| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
২. ওমসৰাদসিক্খাপদৰণ্ণনা
2. Omasavādasikkhāpadavaṇṇanā
১৩. দুতিযে পুব্বে পতিট্ঠিতারপ্পদেসং পুন অরে পত্তেতি পঠমং ভূমিযং পতিট্ঠিতনেমিপ্পদেসে পরিৰত্তেত্ৰা পুন ভূমিযং পতিট্ঠিতেতি অত্থো।
13. Dutiye pubbe patiṭṭhitārappadesaṃ puna are patteti paṭhamaṃ bhūmiyaṃ patiṭṭhitanemippadese parivattetvā puna bhūmiyaṃ patiṭṭhiteti attho.
১৫. পুব্বেতি অট্ঠুপ্পত্তিযং। পুপ্ফছড্ডকা নাম গব্ভমলাদিহারকা। তচ্ছককম্মন্তি পাসাণকোট্টনাদিৰড্ঢকীকম্মং । হত্থমুদ্দাগণনাতি অঙ্গুলিসঙ্কোচনেনেৰ গণনা। অচ্ছিদ্দকগণনা নাম একট্ঠানদসট্ঠানাদীসু সারিযো ঠপেত্ৰা অনুক্কমেন গণনা। আদি-সদ্দেন সঙ্কলনপটউপ্পাদনৰোক্লনভাগহারাদিৰসেন পৰত্তা পিণ্ডগণনা গহিতা। যস্স সা পগুণা, সো রুক্খম্পি দিস্ৰা ‘‘এত্তকানি এত্থ পণ্ণানী’’তি জানাতি। যভ-মেথুনেতি ৰচনতো আহ ‘‘য-কার-ভ-কারে’’তিআদি।
15.Pubbeti aṭṭhuppattiyaṃ. Pupphachaḍḍakā nāma gabbhamalādihārakā. Tacchakakammanti pāsāṇakoṭṭanādivaḍḍhakīkammaṃ . Hatthamuddāgaṇanāti aṅgulisaṅkocaneneva gaṇanā. Acchiddakagaṇanā nāma ekaṭṭhānadasaṭṭhānādīsu sāriyo ṭhapetvā anukkamena gaṇanā. Ādi-saddena saṅkalanapaṭauppādanavoklanabhāgahārādivasena pavattā piṇḍagaṇanā gahitā. Yassa sā paguṇā, so rukkhampi disvā ‘‘ettakāni ettha paṇṇānī’’ti jānāti. Yabha-methuneti vacanato āha ‘‘ya-kāra-bha-kāre’’tiādi.
১৬. ন পুরিমেনাতি মুসাৰাদসিক্খাপদেন। সোপি আপত্তিযাতি উপসগ্গাদিৰিসিট্ঠেহিপি ৰদন্তো পাচিত্তিযাপত্তিযাৰ কারেতব্বো।
16.Na purimenāti musāvādasikkhāpadena. Sopi āpattiyāti upasaggādivisiṭṭhehipi vadanto pācittiyāpattiyāva kāretabbo.
২৬. দুব্ভাসিতন্তি সামঞ্ঞতো ৰুত্তত্তা পাল়িযং অনাগতেহিপি পরম্মুখা ৰদন্তস্সপি দুব্ভাসিতমেৰাতি আচরিযা ৰদন্তি ততো লামকাপত্তিযা অভাৰা, অনাপত্তিযাপেত্থ ভৰিতুং অযুত্তত্তা। সব্বসত্তাতি এত্থ ৰচনত্থৰিদূহি তিরচ্ছানাদযোপি গহিতা।
26.Dubbhāsitanti sāmaññato vuttattā pāḷiyaṃ anāgatehipi parammukhā vadantassapi dubbhāsitamevāti ācariyā vadanti tato lāmakāpattiyā abhāvā, anāpattiyāpettha bhavituṃ ayuttattā. Sabbasattāti ettha vacanatthavidūhi tiracchānādayopi gahitā.
৩৫. অনুসাসনীপুরেক্খারতায ৰা পাপগরহিতায ৰা ৰদন্তানং চিত্তস্স লহুপরিৰত্তিভাৰতো অন্তরন্তরা কোপে উপ্পন্নেপি অনাপত্তি। কাযৰিকারমত্তেনপি ওমসনসম্ভৰতো ‘‘তিসমুট্ঠানং, কাযকম্ম’’ন্তি চ ৰুত্তং। পরিৰারে পন ‘‘চতুত্থেন আপত্তিসমুট্ঠানেন…পে॰… দুব্ভাসিতং আপজ্জেয্যাতি। ন হীতি ৰত্তব্ব’’ন্তিআদিনা (পরি॰ ২৭৬) ইতরানি সমুট্ঠানানি পটিক্খিপিত্ৰা পঞ্চমস্সেৰ ৰুত্তত্তা আহ ‘‘দুব্ভাসিতাপত্তি পনেত্থ ৰাচাচিত্ততো সমুট্ঠাতী’’তি। দৰকম্যতায হি কাযৰাচাচিত্তেহি ওমসন্তস্সপি ৰাচাচিত্তমেৰ আপত্তিযা অঙ্গং হোতি, ন পন কাযো ৰিজ্জমানোপি ধম্মদেসনাপত্তি ৰিয কেৰলং কাযৰিকারেনেৰ। ওমসন্তস্স পন কিঞ্চাপি ইধ দুব্ভাসিতাপত্তিযা অনাপত্তি, অথ খো কাযকীল়াপটিক্খেপসিক্খাপদেন দুক্কটমেৰাতি দট্ঠব্বং। উপসম্পন্নং জাতিআদীহি অনঞ্ঞাপদেসেন অক্কোসনং, তস্স জাননং, অত্থপুরেক্খারতাদীনং অভাৰোতি ইমানেত্থ তীণি অঙ্গানি।
35. Anusāsanīpurekkhāratāya vā pāpagarahitāya vā vadantānaṃ cittassa lahuparivattibhāvato antarantarā kope uppannepi anāpatti. Kāyavikāramattenapi omasanasambhavato ‘‘tisamuṭṭhānaṃ, kāyakamma’’nti ca vuttaṃ. Parivāre pana ‘‘catutthena āpattisamuṭṭhānena…pe… dubbhāsitaṃ āpajjeyyāti. Na hīti vattabba’’ntiādinā (pari. 276) itarāni samuṭṭhānāni paṭikkhipitvā pañcamasseva vuttattā āha ‘‘dubbhāsitāpatti panettha vācācittato samuṭṭhātī’’ti. Davakamyatāya hi kāyavācācittehi omasantassapi vācācittameva āpattiyā aṅgaṃ hoti, na pana kāyo vijjamānopi dhammadesanāpatti viya kevalaṃ kāyavikāreneva. Omasantassa pana kiñcāpi idha dubbhāsitāpattiyā anāpatti, atha kho kāyakīḷāpaṭikkhepasikkhāpadena dukkaṭamevāti daṭṭhabbaṃ. Upasampannaṃ jātiādīhi anaññāpadesena akkosanaṃ, tassa jānanaṃ, atthapurekkhāratādīnaṃ abhāvoti imānettha tīṇi aṅgāni.
ওমসৰাদসিক্খাপদৰণ্ণনা নিট্ঠিতা।
Omasavādasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. মুসাৰাদৰগ্গো • 1. Musāvādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ২. ওমসৰাদসিক্খাপদৰণ্ণনা • 2. Omasavādasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ২. ওমসৰাদসিক্খাপদৰণ্ণনা • 2. Omasavādasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ২. ওমসৰাদসিক্খাপদৰণ্ণনা • 2. Omasavādasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২. ওমসৰাদ সিক্খাপদং • 2. Omasavāda sikkhāpadaṃ
