| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
243. නියස්‌සකම්‌මකථා
243. Niyassakammakathā
412. ඉධ පන, භික්‌ඛවෙ, භික්‌ඛු බාලො හොති අබ්‍යත්‌තො ආපත්‌තිබහුලො අනපදානො, ගිහිසංසට්‌ඨො විහරති අනනුලොමිකෙහි ගිහිසංසග්‌ගෙහි . තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු බාලො අබ්‍යත්‌තො ආපත්‌තිබහුලො අනපදානො, ගිහිසංසට්‌ඨො විහරති අනනුලොමිකෙහි ගිහිසංසග්‌ගෙහි. හන්‌දස්‌ස මයං නියස්‌සකම්‌මං කරොමා’’ති. තෙ තස්‌ස නියස්‌සකම්‌මං කරොන්‌ති – අධම්‌මෙන වග්‌ගා. සො තම්‌හා ආවාසා අඤ්‌ඤං ආවාසං ගච්‌ඡති. තත්‌ථපි භික්‌ඛූනං එවං හොති – ‘‘අයං ඛො, ආවුසො, භික්‌ඛු සඞ්‌ඝෙන නියස්‌සකම්‌මකතො අධම්‌මෙන වග්‌ගෙහි. හන්‌දස්‌ස මයං නියස්‌සකම්‌මං කරොමා’’ති. තෙ තස්‌ස නියස්‌සකම්‌මං කරොන්‌ති – අධම්‌මෙන සමග්‌ගා…පෙ.… ධම්‌මෙන වග්‌ගා… ධම්‌මපතිරූපකෙන වග්‌ගා… ධම්‌මපතිරූපකෙන සමග්‌ගා…පෙ.….
412. Idha pana, bhikkhave, bhikkhu bālo hoti abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi . Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu bālo abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi. Handassa mayaṃ niyassakammaṃ karomā’’ti. Te tassa niyassakammaṃ karonti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena niyassakammakato adhammena vaggehi. Handassa mayaṃ niyassakammaṃ karomā’’ti. Te tassa niyassakammaṃ karonti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
යථා හෙට්‌ඨා, තථා චක්‌කං කාතබ්‌බං.
Yathā heṭṭhā, tathā cakkaṃ kātabbaṃ.
නියස්‌සකම්‌මකථා නිට්‌ඨිතා.
Niyassakammakathā niṭṭhitā.
