| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
২৪৩. নিযস্সকম্মকথা
243. Niyassakammakathā
৪১২. ইধ পন, ভিক্খৰে, ভিক্খু বালো হোতি অব্যত্তো আপত্তিবহুলো অনপদানো, গিহিসংসট্ঠো ৰিহরতি অননুলোমিকেহি গিহিসংসগ্গেহি । তত্র চে ভিক্খূনং এৰং হোতি – ‘‘অযং খো, আৰুসো, ভিক্খু বালো অব্যত্তো আপত্তিবহুলো অনপদানো, গিহিসংসট্ঠো ৰিহরতি অননুলোমিকেহি গিহিসংসগ্গেহি। হন্দস্স মযং নিযস্সকম্মং করোমা’’তি। তে তস্স নিযস্সকম্মং করোন্তি – অধম্মেন ৰগ্গা। সো তম্হা আৰাসা অঞ্ঞং আৰাসং গচ্ছতি। তত্থপি ভিক্খূনং এৰং হোতি – ‘‘অযং খো, আৰুসো, ভিক্খু সঙ্ঘেন নিযস্সকম্মকতো অধম্মেন ৰগ্গেহি। হন্দস্স মযং নিযস্সকম্মং করোমা’’তি। তে তস্স নিযস্সকম্মং করোন্তি – অধম্মেন সমগ্গা…পে॰… ধম্মেন ৰগ্গা… ধম্মপতিরূপকেন ৰগ্গা… ধম্মপতিরূপকেন সমগ্গা…পে॰…।
412. Idha pana, bhikkhave, bhikkhu bālo hoti abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi . Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu bālo abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi. Handassa mayaṃ niyassakammaṃ karomā’’ti. Te tassa niyassakammaṃ karonti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena niyassakammakato adhammena vaggehi. Handassa mayaṃ niyassakammaṃ karomā’’ti. Te tassa niyassakammaṃ karonti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
যথা হেট্ঠা, তথা চক্কং কাতব্বং।
Yathā heṭṭhā, tathā cakkaṃ kātabbaṃ.
নিযস্সকম্মকথা নিট্ঠিতা।
Niyassakammakathā niṭṭhitā.
