| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၆. ဆဋ္ဌဝဂ္ဂော
6. Chaṭṭhavaggo
၁. နိယာမကထာဝဏ္ဏနာ
1. Niyāmakathāvaṇṇanā
၄၄၅-၄၄၇. ဣဒာနိ နိယာမကထာ နာမ ဟောတိ။ တတ္ထ နိယာမောတိ ‘‘ဘဗ္ဗော နိယာမံ ဩက္ကမိတုံ ကုသလေသု ဓမ္မေသု သမ္မတ္တ’’န္တိ (ပု. ပ. ၁၃) ဝစနတော အရိယမဂ္ဂော ဝုစ္စတိ။ ယသ္မာ ပန တသ္မိံ ဥပ္ပဇ္ဇိတ္ဝာ နိရုဒ္ဓေပိ ပုဂ္ဂလော အနိယတော နာမ န ဟောတိ, တသ္မာ ‘‘သော နိယာမော နိစ္စဋ္ဌေန အသင္ခတော’’တိ ယေသံ လဒ္ဓိ, သေယ္ယထာပိ အန္ဓကာနံ; တေ သန္ဓာယ ပုစ္ဆာ သကဝာဒိသ္သ, ပဋိညာ ဣတရသ္သ။ တတော ‘‘ယဒိ သော အသင္ခတော, ဧဝရူပေန တေန ဘဝိတဗ္ဗ’’န္တိ ဒီပေန္တော နိဗ္ဗာနန္တိအာဒိမာဟ။ သံသန္ဒနပုစ္ဆာ ဥတ္တာနတ္ထာယေဝ။
445-447. Idāni niyāmakathā nāma hoti. Tattha niyāmoti ‘‘bhabbo niyāmaṃ okkamituṃ kusalesu dhammesu sammatta’’nti (pu. pa. 13) vacanato ariyamaggo vuccati. Yasmā pana tasmiṃ uppajjitvā niruddhepi puggalo aniyato nāma na hoti, tasmā ‘‘so niyāmo niccaṭṭhena asaṅkhato’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Tato ‘‘yadi so asaṅkhato, evarūpena tena bhavitabba’’nti dīpento nibbānantiādimāha. Saṃsandanapucchā uttānatthāyeva.
အတ္ထိ ကေစီတိအာဒိ နိယာမသ္သ သင္ခတဘာဝဒီပနတ္ထံ ဝုတ္တံ။ မဂ္ဂော အသင္ခတောတိပဉ္ဟေ တသ္သ ဥပ္ပာဒနိရောဓဘာဝတော ပဋိက္ခိပတီတိ။ နိယာမော သင္ခတောတိပဉ္ဟေ နိရုဒ္ဓေပိ မဂ္ဂေ နိယာမသ္သ အတ္ထိတံ သန္ဓာယ ပဋိက္ခိပတိ။ သောတာပတ္တိနိယာမောတိအာဒိပဉ္ဟေသုပိ အနုလောမတော စ ပဋိလောမတော စ ဣမိနာဝ နယေန အတ္ထော ဝေဒိတဗ္ဗော။ ပဉ္စ အသင္ခတာနီတိ ပုဋ္ဌော ပဉ္စန္နံ အသင္ခတာနံ အာဂတဋ္ဌာနံ အပသ္သန္တော ပဋိက္ခိပတိ။ ဒုတိယံ ပုဋ္ဌော စတုန္နံ သမ္မတ္တနိယာမာနံ နိယာမဝစနတော နိဗ္ဗာနသ္သ စ အသင္ခတဘာဝတော ပဋိဇာနာတိ။ မိစ္ဆတ္တနိယာမပဉ္ဟော နိယာမဝစနမတ္တေန အသင္ခတတာယ အယုတ္တဘာဝဒီပနတ္ထံ ဝုတ္တောတိ။
Atthikecītiādi niyāmassa saṅkhatabhāvadīpanatthaṃ vuttaṃ. Maggo asaṅkhatotipañhe tassa uppādanirodhabhāvato paṭikkhipatīti. Niyāmo saṅkhatotipañhe niruddhepi magge niyāmassa atthitaṃ sandhāya paṭikkhipati. Sotāpattiniyāmotiādipañhesupi anulomato ca paṭilomato ca imināva nayena attho veditabbo. Pañca asaṅkhatānīti puṭṭho pañcannaṃ asaṅkhatānaṃ āgataṭṭhānaṃ apassanto paṭikkhipati. Dutiyaṃ puṭṭho catunnaṃ sammattaniyāmānaṃ niyāmavacanato nibbānassa ca asaṅkhatabhāvato paṭijānāti. Micchattaniyāmapañho niyāmavacanamattena asaṅkhatatāya ayuttabhāvadīpanatthaṃ vuttoti.
နိယာမကထာဝဏ္ဏနာ။
Niyāmakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၅၃) ၁. နိယာမကထာ • (53) 1. Niyāmakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. နိယာမကထာဝဏ္ဏနာ • 1. Niyāmakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. နိယာမကထာဝဏ္ဏနာ • 1. Niyāmakathāvaṇṇanā
