| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၄၃. နိယသ္သကမ္မကထာ
243. Niyassakammakathā
၄၁၂. ဣဓ ပန, ဘိက္ခဝေ, ဘိက္ခု ဗာလော ဟောတိ အဗ္ယတ္တော အာပတ္တိဗဟုလော အနပဒာနော, ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ ။ တတ္ရ စေ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု ဗာလော အဗ္ယတ္တော အာပတ္တိဗဟုလော အနပဒာနော, ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ။ ဟန္ဒသ္သ မယံ နိယသ္သကမ္မံ ကရောမာ’’တိ။ တေ တသ္သ နိယသ္သကမ္မံ ကရောန္တိ – အဓမ္မေန ဝဂ္ဂာ။ သော တမ္ဟာ အာဝာသာ အညံ အာဝာသံ ဂစ္ဆတိ။ တတ္ထပိ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု သင္ဃေန နိယသ္သကမ္မကတော အဓမ္မေန ဝဂ္ဂေဟိ။ ဟန္ဒသ္သ မယံ နိယသ္သကမ္မံ ကရောမာ’’တိ။ တေ တသ္သ နိယသ္သကမ္မံ ကရောန္တိ – အဓမ္မေန သမဂ္ဂာ။ပေ.။ ဓမ္မေန ဝဂ္ဂာ။ ဓမ္မပတိရူပကေန ဝဂ္ဂာ။ ဓမ္မပတိရူပကေန သမဂ္ဂာ။ပေ.။။
412. Idha pana, bhikkhave, bhikkhu bālo hoti abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi . Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu bālo abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi. Handassa mayaṃ niyassakammaṃ karomā’’ti. Te tassa niyassakammaṃ karonti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena niyassakammakato adhammena vaggehi. Handassa mayaṃ niyassakammaṃ karomā’’ti. Te tassa niyassakammaṃ karonti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
ယထာ ဟေဋ္ဌာ, တထာ စက္ကံ ကာတဗ္ဗံ။
Yathā heṭṭhā, tathā cakkaṃ kātabbaṃ.
နိယသ္သကမ္မကထာ နိဋ္ဌိတာ။
Niyassakammakathā niṭṭhitā.
