌වා උප්‌පන්‌නෙ අචලප්‌පසාදෙ. අඤ්‌ඤථත්‌තන්‌ති භාවඤ්‌ඤථත්‌තං . පථවීධාතුයාතිආදීසු වීසතියා කොට්‌ඨාසෙසු ථද්‌ධාකාරභූතාය පථවීධාතුයා, ද්‌වාදසසු කොට්‌ඨාසෙසු යූසගතාය ආබන්‌ධනභූතාය ආපොධාතුයා, චතූසු කොට්‌ඨාසෙසු පරිපාචනභූතාය තෙජොධාතුයා, ඡසු කොට්‌ඨාසෙසු විත්‌ථම්‌භනභූතාය වායොධාතුයා සියා අඤ්‌ඤථත්‌තං. න ත්‌වෙවාති ඉමෙසං හි චතුන්‌නං මහාභූතානං අඤ්‌ඤමඤ්‌ඤභාවූපගමනෙන සියා අඤ්‌ඤථත්‌තං, අරියසාවකස්‌ස පන න ත්‌වෙව සියාති දස්‌සෙති. එත්‌ථ ච අඤ්‌ඤථත්‌තන්‌ති පසාදඤ්‌ඤථත්‌තඤ්‌ච ගතිඅඤ්‌ඤථත්‌තඤ්‌ච. තඤ්‌හි තස්‌ස න හොති, භාවඤ්‌ඤථත්‌තං පන හොති. අරියසාවකො හි මනුස්‌සො හුත්‌වා දෙවොපි හොති බ්‍රහ්‌මාපි. පසාදො පනස්‌ස භවන්‌තරෙපි න විගච්‌ඡති, න ච අපායගතිසඞ්‌ඛාතං ගතිඅඤ්‌ඤථත්‌තං පාපුණාති. සත්‌ථාපි තදෙව දස්‌සෙන්‌තො තත්‍රිදං අඤ්‌ඤථත්‌තන්‌තිආදිමාහ. සෙසමෙත්‌ථ උත්‌තානත්‌ථමෙවාති.
76. Pañcame amaccāti suhajjā. Ñātīti sassusasurapakkhikā. Sālohitāti samānalohitā bhātibhaginiādayo. Aveccappasādeti guṇe avecca jānitvā uppanne acalappasāde. Aññathattanti bhāvaññathattaṃ . Pathavīdhātuyātiādīsu vīsatiyā koṭṭhāsesu thaddhākārabhūtāya pathavīdhātuyā, dvādasasu koṭṭhāsesu yūsagatāya ābandhanabhūtāya āpodhātuyā, catūsu koṭṭhāsesu paripācanabhūtāya tejodhātuyā, chasu koṭṭhāsesu vitthambhanabhūtāya vāyodhātuyā siyā aññathattaṃ. Na tvevāti imesaṃ hi catunnaṃ mahābhūtānaṃ aññamaññabhāvūpagamanena siyā aññathattaṃ, ariyasāvakassa pana na tveva siyāti dasseti. Ettha ca aññathattanti pasādaññathattañca gatiaññathattañca. Tañhi tassa na hoti, bhāvaññathattaṃ pana hoti. Ariyasāvako hi manusso hutvā devopi hoti brahmāpi. Pasādo panassa bhavantarepi na vigacchati, na ca apāyagatisaṅkhātaṃ gatiaññathattaṃ pāpuṇāti. Satthāpi tadeva dassento tatridaṃ aññathattantiādimāha. Sesamettha uttānatthamevāti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 5. නිවෙසකසුත්‌තං • 5. Nivesakasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5. නිවෙසකසුත්‌තවණ්‌ණනා • 5. Nivesakasuttavaṇṇanā
