| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
2. ஓமஸவாத³ஸிக்கா²பத³வண்ணனா
2. Omasavādasikkhāpadavaṇṇanā
ஓமஸவாதே³தி கு²ங்ஸனக³ரஹணவசனே. யஸ்மா பன தங் நேவ கண்ணஸுக²ங், ந ஹத³யஸுக²ங், தஸ்மா தேன கண்ணஞ்சேவ ஹத³யஞ்ச விஜ்ஜ²தீதி ஆஹ ‘‘ஓவிஜ்ஜ²னவசனே’’தி, ஜாதிஆதீ³ஹி க⁴டெத்வா வசனேதி வுத்தங் ஹோதி. தேனாஹ ‘‘ஜாதினாமா’’திஆதி³. தத்த² ஜாதி நாம ப்³ராஹ்மணாதி³ உக்கட்டா² சேவ சண்டா³லாதி³ ஹீனா ச ஜாதி. நாமங் நாம அவகண்ணகாதி³ ஹீனஞ்சேவ பு³த்³த⁴ரக்கி²தாதி³ உக்கட்ட²ஞ்ச நாமங். கொ³த்தங் நாம கோஸியாதி³ ஹீனஞ்சேவ கோ³தமாதி³ உக்கட்ட²ஞ்ச கொ³த்தங். கம்மங் நாம புப்ப²ச²ட்³ட³காதி³ ஹீனஞ்சேவ கஸிவணிஜ்ஜாதி³ உக்கட்ட²ஞ்ச கம்மங். ஸிப்பங் நாம நளகாராதி³ ஹீனஞ்சேவ முத்³தா³க³ணனாதி³ உக்கட்ட²ஞ்ச ஸிப்பங். ஆபா³தோ⁴ நாம ஸப்³போ³பி ரோகோ³ ஹீனோயேவ. அத² வா மது⁴மேஹோ உக்கட்டோ², ஸேஸோ ஹீனோதி வேதி³தப்³போ³. லிங்க³ங் நாம அதிதீ³கா⁴தி³ ஹீனஞ்சேவ நாதிதீ³கா⁴தி³ உக்கட்ட²ஞ்ச லிங்க³ங். கிலேஸோ நாம ராகா³தி³கோ ஸப்³போ³பி கிலேஸோ. ஆபத்தி நாம ஸோதாபத்தாதி³கா உக்கட்டா² சேவ பாராஜிகாதி³ அனுக்கட்டா² ச ஆபத்தி. அக்கோஸோ நாம ‘‘ஒட்டோ²ஸீ’’திஆதி³கோ ஹீனோ சேவ ‘‘பண்டி³தோஸீ’’திஆதி³கோ (பாசி॰ 15) உக்கட்டோ² ச அக்கோஸோ.
Omasavādeti khuṃsanagarahaṇavacane. Yasmā pana taṃ neva kaṇṇasukhaṃ, na hadayasukhaṃ, tasmā tena kaṇṇañceva hadayañca vijjhatīti āha ‘‘ovijjhanavacane’’ti, jātiādīhi ghaṭetvā vacaneti vuttaṃ hoti. Tenāha ‘‘jātināmā’’tiādi. Tattha jāti nāma brāhmaṇādi ukkaṭṭhā ceva caṇḍālādi hīnā ca jāti. Nāmaṃ nāma avakaṇṇakādi hīnañceva buddharakkhitādi ukkaṭṭhañca nāmaṃ. Gottaṃ nāma kosiyādi hīnañceva gotamādi ukkaṭṭhañca gottaṃ. Kammaṃ nāma pupphachaḍḍakādi hīnañceva kasivaṇijjādi ukkaṭṭhañca kammaṃ. Sippaṃ nāma naḷakārādi hīnañceva muddāgaṇanādi ukkaṭṭhañca sippaṃ. Ābādho nāma sabbopi rogo hīnoyeva. Atha vā madhumeho ukkaṭṭho, seso hīnoti veditabbo. Liṅgaṃ nāma atidīghādi hīnañceva nātidīghādi ukkaṭṭhañca liṅgaṃ. Kileso nāma rāgādiko sabbopi kileso. Āpatti nāma sotāpattādikā ukkaṭṭhā ceva pārājikādi anukkaṭṭhā ca āpatti. Akkoso nāma ‘‘oṭṭhosī’’tiādiko hīno ceva ‘‘paṇḍitosī’’tiādiko (pāci. 15) ukkaṭṭho ca akkoso.
யதா² ததா²தி பாளிஆக³தானாக³தபதா³னங் யேன கேனசி ஆகாரேன. இமஸ்மிங் ஸிக்கா²பதே³ ட²பெத்வா பி⁴க்கு²ங் பி⁴க்கு²னிஆத³யோ ஸப்³பே³ ஸத்தா அனுபஸம்பன்னட்டா²னே டி²தாதி ஆஹ ‘‘இத⁴ சா’’திஆதி³. த³வகம்யதா நாம கேளிஹஸாதி⁴ப்பாயதா. ஸப்³ப³த்தா²தி உபஸம்பன்னானுபஸம்பன்னேஸு சேவ பாளிஆக³தானாக³தபதே³ஸு சாதி ஸப்³ப³த்த². அத்த²த⁴ம்மஅனுஸாஸனிபுரெக்கா²ரானந்தி எத்த² ‘‘சண்டா³லோஸீ’’திஆதி³காய பாளியா அத்த²ங் வண்ணெந்தோ அத்த²புரெக்கா²ரோ நாம. பாளிங் வாசெந்தோ த⁴ம்மபுரெக்கா²ரோ நாம. அனுஸிட்டி²யங் ட²த்வா ‘‘இதா³னிபி சண்டா³லோஸி, பாபங் மா அகாஸி. மா தமோதமபராயணோ அஹோஸீ’’திஆதி³னா (பாசி॰ அட்ட²॰ 35) நயேன கதெ²ந்தோ அனுஸாஸனிபுரெக்கா²ரோ நாமாதி வேதி³தப்³போ³.
Yathātathāti pāḷiāgatānāgatapadānaṃ yena kenaci ākārena. Imasmiṃ sikkhāpade ṭhapetvā bhikkhuṃ bhikkhuniādayo sabbe sattā anupasampannaṭṭhāne ṭhitāti āha ‘‘idha cā’’tiādi. Davakamyatā nāma keḷihasādhippāyatā. Sabbatthāti upasampannānupasampannesu ceva pāḷiāgatānāgatapadesu cāti sabbattha. Atthadhammaanusāsanipurekkhārānanti ettha ‘‘caṇḍālosī’’tiādikāya pāḷiyā atthaṃ vaṇṇento atthapurekkhāro nāma. Pāḷiṃ vācento dhammapurekkhāro nāma. Anusiṭṭhiyaṃ ṭhatvā ‘‘idānipi caṇḍālosi, pāpaṃ mā akāsi. Mā tamotamaparāyaṇo ahosī’’tiādinā (pāci. aṭṭha. 35) nayena kathento anusāsanipurekkhāro nāmāti veditabbo.
ஓமஸவாத³ஸிக்கா²பத³வண்ணனா நிட்டி²தா.
Omasavādasikkhāpadavaṇṇanā niṭṭhitā.
