| Library / Tipiṭaka / តិបិដក • Tipiṭaka / បញ្ចបករណ-អដ្ឋកថា • Pañcapakaraṇa-aṭṭhakathā |
៤. និយតស្ស និយាមកថាវណ្ណនា
4. Niyatassa niyāmakathāvaṇṇanā
៦៦៣-៦៦៤. ឥទានិ និយតស្ស និយាមកថា នាម ហោតិ។ តត្ថ ទុវិធោ និយាមោ – មិច្ឆត្តនិយាមោ ច អានន្តរិយកម្មំ, សម្មត្តនិយាមោ ច អរិយមគ្គោ។ ឥមេ ទ្វេ និយាមេ ឋបេត្វា អញ្ញោ និយាមោ នាម នត្ថិ។ សព្ពេបិ ហិ សេសា តេភូមកធម្មា អនិយតា នាម។ តេហិ សមន្នាគតោបិ អនិយតោយេវ។ ពុទ្ធេហិ បន អត្តនោ ញាណពលេន ‘‘អយំ សត្តោ អនាគតេ ពោធិំ បាបុណិស្សតី’’តិ ព្យាកតោ ពោធិសត្តោ បុញ្ញុស្សទត្តា និយតោតិ វុច្ចតិ។ ឥតិ ឥមំ វោហារមត្តំ គហេត្វា ‘‘បច្ឆិមភវិកោ ពោធិសត្តោ តាយ ជាតិយា ភព្ពោ ធម្មំ អភិសមេតុ’’ន្តិ អធិប្បាយេន ‘‘និយតោ និយាមំ ឱក្កមតី’’តិ យេសំ លទ្ធិ, សេយ្យថាបិ បុព្ពសេលិយាបរសេលិយានំ; តេ សន្ធាយ បុច្ឆា សកវាទិស្ស, បដិញ្ញា ឥតរស្ស។ មិច្ឆត្តនិយតោតិអាទិ អញ្ញេន និយាមេន និយតស្ស អញ្ញនិយាមាភាវទស្សនត្ថំ វុត្តំ។ បុព្ពេ មគ្គំ ភាវេត្វាតិអាទិ និយាមប្បភេទទស្សនត្ថំ វុត្តំ។ សតិបដ្ឋានន្តិអាទិ ឯកស្មិម្បិ និយាមេ ធម្មប្បភេទទស្សនត្ថំ វុត្តំ។ ភព្ពោ ពោធិសត្តោតិ វចនំ កេវលំ ពោធិសត្តស្ស ភព្ពតំ ទីបេតិ, ន និយតស្ស និយាមោក្កមនំ, តស្មា អសាធកំ។ សោ ហិ បុព្ពេ ឯកេនបិ និយតធម្មេន អនិយតោ ពោធិមូលេ សច្ចទស្សនេន និយាមំ ឱក្កន្តោតិ។
663-664. Idāni niyatassa niyāmakathā nāma hoti. Tattha duvidho niyāmo – micchattaniyāmo ca ānantariyakammaṃ, sammattaniyāmo ca ariyamaggo. Ime dve niyāme ṭhapetvā añño niyāmo nāma natthi. Sabbepi hi sesā tebhūmakadhammā aniyatā nāma. Tehi samannāgatopi aniyatoyeva. Buddhehi pana attano ñāṇabalena ‘‘ayaṃ satto anāgate bodhiṃ pāpuṇissatī’’ti byākato bodhisatto puññussadattā niyatoti vuccati. Iti imaṃ vohāramattaṃ gahetvā ‘‘pacchimabhaviko bodhisatto tāya jātiyā bhabbo dhammaṃ abhisametu’’nti adhippāyena ‘‘niyato niyāmaṃ okkamatī’’ti yesaṃ laddhi, seyyathāpi pubbaseliyāparaseliyānaṃ; te sandhāya pucchā sakavādissa, paṭiññā itarassa. Micchattaniyatotiādi aññena niyāmena niyatassa aññaniyāmābhāvadassanatthaṃ vuttaṃ. Pubbe maggaṃ bhāvetvātiādi niyāmappabhedadassanatthaṃ vuttaṃ. Satipaṭṭhānantiādi ekasmimpi niyāme dhammappabhedadassanatthaṃ vuttaṃ. Bhabbo bodhisattoti vacanaṃ kevalaṃ bodhisattassa bhabbataṃ dīpeti, na niyatassa niyāmokkamanaṃ, tasmā asādhakaṃ. So hi pubbe ekenapi niyatadhammena aniyato bodhimūle saccadassanena niyāmaṃ okkantoti.
និយតស្ស និយាមកថាវណ្ណនា។
Niyatassa niyāmakathāvaṇṇanā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / (១២៩) ៤. និយតស្ស និយាមកថា • (129) 4. Niyatassa niyāmakathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៤. និយតស្សនិយាមកថាវណ្ណនា • 4. Niyatassaniyāmakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៤. និយតស្សនិយាមកថាវណ្ណនា • 4. Niyatassaniyāmakathāvaṇṇanā
