| Library / Tipiṭaka / ཏིཔིཊཀ • Tipiṭaka / ཝཛིརབུདྡྷི-ཊཱིཀཱ • Vajirabuddhi-ṭīkā |
༢. ཨོམསཝཱདསིཀྑཱཔདཝཎྞནཱ
2. Omasavādasikkhāpadavaṇṇanā
༡༣. ‘‘པུན ཨརེ པཏྟེཏི པུན ཏཾ ཋཱནཾ པརིཝཊྚེཏྭཱ ཨཱགཏེ ཨཉྙསྨིཾ ཨརེ’’ཏི ལིཁིཏཾ། པཏིཊྛིཏཱརཔྤདེསནྟི བྷཱུམིཾ། པུན ཨརེཏི པུན ཏསྨིཾཡེཝ ཨརེ བྷཱུམིཾ པཏྟེཏི ཨཏྠོཏི ཀེཙི, ཏཾ ན སུནྡརཾ ཝིཡ། ཛཱཔིཏོཏི པརཱཛིཏོ, ‘‘པརཱཛིཏོ’’ཏི ཝཱ པཱཋོ། པཱཔེསཱིཏི ཨབྷིབྷཝསི། མནཱཔཾ བྷཱསམཱནསྶ བྲཱཧྨཎསྶ གརུཾ བྷཱརཾ། ཨུདབྦཧཱིཏི ཨཱཀཌྜྷཱིཏི ཨཏྠོ, ཨནཱདརཏྠེ ཝཱ སཱམིཝཙནཾ། དྷནཉྩ ནཾ ཨལཱབྷེསཱིཏི ཡཐཱ སོ དྷནཾ ཨལབྷི, ཏཐཱ ཨཀཱསཱིཏི ཨདྷིཔྤཱཡོ།
13.‘‘Puna are patteti puna taṃ ṭhānaṃ parivaṭṭetvā āgate aññasmiṃ are’’ti likhitaṃ. Patiṭṭhitārappadesanti bhūmiṃ. Puna areti puna tasmiṃyeva are bhūmiṃ patteti atthoti keci, taṃ na sundaraṃ viya. Jāpitoti parājito, ‘‘parājito’’ti vā pāṭho. Pāpesīti abhibhavasi. Manāpaṃ bhāsamānassa brāhmaṇassa garuṃ bhāraṃ. Udabbahīti ākaḍḍhīti attho, anādaratthe vā sāmivacanaṃ. Dhanañca naṃ alābhesīti yathā so dhanaṃ alabhi, tathā akāsīti adhippāyo.
༡༥. པུབྦེཏི ནིདཱནེ། ཨཝཀཎྞཀནྟི ཚིནྣཀཎྞཀནཱམཾ། ཛཝཀཎྞཀནྟི ཝངྐཀཎྞཀནཱམཾ། དྷནིཊྛཀཾ དྷནཝཌྜྷཀནཱམཾ, སིརིཝཌྜྷཀནཱམཾ ཀུལཝཌྜྷཀསྶེཝ ནཱམཾ། ཏཙྪཀཀམྨནྟི ཁཎནཀམྨཀཱརཱ ཀོཊྛཀཱ, པཱསཱཎཀམྨཀཱརཱཏི ཀེཙི། ‘‘མུདྡཱཏི པབྦགཎནཱ། གཎནཱཏི མཧཱགཎནཱ’’ཏི པོརཱཎགཎྛིཔདེ ཝུཏྟཾ། ‘‘མདྷུམེཧཾ ཨོམེཧ’’ནྟི ལིཁིཏཾ། ཐཱུལཀཱཡསྶ མཾསཱུཔཙཡོཏི ཨེཀེ། ཡབྷ མེཐུནེ། ཝཱིཏརཱགཏཱདཱིཧི ཨཀྐོསནྟོཔི ཀིལེསེཧེཝ ཀིར ཨཀྐོསཏི ནཱམ, ཏཐཱ ‘‘སོཏཱཔནྣོ’’ཏི ཨཀྐོསནྟོ ཨཱཔཏྟིཡཱ ཨཀྐོསཏི ནཱམཱཏི ཨེཀེ། ལིངྒཱཡཏྟཏྟཱ ཨཙྩོདཱཏཱདིཔི ལིངྒམེཝ ཛཱཏཾ།
15.Pubbeti nidāne. Avakaṇṇakanti chinnakaṇṇakanāmaṃ. Javakaṇṇakanti vaṅkakaṇṇakanāmaṃ. Dhaniṭṭhakaṃ dhanavaḍḍhakanāmaṃ, sirivaḍḍhakanāmaṃ kulavaḍḍhakasseva nāmaṃ. Tacchakakammanti khaṇanakammakārā koṭṭhakā, pāsāṇakammakārāti keci. ‘‘Muddāti pabbagaṇanā. Gaṇanāti mahāgaṇanā’’ti porāṇagaṇṭhipade vuttaṃ. ‘‘Madhumehaṃ omeha’’nti likhitaṃ. Thūlakāyassa maṃsūpacayoti eke. Yabha methune. Vītarāgatādīhi akkosantopi kileseheva kira akkosati nāma, tathā ‘‘sotāpanno’’ti akkosanto āpattiyā akkosati nāmāti eke. Liṅgāyattattā accodātādipi liṅgameva jātaṃ.
༡༦. སབྦཏྠ ཝདེཏཱིཏི ཨུདྡེསོ། བྷཎཏཱིཏི ཝིཏྠཱརོ། ཝདེཏཱིཏི ཝཱ ཨིམིནཱ པརཝིཉྙཱཔནཾ དཱིཔེཏི།
16. Sabbattha vadetīti uddeso. Bhaṇatīti vitthāro. Vadetīti vā iminā paraviññāpanaṃ dīpeti.
༢༦. ཨཉྙཱཔདེསཝཱརེསུ པན ‘‘ཨེཝཾ ཝདེཏཱི’’ཏི ཝུཏྟཾ། ཀསྨཱ? པུབྦེ དསྶིཏཨུདྡེསཀྐམནིདསྶནཏྠཾ། པུབྦེཔི ‘‘ཧཱིནེན ཧཱིནཾ, ཧཱིནེན ཨུཀྐཊྛཾ, ཨུཀྐཊྛེན ཧཱིནཾ, ཨུཀྐཊྛེན ཨུཀྐཊྛ’’ནྟི ཛཱཏྱཱདཱིསུ ཨེཀེཀསྨིཾ ཙཏུདྷཱ ཙཏུདྷཱ དསྶིཏཨུདྡེསཀྐམསྶ ནིདསྶནཾ ‘‘ཨེཝ’’ནྟི ཨིམིནཱ ཀརོཏི། ‘‘ཧཱིནེན ཧཱིནཾ ཝདེཏཱི’’ཏི ཝུཏྟཊྛཱནེཡེཝ ཧི ‘‘ཨེཝཾ ཝདེཏཱི’’ཏི ཝུཏྟེ སོ ཨཱཀཱརོ ནིདསྶིཏོ ཧོཏཱིཏི ཨདྷིཔྤཱཡོ། ཨཉྙཐཱ ཨཉྙཱཔདེསེན སོ ཨཱཀཱརོ ན སམྦྷཝཏཱིཏི ཨཱཔཛྫཏི། ན སམྦྷཝཏི ཨེཝཱཏི ཙེ? ན, ཝིསེསཀཱརཎཱབྷཱཝཱ, ཏཏྠ ཨནཱཔཏྟིཔྤསངྒཏོ, ཨནིཡམནིདྡེསེན ཨནིཡམཏྠསམྦྷཝཏོ ཙ། ‘‘སནྟི ཨིདྷེཀཙྩེ ཙཎྜཱལཱ’’ཏིཨཱདིནཱ ཧི ཨནིཡམནིདྡེསེན ཙཎྜཱལཾ ཝཱ ཨཙཎྜཱལཾ ཝཱ སནྡྷཱཡ བྷཎནྟསྶ ཨཱཔཏྟཱིཏི ཨནིཡམཏྠོ སམྦྷཝཏཱིཏི ཨདྷིཔྤཱཡོ། ཡདི ཨེཝཾ ཨེཏྟཀམེཝ ཝཏྟབྦཾ ཏཱཝཏཱ པུབྦེ དསྶིཏཨུདྡེསཀྐམནིདསྶནསིདྡྷིཏོཏི? ན, ‘‘ཝདེཏཱི’’ཏི ཨིམིནཱ ཨཡོཛིཏེ ‘‘ཨེཝ’’ནྟི པདེ ཨིམཾ ནཱམ ཨཱཀཱརཾ དསྶེཏཱིཏི ཨནཝབོདྷཏོ། ཨཉྙཱཔདེསནཡེཔི པརཝིཉྙཱཔནེཡེཝ དུཀྐཊཔཱཙིཏྟིཡཾ ཝིཡཱཏི ནིཡམནཔཡོཛནཾ ཝཱ ‘‘ཝདེཏཱི’’ཏི པདནྟི ཝེདིཏབྦཾ། ཨཐ ཝཱ ཨཏྟནོ སམཱིཔེ ཋཏྭཱ ཨཉྙཾ བྷིཀྑུཾ ཨཱཎཱཔེནྟོ ཧཱིནེན ཧཱིནཾ ཝདེཏི བྷཎཏི, ཨཱཔཏྟི པཱཙིཏྟིཡསྶ། སཙེ སཡཾ ཧཱིནོ ཧཱིནེན ཧཱིནཾ ཙཎྜཱལཾ…པེ॰… པུཀྐུསཾ ‘‘པུཀྐུསོ’’ཏི བྷཎཏི ཨཱཔཏྟི ཝཱཙཱཡ ཝཱཙཱཡ པཱཙིཏྟིཡསྶ, ཨེས ནཡོ ཨཉྙཱཔདེསཝཱརེསུཔཱིཏི ཡོཛནཱ ཝེདིཏབྦཱ། ཨཡམཏྠོ དུཊྛདོསེསུ པརིཡེསིཏབྦོ། ཨཉྙཐཱ ‘‘ཝདེཏི བྷཎཏཱི’’ཏི ཨེཏེསཾ ཨཉྙཏརཾ ཨུབྷཡཏྠ ཨནཉྙཱཔདེསཝཱརཨཉྙཱཔདེསཝཱརེསུ, ཝིསེསེན ཝཱ ཨཉྙཱཔདེསཝཱརེསུ ནིརཏྠཀཾ ཨཱཔཛྫཏི ཝིནཱཡེཝ ཏེན ཝཙནསིལིཊྛཏཱསམྦྷཝཏོ། ཨཏྟཏོ པཱལི༹ཡཾ ཨཝུཏྟཏྟཱ པནེཏྠ ‘‘སཱཎཏྟིཀ’’ནྟི ཝུཏྟནྟི ཝེདིཏབྦཾ། ཏཏྲཱཡཾ པདསནྡྷི ཝདེཏཱིཏི ཝད ཨིཏཱིཏི། ཨསམྨུཁཱ ཝདནྟསྶ དུཀྐཊཾ ‘‘སམྨུཁཱ པན སཏྟཧིཔི ཨཱཔཏྟིཀྑནྡྷེཧི ཝདནྟསྶ དུཀྐཊ’’ནྟི ཨནྡྷཀཊྛཀཐཱཡཾ ཝུཏྟཏྟཱ། དཝཀམྱཏཱ ནཱམ ཀེལི༹, ཏཾ དསྶེཏུཾ ‘‘ཧསཱདྷིཔྤཱཡཏཱ’’ཏི ཝུཏྟཾ། ‘‘ཨསམྨུཁཱཔི དཝཀམྱཏཱཡ ཝདནྟསྶ དུབྦྷཱསིཏམེཝཱ’’ཏི ཨཱཙརིཡཱ ཝདནྟི། པཱཔགརཧིཏཱཡ ཀུཛ྄ཛྷིཏྭཱཔི ཝདནྟསྶ དུཀྐཊཾ, ཨསམྨུཁཱ ཨནཱཔཏྟཱིཏི།
26. Aññāpadesavāresu pana ‘‘evaṃ vadetī’’ti vuttaṃ. Kasmā? Pubbe dassitauddesakkamanidassanatthaṃ. Pubbepi ‘‘hīnena hīnaṃ, hīnena ukkaṭṭhaṃ, ukkaṭṭhena hīnaṃ, ukkaṭṭhena ukkaṭṭha’’nti jātyādīsu ekekasmiṃ catudhā catudhā dassitauddesakkamassa nidassanaṃ ‘‘eva’’nti iminā karoti. ‘‘Hīnena hīnaṃ vadetī’’ti vuttaṭṭhāneyeva hi ‘‘evaṃ vadetī’’ti vutte so ākāro nidassito hotīti adhippāyo. Aññathā aññāpadesena so ākāro na sambhavatīti āpajjati. Na sambhavati evāti ce? Na, visesakāraṇābhāvā, tattha anāpattippasaṅgato, aniyamaniddesena aniyamatthasambhavato ca. ‘‘Santi idhekacce caṇḍālā’’tiādinā hi aniyamaniddesena caṇḍālaṃ vā acaṇḍālaṃ vā sandhāya bhaṇantassa āpattīti aniyamattho sambhavatīti adhippāyo. Yadi evaṃ ettakameva vattabbaṃ tāvatā pubbe dassitauddesakkamanidassanasiddhitoti? Na, ‘‘vadetī’’ti iminā ayojite ‘‘eva’’nti pade imaṃ nāma ākāraṃ dassetīti anavabodhato. Aññāpadesanayepi paraviññāpaneyeva dukkaṭapācittiyaṃ viyāti niyamanapayojanaṃ vā ‘‘vadetī’’ti padanti veditabbaṃ. Atha vā attano samīpe ṭhatvā aññaṃ bhikkhuṃ āṇāpento hīnena hīnaṃ vadeti bhaṇati, āpatti pācittiyassa. Sace sayaṃ hīno hīnena hīnaṃ caṇḍālaṃ…pe… pukkusaṃ ‘‘pukkuso’’ti bhaṇati āpatti vācāya vācāya pācittiyassa, esa nayo aññāpadesavāresupīti yojanā veditabbā. Ayamattho duṭṭhadosesu pariyesitabbo. Aññathā ‘‘vadeti bhaṇatī’’ti etesaṃ aññataraṃ ubhayattha anaññāpadesavāraaññāpadesavāresu, visesena vā aññāpadesavāresu niratthakaṃ āpajjati vināyeva tena vacanasiliṭṭhatāsambhavato. Attato pāḷiyaṃ avuttattā panettha ‘‘sāṇattika’’nti vuttanti veditabbaṃ. Tatrāyaṃ padasandhi vadetīti vada itīti. Asammukhā vadantassa dukkaṭaṃ ‘‘sammukhā pana sattahipi āpattikkhandhehi vadantassa dukkaṭa’’nti andhakaṭṭhakathāyaṃ vuttattā. Davakamyatā nāma keḷi, taṃ dassetuṃ ‘‘hasādhippāyatā’’ti vuttaṃ. ‘‘Asammukhāpi davakamyatāya vadantassa dubbhāsitamevā’’ti ācariyā vadanti. Pāpagarahitāya kujjhitvāpi vadantassa dukkaṭaṃ, asammukhā anāpattīti.
ཨོམསཝཱདསིཀྑཱཔདཝཎྞནཱ ནིཊྛིཏཱ།
Omasavādasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༡. མུསཱཝཱདཝགྒོ • 1. Musāvādavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༢. ཨོམསཝཱདསིཀྑཱཔདཝཎྞནཱ • 2. Omasavādasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༢. ཨོམསཝཱདསིཀྑཱཔདཝཎྞནཱ • 2. Omasavādasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༢. ཨོམསཝཱདསིཀྑཱཔདཝཎྞནཱ • 2. Omasavādasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༢. ཨོམསཝཱད སིཀྑཱཔདཾ • 2. Omasavāda sikkhāpadaṃ
