| Library / Tipiṭaka / ཏིཔིཊཀ • Tipiṭaka / ཙཱུལ༹ཝགྒཔཱལི༹ • Cūḷavaggapāḷi |
༢. ནིཡསྶཀམྨཾ
2. Niyassakammaṃ
༡༡. ཏེན ཁོ པན སམཡེན ཨཱཡསྨཱ སེཡྻསཀོ བཱལོ ཧོཏི ཨབྱཏྟོ ཨཱཔཏྟིབཧུལོ ཨནཔདཱནོ; གིཧིསཾསཊྛོ ཝིཧརཏི ཨནནུལོམིཀེཧི གིཧིསཾསགྒེཧི; ཨཔིསྶུ བྷིཀྑཱུ པཀཏཱ 1 པརིཝཱསཾ དེནྟཱ མཱུལཱཡ པཊིཀསྶནྟཱ མཱནཏྟཾ དེནྟཱ ཨབྦྷེནྟཱ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཡསྨཱ སེཡྻསཀོ བཱལོ བྷཝིསྶཏི ཨབྱཏྟོ ཨཱཔཏྟིབཧུལོ ཨནཔདཱནོ; གིཧིསཾསཊྛོ ཝིཧརིསྶཏི ཨནནུལོམིཀེཧི གིཧིསཾསགྒེཧི ; ཨཔིསྶུ བྷིཀྑཱུ པཀཏཱ པརིཝཱསཾ དེནྟཱ མཱུལཱཡ པཊིཀསྶནྟཱ མཱནཏྟཾ དེནྟཱ ཨབྦྷེནྟཱ’’ཏི། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ།
11. Tena kho pana samayena āyasmā seyyasako bālo hoti abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā 2 parivāsaṃ dentā mūlāya paṭikassantā mānattaṃ dentā abbhentā. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā seyyasako bālo bhavissati abyatto āpattibahulo anapadāno; gihisaṃsaṭṭho viharissati ananulomikehi gihisaṃsaggehi ; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā’’ti. Atha kho te bhikkhū bhagavato etamatthaṃ ārocesuṃ.
ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ བྷིཀྑུསངྒྷཾ སནྣིཔཱཏཱཔེཏྭཱ བྷིཀྑཱུ པཊིཔུཙྪི – ‘‘སཙྩཾ ཀིར, བྷིཀྑཝེ, སེཡྻསཀོ བྷིཀྑུ བཱལོ ཨབྱཏྟོ ཨཱཔཏྟིབཧུལོ ཨནཔདཱནོ; གིཧིསཾསཊྛོ ཝིཧརཏི ཨནནུལོམིཀེཧི གིཧིསཾསགྒེཧི; ཨཔིསྶུ བྷིཀྑཱུ པཀཏཱ པརིཝཱསཾ དེནྟཱ མཱུལཱཡ པཊིཀསྶནྟཱ མཱནཏྟཾ དེནྟཱ ཨབྦྷེནྟཱ’’ཏི? ‘‘སཙྩཾ བྷགཝཱ’’ཏི། ཝིགརཧི བུདྡྷོ བྷགཝཱ – ‘‘ཨནནུཙྪཝིཀཾ, བྷིཀྑཝེ, ཏསྶ མོགྷཔུརིསསྶ ཨནནུལོམིཀཾ ཨཔྤཏིརཱུཔཾ ཨསྶཱམཎཀཾ ཨཀཔྤིཡཾ ཨཀརཎཱིཡཾ། ཀཐཉྷི ནཱམ སོ, བྷིཀྑཝེ, མོགྷཔུརིསོ བཱལོ བྷཝིསྶཏི ཨབྱཏྟོ ཨཱཔཏྟིབཧུལོ ཨནཔདཱནོ; གིཧིསཾསཊྛོ ཝིཧརིསྶཏི ཨནནུལོམིཀེཧི གིཧིསཾསགྒེཧི; ཨཔིསྶུ བྷིཀྑཱུ པཀཏཱ པརིཝཱསཾ དེནྟཱ མཱུལཱཡ པཊིཀསྶནྟཱ མཱནཏྟཾ དེནྟཱ ཨབྦྷེནྟཱ། ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཏེན ཧི, བྷིཀྑཝེ, སངྒྷོ སེཡྻསཀསྶ བྷིཀྑུནོ ནིཡསྶཀམྨཾ 3 ཀརོཏུ – ནིསྶཱཡ ཏེ ཝཏྠབྦནྟི། ཨེཝཉྩ པན, བྷིཀྑཝེ, ཀཱཏབྦཾ། པཋམཾ སེཡྻསཀོ བྷིཀྑུ ཙོདེཏབྦོ, ཙོདེཏྭཱ སཱརེཏབྦོ, སཱརེཏྭཱ ཨཱཔཏྟིཾ ཨཱརོཔེཏབྦོ 4, ཨཱཔཏྟིཾ ཨཱརོཔེཏྭཱ བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā’’ti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ, bhikkhave, tassa moghapurisassa ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma so, bhikkhave, moghapuriso bālo bhavissati abyatto āpattibahulo anapadāno; gihisaṃsaṭṭho viharissati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho seyyasakassa bhikkhuno niyassakammaṃ 5 karotu – nissāya te vatthabbanti. Evañca pana, bhikkhave, kātabbaṃ. Paṭhamaṃ seyyasako bhikkhu codetabbo, codetvā sāretabbo, sāretvā āpattiṃ āropetabbo 6, āpattiṃ āropetvā byattena bhikkhunā paṭibalena saṅgho ñāpetabbo –
༡༢. ‘‘སུཎཱཏུ མེ, བྷནྟེ, སངྒྷོ། ཨཡཾ སེཡྻསཀོ བྷིཀྑུ བཱལོ ཨབྱཏྟོ ཨཱཔཏྟིབཧུལོ ཨནཔདཱནོ; གིཧིསཾསཊྛོ ཝིཧརཏི ཨནནུལོམིཀེཧི གིཧིསཾསགྒེཧི; ཨཔིསྶུ བྷིཀྑཱུ པཀཏཱ པརིཝཱསཾ དེནྟཱ མཱུལཱཡ པཊིཀསྶནྟཱ མཱནཏྟཾ དེནྟཱ ཨབྦྷེནྟཱ། ཡདི སངྒྷསྶ པཏྟཀལླཾ, སངྒྷོ སེཡྻསཀསྶ བྷིཀྑུནོ ནིཡསྶཀམྨཾ ཀརེཡྻ – ནིསྶཱཡ ཏེ ཝཏྠབྦནྟི། ཨེསཱ ཉཏྟི།
12. ‘‘Suṇātu me, bhante, saṅgho. Ayaṃ seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Yadi saṅghassa pattakallaṃ, saṅgho seyyasakassa bhikkhuno niyassakammaṃ kareyya – nissāya te vatthabbanti. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ སེཡྻསཀོ བྷིཀྑུ བཱལོ ཨབྱཏྟོ ཨཱཔཏྟིབཧུལོ ཨནཔདཱནོ; གིཧིསཾསཊྛོ ཝིཧརཏི ཨནནུལོམིཀེཧི གིཧིསཾསགྒེཧི; ཨཔིསྶུ བྷིཀྑཱུ པཀཏཱ པརིཝཱསཾ དེནྟཱ མཱུལཱཡ པཊིཀསྶནྟཱ མཱནཏྟཾ དེནྟཱ ཨབྦྷེནྟཱ། སངྒྷོ སེཡྻསཀསྶ བྷིཀྑུནོ ནིཡསྶཀམྨཾ ཀརོཏི – ནིསྶཱཡ ཏེ ཝཏྠབྦནྟི། ཡསྶཱཡསྨཏོ ཁམཏི སེཡྻསཀསྶ བྷིཀྑུནོ ནིཡསྶསྶ ཀམྨསྶ ཀརཎཾ – ནིསྶཱཡ ཏེ ཝཏྠབྦནྟི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Saṅgho seyyasakassa bhikkhuno niyassakammaṃ karoti – nissāya te vatthabbanti. Yassāyasmato khamati seyyasakassa bhikkhuno niyassassa kammassa karaṇaṃ – nissāya te vatthabbanti, so tuṇhassa; yassa nakkhamati, so bhāseyya.
‘‘དུཏིཡམྤི ཨེཏམཏྠཾ ཝདཱམི…པེ॰… ཏཏིཡམྤི ཨེཏམཏྠཾ ཝདཱམི – སུཎཱཏུ མེ, བྷནྟེ, སངྒྷོ། ཨཡཾ སེཡྻསཀོ བྷིཀྑུ བཱལོ ཨབྱཏྟོ ཨཱཔཏྟིབཧུལོ ཨནཔདཱནོ; གིཧིསཾསཊྛོ ཝིཧརཏི ཨནནུལོམིཀེཧི གིཧིསཾསགྒེཧི; ཨཔིསྶུ བྷིཀྑཱུ པཀཏཱ པརིཝཱསཾ དེནྟཱ མཱུལཱཡ པཊིཀསྶནྟཱ མཱནཏྟཾ དེནྟཱ ཨབྦྷེནྟཱ། སངྒྷོ སེཡྻསཀསྶ བྷིཀྑུནོ ནིཡསྶཀམྨཾ ཀརོཏི – ནིསྶཱཡ ཏེ ཝཏྠབྦནྟི། ཡསྶཱཡསྨཏོ ཁམཏི སེཡྻསཀསྶ བྷིཀྑུནོ ནིཡསྶསྶ ཀམྨསྶ ཀརཎཾ – ནིསྶཱཡ ཏེ ཝཏྠབྦནྟི, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Dutiyampi etamatthaṃ vadāmi…pe… tatiyampi etamatthaṃ vadāmi – suṇātu me, bhante, saṅgho. Ayaṃ seyyasako bhikkhu bālo abyatto āpattibahulo anapadāno; gihisaṃsaṭṭho viharati ananulomikehi gihisaṃsaggehi; apissu bhikkhū pakatā parivāsaṃ dentā mūlāya paṭikassantā mānattaṃ dentā abbhentā. Saṅgho seyyasakassa bhikkhuno niyassakammaṃ karoti – nissāya te vatthabbanti. Yassāyasmato khamati seyyasakassa bhikkhuno niyassassa kammassa karaṇaṃ – nissāya te vatthabbanti, so tuṇhassa; yassa nakkhamati, so bhāseyya.
‘‘ཀཏཾ སངྒྷེན སེཡྻསཀསྶ བྷིཀྑུནོ ནིཡསྶཀམྨཾ – ནིསྶཱཡ ཏེ ཝཏྠབྦནྟི། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Kataṃ saṅghena seyyasakassa bhikkhuno niyassakammaṃ – nissāya te vatthabbanti. Khamati saṅghassa, tasmā tuṇhī, evametaṃ dhārayāmī’’ti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ནིཡསྶཀམྨཀཐཱ • Niyassakammakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ནིཡསྶཀམྨཀཐཱཝཎྞནཱ • Niyassakammakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཨདྷམྨཀམྨདྭཱདསཀཀཐཱཝཎྞནཱ • Adhammakammadvādasakakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ནིཡསྶཀམྨཀཐཱདིཝཎྞནཱ • Niyassakammakathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༢. ནིཡསྶཀམྨཀཐཱ • 2. Niyassakammakathā
