| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
2. ஓமஸவாத³ஸிக்கா²பத³வண்ணனா
2. Omasavādasikkhāpadavaṇṇanā
12. து³தியே கண்ணகடுகதாய அமனாபங் வத³ந்தா கண்ணேஸு விஜ்ஜ²ந்தா விய ஹொந்தீதி ஆஹ ‘‘ஓமஸந்தீதி ஓவிஜ்ஜ²ந்தீ’’தி. பத⁴ங்ஸெந்தீதி அபி⁴ப⁴வந்தி.
12. Dutiye kaṇṇakaṭukatāya amanāpaṃ vadantā kaṇṇesu vijjhantā viya hontīti āha ‘‘omasantīti ovijjhantī’’ti. Padhaṃsentīti abhibhavanti.
13. போ³தி⁴ஸத்தோ தேன ஸமயேன ஹோதீதி தேன ஸமயேன போ³தி⁴ஸத்தோ நந்தி³விஸாலோ நாம அஹோஸீதி அத்தோ². அதீதத்தே² வத்தமானவசனங், கிரியாகாலவசனிச்சா²ய வா வத்தமானப்பயோகோ³ ஸத்³த³ந்தரஸன்னிதா⁴னேன பூ⁴ததாவக³மோ ஸியாதி. பச்சேஸீதி ‘‘அமனாபங் இத³’’ந்தி அஞ்ஞாஸி. ஹெட்டா²ருக்கே² த³த்வாதி உபத்த²ம்ப⁴கே த³த்வா. புப்³பே³ பதிட்டி²தாரப்பதே³ஸங் புன அரே பத்தேதி புப்³பே³ உஜுகங் ஹெட்டா²முக²ங் பதிட்டி²தஅரஸ்ஸ பூ⁴மிப்பதே³ஸங் புன தஸ்மிங்யேவ அரே பரிவத்தெத்வா ஹெட்டா²முக²பா⁴வேன ஸம்பத்தே, பட²மங் பூ⁴மியங் பதிட்டி²தனேமிப்பதே³ஸே பரிவத்தெத்வா புன பூ⁴மியங் பதிட்டி²தேதி வுத்தங் ஹோதி. ஸிதி²லகரணந்தி ஸிதி²லகிரியா.
13.Bodhisatto tena samayena hotīti tena samayena bodhisatto nandivisālo nāma ahosīti attho. Atītatthe vattamānavacanaṃ, kiriyākālavacanicchāya vā vattamānappayogo saddantarasannidhānena bhūtatāvagamo siyāti. Paccesīti ‘‘amanāpaṃ ida’’nti aññāsi. Heṭṭhārukkhe datvāti upatthambhake datvā. Pubbe patiṭṭhitārappadesaṃ puna are patteti pubbe ujukaṃ heṭṭhāmukhaṃ patiṭṭhitaarassa bhūmippadesaṃ puna tasmiṃyeva are parivattetvā heṭṭhāmukhabhāvena sampatte, paṭhamaṃ bhūmiyaṃ patiṭṭhitanemippadese parivattetvā puna bhūmiyaṃ patiṭṭhiteti vuttaṃ hoti. Sithilakaraṇanti sithilakiriyā.
15. புப்³பே³தி அட்டு²ப்பத்தியங். தச்ச²ககம்மந்தி வட்³ட⁴கீகம்மங். கொட்டககம்மந்தி வா பாஸாணகொட்டககம்மங் . ஹத்த²முத்³தா³க³ணனாதி அங்கு³லிஸங்கோசேனேவ க³ணனா. பாத³ஸிகமிலக்க²காத³யோ விய நவந்தவஸேன க³ணனா அச்சி²த்³த³கக³ணனா. ஆதி³-ஸத்³தே³ன ஸங்கலனபடுப்பாத³னவோக்லனபா⁴க³ஹாராதி³வஸேன பவத்தா பிண்ட³க³ணனா க³ஹிதா. யஸ்ஸ ஸா பகு³ணா ஹோதி, ஸோ ருக்க²ம்பி தி³ஸ்வா ‘‘எத்தகானி எத்த² பண்ணானீ’’தி ஜானாதி. யப⁴ மேது²னேதி வசனதோ ய-கார ப⁴-காரே ஏகதோ யோஜிதே அஸத்³த⁴ம்மவசனங் ஹோதி.
15.Pubbeti aṭṭhuppattiyaṃ. Tacchakakammanti vaḍḍhakīkammaṃ. Koṭṭakakammanti vā pāsāṇakoṭṭakakammaṃ . Hatthamuddāgaṇanāti aṅgulisaṅkoceneva gaṇanā. Pādasikamilakkhakādayo viya navantavasena gaṇanā acchiddakagaṇanā. Ādi-saddena saṅkalanapaṭuppādanavoklanabhāgahārādivasena pavattā piṇḍagaṇanā gahitā. Yassa sā paguṇā hoti, so rukkhampi disvā ‘‘ettakāni ettha paṇṇānī’’ti jānāti. Yabha methuneti vacanato ya-kāra bha-kāre ekato yojite asaddhammavacanaṃ hoti.
16-26. ஆபத்தியா காரேதப்³போ³தி பாசித்தியேன காரேதப்³போ³ உபஸக்³கா³தி³மத்தவிஸிட்டா²னங் அதிசண்டா³லாதி³பதா³னங் பாளியங் ஆக³தேஸுயேவ ஸங்க³ஹிதத்தா. சோரோஸீதிஆதீ³னங் பன கேனசி பரியாயேன பாளியங் அனாக³தத்தா து³க்கடங் வுத்தங். ஹஸாதி⁴ப்பாயதாதி புரிமபத³ஸ்ஸ அத்த²விவரணங். பாளியங் அவுத்தேபி ‘‘ஜாதிஆதீ³ஹி அக்கோஸவத்தூ²ஹி பரம்முகா² அக்கோஸந்தஸ்ஸ வத்தூ²னங் அனஞ்ஞபா⁴வதோ யதா² து³க்கடங், ததா² த³வகம்யதாய பரம்முகா² வத³ந்தஸ்ஸபி து³ப்³பா⁴ஸிதமேவா’’தி ஆசரியா வத³ந்தி. ஸப்³ப³ஸத்தாதி எத்த² வசனத்த²விஜானநபகதிகா திரச்சா²னக³தாபி க³ஹேதப்³பா³.
16-26.Āpattiyākāretabboti pācittiyena kāretabbo upasaggādimattavisiṭṭhānaṃ aticaṇḍālādipadānaṃ pāḷiyaṃ āgatesuyeva saṅgahitattā. Corosītiādīnaṃ pana kenaci pariyāyena pāḷiyaṃ anāgatattā dukkaṭaṃ vuttaṃ. Hasādhippāyatāti purimapadassa atthavivaraṇaṃ. Pāḷiyaṃ avuttepi ‘‘jātiādīhi akkosavatthūhi parammukhā akkosantassa vatthūnaṃ anaññabhāvato yathā dukkaṭaṃ, tathā davakamyatāya parammukhā vadantassapi dubbhāsitamevā’’ti ācariyā vadanti. Sabbasattāti ettha vacanatthavijānanapakatikā tiracchānagatāpi gahetabbā.
35. அனுஸாஸனிபுரெக்கா²ரதாய ட²த்வா வத³ந்தஸ்ஸ சித்தஸ்ஸ லஹுபரிவத்திபா⁴வதோ அந்தரா கோபே உப்பன்னேபி அனாபத்தி. யங் அக்கோஸதி, தஸ்ஸ உபஸம்பன்னதா, அனஞ்ஞாபதே³ஸேன ஜாதிஆதீ³ஹி அக்கோஸனங், ‘‘மங் அக்கோஸதீ’’தி ஜானநா, அத்த²புரெக்கா²ரதாதீ³னங் அபா⁴வதாதி இமானெத்த² சத்தாரி அங்கா³னி.
35. Anusāsanipurekkhāratāya ṭhatvā vadantassa cittassa lahuparivattibhāvato antarā kope uppannepi anāpatti. Yaṃ akkosati, tassa upasampannatā, anaññāpadesena jātiādīhi akkosanaṃ, ‘‘maṃ akkosatī’’ti jānanā, atthapurekkhāratādīnaṃ abhāvatāti imānettha cattāri aṅgāni.
ஓமஸவாத³ஸிக்கா²பத³வண்ணனா நிட்டி²தா.
Omasavādasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. ஓமஸவாத³ஸிக்கா²பத³வண்ணனா • 2. Omasavādasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. ஓமஸவாத³ ஸிக்கா²பத³ங் • 2. Omasavāda sikkhāpadaṃ
