| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၈. နိယာမောက္ကန္တိကထာဝဏ္ဏနာ
8. Niyāmokkantikathāvaṇṇanā
၄၀၃. ဣဒာနိ နိယာမောက္ကန္တိကထာ နာမ ဟောတိ။ တတ္ထ ယေသံ ဃဋိကာရသုတ္တေ ဇောတိပာလသ္သ ပဗ္ဗဇ္ဇံ သန္ဓာယ ‘‘ဗောဓိသတ္တော ကသ္သပဘဂဝတော ပာဝစနေ ဩက္ကန္တနိယာမော စရိတဗ္ရဟ္မစရိယော’’တိ လဒ္ဓိ, သေယ္ယထာပိ ဧတရဟိ အန္ဓကာနံ; တေ သန္ဓာယ ဗောဓိသတ္တောတိ ပုစ္ဆာ သကဝာဒိသ္သ, လဒ္ဓိယံ ဌတ္ဝာ ပဋိညာ ဣတရသ္သ။ တတော ယသ္မာ နိယာမောတိ ဝာ ဗ္ရဟ္မစရိယန္တိ ဝာ အရိယမဂ္ဂသ္သ နာမံ, ဗောဓိသတ္တာနဉ္စ ဌပေတ္ဝာ ပာရမီပူရဏံ အညာ နိယာမောက္ကန္တိ နာမ နတ္ထိ။ ယဒိ ဘဝေယ္ယ, ဗောဓိသတ္တော သောတာပန္နော သာဝကော ဘဝေယ္ယ။ န စေတမေဝံ။ ကေဝလဉ္ဟိ နံ ဗုဒ္ဓာ အတ္တနော ဉာဏဗလေ ဌတ္ဝာ – ‘‘အယံ ဗုဒ္ဓော ဘဝိသ္သတီ’’တိ ဗ္ယာကရောန္တိ, တသ္မာ ပုန ဗောဓိသတ္တောတိ အနုယောဂော သကဝာဒိသ္သ။ ပစ္ဆိမဘဝံ သန္ဓာယ ပဋိက္ခေပော ဣတရသ္သ။ ဒုတိယပဉ္ဟေ ဇောတိပာလကာလံ သန္ဓာယ ပဋိညာ တသ္သေဝ။ သာဝကော ဟုတ္ဝာတိအာဒီသုပိ ဧသေဝ နယော။ အနုသ္သဝိယောတိ အနုသ္သဝေန ပဋိဝိဒ္ဓဓမ္မော။ ပစ္ဆိမဘဝံ သန္ဓာယ ပဋိက္ခိပိတ္ဝာ ဇောတိပာလကာလေ အနုသ္သဝံ သန္ဓာယ ပဋိဇာနာတိ။
403. Idāni niyāmokkantikathā nāma hoti. Tattha yesaṃ ghaṭikārasutte jotipālassa pabbajjaṃ sandhāya ‘‘bodhisatto kassapabhagavato pāvacane okkantaniyāmo caritabrahmacariyo’’ti laddhi, seyyathāpi etarahi andhakānaṃ; te sandhāya bodhisattoti pucchā sakavādissa, laddhiyaṃ ṭhatvā paṭiññā itarassa. Tato yasmā niyāmoti vā brahmacariyanti vā ariyamaggassa nāmaṃ, bodhisattānañca ṭhapetvā pāramīpūraṇaṃ aññā niyāmokkanti nāma natthi. Yadi bhaveyya, bodhisatto sotāpanno sāvako bhaveyya. Na cetamevaṃ. Kevalañhi naṃ buddhā attano ñāṇabale ṭhatvā – ‘‘ayaṃ buddho bhavissatī’’ti byākaronti, tasmā puna bodhisattoti anuyogo sakavādissa. Pacchimabhavaṃ sandhāya paṭikkhepo itarassa. Dutiyapañhe jotipālakālaṃ sandhāya paṭiññā tasseva. Sāvako hutvātiādīsupi eseva nayo. Anussaviyoti anussavena paṭividdhadhammo. Pacchimabhavaṃ sandhāya paṭikkhipitvā jotipālakāle anussavaṃ sandhāya paṭijānāti.
၄၀၄. အညံ သတ္ထာရန္တိအာဠာရဉ္စ ရာမပုတ္တဉ္စ သန္ဓာယ ဝုတ္တံ။ အာယသ္မာ အာနန္ဒောတိအာဒိ ‘‘ဩက္ကန္တနိယာမာဝ သာဝကာ ဟောန္တိ, န ဣတရေ ဩက္ကန္တနိယာမာ ဧဝရူပာ ဟောန္တီ’’တိ ဒသ္သေတုံ ဝုတ္တံ။
404. Aññaṃ satthārantiāḷārañca rāmaputtañca sandhāya vuttaṃ. Āyasmā ānandotiādi ‘‘okkantaniyāmāva sāvakā honti, na itare okkantaniyāmā evarūpā hontī’’ti dassetuṃ vuttaṃ.
သာဝကော ဇာတိံ ဝီတိဝတ္တောတိ ယာယ ဇာတိယာ သာဝကော, တံ ဝီတိဝတ္တော အညသ္မိံ ဘဝေ အသာဝကော ဟောတီတိ ပုစ္ဆတိ။ ဣတရော သောတာပန္နာဒီနံ သောတာပန္နာဒိသာဝကဘာဝတော ပဋိက္ခိပတိ။ သေသမေတ္ထ ဥတ္တာနတ္ထမေဝာတိ။
Sāvako jātiṃ vītivattoti yāya jātiyā sāvako, taṃ vītivatto aññasmiṃ bhave asāvako hotīti pucchati. Itaro sotāpannādīnaṃ sotāpannādisāvakabhāvato paṭikkhipati. Sesamettha uttānatthamevāti.
နိယာမောက္ကန္တိကထာဝဏ္ဏနာ။
Niyāmokkantikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၄၀) ၈. နိယာမောက္ကန္တိကထာ • (40) 8. Niyāmokkantikathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၈. နိယာမောက္ကန္တိကထာဝဏ္ဏနာ • 8. Niyāmokkantikathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၈. နိယာမောက္ကန္တိကထာဝဏ္ဏနာ • 8. Niyāmokkantikathāvaṇṇanā
