| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. নোচেদংসুত্তং
4. Nocedaṃsuttaṃ
১১৭. সাৰত্থিযং ৰিহরতি…পে॰… ‘‘নো চেদং, ভিক্খৰে, পথৰীধাতুযা অস্সাদো অভৰিস্স, নযিদং সত্তা পথৰীধাতুযা সারজ্জেয্যুং । যস্মা চ খো, ভিক্খৰে, অত্থি পথৰীধাতুযা অস্সাদো, তস্মা সত্তা পথৰীধাতুযা সারজ্জন্তি। নো চেদং, ভিক্খৰে, পথৰীধাতুযা আদীনৰো অভৰিস্স, নযিদং সত্তা পথৰীধাতুযা নিব্বিন্দেয্যুং। যস্মা চ খো, ভিক্খৰে, অত্থি পথৰীধাতুযা আদীনৰো, তস্মা সত্তা পথৰীধাতুযা নিব্বিন্দন্তি। নো চেদং, ভিক্খৰে, পথৰীধাতুযা নিস্সরণং অভৰিস্স, নযিদং সত্তা পথৰীধাতুযা নিস্সরেয্যুং। যস্মা চ খো, ভিক্খৰে, অত্থি পথৰীধাতুযা নিস্সরণং, তস্মা সত্তা পথৰীধাতুযা নিস্সরন্তি’’।
117. Sāvatthiyaṃ viharati…pe… ‘‘no cedaṃ, bhikkhave, pathavīdhātuyā assādo abhavissa, nayidaṃ sattā pathavīdhātuyā sārajjeyyuṃ . Yasmā ca kho, bhikkhave, atthi pathavīdhātuyā assādo, tasmā sattā pathavīdhātuyā sārajjanti. No cedaṃ, bhikkhave, pathavīdhātuyā ādīnavo abhavissa, nayidaṃ sattā pathavīdhātuyā nibbindeyyuṃ. Yasmā ca kho, bhikkhave, atthi pathavīdhātuyā ādīnavo, tasmā sattā pathavīdhātuyā nibbindanti. No cedaṃ, bhikkhave, pathavīdhātuyā nissaraṇaṃ abhavissa, nayidaṃ sattā pathavīdhātuyā nissareyyuṃ. Yasmā ca kho, bhikkhave, atthi pathavīdhātuyā nissaraṇaṃ, tasmā sattā pathavīdhātuyā nissaranti’’.
‘‘নো চেদং, ভিক্খৰে, আপোধাতুযা অস্সাদো অভৰিস্স…পে॰… নো চেদং, ভিক্খৰে, তেজোধাতুযা…পে॰… নো চেদং, ভিক্খৰে, ৰাযোধাতুযা অস্সাদো অভৰিস্স, নযিদং সত্তা ৰাযোধাতুযা সারজ্জেয্যুং। যস্মা চ খো, ভিক্খৰে, অত্থি ৰাযোধাতুযা অস্সাদো, তস্মা সত্তা ৰাযোধাতুযা সারজ্জন্তি। নো চেদং, ভিক্খৰে, ৰাযোধাতুযা আদীনৰো অভৰিস্স, নযিদং সত্তা ৰাযোধাতুযা নিব্বিন্দেয্যুং। যস্মা চ খো, ভিক্খৰে, অত্থি ৰাযোধাতুযা আদীনৰো, তস্মা সত্তা ৰাযোধাতুযা নিব্বিন্দন্তি। নো চেদং, ভিক্খৰে, ৰাযোধাতুযা নিস্সরণং অভৰিস্স, নযিদং সত্তা ৰাযোধাতুযা নিস্সরেয্যুং। যস্মা চ খো, ভিক্খৰে, অত্থি ৰাযোধাতুযা নিস্সরণং, তস্মা সত্তা ৰাযোধাতুযা নিস্সরন্তি।
‘‘No cedaṃ, bhikkhave, āpodhātuyā assādo abhavissa…pe… no cedaṃ, bhikkhave, tejodhātuyā…pe… no cedaṃ, bhikkhave, vāyodhātuyā assādo abhavissa, nayidaṃ sattā vāyodhātuyā sārajjeyyuṃ. Yasmā ca kho, bhikkhave, atthi vāyodhātuyā assādo, tasmā sattā vāyodhātuyā sārajjanti. No cedaṃ, bhikkhave, vāyodhātuyā ādīnavo abhavissa, nayidaṃ sattā vāyodhātuyā nibbindeyyuṃ. Yasmā ca kho, bhikkhave, atthi vāyodhātuyā ādīnavo, tasmā sattā vāyodhātuyā nibbindanti. No cedaṃ, bhikkhave, vāyodhātuyā nissaraṇaṃ abhavissa, nayidaṃ sattā vāyodhātuyā nissareyyuṃ. Yasmā ca kho, bhikkhave, atthi vāyodhātuyā nissaraṇaṃ, tasmā sattā vāyodhātuyā nissaranti.
‘‘যাৰকীৰঞ্চিমে, ভিক্খৰে, সত্তা ইমাসং চতুন্নং ধাতূনং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং ন অব্ভঞ্ঞংসু, নেৰ তাৰিমে ভিক্খৰে, সত্তা সদেৰকা লোকা সমারকা সব্রহ্মকা সস্সমণব্রাহ্মণিযা পজায সদেৰমনুস্সায নিস্সটা ৰিসংযুত্তা ৰিপ্পমুত্তা ৰিমরিযাদিকতেন চেতসা ৰিহরিংসু।
‘‘Yāvakīvañcime, bhikkhave, sattā imāsaṃ catunnaṃ dhātūnaṃ assādañca assādato ādīnavañca ādīnavato nissaraṇañca nissaraṇato yathābhūtaṃ na abbhaññaṃsu, neva tāvime bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā vimariyādikatena cetasā vihariṃsu.
‘‘যতো চ খো, ভিক্খৰে, সত্তা ইমাসং চতুন্নং ধাতূনং অস্সাদঞ্চ অস্সাদতো আদীনৰঞ্চ আদীনৰতো নিস্সরণঞ্চ নিস্সরণতো যথাভূতং অব্ভঞ্ঞংসু, অথ, ভিক্খৰে, সত্তা সদেৰকা লোকা সমারকা সব্রহ্মকা সস্সমণব্রাহ্মণিযা পজায সদেৰমনুস্সায নিস্সটা ৰিসংযুত্তা ৰিপ্পমুত্তা ৰিমরিযাদিকতেন চেতসা ৰিহরন্তী’’তি। চতুত্থং।
‘‘Yato ca kho, bhikkhave, sattā imāsaṃ catunnaṃ dhātūnaṃ assādañca assādato ādīnavañca ādīnavato nissaraṇañca nissaraṇato yathābhūtaṃ abbhaññaṃsu, atha, bhikkhave, sattā sadevakā lokā samārakā sabrahmakā sassamaṇabrāhmaṇiyā pajāya sadevamanussāya nissaṭā visaṃyuttā vippamuttā vimariyādikatena cetasā viharantī’’ti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. নোচেদংসুত্তৰণ্ণনা • 4. Nocedaṃsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. নোচেদংসুত্তৰণ্ণনা • 4. Nocedaṃsuttavaṇṇanā
