| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
2. ஓமஸவாத³ஸிக்கா²பத³வண்ணனா
2. Omasavādasikkhāpadavaṇṇanā
12. து³தியஸிக்கா²பதே³ ஓமஸந்தீதி ஓவிஜ்ஜ²ந்தி. கு²ங்ஸெந்தீதி அக்கோஸந்தி. வம்பெ⁴ந்தீதி பத⁴ங்ஸெந்தி.
12. Dutiyasikkhāpade omasantīti ovijjhanti. Khuṃsentīti akkosanti. Vambhentīti padhaṃsenti.
13. பூ⁴தபுப்³ப³ந்தி இத³ங் வத்து²ங் ப⁴க³வா ஓமஸவாத³க³ரஹணத்த²ங் ஆஹரி. நந்தி³விஸாலோ நாமாதி நந்தீ³தி தஸ்ஸ ப³லீப³த்³த³ஸ்ஸ நாமங், விஸாணானி பனஸ்ஸ விஸாலானி, தஸ்மா ‘‘நந்தி³விஸாலோ’’தி வுச்சதி. போ³தி⁴ஸத்தோ தேன ஸமயேன நந்தி³விஸாலோ நாம ஹோதி. ப்³ராஹ்மணோ தங் யாகு³ப⁴த்தாதீ³ஹி அதிவிய போஸேஸி. அத² ஸோ ப்³ராஹ்மணங் அனுகம்பமானோ ‘‘க³ச்ச² த்வ’’ந்திஆதி³மாஹ. தத்தே²வ அட்டா²ஸீதி அஹேதுகபடிஸந்தி⁴காலேபி பரகு²ங்ஸனங் அமனாபதோயேவ பச்சேஸி, தஸ்மா ப்³ராஹ்மணஸ்ஸ தோ³ஸங் த³ஸ்ஸேதுகாமோ அட்டா²ஸி. ஸகடஸதங் அதிப³த்³த⁴ங் பவட்டேஸீதி படிபாடியா ட²பெத்வா ஹெட்டா²ருக்கே² த³த்வா ஏகாப³த்³த⁴ங் கத்வா முக்³க³மாஸவாலுகாதீ³ஹி புண்ணங் ஸகடஸதங் பவட்டெந்தோ, கிஞ்சாபி புப்³பே³ பதிட்டி²தாரப்பதே³ஸங் புன அரே பத்தே பவட்டிதங் ஹோதி, போ³தி⁴ஸத்தோ பன புரிமஸகடேன பதிட்டி²தட்டா²னே பச்சி²மஸகடங் பதிட்டா²பேதுங் ஸகடஸதப்பமாணங் பதே³ஸங் பவட்டேஸி. போ³தி⁴ஸத்தானஞ்ஹி ஸிதி²லகரணங் நாம நத்தி². தேன சத்தமனோ அஹூதி தேன ப்³ராஹ்மணஸ்ஸ த⁴னலாபே⁴ன அத்தனோ கம்மேன ச ஸோ நந்தி³விஸாலோ அத்தமனோ அஹோஸி.
13.Bhūtapubbanti idaṃ vatthuṃ bhagavā omasavādagarahaṇatthaṃ āhari. Nandivisālo nāmāti nandīti tassa balībaddassa nāmaṃ, visāṇāni panassa visālāni, tasmā ‘‘nandivisālo’’ti vuccati. Bodhisatto tena samayena nandivisālo nāma hoti. Brāhmaṇo taṃ yāgubhattādīhi ativiya posesi. Atha so brāhmaṇaṃ anukampamāno ‘‘gaccha tva’’ntiādimāha. Tattheva aṭṭhāsīti ahetukapaṭisandhikālepi parakhuṃsanaṃ amanāpatoyeva paccesi, tasmā brāhmaṇassa dosaṃ dassetukāmo aṭṭhāsi. Sakaṭasataṃ atibaddhaṃ pavaṭṭesīti paṭipāṭiyā ṭhapetvā heṭṭhārukkhe datvā ekābaddhaṃ katvā muggamāsavālukādīhi puṇṇaṃ sakaṭasataṃ pavaṭṭento, kiñcāpi pubbe patiṭṭhitārappadesaṃ puna are patte pavaṭṭitaṃ hoti, bodhisatto pana purimasakaṭena patiṭṭhitaṭṭhāne pacchimasakaṭaṃ patiṭṭhāpetuṃ sakaṭasatappamāṇaṃ padesaṃ pavaṭṭesi. Bodhisattānañhi sithilakaraṇaṃ nāma natthi. Tena cattamano ahūti tena brāhmaṇassa dhanalābhena attano kammena ca so nandivisālo attamano ahosi.
15. அக்கோஸேனபீதி எத்த² பன யஸ்மா பரதோ ‘‘த்³வே அக்கோஸா – ஹீனோ ச அக்கோஸோ உக்கட்டோ² ச அக்கோஸோ’’தி விப⁴ஜிதுகாமோ, தஸ்மா யதா² புப்³பே³ ‘‘ஹீனேனபி அக்கோஸேன கு²ங்ஸெந்தீ’’தி வுத்தங்; ஏவங் அவத்வா ‘‘அக்கோஸேன’’ இச்சேவமாஹ. வேனஜாதீதி தச்ச²கஜாதி; வேணுகாரஜாதீதிபி வத³ந்தி. நேஸாத³ஜாதீதி மிக³லுத்³த³காதி³ஜாதி.
15.Akkosenapīti ettha pana yasmā parato ‘‘dve akkosā – hīno ca akkoso ukkaṭṭho ca akkoso’’ti vibhajitukāmo, tasmā yathā pubbe ‘‘hīnenapi akkosena khuṃsentī’’ti vuttaṃ; evaṃ avatvā ‘‘akkosena’’ iccevamāha. Venajātīti tacchakajāti; veṇukārajātītipi vadanti. Nesādajātīti migaluddakādijāti.
ரத²காரஜாதீதி சம்மகாரஜாதி. புக்குஸஜாதீதி புப்ப²ச²ட்³ட³கஜாதி. அவகண்ணகாதி³ தா³ஸானங் நாமங் ஹோதி; தஸ்மா ஹீனங். ஓஞ்ஞாதந்தி அவஞ்ஞாதங்; ‘‘உஞ்ஞாத’’ந்திபி பட²ந்தி. அவஞ்ஞாதந்தி வம்பெ⁴த்வா ஞாதங். ஹீளிதந்தி ஜிகு³ச்சி²தங் . பரிபூ⁴தந்தி கிமேதேனாதிதி பரிப⁴வகதங். அசித்தீகதந்தி ந க³ருகதங்.
Rathakārajātīti cammakārajāti. Pukkusajātīti pupphachaḍḍakajāti. Avakaṇṇakādi dāsānaṃ nāmaṃ hoti; tasmā hīnaṃ. Oññātanti avaññātaṃ; ‘‘uññāta’’ntipi paṭhanti. Avaññātanti vambhetvā ñātaṃ. Hīḷitanti jigucchitaṃ . Paribhūtanti kimetenātiti paribhavakataṃ. Acittīkatanti na garukataṃ.
கொட்ட²ககம்மந்தி தச்ச²ககம்மங். முத்³தா³தி ஹத்த²முத்³தா³க³ணனா. க³ணனாதி அச்சி²த்³த³காதி³அவஸேஸக³ணனா. லேகா²தி அக்க²ரலேகா². மது⁴மேஹாபா³தோ⁴ வேத³னாய அபா⁴வதோ ‘‘உக்கட்டோ²’’தி வுத்தோ. பாடிகங்கா²தி இச்சி²தப்³பா³. யகாரேன வா ப⁴காரேன வாதி யகாரப⁴காரே யோஜெத்வா யோ அக்கோஸோ. காடகோடசிகாய வாதி ‘‘காட’’ந்தி புரிஸனிமித்தங், ‘‘கோடசிகா’’தி இத்தி²னிமித்தங்; ஏதேஹி வா யோ அக்கோஸோ, ஏஸோ ஹீனோ நாம அக்கோஸோதி.
Koṭṭhakakammanti tacchakakammaṃ. Muddāti hatthamuddāgaṇanā. Gaṇanāti acchiddakādiavasesagaṇanā. Lekhāti akkharalekhā. Madhumehābādho vedanāya abhāvato ‘‘ukkaṭṭho’’ti vutto. Pāṭikaṅkhāti icchitabbā. Yakārena vā bhakārena vāti yakārabhakāre yojetvā yo akkoso. Kāṭakoṭacikāya vāti ‘‘kāṭa’’nti purisanimittaṃ, ‘‘koṭacikā’’ti itthinimittaṃ; etehi vā yo akkoso, eso hīno nāma akkosoti.
16. இதா³னி தேஸங் ஜாதிஆதீ³னங் பபே⁴த³வஸேன ஆபத்திங் ஆரோபெத்வா த³ஸ்ஸெந்தோ ‘‘உபஸம்பன்னோ உபஸம்பன்ன’’ந்திஆதி³மாஹ. தத்த² கு²ங்ஸேதுகாமோ வம்பே⁴துகாமோ மங்குகத்துகாமோதி அக்கோஸிதுகாமோ பத⁴ங்ஸிதுகாமோ க³ரஹிதுகாமோ நித்தேஜங் கத்துகாமோதி அத்தோ². ஹீனேன ஹீனந்தி ஹீனேன ஜாதிவசனேன ஹீனஜாதிகங். ஏதேன உபாயேன ஸப்³ப³பதே³ஸு அத்தோ² வேதி³தப்³போ³.
16. Idāni tesaṃ jātiādīnaṃ pabhedavasena āpattiṃ āropetvā dassento ‘‘upasampanno upasampanna’’ntiādimāha. Tattha khuṃsetukāmo vambhetukāmo maṅkukattukāmoti akkositukāmo padhaṃsitukāmo garahitukāmo nittejaṃ kattukāmoti attho. Hīnena hīnanti hīnena jātivacanena hīnajātikaṃ. Etena upāyena sabbapadesu attho veditabbo.
எத்த² ச ஹீனேன ஹீனங் வத³ந்தோ கிஞ்சாபி ஸச்சங் வத³தி, ஓமஸிதுகாமதாய பனஸ்ஸ வாசாய வாசாய பாசித்தியங். உக்கட்டே²ன ஹீனங் வத³ந்தோ ச கிஞ்சாபி அலிகங் ப⁴ணதி, ஓமஸிதுகாமதாய பன இமினாவ ஸிக்கா²பதே³ன பாசித்தியங் ஆபஜ்ஜதி, ந புரிமேன. யோபி ‘‘அதிசண்டா³லோஸி, அதிப்³ராஹ்மணோஸி, து³ட்ட²சண்டா³லோஸி, து³ட்ட²ப்³ராஹ்மணோஸீ’’திஆதீ³னி வத³தி, ஸோபி ஆபத்தியா காரேதப்³போ³.
Ettha ca hīnena hīnaṃ vadanto kiñcāpi saccaṃ vadati, omasitukāmatāya panassa vācāya vācāya pācittiyaṃ. Ukkaṭṭhena hīnaṃ vadanto ca kiñcāpi alikaṃ bhaṇati, omasitukāmatāya pana imināva sikkhāpadena pācittiyaṃ āpajjati, na purimena. Yopi ‘‘aticaṇḍālosi, atibrāhmaṇosi, duṭṭhacaṇḍālosi, duṭṭhabrāhmaṇosī’’tiādīni vadati, sopi āpattiyā kāretabbo.
26. ஸந்தி இதே⁴கச்சேதி வாரே பன பரிஹரித்வா வுத்தபா⁴வேன து³க்கடங். ஏஸேவ நயோ யே நூன…பே॰… ந மயந்தி வாரேஸுபி. அனுபஸம்பன்னே பன சதூஸுபி வாரேஸு து³க்கடமேவ. சோரோஸி க³ண்டி²பே⁴த³கோஸீதிஆதி³வசனேஹி பன உபஸம்பன்னேபி அனுபம்பன்னேபி ஸப்³ப³வாரேஸு து³க்கடமேவ. த³வகம்யதாய பன உபஸம்பன்னேபி அனுபஸம்பன்னேபி ஸப்³ப³வாரேஸு து³ப்³பா⁴ஸிதங். த³வகம்யதா நாம கேளிஹஸாதி⁴ப்பாயதா. இமஸ்மிஞ்ச ஸிக்கா²பதே³ ட²பெத்வா பி⁴க்கு²ங் பி⁴க்கு²னீஆத³யோ ஸப்³ப³ஸத்தா அனுபஸம்பன்னட்டா²னே டி²தாதி வேதி³தப்³பா³.
26.Santiidhekacceti vāre pana pariharitvā vuttabhāvena dukkaṭaṃ. Eseva nayo ye nūna…pe… na mayanti vāresupi. Anupasampanne pana catūsupi vāresu dukkaṭameva. Corosi gaṇṭhibhedakosītiādivacanehi pana upasampannepi anupampannepi sabbavāresu dukkaṭameva. Davakamyatāya pana upasampannepi anupasampannepi sabbavāresu dubbhāsitaṃ. Davakamyatā nāma keḷihasādhippāyatā. Imasmiñca sikkhāpade ṭhapetvā bhikkhuṃ bhikkhunīādayo sabbasattā anupasampannaṭṭhāne ṭhitāti veditabbā.
35. அத்த²புரெக்கா²ரஸ்ஸாதிஆதீ³ஸு பாளியா அத்த²ங் வண்ணயந்தோ அத்த²புரெக்கா²ரோ; பாளிங் வாசெந்தோ த⁴ம்மபுரெக்கா²ரோ; அனுஸிட்டி²யங் ட²த்வா ‘‘இதா³னிபி சண்டா³லோஸி, பாபங் மா அகாஸி, மா தமோ தமபராயணோ அஹோஸீ’’திஆதி³னா நயேன கதெ²ந்தோ அனுஸாஸனீபுரெக்கா²ரோ நாமாதி வேதி³தப்³போ³. ஸேஸங் உத்தானமேவ.
35.Atthapurekkhārassātiādīsu pāḷiyā atthaṃ vaṇṇayanto atthapurekkhāro; pāḷiṃ vācento dhammapurekkhāro; anusiṭṭhiyaṃ ṭhatvā ‘‘idānipi caṇḍālosi, pāpaṃ mā akāsi, mā tamo tamaparāyaṇo ahosī’’tiādinā nayena kathento anusāsanīpurekkhāro nāmāti veditabbo. Sesaṃ uttānameva.
திஸமுட்டா²னங் – காயசித்ததோ வாசாசித்ததோ காயவாசாசித்ததோ ச ஸமுட்டா²தி. கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி. து³ப்³பா⁴ஸிதாபத்தி பனெத்த² வாசாசித்ததோ ஸமுட்டா²தி, கிரியங், ஸஞ்ஞாவிமொக்க²ங், ஸசித்தகங், அகுஸலசித்தங், த்³விவேத³னங் ஸுகா² ச மஜ்ஜ²த்தா சாதி.
Tisamuṭṭhānaṃ – kāyacittato vācācittato kāyavācācittato ca samuṭṭhāti. Kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti. Dubbhāsitāpatti panettha vācācittato samuṭṭhāti, kiriyaṃ, saññāvimokkhaṃ, sacittakaṃ, akusalacittaṃ, dvivedanaṃ sukhā ca majjhattā cāti.
ஓமஸவாத³ஸிக்கா²பத³ங் து³தியங்.
Omasavādasikkhāpadaṃ dutiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. ஓமஸவாத³ ஸிக்கா²பத³ங் • 2. Omasavāda sikkhāpadaṃ
