| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৬. ছট্ঠৰগ্গো
6. Chaṭṭhavaggo
১. নিযামকথাৰণ্ণনা
1. Niyāmakathāvaṇṇanā
৪৪৫-৪৪৭. ইদানি নিযামকথা নাম হোতি। তত্থ নিযামোতি ‘‘ভব্বো নিযামং ওক্কমিতুং কুসলেসু ধম্মেসু সম্মত্ত’’ন্তি (পু॰ প॰ ১৩) ৰচনতো অরিযমগ্গো ৰুচ্চতি। যস্মা পন তস্মিং উপ্পজ্জিত্ৰা নিরুদ্ধেপি পুগ্গলো অনিযতো নাম ন হোতি, তস্মা ‘‘সো নিযামো নিচ্চট্ঠেন অসঙ্খতো’’তি যেসং লদ্ধি, সেয্যথাপি অন্ধকানং; তে সন্ধায পুচ্ছা সকৰাদিস্স, পটিঞ্ঞা ইতরস্স। ততো ‘‘যদি সো অসঙ্খতো, এৰরূপেন তেন ভৰিতব্ব’’ন্তি দীপেন্তো নিব্বানন্তিআদিমাহ। সংসন্দনপুচ্ছা উত্তানত্থাযেৰ।
445-447. Idāni niyāmakathā nāma hoti. Tattha niyāmoti ‘‘bhabbo niyāmaṃ okkamituṃ kusalesu dhammesu sammatta’’nti (pu. pa. 13) vacanato ariyamaggo vuccati. Yasmā pana tasmiṃ uppajjitvā niruddhepi puggalo aniyato nāma na hoti, tasmā ‘‘so niyāmo niccaṭṭhena asaṅkhato’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Tato ‘‘yadi so asaṅkhato, evarūpena tena bhavitabba’’nti dīpento nibbānantiādimāha. Saṃsandanapucchā uttānatthāyeva.
অত্থি কেচীতিআদি নিযামস্স সঙ্খতভাৰদীপনত্থং ৰুত্তং। মগ্গো অসঙ্খতোতিপঞ্হে তস্স উপ্পাদনিরোধভাৰতো পটিক্খিপতীতি। নিযামো সঙ্খতোতিপঞ্হে নিরুদ্ধেপি মগ্গে নিযামস্স অত্থিতং সন্ধায পটিক্খিপতি। সোতাপত্তিনিযামোতিআদিপঞ্হেসুপি অনুলোমতো চ পটিলোমতো চ ইমিনাৰ নযেন অত্থো ৰেদিতব্বো। পঞ্চ অসঙ্খতানীতি পুট্ঠো পঞ্চন্নং অসঙ্খতানং আগতট্ঠানং অপস্সন্তো পটিক্খিপতি। দুতিযং পুট্ঠো চতুন্নং সম্মত্তনিযামানং নিযামৰচনতো নিব্বানস্স চ অসঙ্খতভাৰতো পটিজানাতি। মিচ্ছত্তনিযামপঞ্হো নিযামৰচনমত্তেন অসঙ্খততায অযুত্তভাৰদীপনত্থং ৰুত্তোতি।
Atthikecītiādi niyāmassa saṅkhatabhāvadīpanatthaṃ vuttaṃ. Maggo asaṅkhatotipañhe tassa uppādanirodhabhāvato paṭikkhipatīti. Niyāmo saṅkhatotipañhe niruddhepi magge niyāmassa atthitaṃ sandhāya paṭikkhipati. Sotāpattiniyāmotiādipañhesupi anulomato ca paṭilomato ca imināva nayena attho veditabbo. Pañca asaṅkhatānīti puṭṭho pañcannaṃ asaṅkhatānaṃ āgataṭṭhānaṃ apassanto paṭikkhipati. Dutiyaṃ puṭṭho catunnaṃ sammattaniyāmānaṃ niyāmavacanato nibbānassa ca asaṅkhatabhāvato paṭijānāti. Micchattaniyāmapañho niyāmavacanamattena asaṅkhatatāya ayuttabhāvadīpanatthaṃ vuttoti.
নিযামকথাৰণ্ণনা।
Niyāmakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৫৩) ১. নিযামকথা • (53) 1. Niyāmakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ১. নিযামকথাৰণ্ণনা • 1. Niyāmakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ১. নিযামকথাৰণ্ণনা • 1. Niyāmakathāvaṇṇanā
