| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৭-৮. ওক্খিত্তচক্খুসিক্খাপদৰণ্ণনা
7-8. Okkhittacakkhusikkhāpadavaṇṇanā
কিত্তকেন পন ওক্খিত্তচক্খু হোতীতি আহ ‘‘যুগমত্তং ভূমিভাগং পেক্খমানো’’তি। যুগযুত্তকো হি দন্তো আজানেয্যো যুগমত্তং পেক্খতি, পুরতো চতুহত্থপ্পমাণং ভূমিভাগং, ইমিনাপি এত্তকং পেক্খন্তেন গন্তব্বং। যো অনাদরিযং পটিচ্চ তং তং দিসাভাগং পাসাদং কূটাগারং ৰীথিং ওলোকেন্তো গচ্ছতি, আপত্তি দুক্কটস্স। হত্থিঅস্সাদিপরিস্সযাভাৰন্তি পরিস্সযনট্ঠেন, অভিভৰনট্ঠেন, ৰিহেঠনট্ঠেন ৰা পরিস্সযো, হত্থিঅস্সাদিযেৰ পরিস্সযো হত্থিঅস্সাদিপরিস্সযো, তস্সাভাৰং, হত্থিঅস্সাদি উপদ্দৰাভাৰন্তি অত্থো। ‘‘যথা চ একস্মিং ঠানে ঠত্ৰা, এৰং গচ্ছন্তোপি পরিস্সযাভাৰং ওলোকেতুং লভতিযেৰ, তথা গামে পূজ’’ন্তি (সারত্থ॰ টী॰ পাচিত্তিয ৩.৫৮২) ৰদন্তি।
Kittakena pana okkhittacakkhu hotīti āha ‘‘yugamattaṃ bhūmibhāgaṃ pekkhamāno’’ti. Yugayuttako hi danto ājāneyyo yugamattaṃ pekkhati, purato catuhatthappamāṇaṃ bhūmibhāgaṃ, imināpi ettakaṃ pekkhantena gantabbaṃ. Yo anādariyaṃ paṭicca taṃ taṃ disābhāgaṃ pāsādaṃ kūṭāgāraṃ vīthiṃ olokento gacchati, āpatti dukkaṭassa. Hatthiassādiparissayābhāvanti parissayanaṭṭhena, abhibhavanaṭṭhena, viheṭhanaṭṭhena vā parissayo, hatthiassādiyeva parissayo hatthiassādiparissayo, tassābhāvaṃ, hatthiassādi upaddavābhāvanti attho. ‘‘Yathā ca ekasmiṃ ṭhāne ṭhatvā, evaṃ gacchantopi parissayābhāvaṃ oloketuṃ labhatiyeva, tathā gāme pūja’’nti (sārattha. ṭī. pācittiya 3.582) vadanti.
ওক্খিত্তচক্খুসিক্খাপদৰণ্ণনা নিট্ঠিতা।
Okkhittacakkhusikkhāpadavaṇṇanā niṭṭhitā.
