| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
8. நியாமோக்கந்திகதா²வண்ணனா
8. Niyāmokkantikathāvaṇṇanā
403. இதா³னி நியாமோக்கந்திகதா² நாம ஹோதி. தத்த² யேஸங் க⁴டிகாரஸுத்தே ஜோதிபாலஸ்ஸ பப்³ப³ஜ்ஜங் ஸந்தா⁴ய ‘‘போ³தி⁴ஸத்தோ கஸ்ஸபப⁴க³வதோ பாவசனே ஓக்கந்தனியாமோ சரிதப்³ரஹ்மசரியோ’’தி லத்³தி⁴, ஸெய்யதா²பி ஏதரஹி அந்த⁴கானங்; தே ஸந்தா⁴ய போ³தி⁴ஸத்தோதி புச்சா² ஸகவாதி³ஸ்ஸ, லத்³தி⁴யங் ட²த்வா படிஞ்ஞா இதரஸ்ஸ. ததோ யஸ்மா நியாமோதி வா ப்³ரஹ்மசரியந்தி வா அரியமக்³க³ஸ்ஸ நாமங், போ³தி⁴ஸத்தானஞ்ச ட²பெத்வா பாரமீபூரணங் அஞ்ஞா நியாமோக்கந்தி நாம நத்தி². யதி³ ப⁴வெய்ய, போ³தி⁴ஸத்தோ ஸோதாபன்னோ ஸாவகோ ப⁴வெய்ய. ந சேதமேவங். கேவலஞ்ஹி நங் பு³த்³தா⁴ அத்தனோ ஞாணப³லே ட²த்வா – ‘‘அயங் பு³த்³தோ⁴ ப⁴விஸ்ஸதீ’’தி ப்³யாகரொந்தி, தஸ்மா புன போ³தி⁴ஸத்தோதி அனுயோகோ³ ஸகவாதி³ஸ்ஸ. பச்சி²மப⁴வங் ஸந்தா⁴ய படிக்கே²போ இதரஸ்ஸ. து³தியபஞ்ஹே ஜோதிபாலகாலங் ஸந்தா⁴ய படிஞ்ஞா தஸ்ஸேவ. ஸாவகோ ஹுத்வாதிஆதீ³ஸுபி ஏஸேவ நயோ. அனுஸ்ஸவியோதி அனுஸ்ஸவேன படிவித்³த⁴த⁴ம்மோ. பச்சி²மப⁴வங் ஸந்தா⁴ய படிக்கி²பித்வா ஜோதிபாலகாலே அனுஸ்ஸவங் ஸந்தா⁴ய படிஜானாதி.
403. Idāni niyāmokkantikathā nāma hoti. Tattha yesaṃ ghaṭikārasutte jotipālassa pabbajjaṃ sandhāya ‘‘bodhisatto kassapabhagavato pāvacane okkantaniyāmo caritabrahmacariyo’’ti laddhi, seyyathāpi etarahi andhakānaṃ; te sandhāya bodhisattoti pucchā sakavādissa, laddhiyaṃ ṭhatvā paṭiññā itarassa. Tato yasmā niyāmoti vā brahmacariyanti vā ariyamaggassa nāmaṃ, bodhisattānañca ṭhapetvā pāramīpūraṇaṃ aññā niyāmokkanti nāma natthi. Yadi bhaveyya, bodhisatto sotāpanno sāvako bhaveyya. Na cetamevaṃ. Kevalañhi naṃ buddhā attano ñāṇabale ṭhatvā – ‘‘ayaṃ buddho bhavissatī’’ti byākaronti, tasmā puna bodhisattoti anuyogo sakavādissa. Pacchimabhavaṃ sandhāya paṭikkhepo itarassa. Dutiyapañhe jotipālakālaṃ sandhāya paṭiññā tasseva. Sāvako hutvātiādīsupi eseva nayo. Anussaviyoti anussavena paṭividdhadhammo. Pacchimabhavaṃ sandhāya paṭikkhipitvā jotipālakāle anussavaṃ sandhāya paṭijānāti.
404. அஞ்ஞங் ஸத்தா²ரந்திஆளாரஞ்ச ராமபுத்தஞ்ச ஸந்தா⁴ய வுத்தங். ஆயஸ்மா ஆனந்தோ³திஆதி³ ‘‘ஓக்கந்தனியாமாவ ஸாவகா ஹொந்தி, ந இதரே ஓக்கந்தனியாமா ஏவரூபா ஹொந்தீ’’தி த³ஸ்ஸேதுங் வுத்தங்.
404. Aññaṃ satthārantiāḷārañca rāmaputtañca sandhāya vuttaṃ. Āyasmā ānandotiādi ‘‘okkantaniyāmāva sāvakā honti, na itare okkantaniyāmā evarūpā hontī’’ti dassetuṃ vuttaṃ.
ஸாவகோ ஜாதிங் வீதிவத்தோதி யாய ஜாதியா ஸாவகோ, தங் வீதிவத்தோ அஞ்ஞஸ்மிங் ப⁴வே அஸாவகோ ஹோதீதி புச்ச²தி. இதரோ ஸோதாபன்னாதீ³னங் ஸோதாபன்னாதி³ஸாவகபா⁴வதோ படிக்கி²பதி. ஸேஸமெத்த² உத்தானத்த²மேவாதி.
Sāvako jātiṃ vītivattoti yāya jātiyā sāvako, taṃ vītivatto aññasmiṃ bhave asāvako hotīti pucchati. Itaro sotāpannādīnaṃ sotāpannādisāvakabhāvato paṭikkhipati. Sesamettha uttānatthamevāti.
நியாமோக்கந்திகதா²வண்ணனா.
Niyāmokkantikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (40) 8. நியாமோக்கந்திகதா² • (40) 8. Niyāmokkantikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 8. நியாமோக்கந்திகதா²வண்ணனா • 8. Niyāmokkantikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 8. நியாமோக்கந்திகதா²வண்ணனா • 8. Niyāmokkantikathāvaṇṇanā
