| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೪. ನಿಯತಸ್ಸ ನಿಯಾಮಕಥಾವಣ್ಣನಾ
4. Niyatassa niyāmakathāvaṇṇanā
೬೬೩-೬೬೪. ಇದಾನಿ ನಿಯತಸ್ಸ ನಿಯಾಮಕಥಾ ನಾಮ ಹೋತಿ। ತತ್ಥ ದುವಿಧೋ ನಿಯಾಮೋ – ಮಿಚ್ಛತ್ತನಿಯಾಮೋ ಚ ಆನನ್ತರಿಯಕಮ್ಮಂ, ಸಮ್ಮತ್ತನಿಯಾಮೋ ಚ ಅರಿಯಮಗ್ಗೋ। ಇಮೇ ದ್ವೇ ನಿಯಾಮೇ ಠಪೇತ್ವಾ ಅಞ್ಞೋ ನಿಯಾಮೋ ನಾಮ ನತ್ಥಿ। ಸಬ್ಬೇಪಿ ಹಿ ಸೇಸಾ ತೇಭೂಮಕಧಮ್ಮಾ ಅನಿಯತಾ ನಾಮ। ತೇಹಿ ಸಮನ್ನಾಗತೋಪಿ ಅನಿಯತೋಯೇವ। ಬುದ್ಧೇಹಿ ಪನ ಅತ್ತನೋ ಞಾಣಬಲೇನ ‘‘ಅಯಂ ಸತ್ತೋ ಅನಾಗತೇ ಬೋಧಿಂ ಪಾಪುಣಿಸ್ಸತೀ’’ತಿ ಬ್ಯಾಕತೋ ಬೋಧಿಸತ್ತೋ ಪುಞ್ಞುಸ್ಸದತ್ತಾ ನಿಯತೋತಿ ವುಚ್ಚತಿ। ಇತಿ ಇಮಂ ವೋಹಾರಮತ್ತಂ ಗಹೇತ್ವಾ ‘‘ಪಚ್ಛಿಮಭವಿಕೋ ಬೋಧಿಸತ್ತೋ ತಾಯ ಜಾತಿಯಾ ಭಬ್ಬೋ ಧಮ್ಮಂ ಅಭಿಸಮೇತು’’ನ್ತಿ ಅಧಿಪ್ಪಾಯೇನ ‘‘ನಿಯತೋ ನಿಯಾಮಂ ಓಕ್ಕಮತೀ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಪುಬ್ಬಸೇಲಿಯಾಪರಸೇಲಿಯಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ। ಮಿಚ್ಛತ್ತನಿಯತೋತಿಆದಿ ಅಞ್ಞೇನ ನಿಯಾಮೇನ ನಿಯತಸ್ಸ ಅಞ್ಞನಿಯಾಮಾಭಾವದಸ್ಸನತ್ಥಂ ವುತ್ತಂ। ಪುಬ್ಬೇ ಮಗ್ಗಂ ಭಾವೇತ್ವಾತಿಆದಿ ನಿಯಾಮಪ್ಪಭೇದದಸ್ಸನತ್ಥಂ ವುತ್ತಂ। ಸತಿಪಟ್ಠಾನನ್ತಿಆದಿ ಏಕಸ್ಮಿಮ್ಪಿ ನಿಯಾಮೇ ಧಮ್ಮಪ್ಪಭೇದದಸ್ಸನತ್ಥಂ ವುತ್ತಂ। ಭಬ್ಬೋ ಬೋಧಿಸತ್ತೋತಿ ವಚನಂ ಕೇವಲಂ ಬೋಧಿಸತ್ತಸ್ಸ ಭಬ್ಬತಂ ದೀಪೇತಿ, ನ ನಿಯತಸ್ಸ ನಿಯಾಮೋಕ್ಕಮನಂ, ತಸ್ಮಾ ಅಸಾಧಕಂ। ಸೋ ಹಿ ಪುಬ್ಬೇ ಏಕೇನಪಿ ನಿಯತಧಮ್ಮೇನ ಅನಿಯತೋ ಬೋಧಿಮೂಲೇ ಸಚ್ಚದಸ್ಸನೇನ ನಿಯಾಮಂ ಓಕ್ಕನ್ತೋತಿ।
663-664. Idāni niyatassa niyāmakathā nāma hoti. Tattha duvidho niyāmo – micchattaniyāmo ca ānantariyakammaṃ, sammattaniyāmo ca ariyamaggo. Ime dve niyāme ṭhapetvā añño niyāmo nāma natthi. Sabbepi hi sesā tebhūmakadhammā aniyatā nāma. Tehi samannāgatopi aniyatoyeva. Buddhehi pana attano ñāṇabalena ‘‘ayaṃ satto anāgate bodhiṃ pāpuṇissatī’’ti byākato bodhisatto puññussadattā niyatoti vuccati. Iti imaṃ vohāramattaṃ gahetvā ‘‘pacchimabhaviko bodhisatto tāya jātiyā bhabbo dhammaṃ abhisametu’’nti adhippāyena ‘‘niyato niyāmaṃ okkamatī’’ti yesaṃ laddhi, seyyathāpi pubbaseliyāparaseliyānaṃ; te sandhāya pucchā sakavādissa, paṭiññā itarassa. Micchattaniyatotiādi aññena niyāmena niyatassa aññaniyāmābhāvadassanatthaṃ vuttaṃ. Pubbe maggaṃ bhāvetvātiādi niyāmappabhedadassanatthaṃ vuttaṃ. Satipaṭṭhānantiādi ekasmimpi niyāme dhammappabhedadassanatthaṃ vuttaṃ. Bhabbo bodhisattoti vacanaṃ kevalaṃ bodhisattassa bhabbataṃ dīpeti, na niyatassa niyāmokkamanaṃ, tasmā asādhakaṃ. So hi pubbe ekenapi niyatadhammena aniyato bodhimūle saccadassanena niyāmaṃ okkantoti.
ನಿಯತಸ್ಸ ನಿಯಾಮಕಥಾವಣ್ಣನಾ।
Niyatassa niyāmakathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೧೨೯) ೪. ನಿಯತಸ್ಸ ನಿಯಾಮಕಥಾ • (129) 4. Niyatassa niyāmakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೪. ನಿಯತಸ್ಸನಿಯಾಮಕಥಾವಣ್ಣನಾ • 4. Niyatassaniyāmakathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೪. ನಿಯತಸ್ಸನಿಯಾಮಕಥಾವಣ್ಣನಾ • 4. Niyatassaniyāmakathāvaṇṇanā
