| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
4. நியதஸ்ஸ நியாமகதா²வண்ணனா
4. Niyatassa niyāmakathāvaṇṇanā
663-664. இதா³னி நியதஸ்ஸ நியாமகதா² நாம ஹோதி. தத்த² து³விதோ⁴ நியாமோ – மிச்ச²த்தனியாமோ ச ஆனந்தரியகம்மங், ஸம்மத்தனியாமோ ச அரியமக்³கோ³. இமே த்³வே நியாமே ட²பெத்வா அஞ்ஞோ நியாமோ நாம நத்தி². ஸப்³பே³பி ஹி ஸேஸா தேபூ⁴மகத⁴ம்மா அனியதா நாம. தேஹி ஸமன்னாக³தோபி அனியதோயேவ. பு³த்³தே⁴ஹி பன அத்தனோ ஞாணப³லேன ‘‘அயங் ஸத்தோ அனாக³தே போ³தி⁴ங் பாபுணிஸ்ஸதீ’’தி ப்³யாகதோ போ³தி⁴ஸத்தோ புஞ்ஞுஸ்ஸத³த்தா நியதோதி வுச்சதி. இதி இமங் வோஹாரமத்தங் க³ஹெத்வா ‘‘பச்சி²மப⁴விகோ போ³தி⁴ஸத்தோ தாய ஜாதியா ப⁴ப்³போ³ த⁴ம்மங் அபி⁴ஸமேது’’ந்தி அதி⁴ப்பாயேன ‘‘நியதோ நியாமங் ஓக்கமதீ’’தி யேஸங் லத்³தி⁴, ஸெய்யதா²பி புப்³ப³ஸேலியாபரஸேலியானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. மிச்ச²த்தனியதோதிஆதி³ அஞ்ஞேன நியாமேன நியதஸ்ஸ அஞ்ஞனியாமாபா⁴வத³ஸ்ஸனத்த²ங் வுத்தங். புப்³பே³ மக்³க³ங் பா⁴வெத்வாதிஆதி³ நியாமப்பபே⁴த³த³ஸ்ஸனத்த²ங் வுத்தங். ஸதிபட்டா²னந்திஆதி³ ஏகஸ்மிம்பி நியாமே த⁴ம்மப்பபே⁴த³த³ஸ்ஸனத்த²ங் வுத்தங். ப⁴ப்³போ³ போ³தி⁴ஸத்தோதி வசனங் கேவலங் போ³தி⁴ஸத்தஸ்ஸ ப⁴ப்³ப³தங் தீ³பேதி, ந நியதஸ்ஸ நியாமோக்கமனங், தஸ்மா அஸாத⁴கங். ஸோ ஹி புப்³பே³ ஏகேனபி நியதத⁴ம்மேன அனியதோ போ³தி⁴மூலே ஸச்சத³ஸ்ஸனேன நியாமங் ஓக்கந்தோதி.
663-664. Idāni niyatassa niyāmakathā nāma hoti. Tattha duvidho niyāmo – micchattaniyāmo ca ānantariyakammaṃ, sammattaniyāmo ca ariyamaggo. Ime dve niyāme ṭhapetvā añño niyāmo nāma natthi. Sabbepi hi sesā tebhūmakadhammā aniyatā nāma. Tehi samannāgatopi aniyatoyeva. Buddhehi pana attano ñāṇabalena ‘‘ayaṃ satto anāgate bodhiṃ pāpuṇissatī’’ti byākato bodhisatto puññussadattā niyatoti vuccati. Iti imaṃ vohāramattaṃ gahetvā ‘‘pacchimabhaviko bodhisatto tāya jātiyā bhabbo dhammaṃ abhisametu’’nti adhippāyena ‘‘niyato niyāmaṃ okkamatī’’ti yesaṃ laddhi, seyyathāpi pubbaseliyāparaseliyānaṃ; te sandhāya pucchā sakavādissa, paṭiññā itarassa. Micchattaniyatotiādi aññena niyāmena niyatassa aññaniyāmābhāvadassanatthaṃ vuttaṃ. Pubbe maggaṃ bhāvetvātiādi niyāmappabhedadassanatthaṃ vuttaṃ. Satipaṭṭhānantiādi ekasmimpi niyāme dhammappabhedadassanatthaṃ vuttaṃ. Bhabbo bodhisattoti vacanaṃ kevalaṃ bodhisattassa bhabbataṃ dīpeti, na niyatassa niyāmokkamanaṃ, tasmā asādhakaṃ. So hi pubbe ekenapi niyatadhammena aniyato bodhimūle saccadassanena niyāmaṃ okkantoti.
நியதஸ்ஸ நியாமகதா²வண்ணனா.
Niyatassa niyāmakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (129) 4. நியதஸ்ஸ நியாமகதா² • (129) 4. Niyatassa niyāmakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 4. நியதஸ்ஸனியாமகதா²வண்ணனா • 4. Niyatassaniyāmakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 4. நியதஸ்ஸனியாமகதா²வண்ணனா • 4. Niyatassaniyāmakathāvaṇṇanā
