| Library / Tipiṭaka / तिपिटक • Tipiṭaka / पञ्चपकरण-मूलटीका • Pañcapakaraṇa-mūlaṭīkā |
४. नियतस्सनियामकथावण्णना
4. Niyatassaniyāmakathāvaṇṇanā
६६३-६६४. सेसा तेभूमकधम्मा अनियता नामाति एत्थ अप्पत्तनियामानं धम्मे सन्धाय ‘‘तेभूमकधम्मा’’ति आह। एतेव हि सन्धाय ‘‘तेहि समन्नागतोपि अनियतोयेवा’’ति वुत्तन्ति। इति इमं वोहारमत्तं गहेत्वा ‘‘नियतो बोधिसत्तो पच्छिमभविको भब्बो धम्मं अभिसमेतुं ओक्कमितु’’न्ति अधिप्पायेन ‘‘नियामं ओक्कमती’’ति येसं लद्धीति अत्थयोजना। एवं पन वोहारमत्तसब्भावो ‘‘नियतो’’ति वचनस्स, धम्मं अभिसमेतुं भब्बता च ‘‘नियामं ओक्कमती’’ति वचनस्स कारणभावेन वुत्ता होति, भब्बतायेव पन उभयस्सपि कारणन्ति युत्तं। अञ्ञेनाति यदि नियतो नियामं ओक्कमेय्य, मिच्छत्तनियतो सम्मत्तनियामं, सम्मत्तनियतो वा मिच्छत्तनियामं ओक्कमेय्य, न च तं अत्थीति दस्सनत्थन्ति अत्थो।
663-664. Sesā tebhūmakadhammā aniyatā nāmāti ettha appattaniyāmānaṃ dhamme sandhāya ‘‘tebhūmakadhammā’’ti āha. Eteva hi sandhāya ‘‘tehi samannāgatopi aniyatoyevā’’ti vuttanti. Iti imaṃ vohāramattaṃ gahetvā ‘‘niyato bodhisatto pacchimabhaviko bhabbo dhammaṃ abhisametuṃ okkamitu’’nti adhippāyena ‘‘niyāmaṃ okkamatī’’ti yesaṃ laddhīti atthayojanā. Evaṃ pana vohāramattasabbhāvo ‘‘niyato’’ti vacanassa, dhammaṃ abhisametuṃ bhabbatā ca ‘‘niyāmaṃ okkamatī’’ti vacanassa kāraṇabhāvena vuttā hoti, bhabbatāyeva pana ubhayassapi kāraṇanti yuttaṃ. Aññenāti yadi niyato niyāmaṃ okkameyya, micchattaniyato sammattaniyāmaṃ, sammattaniyato vā micchattaniyāmaṃ okkameyya, na ca taṃ atthīti dassanatthanti attho.
नियतस्सनियामकथावण्णना निट्ठिता।
Niyatassaniyāmakathāvaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / अभिधम्मपिटक • Abhidhammapiṭaka / कथावत्थुपाळि • Kathāvatthupāḷi / (१२९) ४. नियतस्स नियामकथा • (129) 4. Niyatassa niyāmakathā
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / ४. नियतस्स नियामकथावण्णना • 4. Niyatassa niyāmakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / ४. नियतस्सनियामकथावण्णना • 4. Niyatassaniyāmakathāvaṇṇanā
