| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
2. නියස්‌සකම්‌මං
2. Niyassakammaṃ
11. තෙන ඛො පන සමයෙන ආයස්‌මා සෙය්‍යසකො බාලො හොති අබ්‍යත්‌තො ආපත්‌තිබහුලො අනපදානො; ගිහිසංසට්‌ඨො විහරති අනනුලොමිකෙහි ගිහිසංසග්‌ගෙහි; අපිස්‌සු භික්‌ඛූ පකතා 1 පරිවාසං දෙන්‌තා මූලාය පටිකස්‌සන්‌තා මානත්‌තං දෙන්‌තා අබ්‌භෙන්‌තා. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ආයස්‌මා සෙය්‍යසකො බාලො භවිස්‌සති අබ්‍යත්‌තො ආපත්‌තිබහුලො අනපදානො; ගිහිසංසට්‌ඨො විහරිස්‌සති අනනුලොමිකෙහි ගිහිසංසග්‌ගෙහි ; අපිස්‌සු භික්‌ඛූ පකතා පරිවාසං දෙන්‌තා මූලාය පටිකස්‌සන්‌තා මානත්‌තං දෙන්‌තා අබ්‌භෙන්‌තා’’ති. අථ ඛො තෙ භික්‌ඛූ භගවතො එතමත්‌ථං ආරොචෙසුං.
11. Tena kho pana samayena āyasmā seyyasako bālo hoti abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā 2 parivāsaṃ dentā mūlāya paṭikassantā mānattaṃ dentā abbhentā. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā seyyasako bālo bhavissati abyatto āpattibahulo anapadāno; gihisaṃsaṭṭho viharissati ananulomikehi gihisaṃsaggehi ; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā’’ti. Atha kho te bhikkhū bhagavato etamatthaṃ ārocesuṃ.
අථ ඛො භගවා එතස්‌මිං නිදානෙ එතස්‌මිං පකරණෙ භික්‌ඛුසඞ්‌ඝං සන්‌නිපාතාපෙත්‌වා භික්‌ඛූ පටිපුච්‌ඡි – ‘‘සච්‌චං කිර, භික්‌ඛවෙ, සෙය්‍යසකො භික්‌ඛු බාලො අබ්‍යත්‌තො ආපත්‌තිබහුලො අනපදානො; ගිහිසංසට්‌ඨො විහරති අනනුලොමිකෙහි ගිහිසංසග්‌ගෙහි; අපිස්‌සු භික්‌ඛූ පකතා පරිවාසං දෙන්‌තා මූලාය පටිකස්‌සන්‌තා මානත්‌තං දෙන්‌තා අබ්‌භෙන්‌තා’’ති? ‘‘සච්‌චං භගවා’’ති. විගරහි බුද්‌ධො භගවා – ‘‘අනනුච්‌ඡවිකං, භික්‌ඛවෙ, තස්‌ස මොඝපුරිසස්‌ස අනනුලොමිකං අප්‌පතිරූපං අස්‌සාමණකං අකප්‌පියං අකරණීයං. කථඤ්‌හි නාම සො, භික්‌ඛවෙ, මොඝපුරිසො බාලො භවිස්‌සති අබ්‍යත්‌තො ආපත්‌තිබහුලො අනපදානො; ගිහිසංසට්‌ඨො විහරිස්‌සති අනනුලොමිකෙහි ගිහිසංසග්‌ගෙහි; අපිස්‌සු භික්‌ඛූ පකතා පරිවාසං දෙන්‌තා මූලාය පටිකස්‌සන්‌තා මානත්‌තං දෙන්‌තා අබ්‌භෙන්‌තා. නෙතං, භික්‌ඛවෙ, අප්‌පසන්‌නානං වා පසාදාය…පෙ.… විගරහිත්‌වා…පෙ.… ධම්‌මිං කථං කත්‌වා භික්‌ඛූ ආමන්‌තෙසි – ‘‘තෙන හි, භික්‌ඛවෙ, සඞ්‌ඝො සෙය්‍යසකස්‌ස භික්‌ඛුනො නියස්‌සකම්‌මං 3 කරොතු – නිස්‌සාය තෙ වත්‌ථබ්‌බන්‌ති. එවඤ්‌ච පන, භික්‌ඛවෙ, කාතබ්‌බං. පඨමං සෙය්‍යසකො භික්‌ඛු චොදෙතබ්‌බො, චොදෙත්‌වා සාරෙතබ්‌බො, සාරෙත්‌වා ආපත්‌තිං ආරොපෙතබ්‌බො 4, ආපත්‌තිං ආරොපෙත්‌වා බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā’’ti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ, bhikkhave, tassa moghapurisassa ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma so, bhikkhave, moghapuriso bālo bhavissati abyatto āpattibahulo anapadāno; gihisaṃsaṭṭho viharissati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho seyyasakassa bhikkhuno niyassakammaṃ 5 karotu – nissāya te vatthabbanti. Evañca pana, bhikkhave, kātabbaṃ. Paṭhamaṃ seyyasako bhikkhu codetabbo, codetvā sāretabbo, sāretvā āpattiṃ āropetabbo 6, āpattiṃ āropetvā byattena bhikkhunā paṭibalena saṅgho ñāpetabbo –
12. ‘‘සුණාතු මෙ, භන්‌තෙ, සඞ්‌ඝො. අයං සෙය්‍යසකො භික්‌ඛු බාලො අබ්‍යත්‌තො ආපත්‌තිබහුලො අනපදානො; ගිහිසංසට්‌ඨො විහරති අනනුලොමිකෙහි ගිහිසංසග්‌ගෙහි; අපිස්‌සු භික්‌ඛූ පකතා පරිවාසං දෙන්‌තා මූලාය පටිකස්‌සන්‌තා මානත්‌තං දෙන්‌තා අබ්‌භෙන්‌තා. යදි සඞ්‌ඝස්‌ස පත්‌තකල්‌ලං, සඞ්‌ඝො සෙය්‍යසකස්‌ස භික්‌ඛුනො නියස්‌සකම්‌මං කරෙය්‍ය – නිස්‌සාය තෙ වත්‌ථබ්‌බන්‌ති. එසා ඤත්‌ති.
12. ‘‘Suṇātu me, bhante, saṅgho. Ayaṃ seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Yadi saṅghassa pattakallaṃ, saṅgho seyyasakassa bhikkhuno niyassakammaṃ kareyya – nissāya te vatthabbanti. Esā ñatti.
‘‘සුණාතු මෙ, භන්‌තෙ, සඞ්‌ඝො. අයං සෙය්‍යසකො භික්‌ඛු බාලො අබ්‍යත්‌තො ආපත්‌තිබහුලො අනපදානො; ගිහිසංසට්‌ඨො විහරති අනනුලොමිකෙහි ගිහිසංසග්‌ගෙහි; අපිස්‌සු භික්‌ඛූ පකතා පරිවාසං දෙන්‌තා මූලාය පටිකස්‌සන්‌තා මානත්‌තං දෙන්‌තා අබ්‌භෙන්‌තා. සඞ්‌ඝො සෙය්‍යසකස්‌ස භික්‌ඛුනො නියස්‌සකම්‌මං කරොති – නිස්‌සාය තෙ වත්‌ථබ්‌බන්‌ති. යස්‌සායස්‌මතො ඛමති සෙය්‍යසකස්‌ස භික්‌ඛුනො නියස්‌සස්‌ස කම්‌මස්‌ස කරණං – නිස්‌සාය තෙ වත්‌ථබ්‌බන්‌ති, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Suṇātu me, bhante, saṅgho. Ayaṃ seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Saṅgho seyyasakassa bhikkhuno niyassakammaṃ karoti – nissāya te vatthabbanti. Yassāyasmato khamati seyyasakassa bhikkhuno niyassassa kammassa karaṇaṃ – nissāya te vatthabbanti, so tuṇhassa; yassa nakkhamati, so bhāseyya.
‘‘දුතියම්‌පි එතමත්‌ථං වදාමි…පෙ.… තතියම්‌පි එතමත්‌ථං වදාමි – සුණාතු මෙ, භන්‌තෙ, සඞ්‌ඝො. අයං සෙය්‍යසකො භික්‌ඛු බාලො අබ්‍යත්‌තො ආපත්‌තිබහුලො අනපදානො; ගිහිසංසට්‌ඨො විහරති අනනුලොමිකෙහි ගිහිසංසග්‌ගෙහි; අපිස්‌සු භික්‌ඛූ පකතා පරිවාසං දෙන්‌තා මූලාය පටිකස්‌සන්‌තා මානත්‌තං දෙන්‌තා අබ්‌භෙන්‌තා. සඞ්‌ඝො සෙය්‍යසකස්‌ස භික්‌ඛුනො නියස්‌සකම්‌මං කරොති – නිස්‌සාය තෙ වත්‌ථබ්‌බන්‌ති. යස්‌සායස්‌මතො ඛමති සෙය්‍යසකස්‌ස භික්‌ඛුනො නියස්‌සස්‌ස කම්‌මස්‌ස කරණං – නිස්‌සාය තෙ වත්‌ථබ්‌බන්‌ති, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Saṅgho seyyasakassa bhikkhuno niyassakammaṃ karoti – nissāya te vatthabbanti. Yassāyasmato khamati seyyasakassa bhikkhuno niyassassa kammassa karaṇaṃ – nissāya te vatthabbanti, so tuṇhassa; yassa nakkhamati, so bhāseyya.
‘‘කතං සඞ්‌ඝෙන සෙය්‍යසකස්‌ස භික්‌ඛුනො නියස්‌සකම්‌මං – නිස්‌සාය තෙ වත්‌ථබ්‌බන්‌ති. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Kataṃ saṅghena seyyasakassa bhikkhuno niyassakammaṃ – nissāya te vatthabbanti. Khamati saṅghassa, tasmā tuṇhī, evametaṃ dhārayāmī’’ti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / නියස්‌සකම්‌මකථා • Niyassakammakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / නියස්‌සකම්‌මකථාවණ්‌ණනා • Niyassakammakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / අධම්‌මකම්‌මද්‌වාදසකකථාවණ්‌ණනා • Adhammakammadvādasakakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / නියස්‌සකම්‌මකථාදිවණ්‌ණනා • Niyassakammakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 2. නියස්‌සකම්‌මකථා • 2. Niyassakammakathā
