| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
11. ඔඝපඤ්‌හාසුත්‌තං
11. Oghapañhāsuttaṃ
324. ‘‘‘ඔඝො, ඔඝො’ති, ආවුසො සාරිපුත්‌ත, වුච්‌චති. කතමො නු ඛො, ආවුසො, ඔඝො’’ති? ‘‘චත්‌තාරොමෙ, ආවුසො, ඔඝා. කාමොඝො, භවොඝො, දිට්‌ඨොඝො, අවිජ්‌ජොඝො – ඉමෙ ඛො, ආවුසො, චත්‌තාරො ඔඝා’’ති. ‘‘අත්‌ථි පනාවුසො, මග්‌ගො අත්‌ථි පටිපදා, එතෙසං ඔඝානං පහානායා’’ති? ‘‘අත්‌ථි ඛො, ආවුසො, මග්‌ගො අත්‌ථි පටිපදා, එතෙසං ඔඝානං පහානායා’’ති. ‘‘කතමො පනාවුසො, මග්‌ගො කතමා පටිපදා, එතෙසං ඔඝානං පහානායා’’ති? ‘‘අයමෙව ඛො, ආවුසො, අරියො අට්‌ඨඞ්‌ගිකො මග්‌ගො, එතෙසං ඔඝානං පහානාය, සෙය්‍යථිදං – සම්‌මාදිට්‌ඨි සම්‌මාසඞ්‌කප්‌පො සම්‌මාවාචා සම්‌මාකම්‌මන්‌තො සම්‌මාආජීවො සම්‌මාවායාමො සම්‌මාසති සම්‌මාසමාධි . අයං ඛො, ආවුසො, මග්‌ගො අයං පටිපදා, එතෙසං ඔඝානං පහානායා’’ති. ‘‘භද්‌දකො , ආවුසො, මග්‌ගො භද්‌දිකා පටිපදා, එතෙසං ඔඝානං පහානාය. අලඤ්‌ච පනාවුසො සාරිපුත්‌ත, අප්‌පමාදායා’’ති. එකාදසමං.
324. ‘‘‘Ogho, ogho’ti, āvuso sāriputta, vuccati. Katamo nu kho, āvuso, ogho’’ti? ‘‘Cattārome, āvuso, oghā. Kāmogho, bhavogho, diṭṭhogho, avijjogho – ime kho, āvuso, cattāro oghā’’ti. ‘‘Atthi panāvuso, maggo atthi paṭipadā, etesaṃ oghānaṃ pahānāyā’’ti? ‘‘Atthi kho, āvuso, maggo atthi paṭipadā, etesaṃ oghānaṃ pahānāyā’’ti. ‘‘Katamo panāvuso, maggo katamā paṭipadā, etesaṃ oghānaṃ pahānāyā’’ti? ‘‘Ayameva kho, āvuso, ariyo aṭṭhaṅgiko maggo, etesaṃ oghānaṃ pahānāya, seyyathidaṃ – sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi . Ayaṃ kho, āvuso, maggo ayaṃ paṭipadā, etesaṃ oghānaṃ pahānāyā’’ti. ‘‘Bhaddako , āvuso, maggo bhaddikā paṭipadā, etesaṃ oghānaṃ pahānāya. Alañca panāvuso sāriputta, appamādāyā’’ti. Ekādasamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3-15. ධම්‌මවාදීපඤ්‌හාසුත්‌තාදිවණ්‌ණනා • 3-15. Dhammavādīpañhāsuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3-15. ධම්‌මවාදීපඤ්‌හසුත්‌තාදිවණ්‌ණනා • 3-15. Dhammavādīpañhasuttādivaṇṇanā
