| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
250. නියස්‌සකම්‌මපටිප්‌පස්‌සද්‌ධිකථා
250. Niyassakammapaṭippassaddhikathā
423. ඉධ පන, භික්‌ඛවෙ, භික්‌ඛු සඞ්‌ඝෙන නියස්‌සකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, නියස්‌සස්‌ස කම්‌මස්‌ස පටිප්‌පස්‌සද්‌ධිං යාචති. තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු සඞ්‌ඝෙන නියස්‌සකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, නියස්‌සස්‌ස කම්‌මස්‌ස පටිප්‌පස්‌සද්‌ධිං යාචති. හන්‌දස්‌ස මයං නියස්‌සකම්‌මං පටිප්‌පස්‌සම්‌භෙමා’’ති. තෙ තස්‌ස නියස්‌සකම්‌මං පටිප්‌පස්‌සම්‌භෙන්‌ති – අධම්‌මෙන වග්‌ගා. සො තම්‌හා ආවාසා අඤ්‌ඤං ආවාසං ගච්‌ඡති. තත්‌ථපි භික්‌ඛූනං එවං හොති – ‘‘ඉමස්‌ස ඛො, ආවුසො, භික්‌ඛුනො සඞ්‌ඝෙන නියස්‌සකම්‌මං පටිප්‌පස්‌සද්‌ධං අධම්‌මෙන වග්‌ගෙහි. හන්‌දස්‌ස මයං නියස්‌සකම්‌මං පටිප්‌පස්‌සම්‌භෙමා’’ති. තෙ තස්‌ස නියස්‌සකම්‌මං පටිප්‌පස්‌සම්‌භෙන්‌ති – අධම්‌මෙන සමග්‌ගා…පෙ.… ධම්‌මෙන වග්‌ගා… ධම්‌මපතිරූපකෙන වග්‌ගා… ධම්‌මපතිරූපකෙන සමග්‌ගා…පෙ.….
423. Idha pana, bhikkhave, bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena niyassakammakato sammā vattati, lomaṃ pāteti, netthāraṃ vattati, niyassassa kammassa paṭippassaddhiṃ yācati. Handassa mayaṃ niyassakammaṃ paṭippassambhemā’’ti. Te tassa niyassakammaṃ paṭippassambhenti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘imassa kho, āvuso, bhikkhuno saṅghena niyassakammaṃ paṭippassaddhaṃ adhammena vaggehi. Handassa mayaṃ niyassakammaṃ paṭippassambhemā’’ti. Te tassa niyassakammaṃ paṭippassambhenti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
චක්‌කං කාතබ්‌බං.
Cakkaṃ kātabbaṃ.
නියස්‌සකම්‌මපටිප්‌පස්‌සද්‌ධිකථා නිට්‌ඨිතා.
Niyassakammapaṭippassaddhikathā niṭṭhitā.
