| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
၂. နိယသ္သကမ္မံ
2. Niyassakammaṃ
၁၁. တေန ခော ပန သမယေန အာယသ္မာ သေယ္ယသကော ဗာလော ဟောတိ အဗ္ယတ္တော အာပတ္တိဗဟုလော အနပဒာနော; ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ; အပိသ္သု ဘိက္ခူ ပကတာ 1 ပရိဝာသံ ဒေန္တာ မူလာယ ပဋိကသ္သန္တာ မာနတ္တံ ဒေန္တာ အဗ္ဘေန္တာ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာယသ္မာ သေယ္ယသကော ဗာလော ဘဝိသ္သတိ အဗ္ယတ္တော အာပတ္တိဗဟုလော အနပဒာနော; ဂိဟိသံသဋ္ဌော ဝိဟရိသ္သတိ အနနုလောမိကေဟိ ဂိဟိသံသဂ္ဂေဟိ ; အပိသ္သု ဘိက္ခူ ပကတာ ပရိဝာသံ ဒေန္တာ မူလာယ ပဋိကသ္သန္တာ မာနတ္တံ ဒေန္တာ အဗ္ဘေန္တာ’’တိ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။
11. Tena kho pana samayena āyasmā seyyasako bālo hoti abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā 2 parivāsaṃ dentā mūlāya paṭikassantā mānattaṃ dentā abbhentā. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā seyyasako bālo bhavissati abyatto āpattibahulo anapadāno; gihisaṃsaṭṭho viharissati ananulomikehi gihisaṃsaggehi ; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā’’ti. Atha kho te bhikkhū bhagavato etamatthaṃ ārocesuṃ.
အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဘိက္ခုသင္ဃံ သန္နိပာတာပေတ္ဝာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, သေယ္ယသကော ဘိက္ခု ဗာလော အဗ္ယတ္တော အာပတ္တိဗဟုလော အနပဒာနော; ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ; အပိသ္သု ဘိက္ခူ ပကတာ ပရိဝာသံ ဒေန္တာ မူလာယ ပဋိကသ္သန္တာ မာနတ္တံ ဒေန္တာ အဗ္ဘေန္တာ’’တိ? ‘‘သစ္စံ ဘဂဝာ’’တိ။ ဝိဂရဟိ ဗုဒ္ဓော ဘဂဝာ – ‘‘အနနုစ္ဆဝိကံ, ဘိက္ခဝေ, တသ္သ မောဃပုရိသသ္သ အနနုလောမိကံ အပ္ပတိရူပံ အသ္သာမဏကံ အကပ္ပိယံ အကရဏီယံ။ ကထဉ္ဟိ နာမ သော, ဘိက္ခဝေ, မောဃပုရိသော ဗာလော ဘဝိသ္သတိ အဗ္ယတ္တော အာပတ္တိဗဟုလော အနပဒာနော; ဂိဟိသံသဋ္ဌော ဝိဟရိသ္သတိ အနနုလောမိကေဟိ ဂိဟိသံသဂ္ဂေဟိ; အပိသ္သု ဘိက္ခူ ပကတာ ပရိဝာသံ ဒေန္တာ မူလာယ ပဋိကသ္သန္တာ မာနတ္တံ ဒေန္တာ အဗ္ဘေန္တာ။ နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘တေန ဟိ, ဘိက္ခဝေ, သင္ဃော သေယ္ယသကသ္သ ဘိက္ခုနော နိယသ္သကမ္မံ 3 ကရောတု – နိသ္သာယ တေ ဝတ္ထဗ္ဗန္တိ။ ဧဝဉ္စ ပန, ဘိက္ခဝေ, ကာတဗ္ဗံ။ ပဌမံ သေယ္ယသကော ဘိက္ခု စောဒေတဗ္ဗော, စောဒေတ္ဝာ သာရေတဗ္ဗော, သာရေတ္ဝာ အာပတ္တိံ အာရောပေတဗ္ဗော 4, အာပတ္တိံ အာရောပေတ္ဝာ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā’’ti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ, bhikkhave, tassa moghapurisassa ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma so, bhikkhave, moghapuriso bālo bhavissati abyatto āpattibahulo anapadāno; gihisaṃsaṭṭho viharissati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho seyyasakassa bhikkhuno niyassakammaṃ 5 karotu – nissāya te vatthabbanti. Evañca pana, bhikkhave, kātabbaṃ. Paṭhamaṃ seyyasako bhikkhu codetabbo, codetvā sāretabbo, sāretvā āpattiṃ āropetabbo 6, āpattiṃ āropetvā byattena bhikkhunā paṭibalena saṅgho ñāpetabbo –
၁၂. ‘‘သုဏာတု မေ, ဘန္တေ, သင္ဃော။ အယံ သေယ္ယသကော ဘိက္ခု ဗာလော အဗ္ယတ္တော အာပတ္တိဗဟုလော အနပဒာနော; ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ; အပိသ္သု ဘိက္ခူ ပကတာ ပရိဝာသံ ဒေန္တာ မူလာယ ပဋိကသ္သန္တာ မာနတ္တံ ဒေန္တာ အဗ္ဘေန္တာ။ ယဒိ သင္ဃသ္သ ပတ္တကလ္လံ, သင္ဃော သေယ္ယသကသ္သ ဘိက္ခုနော နိယသ္သကမ္မံ ကရေယ္ယ – နိသ္သာယ တေ ဝတ္ထဗ္ဗန္တိ။ ဧသာ ဉတ္တိ။
12. ‘‘Suṇātu me, bhante, saṅgho. Ayaṃ seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Yadi saṅghassa pattakallaṃ, saṅgho seyyasakassa bhikkhuno niyassakammaṃ kareyya – nissāya te vatthabbanti. Esā ñatti.
‘‘သုဏာတု မေ, ဘန္တေ, သင္ဃော။ အယံ သေယ္ယသကော ဘိက္ခု ဗာလော အဗ္ယတ္တော အာပတ္တိဗဟုလော အနပဒာနော; ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ; အပိသ္သု ဘိက္ခူ ပကတာ ပရိဝာသံ ဒေန္တာ မူလာယ ပဋိကသ္သန္တာ မာနတ္တံ ဒေန္တာ အဗ္ဘေန္တာ။ သင္ဃော သေယ္ယသကသ္သ ဘိက္ခုနော နိယသ္သကမ္မံ ကရောတိ – နိသ္သာယ တေ ဝတ္ထဗ္ဗန္တိ။ ယသ္သာယသ္မတော ခမတိ သေယ္ယသကသ္သ ဘိက္ခုနော နိယသ္သသ္သ ကမ္မသ္သ ကရဏံ – နိသ္သာယ တေ ဝတ္ထဗ္ဗန္တိ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Suṇātu me, bhante, saṅgho. Ayaṃ seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Saṅgho seyyasakassa bhikkhuno niyassakammaṃ karoti – nissāya te vatthabbanti. Yassāyasmato khamati seyyasakassa bhikkhuno niyassassa kammassa karaṇaṃ – nissāya te vatthabbanti, so tuṇhassa; yassa nakkhamati, so bhāseyya.
‘‘ဒုတိယမ္ပိ ဧတမတ္ထံ ဝဒာမိ။ပေ.။ တတိယမ္ပိ ဧတမတ္ထံ ဝဒာမိ – သုဏာတု မေ, ဘန္တေ, သင္ဃော။ အယံ သေယ္ယသကော ဘိက္ခု ဗာလော အဗ္ယတ္တော အာပတ္တိဗဟုလော အနပဒာနော; ဂိဟိသံသဋ္ဌော ဝိဟရတိ အနနုလောမိကေဟိ ဂိဟိသံသဂ္ဂေဟိ; အပိသ္သု ဘိက္ခူ ပကတာ ပရိဝာသံ ဒေန္တာ မူလာယ ပဋိကသ္သန္တာ မာနတ္တံ ဒေန္တာ အဗ္ဘေန္တာ။ သင္ဃော သေယ္ယသကသ္သ ဘိက္ခုနော နိယသ္သကမ္မံ ကရောတိ – နိသ္သာယ တေ ဝတ္ထဗ္ဗန္တိ။ ယသ္သာယသ္မတော ခမတိ သေယ္ယသကသ္သ ဘိက္ခုနော နိယသ္သသ္သ ကမ္မသ္သ ကရဏံ – နိသ္သာယ တေ ဝတ္ထဗ္ဗန္တိ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Saṅgho seyyasakassa bhikkhuno niyassakammaṃ karoti – nissāya te vatthabbanti. Yassāyasmato khamati seyyasakassa bhikkhuno niyassassa kammassa karaṇaṃ – nissāya te vatthabbanti, so tuṇhassa; yassa nakkhamati, so bhāseyya.
‘‘ကတံ သင္ဃေန သေယ္ယသကသ္သ ဘိက္ခုနော နိယသ္သကမ္မံ – နိသ္သာယ တေ ဝတ္ထဗ္ဗန္တိ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။
‘‘Kataṃ saṅghena seyyasakassa bhikkhuno niyassakammaṃ – nissāya te vatthabbanti. Khamati saṅghassa, tasmā tuṇhī, evametaṃ dhārayāmī’’ti.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / နိယသ္သကမ္မကထာ • Niyassakammakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / နိယသ္သကမ္မကထာဝဏ္ဏနာ • Niyassakammakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / အဓမ္မကမ္မဒ္ဝာဒသကကထာဝဏ္ဏနာ • Adhammakammadvādasakakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / နိယသ္သကမ္မကထာဒိဝဏ္ဏနာ • Niyassakammakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၂. နိယသ္သကမ္မကထာ • 2. Niyassakammakathā
