| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১১. ওঘপঞ্হাসুত্তং
11. Oghapañhāsuttaṃ
৩২৪. ‘‘‘ওঘো, ওঘো’তি, আৰুসো সারিপুত্ত, ৰুচ্চতি। কতমো নু খো, আৰুসো, ওঘো’’তি? ‘‘চত্তারোমে, আৰুসো, ওঘা। কামোঘো, ভৰোঘো, দিট্ঠোঘো, অৰিজ্জোঘো – ইমে খো, আৰুসো, চত্তারো ওঘা’’তি। ‘‘অত্থি পনাৰুসো, মগ্গো অত্থি পটিপদা, এতেসং ওঘানং পহানাযা’’তি? ‘‘অত্থি খো, আৰুসো, মগ্গো অত্থি পটিপদা, এতেসং ওঘানং পহানাযা’’তি। ‘‘কতমো পনাৰুসো, মগ্গো কতমা পটিপদা, এতেসং ওঘানং পহানাযা’’তি? ‘‘অযমেৰ খো, আৰুসো, অরিযো অট্ঠঙ্গিকো মগ্গো, এতেসং ওঘানং পহানায, সেয্যথিদং – সম্মাদিট্ঠি সম্মাসঙ্কপ্পো সম্মাৰাচা সম্মাকম্মন্তো সম্মাআজীৰো সম্মাৰাযামো সম্মাসতি সম্মাসমাধি । অযং খো, আৰুসো, মগ্গো অযং পটিপদা, এতেসং ওঘানং পহানাযা’’তি। ‘‘ভদ্দকো , আৰুসো, মগ্গো ভদ্দিকা পটিপদা, এতেসং ওঘানং পহানায। অলঞ্চ পনাৰুসো সারিপুত্ত, অপ্পমাদাযা’’তি। একাদসমং।
324. ‘‘‘Ogho, ogho’ti, āvuso sāriputta, vuccati. Katamo nu kho, āvuso, ogho’’ti? ‘‘Cattārome, āvuso, oghā. Kāmogho, bhavogho, diṭṭhogho, avijjogho – ime kho, āvuso, cattāro oghā’’ti. ‘‘Atthi panāvuso, maggo atthi paṭipadā, etesaṃ oghānaṃ pahānāyā’’ti? ‘‘Atthi kho, āvuso, maggo atthi paṭipadā, etesaṃ oghānaṃ pahānāyā’’ti. ‘‘Katamo panāvuso, maggo katamā paṭipadā, etesaṃ oghānaṃ pahānāyā’’ti? ‘‘Ayameva kho, āvuso, ariyo aṭṭhaṅgiko maggo, etesaṃ oghānaṃ pahānāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi . Ayaṃ kho, āvuso, maggo ayaṃ paṭipadā, etesaṃ oghānaṃ pahānāyā’’ti. ‘‘Bhaddako , āvuso, maggo bhaddikā paṭipadā, etesaṃ oghānaṃ pahānāya. Alañca panāvuso sāriputta, appamādāyā’’ti. Ekādasamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩-১৫. ধম্মৰাদীপঞ্হাসুত্তাদিৰণ্ণনা • 3-15. Dhammavādīpañhāsuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩-১৫. ধম্মৰাদীপঞ্হসুত্তাদিৰণ্ণনা • 3-15. Dhammavādīpañhasuttādivaṇṇanā
