| Library / Tipiṭaka / திபிடக • Tipiṭaka / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā |
நோஉபாதா³பா⁴ஜனீயகதா²வண்ணனா
Noupādābhājanīyakathāvaṇṇanā
646. ந உபாதி³யதேவாதி ந நிஸ்ஸயதி ஏவ, கிந்து நிஸ்ஸயதி ச நிஸ்ஸீயதி சாதி அத்தோ².
646. Na upādiyatevāti na nissayati eva, kintu nissayati ca nissīyati cāti attho.
647. புரிமா பனாதி பஞ்சவித⁴ஸங்க³ஹே பத²வீதா⁴துஆபோதா⁴துதேஜோதா⁴துவாயோதா⁴தூனங் புரிமுத்³தே³ஸவஸேன வுத்தங். பொ²ட்ட²ப்³பா³யதனநித்³தே³ஸே வா வுத்தானங் பத²வீதா⁴துஆதீ³னங் புரிமா உத்³தே³ஸே வுத்தா ஆபோதா⁴தூதி அதி⁴ப்பாயோ, வுத்தஸ்ஸ வா பொ²ட்ட²ப்³பா³யதனஸ்ஸ அதீததாய பச்சி²மதா, அனாக³ததாய ச ஆபோதா⁴துயா புரிமதா வுத்தாதி த³ட்ட²ப்³பா³. ஆயூதி ஜீவிதிந்த்³ரியங். கம்மஜதேஜங் உஸ்மா. யங் கிஞ்சி தா⁴துங்…பே॰… ஏகப்பஹாரேன நுப்பஜ்ஜதீதி ஏகஸ்மிங் க²ணே அனேகாஸு பத²வீஸு ஆபாத²க³தாஸு தாஸு தாஸு ஸஹ நுப்பஜ்ஜதி, ததா² தேஜவாயூஸு சாதி அத்தோ². அனேகேஸு ஆரம்மணேஸு ஸன்னிபதிதேஸு ஆபு⁴ஜிதவஸேன ஆரம்மணபஸாதா³தி⁴மத்ததாவஸேன ச பட²மங் கத்த²சி உப்பத்தி த³ஸ்ஸிதா, அஞ்ஞத்த² ச பன உப்பத்தி அத்தி² ஏவ. ஸாயங் ஆரம்மணதோ ஆரம்மணந்தரஸங்கந்தி யேன உபாயேன ஹோதி, தஸ்ஸ விஜானநத்த²ங் புச்ச²தி ‘‘கத²ங் பன சித்தஸ்ஸ ஆரம்மணதோ ஸங்கந்தி ஹோதீ’’தி.
647. Purimā panāti pañcavidhasaṅgahe pathavīdhātuāpodhātutejodhātuvāyodhātūnaṃ purimuddesavasena vuttaṃ. Phoṭṭhabbāyatananiddese vā vuttānaṃ pathavīdhātuādīnaṃ purimā uddese vuttā āpodhātūti adhippāyo, vuttassa vā phoṭṭhabbāyatanassa atītatāya pacchimatā, anāgatatāya ca āpodhātuyā purimatā vuttāti daṭṭhabbā. Āyūti jīvitindriyaṃ. Kammajatejaṃ usmā. Yaṃ kiñci dhātuṃ…pe… ekappahārena nuppajjatīti ekasmiṃ khaṇe anekāsu pathavīsu āpāthagatāsu tāsu tāsu saha nuppajjati, tathā tejavāyūsu cāti attho. Anekesu ārammaṇesu sannipatitesu ābhujitavasena ārammaṇapasādādhimattatāvasena ca paṭhamaṃ katthaci uppatti dassitā, aññattha ca pana uppatti atthi eva. Sāyaṃ ārammaṇato ārammaṇantarasaṅkanti yena upāyena hoti, tassa vijānanatthaṃ pucchati ‘‘kathaṃ pana cittassa ārammaṇato saṅkanti hotī’’ti.
651. அயபிண்டி³ஆதீ³ஸு பத²வீதா⁴து தாதி³ஸாய ஆபோதா⁴துயா அனாப³த்³தா⁴ ஸந்தீ விஸரெய்ய, தஸ்மா ‘‘தானி ஆபோதா⁴து ஆப³ந்தி⁴த்வா ப³த்³தா⁴னி கரோதீ’’தி வுத்தங். யதா² ஹி யுத்தப்பமாணங் உத³கங் பங்ஸுசுண்ணானி ஆப³ந்தி⁴த்வா மத்திகாபிண்ட³ங் கத்வா ட²பேதி, ஏவங் அயோபிண்டி³ஆதீ³ஸுபி தத³னுரூபபச்சயேஹி தத்தே²வ உப்பன்னா ஆபோதா⁴து ததா² ஆப³ந்தி⁴த்வா ட²பேதீதி த³ட்ட²ப்³பா³.
651. Ayapiṇḍiādīsu pathavīdhātu tādisāya āpodhātuyā anābaddhā santī visareyya, tasmā ‘‘tāni āpodhātu ābandhitvā baddhāni karotī’’ti vuttaṃ. Yathā hi yuttappamāṇaṃ udakaṃ paṃsucuṇṇāni ābandhitvā mattikāpiṇḍaṃ katvā ṭhapeti, evaṃ ayopiṇḍiādīsupi tadanurūpapaccayehi tattheva uppannā āpodhātu tathā ābandhitvā ṭhapetīti daṭṭhabbā.
அபு²ஸித்வா பதிட்டா² ஹோதீதி ஆபோதா⁴துயா அபொ²ட்ட²ப்³ப³பா⁴வதோ வுத்தங், ததா² ‘‘அபு²ஸித்வாவ ஆப³ந்த⁴தீ’’தி. ந ஹி யதா² பொ²ட்ட²ப்³ப³தா⁴தூனங் பொ²ட்ட²ப்³ப³பா⁴வேன அஞ்ஞமஞ்ஞனிஸ்ஸயதா, ஏவங் பொ²ட்ட²ப்³பா³பொ²ட்ட²ப்³ப³தா⁴தூனங் ஹோதீதி அதி⁴ப்பாயோ வேதி³தப்³போ³. அவினிப்³போ⁴க³வுத்தீஸு ஹி பூ⁴தேஸு அஞ்ஞமஞ்ஞனிஸ்ஸயதா அஞ்ஞமஞ்ஞபச்சயபூ⁴தேஸு ந ஸக்கா நிவாரேதுங், நாபி ஸஹஜாதேஸு அவினிப்³போ⁴க³தாய ஏகீபூ⁴தேஸு பு²ஸனாபு²ஸனானி விசாரேதுங் யுத்தானீதி. ந உண்ஹா ஹுத்வா ஜா²யதீதி தேஜோஸபா⁴வதங்யேவ படிக்கி²பதி, ந ஸீதத்தங் அனுஜானாதி, தேஜோஸபா⁴வபடிக்கே²பேனேவ ச ஸீதத்தஞ்ச படிக்கி²த்தங் ஹோதி. தேஜோ ஏவ ஹி ஸீதங் ஹிமபாதஸமயாதீ³ஸு ஸீதஸ்ஸ பரிபாசகதாத³ஸ்ஸனதோ, ஸீதுண்ஹானஞ்ச அஞ்ஞமஞ்ஞபடிபக்க²பா⁴வதோ உண்ஹேன ஸஹ ந ஸீதங் பூ⁴தந்தரங் பவத்ததீதி யுஜ்ஜதி. உண்ஹகலாபே பன ஸீதஸ்ஸ அப்பவத்தி ஸீதகலாபே ச உண்ஹஸ்ஸ த்³வின்னங் அஞ்ஞமஞ்ஞபடிபக்க²த்தா தேஜோவிஸேஸபா⁴வே யுஜ்ஜதீதி. பா⁴வஞ்ஞத²த்தந்தி க²ரானங் கு³ளாதீ³னங் த³வதா முது³தா ரஸாதீ³னஞ்ச த³வானங் க²ரதா பச்சயவிஸேஸேஹி ஓமத்தாதி⁴மத்தபத²வீதா⁴துஆதி³கானங் உப்பத்தி. லக்க²ணஞ்ஞத²த்தங் கக்க²ளாதி³லக்க²ணவிஜஹனங், தங் ஏதேஸங் ந ஹோதி, ஓமத்தாதி⁴மத்ததாஸங்கா²தங் பா⁴வஞ்ஞத²த்தங்யேவ ஹோதீதி அத்தோ².
Aphusitvā patiṭṭhā hotīti āpodhātuyā aphoṭṭhabbabhāvato vuttaṃ, tathā ‘‘aphusitvāva ābandhatī’’ti. Na hi yathā phoṭṭhabbadhātūnaṃ phoṭṭhabbabhāvena aññamaññanissayatā, evaṃ phoṭṭhabbāphoṭṭhabbadhātūnaṃ hotīti adhippāyo veditabbo. Avinibbhogavuttīsu hi bhūtesu aññamaññanissayatā aññamaññapaccayabhūtesu na sakkā nivāretuṃ, nāpi sahajātesu avinibbhogatāya ekībhūtesu phusanāphusanāni vicāretuṃ yuttānīti. Na uṇhā hutvā jhāyatīti tejosabhāvataṃyeva paṭikkhipati, na sītattaṃ anujānāti, tejosabhāvapaṭikkhepeneva ca sītattañca paṭikkhittaṃ hoti. Tejo eva hi sītaṃ himapātasamayādīsu sītassa paripācakatādassanato, sītuṇhānañca aññamaññapaṭipakkhabhāvato uṇhena saha na sītaṃ bhūtantaraṃ pavattatīti yujjati. Uṇhakalāpe pana sītassa appavatti sītakalāpe ca uṇhassa dvinnaṃ aññamaññapaṭipakkhattā tejovisesabhāve yujjatīti. Bhāvaññathattanti kharānaṃ guḷādīnaṃ davatā mudutā rasādīnañca davānaṃ kharatā paccayavisesehi omattādhimattapathavīdhātuādikānaṃ uppatti. Lakkhaṇaññathattaṃ kakkhaḷādilakkhaṇavijahanaṃ, taṃ etesaṃ na hoti, omattādhimattatāsaṅkhātaṃ bhāvaññathattaṃyeva hotīti attho.
652. அனுபாதி³ன்னாதீ³னங்யேவாதி ஏகந்தஅனுபாதி³ன்னஏகந்தனசித்தஸமுட்டா²னாதீ³னங் நித்³தே³ஸேஸு க³ஹணேஸு க³ஹிதாதி அத்தோ². யங் வா பனஞ்ஞம்பீதி பன வசனேன புரிமானம்பி நகம்மஸ்ஸகதத்தாபா⁴வாதி³கங் தீ³பேதி. தா ஹி அனுபாதி³ன்னாதி³னகம்மஸ்ஸகதத்தாதி³வசனானங் ஸமானத்த²த்தா ஏகேன அவத்தப்³ப³த்தே இதரேனபி அவத்தப்³பா³ ஸியுங், வத்தப்³ப³த்தே வா வத்தப்³பா³. தஸ்மா ஏகந்தாகம்மஜாதீ³ஸ்வேவ க³ஹேதப்³ப³த்தா தா அனேகந்தேஸு ந க³ஹிதாதி த³ட்ட²ப்³பா³.
652. Anupādinnādīnaṃyevāti ekantaanupādinnaekantanacittasamuṭṭhānādīnaṃ niddesesu gahaṇesu gahitāti attho. Yaṃ vā panaññampīti pana vacanena purimānampi nakammassakatattābhāvādikaṃ dīpeti. Tā hi anupādinnādinakammassakatattādivacanānaṃ samānatthattā ekena avattabbatte itarenapi avattabbā siyuṃ, vattabbatte vā vattabbā. Tasmā ekantākammajādīsveva gahetabbattā tā anekantesu na gahitāti daṭṭhabbā.
666. ஏகந்த …பே॰… பஞ்ஞாயதி தேஸங் விகாரத்தா, அனிப்ப²ன்னத்தா பன தஸ்ஸ உப்பாதோ³ ந கேனசி ஸக்கா வத்துந்தி அதி⁴ப்பாயோ.
666. Ekanta…pe… paññāyati tesaṃ vikārattā, anipphannattā pana tassa uppādo na kenaci sakkā vattunti adhippāyo.
து³கனித்³தே³ஸவண்ணனா நிட்டி²தா.
Dukaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / ரூபவிப⁴த்தி • Rūpavibhatti
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā / உபாதா³பா⁴ஜனீயகதா² • Upādābhājanīyakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-அனுடீகா • Dhammasaṅgaṇī-anuṭīkā / நோஉபாதா³பா⁴ஜனீயகதா²வண்ணனா • Noupādābhājanīyakathāvaṇṇanā
