| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২. ওমসৰাদ সিক্খাপদং
2. Omasavāda sikkhāpadaṃ
১২. দুতিযে মসধাতু ৰিজ্ঝনত্থে পৰত্ততি ‘‘ওমট্ঠং উম্মট্ঠ’’ন্তিআদীসু (সং॰ নি॰ অট্ঠ॰ ১.১.২১) ৰিযাতি দস্সেন্তো আহ ‘‘ওমসন্তীতি ওৰিজ্ঝন্তী’’তি।
12. Dutiye masadhātu vijjhanatthe pavattati ‘‘omaṭṭhaṃ ummaṭṭha’’ntiādīsu (saṃ. ni. aṭṭha. 1.1.21) viyāti dassento āha ‘‘omasantīti ovijjhantī’’ti.
১৩. ‘‘ইদং ৰত্থু’’ন্তি পদং ‘‘আহরী’’তি পদে কম্মং। নন্দিতব্বোতি নন্দো ৰণ্ণবলাদি, সো এতস্সত্থীতি নন্দী। ৰিসালানি মহন্তানি ৰিসাণানি এতস্সত্থীতি ৰিসালো, নন্দী চ সো ৰিসালো চেতি নন্দিৰিসালোতি ৰচনত্থং দস্সেতি ‘‘নন্দিৰিসালো নামা’’তিআদিনা। সোতি নন্দিৰিসালো, ‘‘আহা’’তি পদে কত্তা। তত্থেৰাতি যুঞ্জিতট্ঠানেযেৰ। অহেতুকপটিসন্ধিকালেপীতি পি-সদ্দো অনুগ্গহত্থৰাচকো, পগেৰ দ্ৰিহেতুক তিহেতুক পটিসন্ধিকালেতি অত্থো। ‘‘তেন চা’’তি চকারস্স অৰুত্তসম্পিণ্ডনত্থত্তা ‘‘অত্তনো কম্মেন চা’’তি অত্থং সম্পিণ্ডেতীতি আহ ‘‘অত্তনো কম্মেন চা’’তি। অত্তনোতি নন্দিৰিসালস্স।
13. ‘‘Idaṃ vatthu’’nti padaṃ ‘‘āharī’’ti pade kammaṃ. Nanditabboti nando vaṇṇabalādi, so etassatthīti nandī. Visālāni mahantāni visāṇāni etassatthīti visālo, nandī ca so visālo ceti nandivisāloti vacanatthaṃ dasseti ‘‘nandivisālo nāmā’’tiādinā. Soti nandivisālo, ‘‘āhā’’ti pade kattā. Tatthevāti yuñjitaṭṭhāneyeva. Ahetukapaṭisandhikālepīti pi-saddo anuggahatthavācako, pageva dvihetuka tihetuka paṭisandhikāleti attho. ‘‘Tena cā’’ti cakārassa avuttasampiṇḍanatthattā ‘‘attano kammena cā’’ti atthaṃ sampiṇḍetīti āha ‘‘attano kammena cā’’ti. Attanoti nandivisālassa.
১৫. এত্থাতি এতিস্সং পদভাজনিযং, ‘‘আহা’’তি পদে আধারো। ‘‘যস্মা’’তি পদং ৰিভজিতুকামো’’তি পদে হেতু। অট্ঠুপ্পত্তিযংযেৰ ‘‘হীনেনাপী’’তি ৰত্ৰা পদভাজনিযং অৰুত্তত্তা ইদং ৰুত্তন্তি দট্ঠব্বং। ৰেণুকারজাতীতি ৰিলীৰকারজাতি। নেসাদজাতীতি এত্থ কেৰট্টজাতিপি সঙ্গহিতা।
15.Etthāti etissaṃ padabhājaniyaṃ, ‘‘āhā’’ti pade ādhāro. ‘‘Yasmā’’ti padaṃ vibhajitukāmo’’ti pade hetu. Aṭṭhuppattiyaṃyeva ‘‘hīnenāpī’’ti vatvā padabhājaniyaṃ avuttattā idaṃ vuttanti daṭṭhabbaṃ. Veṇukārajātīti vilīvakārajāti. Nesādajātīti ettha kevaṭṭajātipi saṅgahitā.
পু ৰুচ্চতি করীসং, তং কুসতি অপনেতীতি পুক্কুসো। পুপ্ফং ৰুচ্চতি করীসং, কুসুমং ৰা, তং ছড্ডেতীতি পুপ্ফছড্ডকো।
Pu vuccati karīsaṃ, taṃ kusati apanetīti pukkuso. Pupphaṃ vuccati karīsaṃ, kusumaṃ vā, taṃ chaḍḍetīti pupphachaḍḍako.
কুটতি ছিন্দতীতি কোট্ঠো, সোযেৰ কোট্ঠকো। যকারভকারে একতো যোজেত্ৰা ‘‘যভা’’তি যো অক্কোসো অত্থি, এসো হীনো নাম অক্কোসোতি যোজনা।
Kuṭati chindatīti koṭṭho, soyeva koṭṭhako. Yakārabhakāre ekato yojetvā ‘‘yabhā’’ti yo akkoso atthi, eso hīno nāma akkosoti yojanā.
১৬. সব্বপদেসূতি নামাদীসু সব্বপদেসু। এত্থাতি ইমস্মিং সিক্খাপদে। অলিকন্তি অসচ্চং, মিচ্ছাৰাচন্তি সম্বন্ধো। যোপি ৰদতীতি যোজনা।
16.Sabbapadesūti nāmādīsu sabbapadesu. Etthāti imasmiṃ sikkhāpade. Alikanti asaccaṃ, micchāvācanti sambandho. Yopi vadatīti yojanā.
২৬. পরিহরিত্ৰাতি পরিমুখং কথনং অপনেত্ৰা। দৰং পরিহাসং কামেতীতি দৰকামো, তস্স ভাৰো দৰকম্যং, তংযেৰ দৰকম্যতা। অনুপসম্পন্নন্তি এত্থ অকারস্স সদিসত্থমগ্গহেত্ৰা অঞ্ঞত্থোৰ গহেতব্বোতি আহ ‘‘ঠপেত্ৰা ভিক্খু’’ন্তিআদি। যদি হি সদিসত্থো ভৰেয্য, সামণেরোৰ অনুপসম্পন্নো নাম সিযা সণ্ঠানেন চ পুরিসভাৰেন চ সদিসত্তা, তস্মা অঞ্ঞত্থোৰ গহেতব্বোতি দট্ঠব্বং। সব্বসত্তাতি এত্থ সব্বসদ্দো অনৰসেসত্থো মনুস্সে উপাদায ৰচনত্থজাননাজাননপকতিকানং সব্বসত্তানম্পি গহিতত্তা।
26.Pariharitvāti parimukhaṃ kathanaṃ apanetvā. Davaṃ parihāsaṃ kāmetīti davakāmo, tassa bhāvo davakamyaṃ, taṃyeva davakamyatā. Anupasampannanti ettha akārassa sadisatthamaggahetvā aññatthova gahetabboti āha ‘‘ṭhapetvā bhikkhu’’ntiādi. Yadi hi sadisattho bhaveyya, sāmaṇerova anupasampanno nāma siyā saṇṭhānena ca purisabhāvena ca sadisattā, tasmā aññatthova gahetabboti daṭṭhabbaṃ. Sabbasattāti ettha sabbasaddo anavasesattho manusse upādāya vacanatthajānanājānanapakatikānaṃ sabbasattānampi gahitattā.
৩৫. অত্থপুরেক্খারো নামাতি ৰেদিতব্বোতি সম্বন্ধো। সিক্খাপদমপেক্খিয নপুংসকলিঙ্গৰসেন ‘‘কিরিয’’ন্তিআদি ৰুত্তং। আপত্তিমপেক্খিয ইত্থিলিঙ্গৰসেন ‘‘কিরিযা’’তিআদি ৰুত্তং। ৰজ্জকম্মসদ্দা সিক্খাপদমপেক্খন্তাপি আপত্তি, মপেক্খন্তাপি নিযতনপুংসকলিঙ্গত্তা নপুংসকাযেৰ, তস্মা তে দ্ৰে আপত্তিট্ঠানে ন ৰুত্তাতি দট্ঠব্বন্তি। দুতিযং।
35. Atthapurekkhāro nāmāti veditabboti sambandho. Sikkhāpadamapekkhiya napuṃsakaliṅgavasena ‘‘kiriya’’ntiādi vuttaṃ. Āpattimapekkhiya itthiliṅgavasena ‘‘kiriyā’’tiādi vuttaṃ. Vajjakammasaddā sikkhāpadamapekkhantāpi āpatti, mapekkhantāpi niyatanapuṃsakaliṅgattā napuṃsakāyeva, tasmā te dve āpattiṭṭhāne na vuttāti daṭṭhabbanti. Dutiyaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. মুসাৰাদৰগ্গো • 1. Musāvādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. ওমসৰাদসিক্খাপদৰণ্ণনা • 2. Omasavādasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. ওমসৰাদসিক্খাপদৰণ্ণনা • 2. Omasavādasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. ওমসৰাদসিক্খাপদৰণ্ণনা • 2. Omasavādasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ২. ওমসৰাদসিক্খাপদৰণ্ণনা • 2. Omasavādasikkhāpadavaṇṇanā
