| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. ওক্খাসুত্তং
4. Okkhāsuttaṃ
২২৬. সাৰত্থিযং ৰিহরতি…পে॰… ‘‘যো, ভিক্খৰে, পুব্বণ্হসমযং ওক্খাসতং দানং দদেয্য, যো মজ্ঝন্হিকসমযং ওক্খাসতং দানং দদেয্য, যো সাযন্হসমযং ওক্খাসতং দানং দদেয্য, যো ৰা পুব্বণ্হসমযং অন্তমসো গদ্দুহনমত্তম্পি মেত্তচিত্তং ভাৰেয্য, যো ৰা মজ্ঝন্হিকসমযং অন্তমসো গদ্দুহনমত্তম্পি মেত্তচিত্তং ভাৰেয্য, যো ৰা সাযন্হসমযং অন্তমসো গদ্দুহনমত্তম্পি মেত্তচিত্তং ভাৰেয্য, ইদং ততো মহপ্ফলতরং। তস্মাতিহ, ভিক্খৰে, এৰং সিক্খিতব্বং – ‘মেত্তা নো চেতোৰিমুত্তি ভাৰিতা ভৰিস্সতি বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা’তি। এৰঞ্হি ৰো, ভিক্খৰে, সিক্খিতব্ব’’ন্তি। চতুত্থং।
226. Sāvatthiyaṃ viharati…pe… ‘‘yo, bhikkhave, pubbaṇhasamayaṃ okkhāsataṃ dānaṃ dadeyya, yo majjhanhikasamayaṃ okkhāsataṃ dānaṃ dadeyya, yo sāyanhasamayaṃ okkhāsataṃ dānaṃ dadeyya, yo vā pubbaṇhasamayaṃ antamaso gadduhanamattampi mettacittaṃ bhāveyya, yo vā majjhanhikasamayaṃ antamaso gadduhanamattampi mettacittaṃ bhāveyya, yo vā sāyanhasamayaṃ antamaso gadduhanamattampi mettacittaṃ bhāveyya, idaṃ tato mahapphalataraṃ. Tasmātiha, bhikkhave, evaṃ sikkhitabbaṃ – ‘mettā no cetovimutti bhāvitā bhavissati bahulīkatā yānīkatā vatthukatā anuṭṭhitā paricitā susamāraddhā’ti. Evañhi vo, bhikkhave, sikkhitabba’’nti. Catutthaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. ওক্খাসুত্তৰণ্ণনা • 4. Okkhāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৪. ওক্খাসুত্তৰণ্ণনা • 4. Okkhāsuttavaṇṇanā
