| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༥. ཨོཀིལིནཱིསུཏྟཝཎྞནཱ
5. Okilinīsuttavaṇṇanā
༢༡༦. ཨོཀིལིནཱིཝཏྠུསྨིཾ ཨུཔྤཀྐཾ ཨོཀིལིནིཾ ཨོཀིརིནིནྟི སཱ ཀིར ཨངྒཱརཙིཏཀེ ནིཔནྣཱ ཝིཔྥནྡམཱནཱ ཝིཔརིཝཏྟམཱནཱ པཙྩཏི, ཏསྨཱ ཨུཔྤཀྐཱ ཙེཝ ཧོཏི ཨུཎྷེན ཨགྒིནཱ པཀྐསརཱིརཱ, ཨོཀིལིནཱི ཙ ཀིལིནྣསརཱིརཱ, བིནྡཱུནིསྶཱ སརཱིརཏོ པགྒྷརནྟི, ཨོཀིརིནཱི ཙ ཨངྒཱརསམྤརིཀིཎྞཱ། ཏསྶཱ ཧི ཧེཊྛཏོཔི ཀིཾསུཀཔུཔྥཝཎྞཱ ཨངྒཱརཱ, ཨུབྷཡཔསྶེསུཔི, ཨཱཀཱསཏོཔིསྶཱ ཨུཔརི པཏནྟི། ཏེན ཝུཏྟཾ – ‘‘ཨུཔྤཀྐཾ ཨོཀིལིནིཾ ཨོཀིརིནི’’ནྟི། སཱ ཨིསྶཱཔཀཏཱ སཔཏྟིཾ ཨངྒཱརཀཊཱཧེན ཨོཀིརཱིཏི ཏསྶ ཀིར རཉྙོ ཨེཀཱ ནཱཊཀིནཱི ཨངྒཱརཀཊཱཧཾ སམཱིཔེ ཋཔེཏྭཱ གཏྟཏོ ཨུདཀཾ པུཉྪཏི, པཱཎིནཱ ཙ སེདཾ ཀརོཏི། རཱཛཱཔི ཏཱཡ སདྡྷིཾ ཀཐཉྩ ཀརོཏི, པརིཏུཊྛཱཀཱརཉྩ དསྶེཏི། ཨགྒམཧེསཱི ཏཾ ཨསཧམཱནཱ ཨིསྶཱཔཀཏཱ ཧུཏྭཱ ཨཙིརཔཀྐནྟསྶ རཉྙོ ཏཾ ཨངྒཱརཀཊཱཧཾ གཧེཏྭཱ ཏསྶཱ ཨུཔརི ཨངྒཱརེ ཨོཀིརི། སཱ ཏཾ ཀམྨཾ ཀཏྭཱ ཏཱདིསཾཡེཝ ཝིཔཱཀཾ པཙྩནུབྷཝིཏུཾ པེཏལོཀེ ནིབྦཏྟཱ། པཉྩམཾ།
216. Okilinīvatthusmiṃ uppakkaṃ okiliniṃ okirininti sā kira aṅgāracitake nipannā vipphandamānā viparivattamānā paccati, tasmā uppakkā ceva hoti uṇhena agginā pakkasarīrā, okilinī ca kilinnasarīrā, bindūnissā sarīrato paggharanti, okirinī ca aṅgārasamparikiṇṇā. Tassā hi heṭṭhatopi kiṃsukapupphavaṇṇā aṅgārā, ubhayapassesupi, ākāsatopissā upari patanti. Tena vuttaṃ – ‘‘uppakkaṃ okiliniṃ okirini’’nti. Sā issāpakatā sapattiṃ aṅgārakaṭāhena okirīti tassa kira rañño ekā nāṭakinī aṅgārakaṭāhaṃ samīpe ṭhapetvā gattato udakaṃ puñchati, pāṇinā ca sedaṃ karoti. Rājāpi tāya saddhiṃ kathañca karoti, parituṭṭhākārañca dasseti. Aggamahesī taṃ asahamānā issāpakatā hutvā acirapakkantassa rañño taṃ aṅgārakaṭāhaṃ gahetvā tassā upari aṅgāre okiri. Sā taṃ kammaṃ katvā tādisaṃyeva vipākaṃ paccanubhavituṃ petaloke nibbattā. Pañcamaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༥. ཨོཀིལིནཱིསུཏྟཾ • 5. Okilinīsuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༥. ཨོཀིལིནཱིསུཏྟཝཎྞནཱ • 5. Okilinīsuttavaṇṇanā
