| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
2. ஓமஸவாத³ ஸிக்கா²பத³ங்
2. Omasavāda sikkhāpadaṃ
12. து³தியே மஸதா⁴து விஜ்ஜ²னத்தே² பவத்ததி ‘‘ஓமட்ட²ங் உம்மட்ட²’’ந்திஆதீ³ஸு (ஸங்॰ நி॰ அட்ட²॰ 1.1.21) வியாதி த³ஸ்ஸெந்தோ ஆஹ ‘‘ஓமஸந்தீதி ஓவிஜ்ஜ²ந்தீ’’தி.
12. Dutiye masadhātu vijjhanatthe pavattati ‘‘omaṭṭhaṃ ummaṭṭha’’ntiādīsu (saṃ. ni. aṭṭha. 1.1.21) viyāti dassento āha ‘‘omasantīti ovijjhantī’’ti.
13. ‘‘இத³ங் வத்து²’’ந்தி பத³ங் ‘‘ஆஹரீ’’தி பதே³ கம்மங். நந்தி³தப்³போ³தி நந்தோ³ வண்ணப³லாதி³, ஸோ ஏதஸ்ஸத்தீ²தி நந்தீ³. விஸாலானி மஹந்தானி விஸாணானி ஏதஸ்ஸத்தீ²தி விஸாலோ, நந்தீ³ ச ஸோ விஸாலோ சேதி நந்தி³விஸாலோதி வசனத்த²ங் த³ஸ்ஸேதி ‘‘நந்தி³விஸாலோ நாமா’’திஆதி³னா. ஸோதி நந்தி³விஸாலோ, ‘‘ஆஹா’’தி பதே³ கத்தா. தத்தே²வாதி யுஞ்ஜிதட்டா²னேயேவ. அஹேதுகபடிஸந்தி⁴காலேபீதி பி-ஸத்³தோ³ அனுக்³க³ஹத்த²வாசகோ, பகே³வ த்³விஹேதுக திஹேதுக படிஸந்தி⁴காலேதி அத்தோ². ‘‘தேன சா’’தி சகாரஸ்ஸ அவுத்தஸம்பிண்ட³னத்த²த்தா ‘‘அத்தனோ கம்மேன சா’’தி அத்த²ங் ஸம்பிண்டே³தீதி ஆஹ ‘‘அத்தனோ கம்மேன சா’’தி. அத்தனோதி நந்தி³விஸாலஸ்ஸ.
13. ‘‘Idaṃ vatthu’’nti padaṃ ‘‘āharī’’ti pade kammaṃ. Nanditabboti nando vaṇṇabalādi, so etassatthīti nandī. Visālāni mahantāni visāṇāni etassatthīti visālo, nandī ca so visālo ceti nandivisāloti vacanatthaṃ dasseti ‘‘nandivisālo nāmā’’tiādinā. Soti nandivisālo, ‘‘āhā’’ti pade kattā. Tatthevāti yuñjitaṭṭhāneyeva. Ahetukapaṭisandhikālepīti pi-saddo anuggahatthavācako, pageva dvihetuka tihetuka paṭisandhikāleti attho. ‘‘Tena cā’’ti cakārassa avuttasampiṇḍanatthattā ‘‘attano kammena cā’’ti atthaṃ sampiṇḍetīti āha ‘‘attano kammena cā’’ti. Attanoti nandivisālassa.
15. எத்தா²தி ஏதிஸ்ஸங் பத³பா⁴ஜனியங், ‘‘ஆஹா’’தி பதே³ ஆதா⁴ரோ. ‘‘யஸ்மா’’தி பத³ங் விப⁴ஜிதுகாமோ’’தி பதே³ ஹேது. அட்டு²ப்பத்தியங்யேவ ‘‘ஹீனேனாபீ’’தி வத்வா பத³பா⁴ஜனியங் அவுத்தத்தா இத³ங் வுத்தந்தி த³ட்ட²ப்³ப³ங். வேணுகாரஜாதீதி விலீவகாரஜாதி. நேஸாத³ஜாதீதி எத்த² கேவட்டஜாதிபி ஸங்க³ஹிதா.
15.Etthāti etissaṃ padabhājaniyaṃ, ‘‘āhā’’ti pade ādhāro. ‘‘Yasmā’’ti padaṃ vibhajitukāmo’’ti pade hetu. Aṭṭhuppattiyaṃyeva ‘‘hīnenāpī’’ti vatvā padabhājaniyaṃ avuttattā idaṃ vuttanti daṭṭhabbaṃ. Veṇukārajātīti vilīvakārajāti. Nesādajātīti ettha kevaṭṭajātipi saṅgahitā.
பு வுச்சதி கரீஸங், தங் குஸதி அபனேதீதி புக்குஸோ. புப்ப²ங் வுச்சதி கரீஸங், குஸுமங் வா, தங் ச²ட்³டே³தீதி புப்ப²ச²ட்³ட³கோ.
Pu vuccati karīsaṃ, taṃ kusati apanetīti pukkuso. Pupphaṃ vuccati karīsaṃ, kusumaṃ vā, taṃ chaḍḍetīti pupphachaḍḍako.
குடதி சி²ந்த³தீதி கொட்டோ², ஸோயேவ கொட்ட²கோ. யகாரப⁴காரே ஏகதோ யோஜெத்வா ‘‘யபா⁴’’தி யோ அக்கோஸோ அத்தி², ஏஸோ ஹீனோ நாம அக்கோஸோதி யோஜனா.
Kuṭati chindatīti koṭṭho, soyeva koṭṭhako. Yakārabhakāre ekato yojetvā ‘‘yabhā’’ti yo akkoso atthi, eso hīno nāma akkosoti yojanā.
16. ஸப்³ப³பதே³ஸூதி நாமாதீ³ஸு ஸப்³ப³பதே³ஸு. எத்தா²தி இமஸ்மிங் ஸிக்கா²பதே³. அலிகந்தி அஸச்சங், மிச்சா²வாசந்தி ஸம்ப³ந்தோ⁴. யோபி வத³தீதி யோஜனா.
16.Sabbapadesūti nāmādīsu sabbapadesu. Etthāti imasmiṃ sikkhāpade. Alikanti asaccaṃ, micchāvācanti sambandho. Yopi vadatīti yojanā.
26. பரிஹரித்வாதி பரிமுக²ங் கத²னங் அபனெத்வா. த³வங் பரிஹாஸங் காமேதீதி த³வகாமோ, தஸ்ஸ பா⁴வோ த³வகம்யங், தங்யேவ த³வகம்யதா. அனுபஸம்பன்னந்தி எத்த² அகாரஸ்ஸ ஸதி³ஸத்த²மக்³க³ஹெத்வா அஞ்ஞத்தோ²வ க³ஹேதப்³போ³தி ஆஹ ‘‘ட²பெத்வா பி⁴க்கு²’’ந்திஆதி³. யதி³ ஹி ஸதி³ஸத்தோ² ப⁴வெய்ய, ஸாமணேரோவ அனுபஸம்பன்னோ நாம ஸியா ஸண்டா²னேன ச புரிஸபா⁴வேன ச ஸதி³ஸத்தா, தஸ்மா அஞ்ஞத்தோ²வ க³ஹேதப்³போ³தி த³ட்ட²ப்³ப³ங். ஸப்³ப³ஸத்தாதி எத்த² ஸப்³ப³ஸத்³தோ³ அனவஸேஸத்தோ² மனுஸ்ஸே உபாதா³ய வசனத்த²ஜானநாஜானநபகதிகானங் ஸப்³ப³ஸத்தானம்பி க³ஹிதத்தா.
26.Pariharitvāti parimukhaṃ kathanaṃ apanetvā. Davaṃ parihāsaṃ kāmetīti davakāmo, tassa bhāvo davakamyaṃ, taṃyeva davakamyatā. Anupasampannanti ettha akārassa sadisatthamaggahetvā aññatthova gahetabboti āha ‘‘ṭhapetvā bhikkhu’’ntiādi. Yadi hi sadisattho bhaveyya, sāmaṇerova anupasampanno nāma siyā saṇṭhānena ca purisabhāvena ca sadisattā, tasmā aññatthova gahetabboti daṭṭhabbaṃ. Sabbasattāti ettha sabbasaddo anavasesattho manusse upādāya vacanatthajānanājānanapakatikānaṃ sabbasattānampi gahitattā.
35. அத்த²புரெக்கா²ரோ நாமாதி வேதி³தப்³போ³தி ஸம்ப³ந்தோ⁴. ஸிக்கா²பத³மபெக்கி²ய நபுங்ஸகலிங்க³வஸேன ‘‘கிரிய’’ந்திஆதி³ வுத்தங். ஆபத்திமபெக்கி²ய இத்தி²லிங்க³வஸேன ‘‘கிரியா’’திஆதி³ வுத்தங். வஜ்ஜகம்மஸத்³தா³ ஸிக்கா²பத³மபெக்க²ந்தாபி ஆபத்தி, மபெக்க²ந்தாபி நியதனபுங்ஸகலிங்க³த்தா நபுங்ஸகாயேவ, தஸ்மா தே த்³வே ஆபத்திட்டா²னே ந வுத்தாதி த³ட்ட²ப்³ப³ந்தி. து³தியங்.
35. Atthapurekkhāro nāmāti veditabboti sambandho. Sikkhāpadamapekkhiya napuṃsakaliṅgavasena ‘‘kiriya’’ntiādi vuttaṃ. Āpattimapekkhiya itthiliṅgavasena ‘‘kiriyā’’tiādi vuttaṃ. Vajjakammasaddā sikkhāpadamapekkhantāpi āpatti, mapekkhantāpi niyatanapuṃsakaliṅgattā napuṃsakāyeva, tasmā te dve āpattiṭṭhāne na vuttāti daṭṭhabbanti. Dutiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
