| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၅. နိဝုတကထာဝဏ္ဏနာ
5. Nivutakathāvaṇṇanā
၆၆၅-၆၆၇. ဣဒာနိ နိဝုတကထာ နာမ ဟောတိ။ တတ္ထ သုဒ္ဓသ္သ သုဒ္ဓကိစ္စာဘာဝတော နီဝရဏေဟိ နိဝုတော ဩဖုဋော ပရိယောနဒ္ဓော စ နီဝရဏံ ဇဟတီတိ ယေသံ လဒ္ဓိ, သေယ္ယထာပိ ဥတ္တရာပထကာနံ; တေ သန္ဓာယ နိဝုတောတိပုစ္ဆာ သကဝာဒိသ္သ, ပဋိညာ ဣတရသ္သ။ ရတ္တော ရာဂန္တိအာဒိ နိဝုတသ္သ နီဝရဏဇဟနေ ဒောသဒသ္သနတ္ထံ ဝုတ္တံ။ ပရိသုဒ္ဓေ ပရိယောဒာတေတိအာဒိ ဝိက္ခမ္ဘနဝိသုဒ္ဓိယာ ဝိသုဒ္ဓသ္သ သမုစ္ဆေဒဝိသုဒ္ဓိဒသ္သနတ္ထံ ဝုတ္တံ။ တသ္သ ဧဝံ ဇာနတောတိအာဒိ ဇာနတော ပသ္သတော အာသဝက္ခယံ ဒီပေတိ, န နိဝုတသ္သ နီဝရဏဇဟနံ, တသ္မာ အသာဓကန္တိ။
665-667. Idāni nivutakathā nāma hoti. Tattha suddhassa suddhakiccābhāvato nīvaraṇehi nivuto ophuṭo pariyonaddho ca nīvaraṇaṃ jahatīti yesaṃ laddhi, seyyathāpi uttarāpathakānaṃ; te sandhāya nivutotipucchā sakavādissa, paṭiññā itarassa. Ratto rāgantiādi nivutassa nīvaraṇajahane dosadassanatthaṃ vuttaṃ. Parisuddhe pariyodātetiādi vikkhambhanavisuddhiyā visuddhassa samucchedavisuddhidassanatthaṃ vuttaṃ. Tassa evaṃ jānatotiādi jānato passato āsavakkhayaṃ dīpeti, na nivutassa nīvaraṇajahanaṃ, tasmā asādhakanti.
နိဝုတကထာဝဏ္ဏနာ။
Nivutakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၃၀) ၅. နိဝုတကထာ • (130) 5. Nivutakathā
