| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. நோபரியேஸனானானத்தஸுத்தங்
8. Nopariyesanānānattasuttaṃ
92. ஸாவத்தி²யங் விஹரதி…பே॰… ‘‘தா⁴துனானத்தங், பி⁴க்க²வே, படிச்ச உப்பஜ்ஜதி ஸஞ்ஞானானத்தங், ஸஞ்ஞானானத்தங் படிச்ச உப்பஜ்ஜதி ஸங்கப்பனானத்தங், ஸங்கப்பனானத்தங் படிச்ச உப்பஜ்ஜதி ச²ந்த³னானத்தங், ச²ந்த³னானத்தங் படிச்ச உப்பஜ்ஜதி பரிளாஹனானத்தங், பரிளாஹனானத்தங் படிச்ச உப்பஜ்ஜதி பரியேஸனானானத்தங்; நோ பரியேஸனானானத்தங் படிச்ச உப்பஜ்ஜதி பரிளாஹனானத்தங் , நோ பரிளாஹனானத்தங் படிச்ச உப்பஜ்ஜதி ச²ந்த³னானத்தங், நோ ச²ந்த³னானத்தங் படிச்ச உப்பஜ்ஜதி ஸங்கப்பனானத்தங் , நோ ஸங்கப்பனானத்தங் படிச்ச உப்பஜ்ஜதி ஸஞ்ஞானானத்தங், நோ ஸஞ்ஞானானத்தங் படிச்ச உப்பஜ்ஜதி தா⁴துனானத்தங். கதமஞ்ச, பி⁴க்க²வே, தா⁴துனானத்தங்? ரூபதா⁴து…பே॰… த⁴ம்மதா⁴து – இத³ங் வுச்சதி, பி⁴க்க²வே, தா⁴துனானத்தங்’’.
92. Sāvatthiyaṃ viharati…pe… ‘‘dhātunānattaṃ, bhikkhave, paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānattaṃ; no pariyesanānānattaṃ paṭicca uppajjati pariḷāhanānattaṃ , no pariḷāhanānattaṃ paṭicca uppajjati chandanānattaṃ, no chandanānattaṃ paṭicca uppajjati saṅkappanānattaṃ , no saṅkappanānattaṃ paṭicca uppajjati saññānānattaṃ, no saññānānattaṃ paṭicca uppajjati dhātunānattaṃ. Katamañca, bhikkhave, dhātunānattaṃ? Rūpadhātu…pe… dhammadhātu – idaṃ vuccati, bhikkhave, dhātunānattaṃ’’.
‘‘கத²ஞ்ச , பி⁴க்க²வே, தா⁴துனானத்தங் படிச்ச உப்பஜ்ஜதி ஸஞ்ஞானானத்தங், ஸஞ்ஞானானத்தங் படிச்ச உப்பஜ்ஜதி…பே॰… பரியேஸனானானத்தங்; நோ பரியேஸனானானத்தங் படிச்ச உப்பஜ்ஜதி பரிளாஹனானத்தங், நோ பரிளாஹனானத்தங் படிச்ச உப்பஜ்ஜதி ச²ந்த³னானத்தங், நோ ச²ந்த³னானத்தங் படிச்ச உப்பஜ்ஜதி ஸங்கப்பனானத்தங், நோ ஸங்கப்பனானத்தங் படிச்ச உப்பஜ்ஜதி ஸஞ்ஞானானத்தங், நோ ஸஞ்ஞானானத்தங் படிச்ச உப்பஜ்ஜதி தா⁴துனானத்தங்?
‘‘Kathañca , bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati…pe… pariyesanānānattaṃ; no pariyesanānānattaṃ paṭicca uppajjati pariḷāhanānattaṃ, no pariḷāhanānattaṃ paṭicca uppajjati chandanānattaṃ, no chandanānattaṃ paṭicca uppajjati saṅkappanānattaṃ, no saṅkappanānattaṃ paṭicca uppajjati saññānānattaṃ, no saññānānattaṃ paṭicca uppajjati dhātunānattaṃ?
‘‘ரூபதா⁴துங், பி⁴க்க²வே, படிச்ச உப்பஜ்ஜதி ரூபஸஞ்ஞா…பே॰… த⁴ம்மதா⁴துங் படிச்ச உப்பஜ்ஜதி த⁴ம்மஸஞ்ஞா, த⁴ம்மஸஞ்ஞங் படிச்ச உப்பஜ்ஜதி…பே॰… த⁴ம்மபரியேஸனா; நோ த⁴ம்மபரியேஸனங் படிச்ச உப்பஜ்ஜதி த⁴ம்மபரிளாஹோ, நோ த⁴ம்மபரிளாஹங் படிச்ச உப்பஜ்ஜதி த⁴ம்மச்ச²ந்தோ³, நோ த⁴ம்மச்ச²ந்த³ங் படிச்ச உப்பஜ்ஜதி த⁴ம்மஸங்கப்போ, நோ த⁴ம்மஸங்கப்பங் படிச்ச உப்பஜ்ஜதி த⁴ம்மஸஞ்ஞா, நோ த⁴ம்மஸஞ்ஞங் படிச்ச உப்பஜ்ஜதி த⁴ம்மதா⁴து.
‘‘Rūpadhātuṃ, bhikkhave, paṭicca uppajjati rūpasaññā…pe… dhammadhātuṃ paṭicca uppajjati dhammasaññā, dhammasaññaṃ paṭicca uppajjati…pe… dhammapariyesanā; no dhammapariyesanaṃ paṭicca uppajjati dhammapariḷāho, no dhammapariḷāhaṃ paṭicca uppajjati dhammacchando, no dhammacchandaṃ paṭicca uppajjati dhammasaṅkappo, no dhammasaṅkappaṃ paṭicca uppajjati dhammasaññā, no dhammasaññaṃ paṭicca uppajjati dhammadhātu.
‘‘ஏவங் கோ², பி⁴க்க²வே, தா⁴துனானத்தங் படிச்ச உப்பஜ்ஜதி ஸஞ்ஞானானத்தங், ஸஞ்ஞானானத்தங் படிச்ச உப்பஜ்ஜதி…பே॰… பரியேஸனானானத்தங்; நோ பரியேஸனானானத்தங் படிச்ச உப்பஜ்ஜதி பரிளாஹனானத்தங், நோ பரிளாஹனானத்தங் படிச்ச உப்பஜ்ஜதி ச²ந்த³னானத்தங், நோ ச²ந்த³னானத்தங் படிச்ச உப்பஜ்ஜதி ஸங்கப்பனானத்தங், நோ ஸங்கப்பனானத்தங் படிச்ச உப்பஜ்ஜதி ஸஞ்ஞானானத்தங், நோ ஸஞ்ஞானானத்தங் படிச்ச உப்பஜ்ஜதி தா⁴துனானத்த’’ந்தி. அட்ட²மங்.
‘‘Evaṃ kho, bhikkhave, dhātunānattaṃ paṭicca uppajjati saññānānattaṃ, saññānānattaṃ paṭicca uppajjati…pe… pariyesanānānattaṃ; no pariyesanānānattaṃ paṭicca uppajjati pariḷāhanānattaṃ, no pariḷāhanānattaṃ paṭicca uppajjati chandanānattaṃ, no chandanānattaṃ paṭicca uppajjati saṅkappanānattaṃ, no saṅkappanānattaṃ paṭicca uppajjati saññānānattaṃ, no saññānānattaṃ paṭicca uppajjati dhātunānatta’’nti. Aṭṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. நோபரியேஸனானானத்தஸுத்தவண்ணனா • 8. Nopariyesanānānattasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. நோபரியேஸனானானத்தஸுத்தவண்ணனா • 8. Nopariyesanānānattasuttavaṇṇanā
